حنين القلب ( ام عمر )

هل تعلم

2011-09-21T22:42:00.000+02:00

هل تعلم انك اصبحت كل شىء بدنياى

هل تعلم ان قلبى ينبض بأسمك وان شرايينى تضخ دمك وان عقلى لا يملك سوى التفكير بك

هلى تعلم انك اصبحت كل كيانى وانى اعيش زمانى لك وحدك حتى اسمع اسمى من شفتيك فيسرى فى دمى حبك وعشقك

ان حبى لك لا يحتاج ان تبادلنى نفس الشعور لان حبك بقلبى من ربى مجبور

فلتعلم يا حبيب قلبى ونبضه ونور عيونى ومالك روحى

انك انا وانى بدونك شئ لا يذكر

اهداء الى عمر الاسطورة
احلى من الاصل والصورة

اهداء من عاشقه الرومانسيه

2011-06-08T14:03:00.001+02:00

ليكن لكى ماتشائين

ان ترفضى قلبى او تقبلين

ان تسحقى حبى اسفل سافلين

او ترفعيه الى أعلى عليين

ولكنك احببتينى فلا تكذبين

اعترف ان كيدك صديقك الامين

وانك تستطيعى ان تمحى قلبى وتسحقين

ولكن اعترفى انك بدون حبى لا تحيين

والموت اقرب اليكى مما تتخيلين

فاذا كان كيدك هو كل ما تملكين

فان قلبى يوما سيكون اغلى ما تتمنين

**البوست ده اهداء من عاشقه الرومانسيه تعليقا على موقف خاص جدا

كفااااااااية

2011-02-02T17:07:00.000+02:00

كفاية لحد كده اوى

كفاية الايام السودة اللى فاتت علينا واحنا فى بيوتنا

مرعوبين من السرقة والنهب

كفاية الاقتصاد اللى باظ

والاسعار اللى ولعت بزيادة والبطالة اللى زادت

كفاية اللى حصل فى السجون والبلطجية اللى هربوا ومحدش عارف هربوا ازاى او مين اللى فتح ليهم السجون

كفاية الشهداء اللى ماتوا وهما بيدافعوا عن كلمة حق وقضية هما مؤمنين بيها
كفاية القنوات اللى زى ما تكون كل اللى عايزاه انها تسخنا وتحرضنا على الخراب

والاخر مظاهرتين قصاد بعض بيضربوا فى بعض دول عايزين مبارك ودول مش عايزينه

يعنى اللى عايزينه دول مش هما اللى كانوا برضه فى جمعة الغضب وهما اللى كانوا عمليين يشتموا ويقولوا عليه عميل ولا دول اللى كانوا فى البيوت بيتفرجوا

واللى مش عايزينه وعماليين يقولوا تلاتين سنه كاتم على نفسنا وقرفنا
ممكن اسئلكم سؤال
الراجل ده مش عمل اى حاجة يستاهل انكم تستحملوه الكام شهر الفاضليين ليه؟
يعنى التلاتين سنه اللى كنتوا عماليين تشكروا فيه وفى عيد ميلاده الجرنال يبقى كله تهانى ليه والرسايل على القنوات كل سنه وانت معانا يا ريس

كل ده انتهى لمجرد انكم الحمد لله صحيتم من النوم

والله العظيم انا لا مع دول ولا دول

بس عايزة اقول ليكم حاجة واحدة

اللى عايزه واللى مش عايزه فيه انتخابات جاية والراجل قال انه مش هيرشح نفسه
وحط ليكم نائب الكل بيقول عليه انه انسان محترم ومصدر ثقة خلاص بقى اختاروا اللى انتوا عايزينه فى الانتخابات وهانت يعنى الموضوع كله شهور

انما لازمته ايه المظاهرات دى كلها واللى عايز يصطاد فى الميه العكرة
والبرادعى يقول ده عميل لامريكا واسرائيل طيب لو هو عميل حضرتك تبقى ايه انت تعرف عننا ايه جاى بعد ما قضيت اغلب عمرك بره جاى تصلح لينا اللى احنا فيه

ابقى قابلنى

واللى يقول فى قناة الجزيرة مبارك الخنزير والفنانة تيسير فهمى وجوزها اللى تتصل تقول ما يغور بقى بدل ما نضربوا بالجزمة

ايه قلة الادب دى ده مهما كان رئيسنا لمدة 30 سنه
انظلمنا فيها اه
اتبهدلنا وجوعنا اه
انما يغلطوا فى رمزنا بالمنظر ده لا
حسيت ان الاهانة لينا احنا برضه

بالله عليكم ما حستوها كده ؟؟

والله ما مصدقة ان دى مصر

يا جماعه عايزين نتظاهر ماشى

عايزين تغيير واصلاح وتغير مواد فى الدستور وحل مجلس الشعب طبعا

انما عايزين نموت فى بعض وكل حد يسخنا شوية لا طبعا

ارجوكم نقف لحد هنا ونشوف بكرة هيحصل ايه

عيد ميلاد ابو الفصاد

2010-07-16T17:42:00.002+03:00

عيد ميلاد ابو الفصاد

يلا حالا بالا بالا حيوا ابو الفصاد هيكون عيد ميلاده الليله اسعد الاعياد فليحيا ابو الفصاد

طبعا الليلة عيد الليلادى عيد على رأى الست بس ده النهارده مش اى عيد ده عيد ميلاد اعز واغلى اخ لينا كلنا عيد ميلاد الجدعنه والشهامه والرجوله والسند ليه انا قبل اى حد
عيد ميلاد اللى دايما بنلاقيه سباق فى الخير ويسعى علشان يحاول يخلى كل اللى حواليه مرتاح ومبسوط وفى اى لقاء احس انه اخ بكل ما تحمل الكلمه من معنى طبعا كده مش محتاجه عروستى ولا حاجه الكل عرف مين ابو الفصاد

ايووووووووووووووووون

ابو همس وشابى

خالد همس الاحباب

كل سنه وانت بالف صحه وسلامه ويا رب دايما حوالينا ووسطينا ولا يحرمنا منك ابدا

لا البوست ده ولا مليون بوست طبعا هيوصف احساسنا بيك بس بجد اكتر شىء أسعدنى فى العالم ده انى عرفت حد زيك

خلاص دلعناك بما فيه الكفاية نرجع بقى زى الاول

طبعا بما ان ده عيد ميلادك ال95 يبقى لازم نجيبلك هدية وتكون هديه قيمه كمان تكون محتاجها جدا وانا دورت مش لقيت حاجه مناسبه ليك اكتر من ده

ايه رايك فى طقم الاسنان ده بس يا رب يجى مقاسك لحسن سنانك تطلع قصيرة زيك

هههههههههههههههههههههههههههههههه

ودى هديه عمر لحماه جزمه كعبها 25سم علشان تطول التورته

هههههههههههههههههههههههههههههه
ودى التورتات

وده الساقع

وده ودى السندوتشات علشان عارفاك تجوع بسرعه واطمن كلهم سندوتشات كبده اسكندرانى

كل سنه وانت طيب يا خالود وعقبال 12 سنه كفايه بس يا رب نستحملك لحد ما يعدوا

لازم نتعلم ازاى نحط وشنا فى الارض

2010-06-11T11:23:00.002+03:00

لما اقتل مسلم زيى زيه اخ ليا ممكن يكون صلى معايا فى يوم جمعه ممكن يكون جمعنا مكان واحد لاننا من بلد واحده لا ننا بنشرب من نيل واحد وكفايا ان فى بطاقتى وبطاقته الجنسيه مصرى يضربنى لحد الموت ليه؟ علشان سؤال وياريته كان رد عليه

طبعا الكل عارف موضوع خالد اللى اتقتل على ايد الحكومه ياترى ده شده ودن لينا كلنا علشان نتعلم ازاى نمشى نحط وشنا فى الارض ازاى مش نبص فى عينين حد او شده ودن برضه تعلمنا ازاى مندافعش لا عن ارض ولا عن عرض

قانون الطوارئ اللى خلانى فى اى وقت اتشد من قفايا واتسحل واتهد ولا يبقى ليا كرامه لا جوه ولا بره ولا سعر لدمى

الاسم قانون والقانون اساسه العدل اللى حصل لخالد ده عدل؟؟؟

لحد امتى هفضل مقهور وضعيف لحد امتى هتهان فى بلدى واسكت؟؟؟؟؟؟

فى سؤال مهم دلوقتى ياترى فى حد هياخد لى حقى ؟؟؟ ياترى دمى هيروح هدر؟؟؟ ياترى كام واحد هيحصل له اللى حصل لى ؟؟؟؟

ياترى يابلد هنفضل لامتى معدومى الكرامه نقتل فى بعض علشان نرضى الحكومه؟؟؟
ربنا يصبرك ياامى

تجمع واتجمعنا

2010-06-02T18:39:00.000+03:00

مش عارفه اقول ايه ولا ابدأ بايه بس بجد اليوم كان تحفه وروعه وطبعا مش هعرف احكى بالتفصيل زى فاتيما حبيبتى ولا بالصور الروعه زى خالود همس الاحباب بس اهه هحكى على قدى :

اليوم ابتدى بزيارتنا للقلعة وطبعا ولا لحقنا نلف علشان هما كانوا وصلوا قبلنا ولفوا واتفسحوا والشمس كانت نار وفطوم خافت على وشها رغم انك برضه اسمريتى يا طمطم وبعدين روحنا ع الزعيم وعملنا اجمل عيد ميلاد شوفته الصراحه غنى وزفه اسكندرانى واجمل تورتات لاجمل فطوم

تسلم ايدك يا مدام ناديه القدر وانا وانتى يا بت يا دودو عاشقه الرومانسيه،وطبعا كنا محتارين مين يقطع التورته ومش لقينا احسن من سى عمر اصغر مدون بينا صح ولا ايه؟؟

احتفلنا واكلنا وجه وليد هى وظروفها وفضحنا لحد ما جبنا ليه حته تورته وقعد يقول مش ليه دعوة عايز حقى فكرنى بهانى رمزى فى الفيلم هههههههههه

وبعدين روحنا ركبنا المركب ولفينا بيها وكانت اجمل ساعه فى اليوم تسلمى يا اللى اقترحتى ونفذتى طبعا دى مارو ريتشارد قلب القطة

وبعدين رجعنا اتغدينا وقعدنا شويه وروحنا على المرسى ابو العباس ركبنا المراجيح وضحكنا وفيه مننا اللى صوت واللى بقى مش عايز ينزل ،ده اليوم باختصار

كلمتين وبس

فاتيما \ ربنا يسعدك دايما باللى حواليكى ويسعداللى حواليكى بيكى ويردلك يوسف قريب باذن الله

عاشقه الرومانسية \ كلام الكون مش يعبر عن نص اللى فى قلبى ليكى وانتى عارفه غلاوتك عندى لو قولت جدعنة الدنيا واخلاق وادب والنيولوك روعه ادعلى للى عمله ههههههه

حنان ام رودينا \ بحبك والله وبحس انك اكتر من اخت وبرتاح اوى فى كلامى معاكى بحس انك فهمانى وحسانى وحته منى غاليه اوى عندى وكمان حماة ابنى وتربيه ايدها

خالد همس الاحباب\ طبعا هيكون كلام متكرر لما اقول الجدعنه والشهامه والاخلاق وخفه الدم بس الجديد بيخاااااااااف من المراجيح وقعد يقولى يا ريت كنت قلعت الجزمه قبل ما اركب علشان كنت اعرف انط من غير ما اقطعها هههههههههههه ساب كلللللل حاجه وخايفه على الجزمة اصووووووووووت منك يا خالود

ريتشارد قلب القطة \ بجد شخصيه عسل انسانه كده سكرة وخفه دم ايه وجدعنه ايه وكمان سندوتشتها حلوة اوى هههههههههه وطلعت كمان بنت منطقتى وجوزها كمان انسان اخلاق وشكله هادى يا ماور ربنا يسعدكم واولادها بسم الله ما شاء الله على الادب والاخلاق والتربية ربنا يحفظهم ليكى يا حبيبتى بجد يا ماور انا سعدت جدا انى اتعرفت عليكى واتمنى نبقى نزور بعض

نانو القدر وانا \ انسانه ذوق جدا وبنتها قمه فى الرقه بس لو تقلب من الزمالك للاهلى تبقى عسل واشرف بسم الله عسول اوى ربنا يحفظهم ليكى وكان نفسى تكملى معانا اليوم يا مدام ناديه والله

داليا ماى كورنر\ عايزة المرة الجايه اشوفك حامل انتى وعدتينى تجيبى عروسه لعمر اوووووووك

اسماء نبض اسكندرية\ طبعا مش اول مرة اشوفك يا سومه وكل مرة اشوفك بتزيدى احترام واخلاق فى نظرى بجد ربنا يوفقك يا حبيبتى واشوفك عروسه عن قريب

ضياء بيتوفل مايند \ انسان اخلاق وطيبه وقعد يلعب مع عمر كتير عقبال ما ربنا يكرمك بواحد زيه يطلع عينك

شريف باشا\ بجد انت نعم الاخ حسيت انه خايف علينا واحنا فى بلدنا وعايز يطمن علينا ويركبنا احنا الاول بجد تحس ان فيه شهامه واصاله حلوة اوى ربنا يبارك فيك ويوفقك فى المشروع بتاعك

مى رحيق الورد\ طيبه وامورة ورقيقه وعسوله جدا ربنا يوفقك يا حبيبتى وتعزمينا على فرحك قريب

حنان الشافعى\ قعدت شايله عمر وحضناه والولا يبصلها ويضحك بيعاكسك يا حنان يلا وافقى وجهزى نفسك واحنا هنيجى نتقدم علطول هههههههههه ربنا يوفقك يا حبيبتى

مصطفى ريان\ مثال للبراءة والطيبه والاخلاق بجد يا مصطفى ربنا يكرمك اهه انا مش شوهت صورتك زى ناس هههههه

وليد هى وظروفها \ تحس انه بن بلد وبيتعامل على طبيعته خالص وخلص على التورته كلها لوحده ههههههههه

انجى هات من الاخر \ ربنا ينجحك ويوفقك

بدراوى\ قعد ماسك ايد عمر اكتر من ربع ساعه لدرجه انى افتكرت انه بيقرى فاتحته هههههههههههههه ايه يا عم ايد ابنى

زهراء\ مش اتكلمت معاها كتير بس انسانه بشوشه وطيبة ربنا يسعدك ويوفقك يا حبيبتى

مين بقى كلمنا فى التليفون ريم حبيبتى رسائل بلا بريد وندى الياسمين وحشتينى وكان نفسى تكونى معانا اوى وستيته حب الله الحمش سعدت جدا انى سمعت صوتك

ناس كان نفسى يكونوا معانا

بابتى عبده الرايق وندى الياسمين وريم وبابا ابو خالد

انبسطت اوى بجد معاكم

يا رب جمعنا دايما على الحب والمودة

لقاء اسكندرية

2010-05-20T19:13:00.000+03:00

اخيرا وبعد عذاب وشوق ولهفة هشوفكم اخيرا فى اسكندرية

يوم السبت الموافق 29 مايو 2010 الساعة 10 صباحا امام باب القلعة هكون فى انتظاركم انا وعمر باشا والبت دودو عاشقة الرومانسية وكل مدونى مصر

مشتاقة انى اشوفكم كلكم وبحلم بفاتيما ام يوسف وانى ارتمى فى حضنها وكمان تشيل سى عمر شوية بدل ما هو مكفرنى فى عيشتى ومطير برج الحمام من نافوخى

من الاخر كده وحشتونى كلكم ونفسى اشوفكم فاتيما وداليا وكيارا وريم وكل بنات التدوين ،انا بحلم باليوم ده من زماااان وكماااان اليوم هيكون ليه طعم تانى معاكم وخصوصا اول مرة احضر لقاء ومعايا عمر

انا قاعدة منتظراكم على احر من الجمر

التفاصيل عند خالد همس الاحباب هنا

ربنا يخليكم ليه

2010-05-02T23:55:00.000+03:00

صوره ميرو فى السبوع

بجد مش عارفه ابدأ ازاى اولا وحشتووووووووونى كلكم والله

والف مليون شكر لكل حد سأل عنى او دعى ليه او لعمر

ربنا يخليكم ليه ولا يحرمنى منكم ابدااااااااا

طبعا اول حد اشكره اخويا الكبير وبابتى فى التدوين عبده الرايق

بجد يا روقه مش عارفة اوفيك حقك ازاى فى السؤال الدائم عنى واتصالاتك بيه علشان تطمن عليه وام محمد كمان خلصت ليك

الرصيد معلش بقى هههههههههه

انى احبك فى الله وبحب اسرتك كلها ام محمد واحمد ومحمد ومحمود واسراء حبيبتى ربنا يحفظك ليهم ويحفظهم ليك

طبعاً التانى علطول اخويا اللى دايما بحس انه سند ليه بسؤاله عنى وجدعنته وفرحته بعمر واول واحد كلمنى اول ما طلعت من

غرفه العمليات طبعا الكل عارفه خالد همس الاحباب بجد يا خالد انت نعم الاخ ربنا يبارك لزوجتك واولادك فيك انا خلاص حجزت

شابى يلا بقى علشان تجيب الشقه والعفش والمطبخ والهدوم بتاعه العرسان ونقرى الفاتحه مااااااااااااشى

واستحاله انسى حبيبتى والقلب اللى مليان حنيه علينا كلنا فطوووووووووم والله يا فاتيما تليفوناتك هونت عليه كتير خصوصا

لما كلمتينى قبل الولاده وقعدتى تطمنى فيه ربنا ما يحرمنى منك ابدا يا حبيبتى ويخليكى ليه ولميرو ويردلك يوسف يا رب ..

مستنيه اشوفك الشهر ده ماااااااااااااشى

طبعا الناس اللى اتصلوا كتير جدا وخايفه انسى حد بس ربنا يقدرنى وافتكر الكل

صبرنى يا رب\ ربنا يخليكى ليه يا حبيبتى وتعيشى وتطمنى عليه وكنتى هتفتحى بطنى من كتر الضحك ربنا ما يحرمنى منك

احمد سكر\ الراجل ده يا جدعان والله تعب معايا كل شويه يتصل انتى لسه مش ولادتى حسسنى انى حامل من سنه ونص والاخر

بيتصل من المانيا يقولى ايه عملتوا السبوع ولا لسه طبعا عملناه المهم ربنا ما يحرمنا منك يا سنكرة ابدا والسبوع بتاعك

شيلاه ليك وكمان شيله ليك 5 كيلو لحمه من العقيقه كويس كده ههههههههههه

كيارا\والله بحبك وما فيه كلام يوفقكى حقك اتصالك بيه كل يوم من اول حملى لحد دلوقتى انتى مش صاحبه يا مون انتى اختى

وحبيبتى وبنتى وحماة ابنى كويس كده فاكرة اهه هههههههههه

مين تانى اتصل بيه نوران بت خيخه واى كلام وداليا قوس قزح وسالى حاجات جوايا وريم رسائل بلا بريد وسميه عاشقه القمر

وسكرة وايناس نهر الحب وعلا صيدلانيه طالعة نازله وستيته حسب الله الحمش واسماء نبض اسكندرية

ميرو عنده شهرين

اى حد نسيته يسامحنى والله عمر عنده شهرين نسيت فيهم اسمى

فيه انسانه لو قعدت اتكلم عنها سنه عمرى ما هوفيها حقها عملت عملية مخصوص علشان تقعد معايا بعد الولاده وجت معايا

يوم الولادة وهى لسه تعبانه وكانت بعد عمليتها بيوم ومع ذلك لقيتها تحت البيت وانا نازله مع امى وجوزى لقيتها ورايا والكل

يتحايل عليها تروح ودى ابدااااا وهى اللى كانت ماسكه ايدى ومش عايزة تسبنى وانا داخله غرفه العمليات وانا شبطانه فيها

واول ما فتحت عينى لقيتها جانبى وهى اول ايد شالت عمر بجد يا دودو انتى مش اخت انتى اكتر من صاحبه واخت وشغلتها

كمان سنترال معايا البت دودو عاشقه الرومانسيه دى مزيج من الحب والاخلاق والحنيه والجدعنه والطيبه ربنا يسعدك يا

حبيبتى واشوفك عروسة يااااااااااااااااارب

ربنا يخليكم ليه يا احلى عالم عشت فيه وبيه

دعواتكم

2010-02-24T04:07:00.000+02:00

{ ربنا هب لنا من أزواجنا وذرياتنا قرة أعين واجعلنا للمتقين إماماً } دعواتكم

عيد ميلاد قمر العيله

2009-12-14T01:04:00.000+02:00

اولا كل سنه وانتم طيبين ودايما فى الفته واللحمه غرقانين ويا رب دايما مبسوطين

النهارده بقى يا جدعان فيه مناسبه مهمة جدا وقولت احتفل بيها معاكم طبعا انا عندى اغلى منكم

حد عارفها ؟؟

ايه عيد تحرير سيناء لالالا طبعا احنا فى شهر 12

نعم ايه راس السنه ايه يا عم ولا راس ولا رجل ولا قفا

زى النهارده من 27سنه الدنيا غيمت وحصل فيها زلزال بقوة

9ريختر وحصل خسوف للقمر والشمس لاول مرة معا واتولدت دودو عاشقه الرومانسية يااااااااااااااااه مش قادرة انسى اليوم ده ابدا

المهم بقى علشان اللى حصل مش بيحصل الا كل ما واحدة زيها بتتولد قولنا نحتفل بيها يا عالم منا متاكده انها مش هتكرر تانى

كل سنه وانتى طيبه يا دودو ويا رب ما يحرمنا من بعض ابدا

صحيح انتى مثال حى للرخامه والغلاسه والذكاء الخارق فهمانى طبعا

بس بجد انا محظوظة جدا انى عرفت انسانه زيك فى طيبتها وحنيتها وجدعنتها ومش انتى وبس لا وعيلتك الكريمة كمان من اول ست الكل ام دودو وام حمبوزو وحماده اخوكى بجد ربنا يبارك ليكى فيهم

بت يا دودو انتى عارفه انى جبت ليكى هديه قيمه اقول ايه هى ؟؟

ولا اقولك خلينا فى هديتك فى البوست

مش فيه احسن من كتاب الله

الجاتوه والتورته والساقع كمان اهه

ودى هديه سيدك عمر

كل سنة وانتى طيبه يا حبيبتى وربنا يديم بينا الحب والمودة

ويا رب السنه الجايه تكونى فى بيتك مع اللى يستاهلك

وارتاح منك بقى

كل عام وانتم الى الله اقرب

2009-11-26T21:25:00.000+02:00

السلام عليكم ورحمه الله وبركاته كل سنه وانتم طيبين بمناسبه عيد الاضحى المبارك ربنا يعيده علينا وعلى الامه الاسلامية بالخير يا رب بصوا بقى بما ان العيد بكرة انا عايزة من كل المدونين الاتى : 9 كيلو لحمه - 5كيلو فشه - 6 كيلو مخ ومش حد يقولى مش فيه مخ بيوزن 6 كيلو هقوله هات الجاموسه وانا هطلع منها المخ 7 كيلو مش 6 وعيديتى بقى اللى يطلع من ذمتكم المهم مش اقل من 1000جنيه ماشى علشان نكون على نور من اولها وبعدين دى عديتى وعديه عمر كمان واحتمال جوزى يقسم بينا يعنى لازم تعملوا حسابكم على كده نتكلم بجد بقى (: كل سنه وانتم كلكم بالف خير ويجعل كل ايامكم عيد ونتقابل بعد العيد على خير واسيبكم مع الاغنيه السلام عليكم ورحمه الله وبركاته

التدبيسة

2009-11-18T09:12:00.000+02:00

السلام عليكم ورحمة الله وبركاته ازيكم كلكم وحشتونى والله وعارفه انى مقصرة بس الظروف بقى المهم انى ادبست فى تاج وده طبعا من حبيبتى دودو عاشقة الرومانسيه وبقولها اى تدبيسه تانى ولا هعرفك انا هاجاوبه المرة دى علشان روحك المعنوية بس نبطل رغى بقى وندخل على التاج علطووووووول * اسمك واسم مدونتك ؟ حنين حبيت الاسم ده لانى اتعرفت بيه وسطكم ومدونتى حنين القلب *احب الايام؟ الالوان ؟ الارقام ؟ احب الايام ليه الثلاثاء لانى بحب الارقام الفرديه 9,3 والالوان الازرق والسماوى *برجك وتاريخ ميلادك؟ الميزان 24\9 اهم مميزاتك؟ واهم عيوبك ؟وما الصفة التى تتمنى ان تتوافر فيك؟ المميزات \الله اعلم اللى يعرف يبقى يقولى العيوب \يااااااااااااااااااااه لا كتير خدو عندكم عصبيه,صوتى عالى ,غيورة جداً,متسرعه احياناً,كفايه كده ولا اقول كمان والصفه اللى اتمنى تكون فيه الهدوء ما هو مكانك المفضل ؟ بيتى طبعااااااااااااااااااااااااا ايه هى هوايتك المفضلة ؟ السباحة وزمان كان القراءه وحالياً بعد الحمل النووووم ههههههههههه ما هى المقولة التى تؤمن بها ؟ اذا دعتك قدرتك على ظلم الناس فتذكر قدرت الله عليك اجمل هدية قدمت لك من مين ؟ السنه اللى فاتت جاتلى اجمل هديه فى الكون مصحف من حبيبى طبعا والسنه دى جاتلى شنطة النونو من دودو عاشقه الرومانسية دول اغلى هديتين اسعد يوم فى حياتك؟ واتعس يوم فى حياتك ؟ اسعد يوم طبعا يوم ما عرفت خبر الحمل واتعس يوم مر عليه يوم وفاة والدى موقف طريف لا ينسى من ذاكرتك ؟ لالا دول كتير بس اكتر حاجه فاكراها انى فى يوم فى عيد الاضحى وكنت لسه مخطوبة جديد وخرجت انا وهو وطبعا عروسه جديدة عامله شعرى وميك اب وطقم كده مظبط المهم روحنا القلعة وحبيت اتصور على صخرة وهو يقولى بلاش الموج عالى وانا ابدااا المهم اخيرا وافق وروحت واقفت على الصخرة وفاجأة جت موجه غرقتنى كلى من شعر راسى لحد الشوز كنت شبه الكتكوت المبلول والدنيا كانت ساقعه موت وطبعا قضيت العيد فى السرير من البرد ودى كانت اول واخر مرة اقول اتصور على صخور بس برضه بحب القلعه فيها احلى ايامى معاك ثلاث وردات لمين تهديهم ؟ واحدة لابنى وابوه وواحده للمدونين وواحده لاهلى وحبايبى معاك ثلاث رصاصات على من تطلقهم ؟ حتى لو معايه مليون رصاصة عمرى ما هفكر اطلقها على اى حد مهما كان عمل اللى هقتله بيها اكيد عمل خير فى حياته يبقى حسابه عند اللى عالم بحسانته وسيئاته ايه رايك فى الحب ؟ولمن تقول اجمل كلمة حب ؟ الحب اجمل شىء فى الوجود بس للى يستحقه واجمل كلمه بقولها ليه بحبك ووحشتنى يا حبيب قلبى هل من السهل ان تمثل الحب لشخص يحبك لعدم جرح مشاعره ؟ ممكن اعامله بلطف من غير احراج لانى مش بحب احرج حد انما امثل عليه صعب اوى لان اكيد الموضوع هيوجعه فى النهاية المرأة فى نظر الرجل ........... اكمل؟ الزوجه والام والاخت والابنه والحبيبه يعنى تعتبر كل دنيته الرجل فى نظر المرأة ........ اكمل؟ كل دنيتها الاب الصدر الحنون وقت الشدة والزوج السند اللى بنسند عليه والحبيب اللى استحاله نعيش الدنيا من غيره والابن اللى بتمناه ما هو اسعد خبر سمعته هذا العام؟ وما هو اتعس خبر؟ اسعد خبر طبعا كان حملى والحمد لله واتعس خبر لالا مش فاكرة ولا عايزة افتكر لمن تهدى التاج ؟؟ اول عشر تعليقات وكل اللى يحب يجاوبه يتفضله والله ما يغلى عليكم الحمد لله اخيرا تم بحمد الله

تم بحمد الله

2009-10-12T09:27:00.000+02:00

تم بحمد الله التجمع وكان اكتر من رائع الصراحة حسيت فيه بحب وحنان بين كل الموجودين حتى اللى كانوا اول مرة يشوفوا بعض سبحان الله ربنا جمعنا على خير والف حمد وشكر ان ربنا وفقنا فى دار الايتام وقدرنا نرسم بسمه على وشوش الاطفال انا مش هقول تفاصيل لان حبيبه قلبى فاتيما قالت كل حاجه بالتفصيل يبقى انا اكتفى بالصور ونتفرج سواااااااااااااااا

ودى كانت اول حاجه عملتها فاتيما مع الاطفال وعبارة عن اسكندريه مصغرة فيها البحر

والسماء والنجوم والبيوت وكمان الاولاد اختارو بيت وكتبوا عليه اسم الدار وكانوا

مبسوطين وهما بيلصقوا وبيعملوا بنفسهم النجوم والشوارع

ودى التاجات اللى فاتيما عملتها بنفسها معاهم واحنا كمان عملنا لنفسنا ولابسناها معاهم

ودى زهريه الورد اللى برضه عملتها فاتيما وكلنا كتبنا اسمينا على الورد

ودى شكلها بعد ما خلصت حلوة اوى صح ؟؟

والاطفال وهما بياخدوا اللعب بتاعتهم وعلى فكرة ابو تي شيرت اصفر ده اشرف ابن

م \رانيا على القدر وانا واللى وزع اللعب بنفسه وتسلم ايدك يا اشرف

بجد يا جماعه اليوم كان اكتر من رائع وناس كتير تعبت فيه اوى زى فاتيما حبيبه قلبى

وبجد يا فطوم مش عارفه اقولك ايه على حنيتك وطيبتك مع الاطفال ومعانا احنا كمان

وخالد همس الاحباب اللى بصراحه كان عامل لليوم طعم وكان محسسنا كلنا انه اخونا

اللى بنسند عليه ربنا يخليك لينا يا خالود

وداليا ماى كورنر ربنا يكرمك يا داليا وشكرا اوى ليكى على خوفك عليه

وهنوده ورقتها وضحكتها اللى تجنن مع الاطفال كنت مبسوطه اوى بيكى يا هنوده

وعلشان مش انسى حد دول كل اللى شرفونا

ع ادل البلد دى فيها حكومة و بحب السيما -سووو عجوز و عندى30 -

ضياء بيتوفل مايند - م. رانيا على القدر و انا و بنتها و ابنها-

احمد اسير الجراح -سالى حروووف و صديقتها فاطمة -

اسلام مواطن مصرى نايم- احمد سعيد عنبر العقلاء -

نهر الحب خواطرى و اشعارى

محمد اعشق فى الليل ضوء القمر و اخته فاطمة بحر الحياة-

بدراوى طعم البيوت - حنان الشافعى رياح الحنين -

احمد اسكندرانى فى الغربة- اسماء نبض اسكندرية -

انجى المهم هات من الآخر- ريم بين ضفتى عقلى -

مروة عامر لماضه

ومش هنسى طبعا اللى كلمونا فى التليفون بابتى عبده الرايق و حبيبتى كيارا عالم مولان وصبرنى يا

رب وريم رسايل بلا بريد وداليا قوس قزح بس يا خسارة مش كلمتها والغالية ام مالك الكل كان بيسئل

عنك ربنا يعافيكى يا رب

وطبعا مش هتكلم عن اللى كانت معايا فى كل حاجه حتى من قبل اللقاء لان دى مش يوفيها كلام الدنيا

البت دودو عاشقه الرومانسية احمدى ربنا يا دودو اليوم طلع احسن ما كنا بنتمنى

الحمد لله وربنا يجعله فى ميزان حسناتنا جميعا

مليون مبروك يا ابو شابى

2009-10-07T18:18:00.000+02:00

السلام عليكم ورحمه الله وبركاته

النهارده الفجر الدنيا نورت بقمر جديد قمر نور بيت ابو شابى اللى هو ابو همس ايووووووووووووووووون خالد همس الاحباب النهارده ربنا كرمه بشابى كمان بس الحمد لله مش طلعت شبه خالد ودى الحاجه الوحيده اللى طمنتنى على البونيه مهو مش همس شبهه وتطلع شابى كمان الف مليون مبروك يا ابو همس وشابى ويا رب تشوفهم عرايس ادامك وتخاويهم بعمر كمان احجز البنت دى لابنى ان شاء الله اهه الفرق بينهم مش هيكون كبير باذن الله وعلشان كمان نضربها براحتنا بقى مرات ابنى وانا حرة فيها ربنا يبارك ليك فى زوجتك وبناتك يا ابو البنات ويتربوا فى عزك اللهم أنبته نباتاً حسناً، واجعله قرة عين لوالديه واحفظه، وبارك لنا فيه واجعله من أهل الصلاح والتقوى اميييييييييييييييييييييييييييييين

اخر كلام

2009-10-02T17:12:00.000+02:00

السلام عليكم وحشتونى كووووولكم ومشتاقه انى اشوفكم على احر من الجمر البوست ده زى ما انتم شايفين العنوان اخر كلام اخر كلام عن لقاء اسكندريه الخيرى اللى هيكون يوم 10 /10 وان شاء الله يكون يوم جميل ونستمتع كلنا بيه وكمان ناخد ثواب كبير التجمع هيكون الساعه 10 صباحا امام باب الملجأ وعنوانه دار الحنان طريق مطار النزهه بجوار الامن المركزى وده رقم تليفون التجمع 0193139198 هنكون فى الملجأ لحد الساعه 1 بإذن الله وبعدها هنروح نادى المهندسين فى سابا باشا على البحر يعنى اللى هيتاخر ممكن يجى لنا على النادى مباشرتا وطلبات الملجأ فى البوست ده علشان لو مش حد شافها قبل كده والكل يقدر يشارك معانا ويكون له نصيب من الخير الكبير ده عن طريق اخونا خالد همس الاحباب فى القاهره وده رقم تليفونه 0101345140 معلش ياابو همس بنتعبك معانا بس انت قدها ان شاء الله وفى انتظار اى استفسار منكم ربنا يجعل مشاركتنا كلنا فى ميزان حسناتنا يارب

كل سنه وحبيبه قلبى طيبه

2009-09-28T17:58:00.000+02:00

السلام عليكم ورحمه الله وبركاته

من اول ما اتعرفت عليكى وانا حاسه انك حته منى زى اختى الصغيرة او زى بنتى اللى اتمنى

اشوفها زيك وبحس ان فيكى منى طبعا منتى نفس البرج ونفس الشهر

طبعا مهما اوصفك مش هعرف اوصف براءتك واخلاقك وتربيتك العالية والله بجد انتى نعم الاخلاق والتربية

وطبعا لازم نحتفل بعيد ميلادك لانه يعتبر عيد قومى

ودى احسن تورته لاجمل قلب

ودى هديتك كمان اهه ولو بايدى كنت جيت لحد عندك والله وجبتها ليكى

كل سنه وانتى طيبه يا حبيبتى ويا رب السنه الجايه اشوفك اجمل عروسة فى الكون

ويحقق ليكى كل ما بتتمنى

شكر وتقدير

2009-09-25T09:23:00.000+02:00

السلام عليكم ورحمه الله وبركاته بجد مش عارفه اكتب اقول ايه ؟ اقول عمرى ما تخيلت الحب ده كله والحنان ده حتى من اللى مش شوفتهم اقول ربنا يخليكم ليه ولا يحرمنى من حضنكم ابداااااااااا امبارح كان عيد ميلادى ودى بجد سنه وعددت من عمرى بس عدى فيها حاجات كتير اوى حلوة وعرفت فيها ناس احلى وحصلى فيها اللى كنت بتمناه وهو حملى الف حمد وشكر الف حمد وشكر علشان ربنا عرفنى بناس بجد كلها اخلاص وحب واحساس وقلوب صافيه الف حمد وشكر علشان ربنا عوض صبرى ورزقنى باللى اتمناه الف حمد وشكر لله على كل شىء بجد يا جدعان شكرا ليكم كلكم طبعا شكر خاص للى لو قعدت عمرى كله اتكلم عنه مش اوفيه ولو جزء صغير من حقه خالد همس الاحباب عارف يا خالد بجد مش لاقيه كلام اوصفك بيه لو قولت الرجوله والجدعنه والشهامه والاخلاق هتبقى حاجه مش جديده عليك لان كل الناس تعرفك كده انما انا بجد لو هوصفك هقول اخ بكل ما تحمله الكلمه من معنى ربنا ما يحرمنى منك ويخليك لعيلتك يا ابو همس ويخليك لينا يا اكبر قلب صادفته فى دنيتى كلها وشكر خااااااااااااااااااااص للبت دودو عاشقه الرومانسيه والله العظيم البت دى يا جدعان جدعنة الدنيا فيها وطيبه الدنيا وحنيتها كمان بجد يا دودو اللى عملتيه معايا امبارح مش حد عمله ربنا يسعدك زى ما اسعدينى ويخليكى ليه يااااااااااااااا رب ولا يحرمنا من بعض ابدااااااااااااا وشكر خاص كمان لكيارا وبجد يا بت يا كيكى مش عارفه اقول ايه فى طيبتك وحنيك وبراءتك يا رب يحقق ليكى كل اللى بتتمنيه ويسعدك واشوفك بالفستان الابيض مش عايزين الوان عايزن فرح علطووووول وشكر خاص كمان للاستاذ حماده اسير الغربة بجد يا حماده الف شكر على التهنئه وحلو اوى سرير النونو بس مش شايفه صغنن حبتين انا عايزاه مترونص فى مترين يعنى لو حبيت انام جنب ابنى اروح انام فى الشارع وحبيه قلبى صبرنى يا رب وتورتتها الجميله ربنا ما يحرمنى منك ابدااااااااا ويخلى ليكى اولادك يا صبرنى وشكر لكل اللى قالى كل سنه وانتى طيبه وافتكرنى وربنا ما يحرمنى منكم ابداااااااااااااااااااااا وكل سنه وانا وسطكم وانتوا حواليا بتنورو ليه دنيتى

اخر الاخبار

2009-09-17T20:27:00.000+02:00

السلام عليكم ورحمه الله وبركاته كل سنه وانتم طيبين ويا رب السنه الجايه نكون كلنا ربنا حقق لينا احلامنا وامانينا ندخل فى الموضوع علطول طبعا احنا قولنا ان باذن الله فى اللقاء بتاعنا فيه زيارة لدار الايتام واحنا روحنا فعلا وجبنا متطلبات الدار وعدد الاطفال هناك مش كبير 13طفل من سن 3ل6 سنين وفيه كمان طفل عمره 9شهور ودى متطلبات الدار: اداوات نظافة ********* *شامبو جونسون \ ديتول \شاور جونسون \صابون جونسون \زيت جونسون \لوشن جونسون \بودرة بيبى جونسون \ليف حمام \ليف عادى \بيرسول \صابون وجه \فنيك \ مناديل مواد غذائية ******** * لبن نيدو \بسكويت \لحمه مفرومه \أرز \سمن حلوب \زيت \فراخ \بقسماط \زبادى \فاكهه \سكر \صلصه أدوية ***** * سرنجات 3سم \ اوجمنين شراب \ بارامول شراب \ ريكتوبلكسيل شراب \ ريكتو بلكسيل لبوس \ سيتافلون مطهر \ساين أب \ ميجافين \ كيناكومب مرهم \ شاش \ قطن \ميكوفللين شراب \ سيتال مطهر \ فينادروبس نقط \ درمازين حروق \ أكوافيرا \ رينوستوب \ موتينورم شراب \ موتينورم لبوس دى كل الطلبات بس رجاء يا جماعه اللى هيجيب صنف من اى حاجه يقول علشان مش كلنا نجيب نفس الاصناف ونسيب حاجات تانية والدار كمان بيقبل التبرعات النقديه وربنا يتقبل منا ومنكم صالح الاعمال ويجعلها فى ميزان حسناتكم

لقاء سكندرى تدوينى خيرى

2009-09-11T13:50:00.000+02:00

بصوا بقى ياجماعه الموضوع اننا انا والبت دودو فى لحظه تجلى كده كنا ناويين نروح ملجأ للايتام

يعنى احنا مش لينا نفس نعمل خير زيكم ولا ايه؟

بس للامانه الموضوع ده من قبل رمضان وفكرنا انه يكون لقاء تدوينى

يعنى من ناحيه ناخد ثواب ومن ناحيه تانيه نشوف بعض

ولان وقت رمضان ضيق

ولان العيد بعد رمضان على طول (اضافه هايله الحقيقه) صح؟

ولان بعد العيد مدارس

وعلشان كللل الحاجات دى

اجلنا اليوم ... امتى بقى ياحنونه؟

ده سؤال وجيه (مين وجيه ده)... اقولكم

الميعاد هيكون يوم السبت الموافق 10/10

حد من الجماهير يقولى ما تخليه فى العيد

ارد عليه واقوله الناس اللى هتيجى من سفر

والاعياد بتبقى بهدله واحنا جايبين الناس نضايفهم مش نبهدلهم

حد تانى من صفوف الجماهير الغفيره هيقولى واشمعنى اليوم ده يا حنونه

اقوله بالعقل كده ياابنى هتكون الناس ارتاحت من دوشه العيد والمدارس

ويجوا لنا بقى على رواقه ويكونوا رتبوا امورهم

طيب يطلع واحد تانى يسئلنى هنتقابل امتى وازاى

هاقوله يوم 10/10 الساعه 10 صباحا

اليوم كله عشرات اهو علشان محدش ينسى

ولانى ديمقراطيه واحب الاسئله تكون كتير واحب اجاوبها هيجى حد يسئلنى

هنعمل ايه بقى فى اليوم بتاعنا ده؟ هارد واقول

هانتجمع ونروح كلنا على ملجأ ايتام نقعد معاهم شويه وناخد حسنات كتيييير

ونروح بعد كده على كافيتريا سيد درويش فى بحرى على البحر مباشرتا

ونقعد نتعرف ونتكلم مع بعض

ويجينى سؤال تااانى بيقول

مين الصُحبه ؟ ياحنونه دى اهم حاجه

طبعااااااا معانا فاتيما روح قلب المدونين كلهم

ومعانا الراعى الرسمى للقاء فى القاهره خالد همس الاحباب ابو همس الجدع قوى

ومعانا دودو عاشقه الرومانسيه صديقتى الغاليه

ومعانا عادل مدونه البلد دى فيها حكومه

وكيارا عالم مولان ان شاء الله هتيجى برضه

والاستاذ هانى مدونه نط فى الكوز باذن الله هيجى

ومعانا باذن الله ناس كتييييير هيكونوا مفاجئه اللقاء

ومش هانعلن عنهم الا لما يدونا الموافقه الاخيره

وطبعا فى انتظار كل الناس الحلوه دى

حنين القلب و دودو عاشقه الرومانسيه

وقبل اللقاء بشويه هانروح الملجأ ونعرفوا لكم كلللل التفاصيل

ونعمل اعلان نهائى تاااااااااانى

وحشتووووونى ونفسى اشوفكم نفر نفررررررر

رمضان كريم

2009-08-21T12:18:00.000+02:00

السلام عليكم ورحمه الله وبركاته كل سنه وانت طيبين ورمضان كريم ويا رب السنه الجايه يحقق للمسلمين كلهم احلامهم بصوا بقى انا كنت بتفرج على برنامج راجع ليك يا رب اللى بيقدمه الشيخ حازم شومان وقال على افضل المشاريع اللى تتعمل فى شهر الصوم

وقولت انشرها وربنا يقوينا ونعمل بيها وعلى فكرة البوست طويل انا قولت من الاول اهه نبدأ بسم الله

* هل تريد أن تحمي نفسك من عطش 50.000 سنة يوم القيامة ؟؟ عندما تصوم يوما في رمضان فإنك تصوم 14 ساعة أي =50000 ثانية تقريبًا فهل تتخيل أن صوم 50000 ثانية في رمضان يقيك عطش 50000 سنة يوم القيامة ؟؟؟ أي ان الثانية الواحدة في رمضان بسنة كاملة من سنوات الحر والعطش يوم القيامة !!!!! * أخي الحبيب ... إذا فاتك رمضان ....لن يعوض ... ألا يكفي كل رمضان ضاع في حياتك من قبل ...إذا وقعت فقم ... لا تيأس ... اجعله كأنه آخر رمضان في حياتك واشحذ عزمك وانطلق معنا في هذه المشاريع قدر وسعك:

مشروع كيف تربح المليار في 30 يوم :

· هل تعلم أن حسنات ختمة قرآن واحدة في الأيام العادية = 3,3 مليون حسنة إذا تقبلها الله – سبحانه وتعالى - ( أي تمحو 3,3 مليون سيئة ( ... ومضاعفة الحسنات في رمضان جعلت ثواب العمرة في رمضان = ثواب الحج مع رسول الله !! ... · فما بالك بثواب ختمة القرآن في رمضان ؟؟؟ مئات الملايين من الحسنات بين يديك فهل ستضيعها ثم تندم على الحسنة الواحدة يوم الفزع الأكبر ؟ هكذا رصيدك أعلى من رصيد أصحاب شركات المحمول والملتي ناشيونال جروبز !!

مشروع ضربة البدء : · اجعل بداية الشهر هي أقوى مافي الشهر كله ..فور بداية أول ليلة في رمضان .. اشحذ عزمك وصمم أن تكون هذه الليلة هي ليلة العتق من النار ... من أول ليلة بإذن الله ..وكل ليلة فور الإفطار اعزم أن تكون هذه الليلة هي ليلة العتق من النار ...( إن لله تبارك وتعالى عتقاء في كل يوم وليلة ( صححه الألباني ..أمامك 60 فرصة للعتق من النار في كل يوم فرصة وفي كل ليلة فرصة ... يعني في رمضان :- إذا صحت ليلة واحدة .....انقاذ لمصيرك كله ... إذا صح يوم واحد ..... إنقاذ لمصيرك كله .

** مشروع رمضان غيرني ( مشروع التحضير للتراويح

· قم بتحضير الجزء الذي ستسمعه ليلا في صلاة التراويح بقراءته بعد العصر بتدبر وخشوع .. وسترى الفارق الكبير في خشوعك في التراويح (هكذا أنت تسير في ختمتين معا .. ختمة سماع في التراويح و ختمة تلاوة بعد العصر ) ... وإن استطعت أن تقرأ في تفسير هذا الجزء أو تسمع شريطاً في تفسيره لنلت ختمة نَدَرَ ... من يطبقها اليوم !!! ... وهي ختمة المدارسة .... وهكذا حقا ...... يأتي التغيير في رمضان ...( متوسط تفسير الجزء في تفسير السعدي 29 صفحة فقط للجزء الواحد )

** مشروع مفاتيح خزائن الله

· هل تعلم أن لك في رمضان 60 دعوة مستجابة يعنى أن 60 مشكلة من مشاكل حياتك يمكن أن تحل , 60حلمًا من أحلام حياتك يمكن أن يتحقق ...(ولكل مسلم في كل يوم وليلة دعوة مستجابة ) صححه الألباني ...لو أن أغنى أغنياء العالم أعطاك 60 شيك على بياض – كيف يكون فرحك ؟_ولله المثل الأعلى_ الله أعطاك 60 دعوة مستجابة لكل يوم وليلة · غير حياتك في نصف ساعة : ( احتفظ بكتيب دعاء في جيبك واقرأ فيه بتضرع كل يوم ولا تضيع مفاتيح خزائن الله في حياتك )

** مشروع حج مع رسول الله –صلى الله عليه وسلم-:

( عمرة في رمضان كحجة معي ( لا يوجد عمل يجعلك مع رسول الله كالصحابة مثل عمرة في رمضان ** مشروع زيادة الأرزاق وتوسيعها : عندك مشكلة في الرزق ؟؟ تريد وظيفة مجزية ؟؟ تريدين زوجًا ؟؟ تريدين ذرية وأولاد ؟؟ تريد زوجة ؟؟؟ (من أراد أن يبسط له في رزقه وينسأ له في أثره فليصل رحمه )...لاتنسى عزومة على الإفطار لرحمك وجيرانك .

** مشروع 30 قصر في الجنة :

ليس 30 قصرًا في الساحل الشمالى أو سواحل هاواي أو نيس الفرنسية...بل في الجنة ...حافظ كل يوم على 12 ركعة سنة رواتب ( 2 قبل الفجر/ 4 قبل الظهر و 2 بعده / 2 بعد المغرب / 2 بعد العشاء(
** مشروع 7 حجات يومياً في رمضان

5 حجات : هل تعلم أنك إذا سمعت الأذان فقمت فوراً فتوضأت وانطلقت فوراً إلى المسجد فصليت فيه الفريضة لك ثواب حجة ( من خرج من بيته متطهرا إلى صلاة مكتوبة فأجره أجر الحاج المحرم)صححه الألباني .. ((وللنساء نفس الأجر في منزلها إن شاء الله إذا صحت نيتها بطاعة الله ورسوله بالقرار في البيت وهي راضيه )

· حجة أخرى : ( من صلى صلاة الغداة "أي الفجر" في جماعة ثم جلس يذكر الله حتى تطلع الشمس ثم قام فصلى ركعتين انقلب بأجر حجة وعمرة ) صححه الألباني ...... جلسة الضحى وحدها تفوز بسببها بأجر 30 حجة وعمرة في رمضان . · حجة أخرى ..صح عن رسول الله ص أن حضور درس علم له أجر حجة ...صلى التراويح في مسجد فيه كلمة بين الركعات فهي تقوم مقام درس العلم بإذن الله.... هل هناك عاقل يضيع سبع حجات يومياً !!!

** مشروع ليلة العمر :

ليلة القدر 12 ساعة خير من ألف شهر ... أي خير من 720.000ساعة أي ( 3/4 مليون ساعة ) ... إذا ساعة فيها أفضل من 60.000 ساعة ... آية القرآن فيها أعلى من 60.000 آية والركعة فيها أعلى من 60.000 ركعة و تفطير صائم فيها أعلى من 60.000 تفطير صائم في غيرها ...حقا ..( من حرم خيرها فهو المحروم ) حديث صحيح ... إنها حقاً ليلة العمر ... فطر فيها الصائمين … وصل رحمك ولو بالهاتف .... وصالح كل من بينك وبينه مشاحنة ولو بالهاتف ... واقرأ القرآن … وصلى فيها حتى تتفطر قدماك كرسول الله ص ومن أفضل العبادات فيها أن تعفوعن كل من ظلمك ... وسل الله العفو فإن الجزاء من جنس العمل ( اللهم انك عفو تحب العفو فاعفو عنا )

دى كانت بعض المشاريع اللى عرضها الشيخ حازم شومان واللى طبعها واتنشرت على موقع الطريق اللى الله

واللى اتمنى اننا نستفيد منها

كل سنه وانتم اللى الله اقرب

منقول من موقع الطريق الى الله

الف حمد وشكر لله

2009-07-22T09:57:00.000+03:00

تحديث ********* الف مليون مبروك لحبيبة قلبى دودو عاشقة الرومانسية على الخطوبة السعيدة وعقبال الليلة الكبيرة يا قمر

*****************

اولا طبعا الف مليون حمد وشكر لله كنت حاسه ان حلمى بعيد اوى عنى ومحتاج منى صبر وفلوس فوق طاقتى وكنت خايفه يعدى عمرى وانا بصبر وبحوش لعمليه بعد عمليه ويا عالم تنجح ولا تكون زى اللى قبلها وتعبت من اللف على الدكاترة اللى كان اخرهم دكتور ربنا يكرمه وكان صريح جدا قالى مستحيل يحصل انجاب طبيعى ولازم عمليه حقن مجهرى وانا قولت الحمد لله لسه فيه امل اشوف ليه طفل حتى لو الامل ضعيف بس المهم انه موجود المهم بقى انى اخدت كلام الدكتور ده بس كان جوايا يقين ان ربنا هيكرمنى سواء بعمليه او من غير عمليه المهم ان املى فى ربنا كبير وايمانى بيه اكبر والشهر ده اكتر شهر واظبت فيه على الصلاه والفجر بالذات وبقيت ادعى كتير

ربى لا تذرنى فردا وانت خير الوارثين

يا رب مش تحرمنى من نعمتك بالذريه الصالحه المهم يا جدعان مطولش عليكم من اسبوع حسيت انى تعبانه ومغص وحاجات كده غريبه عليه جوزى قالى يمكن يكون لغبطى فى الاكل قولت ليه لالالا انا باكل كتير اه انما من غير لغبطه ههههههههههههههههههههههههههه قالى طيب قبل ما تاخدى اى علاج نروح نعمل تحليل حمل الاول يمكن ؟؟ قولت ليه لا انا متعقده من موضوع التحاليل دى وكرهت كلمه سالب اللى بتطلع كل مرة والبت دودو عاشقه الرومانسيه برضه قالت ليه تعالى نروح سوا نعمله التحاليل وكنت عماله آجل التحليل علشان صدمتى اللى كل مرة باخدها وهى هى نفس الكلمه ..للاسف يا مدام مش فيه حمل المهم جوزى صمم انه ياخدنى وفعلا روحنا المعمل والبت وهى بتاخد منى الدم بقولها والنبى اتاكدى بس انه مش فيه حمل علشان اروح اخد علاج للمغص ده وقعدت بره وانا بصبر نفسى واقنع نفسى ان النتيجه هتكون زى كل مرة بعمل فيها تحليل من سبع سنين والممرضه ندهت عليه ودخلت ومتوقعه تقولى للاسف مش فيه ويادوب لسه بتقولى انتى وكنت بدير وشى وهمشى ولقيتها بتقول مبروك انتى حاااااااااااااااااااااااااااااااامل انا طبعا مش عارفه تنحت والدموع عماله تنزل منى واللى طالع عليه بالله عليكى طيب اتاكدى والنبى بجد انا حامل يا اشرررررررف الحق بتقول حامل الف حمد وشكر لله ونزلت بوس فى الممرضه لدرجه انها عيطت هى كمان واشرف عيط وكل اللى فى المعمل ويشوفنى يعيط وروحت على ماما وقعدت تعيط واهل اشرف طبعا يحضنوا فيه ويعيطوا الظاهر ان ده يوم العياط العالمى بس بجد فرحتى مش كان ليها حدود احساسى ان ربنا حاسس بيه وواقف جانبى احساس جميل احساسى ان دايما فيه اكبر من كلام الدكاترة وهى اراده الله ويقينى بالله احساس اجمل انا بدعى لكل انسان لسه ربنا مش كرمه ولازم يصلى ويكتر من الدعاء وياخد بالاسباب اه انما يكون متاكد ان الفرج والزرق من عند الله وحده وشكرا خالص لكل اللى كانوا واقفين جانبى اليوم ده و البت دودو عاشقه الرومانسيه اللى جت عند حماتى اول ما عرفت وحسيت فى عنيها بفرحه بجد عمرى ما هنساها وبقولك بجد يا دودو انتى اجدع صاحبه وربنا يخليكى ليه وشكرا كمان للى كان كان متابعنى بالموبيل وفرح ليه زى اخته وحسيت ده طبعا من صوته لانه الجدعنه والشهامه والرجوله مش غريبه عنه طبعا هو خالود همس الاحباب وعقبال ما تخاوى همس يا احن ابو همس فى الدنيا وطبعا شكرا خاااااااااص لبابتى اللى والله العظيم بحس انه اخويا الكبير ومش عايزة اقول بابا علشان مش اكبرك يا روقه واللى اول ما قولت ليه حسيت ان الدموع نازله من عنيه والله العظيم يا بابتى حسيت بيك كانى شيفاك وصبرنى يا رب وفاتيما ومفروسه وكل اللى بارك ليه على الاميل او موبيل ربنا يخليكم ليه ولا يحرمنى منكم ابدا انا والله بحبكم كلكم فى الله وبالله عليكم ادعولى ربنا يتمم نعمته عليه ويفرحنى ببنوته شبه القمر دى ومش حد يقولى هتطلع حلوة كده لمين

عيد ميلاد ابو الفصاد

2009-07-16T13:32:00.000+03:00

كل سنه وانت طيب ومن قلوبنا قريب والسنه دى معانا والجاى ويانا

طبعا يا جماعه ده عيد ميلاد

اغلى واجدع واحن واطيب اخ عرفته مش فى عالم التدوين بس لالا والله فى الكون كله

بجد انت شخصيه هايله ساعات بحس انك مش من دنيتنا دى وساعات بحس انك جيتها غلط

لان جدعنتك وشهامتك وصفائك ونقائك بجد بقى نادرين جدا فى هذا العالم

طبعا كده كلكم عرفتوه

ايييييييييييييييييوة

خالد همس الاحباب

كل سنه وانت طيب

كل سنه وانت منور لينا هذا العالم

كل سنه وانت اجدع واطيب ابو همس فى الكون يلا بقى نعمل العيد ميلاد

يلا حالن بالن بالن حيوا ابو الفصاد هيكون عيد ميلاده الليله اسعد الاعياد فليحيا ابو الفصاد

كان يوم ازرق يوم ما جيت شوفت معزتك يا خالود مش رضيت اقول كان يوم اسود خليته ازرق

ههههههههههههههههههههه

طبعا اقيم هديه واجمل هديه كتاب الله يحفظك دايما

خد بقى هديتك التانيه وعلى فكرة التمن جنبها علشان ترجعه ليه

انا هدفع 10جنيه بس والباقى عليك مش انت اللى هتلبسها

وكمان التورتات والسندوشتات عليه وبمنا سبه السندوشتات

اهديلك اغنيه ويعوض الله يعوض الله يعوض الله

الحساب عليك يا خالود ولا يعوض الله

بصوا بقى تاكلوا الاول سندوتشات المصقعه وبعدين التورته

اهى التورته والساقع كمان والف هنا وشفا

والنهارده عاملين حفله صغنونه كده هنا علشان خاطر خالود واللى بيحبنا مش يضرب نار فى عيد ميلادنا

علشان صاحب عيد الميلاد لما بيتخض بيقصر وهو مش ناقص

الحفله هتكون الساعه 7 بالظبط واللى هيجى بايده فاضيه مش هدخله

كل سنه وانت طيب يا خالود وعقبال مليون سنه يا ابو همس

ممكن اساعدك ؟؟

2009-07-02T17:12:00.000+03:00

السلام عليكم ورحمه الله وبركاته

ممكن اساعدك؟؟

كلمه بقت تقيله على لسانا رغم اننا اكتر ناس محتاجين ليها

بتقولها وانت من جواك كلك رحمه وحب للانسان اللى عايز تقدم ليه المساعده

وفى نفس الوقت بتقوله ساعدنى انى اخد ثواب بمساعدتك

مش شرط نقولها لحد نعرفه

لو لقيت راجل كبير مش قادر يمشى ساعده ومش تقول متاخر عن الشغل

لو لقيت طفل شايل حاجه تقيله ساعده ومش تقول انا تعبان ومش قادر

لو لقيت قطه او كلب اسقيه ولو معاك اكل اكله ومش تقول هو انا لاقى اكل نفسى ولا عيالى

يا جماعه الرحمه

ارحموا من فى الارض يرحمكم من فى السماء

دى الست اللى حبست قطه لحد ما ماتت دخلت النار

والراجل اللى سقى كلب دخل الجنه

فما بالك انت انك بتساعد انسان من لحم ودم وكمان بيدعى ليك

ما يمكن تكون انت محتاج منه دعوته اكتر ما يكون هو محتاج مساعدتك

فيه واحد اسمه عم جابر عمره 80سنه وعنده سرطان فى المعدة

عم جابر عنده 5اولاد كلهم كبرهم وعلمهم وجوزهم ودلوقتى ولا حد بيخبط على بابه

الراجل بيقول بفرح اوى لما الباب يخبط حتى لو بتاع النور او الميه

ولو حد دخل قعد معايا 5دقايق بيحسسنى انى عايش وموجود

الراجل مش طالب مساعده غير الرحمه من الوحده اللى بيحس فيها انه بيموت مليون مرة

دور على قريبك

على جارك

على طفل يتم

فكر ازاى تساعد مش شرط فلوس او مجهود زياده عليك

ساعد باللى تقدر عليه ولو حتى انك تسئل عليه

وربنا عالم انك بتعمل كده لوجهه تعالى ولا رياء ولا نفاق يبقى اكيد هيساعدك ويقف جانبك

ويجعله فى ميزان حسناتك

عقبال عندكم

2009-06-19T20:18:00.000+03:00

واقروا الفاتحه لابو العباس يا اسكندريه يا احسن ناس

والفاتحه التانيه لسيدى ياقوت واللى يعدينا يطق يموت

والفاتحه التالته لابو الدردار واللى يعدينا يولع نار

يا جدعان الزفه الاسكندرانى دى لاختى وحبيبة قلبى دودو عاشقه الرومانسية بمناسبه قراية الفاتحه

اللى لسه مقريه من نص ساعه وبقول ليها الف مليون مبروك وعقبال الليله الكبيرة

حبيبتى انا اختارت ليكى فستان الخطوبه

وجبت كمان التورته اللى هتقطعيها انتى وابو احمدات

ودى بقى هديتى انا يا رب تعجبك

ربنا يسعدك ويوفقك ويكرمك ويبارك ليكى فيه ويبارك ليه فيكى

وعقبال الفرح ياااااااااا رب

مصرى بدون جنسيه

2009-06-14T17:05:00.000+03:00

السلام عليكم ورحمه الله وبركاته اولا انا ولا بفهم فى سياسه ولا غيره بس فيه حاجه كده استفزتنى امبارح كنت بتفرج على برنامج الحقيقه بتاع وائل الابراشى المهم يا جدعان ايه بقى المشكله ان المحكمة العليا اصدرت قرار بسحب الجنسيه المصريه من اى مصرى متجوز من اسرائيلية وده طبعا حفاظا على الامن القومى وعلى البلد وعلى حاجات كتير كده مش فاهمها طيب حاجه بقى حارقه دمى يعنى هو الاسرائليين اللى ماليين البلد والمشاريع اللى بقت كلها اجنبيه والغاز اللى بيتصدر بنص تمنه ليهم والعام اللى بيتخصخص وطبعا احنا غلابه ومش معانا نشترى مين بقى اللى بيشترى مين اللى بقى مالك اكتر من نص البلد سياحه واستثمار وغيره وغيره كلللللللللل ده عادى ومعاهده سلام بينا والجواز هو اللى لا وغلط ومش ينفع ولازم تنسحب منهم الجنسيه ومش يسمح ليهم بدخول البلد لانهم متجوزين من عرب 48 واولادهم كمان بقوا معاهم الجنسيه الاسرائيلية والراجل بتاع مجلس الشعب اللى اسمه البدرشينى ده مستفذ اصلا يقول للمصرى اللى بيكلم من اسرائيل دى مصلحه الدوله العليا يقوم المصرى يقوله والتطبيع منتوا ليل ونهار فاتحين ليهم الاحضان والبلد بلدكم ودلوقتى فيه سلام ومش عارفه ايه يقوله الدولة موافقه على التطبيع بس الشعب المصرى مش موافق وهو انتوا اصلا بتسمعوا كلمه للشعب المصرى بصوا بقى انا مش مع دول ولا دول بس يا نعيش عيشه فل يا نموت احنا الكل يعنى يا نقفل التعامل معاهم نهائى زى دول ما عملت كده مع انى عارفه ومتاكده اننا مش هنقدر علشان المعاهده يا اما يبقى تطبيع من كله والجواز كمان من ضمن انا مش عارفه اذا كان الكلام ده صح ولا ايه ؟؟؟ بس دى وجهه نظرى ومستنيه اسمع وجهه نظركم

من مفيش ؟؟

2009-06-06T18:30:00.000+03:00

كل حاجه بتبداء من مفيش كلمه عاديه جدا سمعتها فى فيلم الانسان يعيش مرة واحده بس وقفت عندها كتير اوى فعلا اى شىء بيبداء من مفيش اى اتنين بيحبوا بعض او بيكرهوا بعض لو دوروا على سبب لحبهم او لكرههم هيلاقوا البدايه مفيش اللى بيقتل مراته وبيلاقيها بتخونه مع صاحبه لو فكر فى بدايه الحكايه برضه مفيش اللى بيموت فى لحظه وهو بيزنى او بيشرب مخدارت او ....او...... او.... لو دور على كل ده عمله ليه وكانت بدايته ايه برضه هيلاقى الاجابه من مفيش بس السؤال هنا ايه اللى بيخلى الحاجه اللى من مفيش دى تبقى مهمه اوى فى حياتنا يعنى مثلا اللى بتحب واحد ويتهىء ليها انه دنيتها كلها مع انه ممكن يكون حبهم ده غلط والافضل انها تبعد عنه بس برضه تقول لالالالالا مستحيل هقدر او اللى يكون بيخون مراته ويزنى مع غيرها تيجى تقوله طيب ليه يا عم ده الموضوع اسهل بكتير اقفل الحكايه دى يقولك لالالالالالالا ازاى مقدرش او اللى بيسرق ويقتل علشان 50جنيه لو فكر فى لحظه انه الحكايه ابسط من انه يقتل علشانها وممكن تعدى بس رده لالالالالالالالالا واسيب حقى ليه دنا اخده من حباب عنيه يا جماعه القتل والسرقه والزنا والحب والكره دى كلها حاجات ممكن تحصل فى لحظه وتحصل من مفيش مش الحل اننا نقول ده الشيطان هو اللى بيوسوس لينا وهو السبب ان النفس لامارة بالسوء احنا برضه علينا جزء كبير جدا من الشر اللى بيحصل الحل اننا نرجع لربنا الحل اننا نجاهد نفسنا الحل اننا نتمسك بحبل الله جميعا وربنا يقوينا على نفسنا وعلى وسوسة الشياطين

حتى الاعضاء اتسرقت !!!

2009-05-20T18:40:00.001+03:00

السلام عليكم ورحمه الله وبركاته

اسمعوا معايا اللى حصل

وده حصل بجد وبحق وحقيقى مش تأليف والله .

فى محل ملابس فى بوكلى واللى مش يعرفها دى قريبه من رشدى واحده ست دخلت تشترى طقم ودخلت تقيسه فى البروفه وجوزها كان معاها مستنيها قدام المحل

اكتر من ساعه وجوزها مستنى وهى مش رجعت دخل يسئل عليها فى المحل صاحب المحل واللى شغالين فيه اكدوا ليه ان مراته خرجت من المحل من بدرى رد جوزها ازاى انا مش شوفتها يعنى راحت فين ؟؟؟

وروح جوزها وفضل منتظر مراته مش رجعت

راح بلغ البوليس قالوله لازم يمر24ساعه على اختفائها علشان تقدر تعمل بلاغ

الراجل فضل يدور عليها والاخر وبعد ما طلعت روحه عملوا ليه البلاغ وجوزها اكد انها مش خرجت من المحل

راحوا وفتشوا المحل ومش لاقين حاجه

وفجأة!!!!؟؟؟؟

وهما بيفتشوا فى البروفه لقوا ان فيها زرار تحت شماعه الهدوم يضغط عليه ينزل زى الاسانسير فى سرداب ولقوا تحت جثه الست مرات الراجل مدفونه ومتاخد منها كل اعضائها ومعاها كمان جثتين برضه متاخدين اعضائهم

طبعا المحل اتشمع وخدوا كل اللى فى المحل وبيحققوا معاهم

بس فيه اسئله هتجننى

اولاً\ مين الدكاترة اللى بيعملوا العمليات دى مهو مش معقول جايبين ناس من المدبح اكيد دول دكاترة ومتخصصين كمان ؟؟؟

ثانياً\ ازاى بتتنقل وتتباع وتشترى وتدخل مستشفيات والناس اللى بتتنقل ليهم الاعضاء دى مش بيسألوا منين ليه ؟؟

ثالثاً\ والاهم فين الضمير فين الخوف من ربنا

ليه اللى بيعمل كده مش يبص لبنته او مراته او امه او اخته انها ممكن يتعمل معاها كده واكتر من كده كمان

المهم يا بنات حوا

اننا ناخد بالنا والاحسن اننا مش نقيس هدوم بره الاول كانوا بيصورو الاعضا ء دلوقتى بيسرقوها واحسن من كل ده اننا مش نشترى هدوم هيحصل ايه يعنى ؟؟

خلاص مش فيه امان فى اى مكان يبقى احنا اللى نأمن نفسنا

وربنا يستر علينا

عيد ميلاد قمر التدوين

2009-05-14T16:21:00.000+03:00

النهاردة فرحى يا جدعان لا مش دى النهاردة عيد ميلاد حبيتى وروح قلبى من جوه فاتيما ام يوسف اللى عاوزة اقولها حبيبتى يا اطيب واحن واكبر قلب قابلته فى التدوين كل سنه وانتى حبيبتى كل سنه انتى فى حضن يوسف ولا يحرمكوا من بعض ابدا ويجمعكم على خير وبهذه المناسبة السعيدة الكل معزوم على التورتة

حبيبتى كل سنة وانتى طيبة وعقبال مليون سنة يا روح قلبى

ادم وحواء

2009-05-06T17:59:00.000+03:00

انا وانت كما ادم وحواء

خلق كل منا للاخر فأنا اتنفس هواك وأرى بعيونك أنظر حولى فلا اجد غيرك

وليس لحنان قلبك ودفء مشاعرك ولا للمسة يديك التى احس فيها بأمان الدنيا

احبك......

لانك مليكى ومالكى

ومستحيل ان اجد غيرك فى الكون او تجد غيرى

فهل السبب انى احبك ؟؟

لانك كل البشر فى عينى ؟؟

أم لانك ملكت كل قلبى وكيانى

كلا ....

انا احبك

لانك حبيبى

وستظل حبيبى حتى أموت

سامحونى

2009-04-25T22:45:00.000+03:00

السلام عليكم ورحمه الله وبركاته اسفه جدا لعدم متابعتى لكم فى الوقت الماضى واسفه كمان لانى مضطرة ابعد شويه عنكم ارجو منكم الدعاء لى اشوف وشكم بخير

خالص التعازى

2009-04-19T18:50:00.000+02:00

بسم الله الرحمن الرحيم كل نفس ذائقة الموت صدق الله العظيم توفت الى رحمه الله تعالى جدة الاخ العزيز خالد همس الاحباب اللهم اسكنها فسيح جناته والهم اهلها الصبر والسلوان

الحمام افضل من الشارع

2009-03-30T19:41:00.000+02:00

السلام عليكم ورحمه الله وبركاته ازيكم وحشتونى جدا وندخل علطول فى الموضوع علشان انا دمى محروق الصراحه

المكان \ حمام عادى خالص فى احدى شوارع اسكندريه الزمان \ من سنة تقريباً الحدث\ هى دى المصيبه بقى

اللى حصل يا جماعه ان فيه راجل الدنيا ضاقت بيه وكان متجوز وعنده بنت والبنت ماتت لانه مش كان معاه يجيب ليها علاج المهم ايجار البيت مش قادر يدفعه قام الراجل صاحب البيت الله يعمر بيته طرده من البيت الراجل باع العفش واداين تقولولى مش بيشتغل ليه ؟؟؟

اقولكم بيشتغل بس على قد حاله يعنى يوميته خمستاشر جنيه هيعمل بيهم ايه ؟؟

ياكل بيهم هو مراته والطفل اللى لسه مولود ولا يدفع نور وميه وايجار ده غير العلاج مش مهم ليهم على الاقل للمولود علشان مش يحصل اخته اللى ماتت

المهم الراجل بقى فى الشارع هو ومراته وابنه طيب يعمل ايه ؟؟ دخل حمام فى الشارع وهنا جت ليه الفكرة

ممكن؟؟ ليه لا ؟؟

يعنى هعمل ايه ولا هيعملوا فيه ايه اكتر من كده ؟؟؟

الراجل راح اشترى طبله باب وركبها واستنى لما الناس اللى فى الحمام خرجوا وراح مركبها وقفل على نفسه هو مراته وجاب كرسيين انتريه وسرير صغير حطه فى طرقه الحمام وقال مش طاااااااااالع من هنا الا على جثتى هعيش فين الواد هيموت من برد الشارع ومراتى بقيت اخاف عليها لما يجى الليل ومش عارف استرها من عيون اللى رايح واللى جاى وانا اسودت الدنيا فى عينى يا اما يسيبوا لينا الحمام ده ومش اظن من قله الحمامات فى الشوارع يعنى ده مش هياثر معاهم واما يجيوا يعدمونا ويريحونا

الطريف يا جماعه فى الموضوع ده

ان لما بيكلموا رئيس حى وسط والمسئول عن الموضوع ده رفض يتكلم ولا ينطق حتى وقال للسكرتير كلمتين قولهم (لا تعليق)

يا نهار مش فايت لالالالالا تعليق

اومال هتعلق امتى وهنقدر نعمل حاجه امتى بكرة نلاقى اللى بيسكن فى المساجد والطرقات والجناين والمقابر

بقينا نسكن حمامات الشوارع

يا ترى بكرة هنسكن فين ؟؟؟؟

واخرتها معاكم ايه ؟؟؟؟

تصدقوا وحشتونى

2009-03-25T07:56:00.000+02:00

السلام عليكم

امبارح كان يوم روووعه وطبعا بغظيكم

ليه بقى ؟؟؟؟

علشان امبارح كان تجمع المدونين فى اسكندريه ودى طبعا فرصه استحاله اضيعها

واليكم الاخبار بالتفصيل (مش بعرف احكى كويس مااااشى):

الساعه 11 ادام نادى الاطباء واول واحده شوفتها وعينى وقعت عليها حبيبه قلبى اللى رايحه مخصوص علشانها ايووووووووووون فاتيما صاحبه مدونه روح قلب ماما وبعدين شوفت خالد همس الاحباب واللى مش عارفه جه ليه اصلا بس يلا اهه نورنا وشوفت كمان هنوده صاحبه مدونه غربة فى اجازة واللى اللقاء كله كان على شرفها وشيماء صاحبه مدونه اعترفات قلب وهشام صاحب مدونة جعلونى مريضاً نفسياً دول اول ناس شوفتهم وبعدين جت العسوله الصغننه دكتورة مروة صاحبه مدونة لماضه وبعد كده دخلنا نادى الاطباء وجت دكتورة داليا صاحبة مدونة كورنور وجت اسماء صاحبه مدونه نبض اسكندريه وسالى صاحبه مدونه الحروف وعاشقه الرومانسية وحنان الشافعى صاحبة مدونه رياح الحنين واحمد صاحب مدونة اسير الجراح

دول اللى اتشرفت بيهم وكنت مبسوطه اوى وانا وسطهم

اتكلمنا فى حاجات كتير وكل واحد قال دخل التدوين ازاى وبقاله قد ايه واسماء نبض اسكندريه اقدم واحده فينا وبتقول انها جديده والصراحه حسيت انها قريبه منى وانى اعرفها من زمان وهى كمان قالت انها شافتنى قبل كده بس مش عارفه فين

فاتيما بجد مبسوطه انى شوفتك اوى وقعدت اتكلمت معاكى براحتى وكان نفسى والله اكمل معاكم اليوم بس الدكتور بقى ان شاء الله المرة الجايه هقعد معاكى لاخر اليوم

هنوده السكرة بجد دمها عسل وعليها ضحكه تحس فيها ببراءة الاطفال وحنينه وطيبه وحسيت انها قريبه اوى منى ومش غريبه عنى بجد هتوحشينى وتسافرى وترجعى لينا تانى بالف مليون سلامه

وعاشقه الرومانسيه اللى حسيت انها طيبه اوى وجدعه بجد ويا عينى الكاكاو وقع على هدومها والعقد بتاعها اتقطع وكانت يا عينى لابسه ابيض بقى ابيض فى كاكاوى معلش يا حبيبتى

ولماضه العسوله حسيت انى اول مرة اقعد معها رغم انى شوفتها قبل كده بس المرة دى قعدنا مع بعض اكتر وبجد حسيت انها شخصيه لذيذه وصريحه وطيبه

وسالى البنت دى سكرة دمها عسل وحنان الشافعى كانت هاديه اوى ومش عرفت اتكلم معاها كتير وداليا كان نفسى اقعد اتكلم معاها اكتر

وداليا قوس قزح وعبده الرايق كلمونا فى التليفون وبجد يا دوللى كان نفسى اوى تكونى معانا فرحتى كانت هتكمل بوجودك وانت يا روقه مش هتنازل انك تكون معانا المرة الجايه

ومش عرفت اتكلم مع هشام ولا احمد بس سعدت جدا انى اتعرفت بيكم بجد محترمين وعلى خلق وربنا يوفقكم

وطبعا خالد همس الاحباب ومش هقول عنه حاجه لانكم اغلبكم عارفينه

طول عمرك رمز للجدعنه والرجوله والشهامه يا محمد ابو سويلم وبجد فرحت انى شوفتك اوى بس عارف لو كنت مش جيت كان اكيد هيبقى اليوم احلى بكتير

تصدقوا والله كلكم وحشتونى اوى من امبارح

يا ترى هشوفكم تانى امتى ؟؟؟

كل سنة وانتى طيبه يا مامتى

2009-03-21T21:05:00.000+02:00

" الجنه تحت اقدام الامهات"

كل سنة وانتى طيبه يا امى

كل سنه وكل ام على وجه الارض طيبه

كل سنه وكل عين سهرت وكل ايد طبطبت وكل قلب حب وادى حنيه

كل سنه وانتى جانبى بتراعينى وبدعواتك بتقوينى

كل سنه وانا بكبر وخوفك عليه بيكبر

ربنا يخليكى ليه يا امى يا رمز الحنيه

ويا رب السنه الجايه اكون من ضمن الامهات

قولوا

امييييييييييييييييييييييييييييين

وانا ذنبى ايه ؟؟

2009-03-09T22:26:00.000+02:00

فى يوم وهى ماشيه لقت طفله عمرها اقل من 5 سنين واخدتها ربتها وبعدين امها لقيتها وقالت للست دى ربيها ولان الاب والام كانوا منفصلين الاب قرر انه يتنازل عن البنت للست اللى لقيتها وطبعا الام ولا فيه حاجه مهمه عندها ولا بنتها ولا غيره لا وكمان لما لقيت الست بتربى بنتها كويس اديت ليها بنتين كمان يتربوا مع اختهم راحت اتجوزت وفتحت بيت تانى ولا خافت على بناتها ولا قبلها وجعها عليهم وقدرت تنام وتعيش واولادها بعيد عن حضنها ونسيتهم وبعد ما البنت الكبيرة بقى عندها 16 سنه والتانيه 14والثالثه 11سنه

اخيرا الام اللى هى اسم مش على مسمى ولا تعرف يعنى ايه أمومه والقطط اللى فى الشارع ارحم على اولادها منها بطالب بالبنات

بطالب ان الام اللى ربت وكبرت وعملت تتعدم وبمنتهى اللامبالاه بتقول ليها مين قال ليكى ربى وعلمى وكبرى !!

ذنبها ايه الست اللى كبرت وربت وشافت بناتها ادام عينها بيكبروا لحظه بلحظها انها مرة واحده تتحرم منهم انا اللى اعرفه ان الام اللى تفهم معنى ضنى مش تفرط فيه ولا تسيبه لست تانيه تربيه حتى لو هتشيله فى عنيها

عايزة افهم حاجه

الام مين؟؟؟؟

اللى ربت وكبرت وعاشت معاهم فرحت اول خطوه واول كلمه ماما منهم واول حضن وشافتهم بعنيها بيكبروا ادامها

علمت وكبرت وصرفت طبعا رغم ان هنا الموضوع مش مادى هو معنوى للست دى بس برده مش فيه حد بيتعلم ببلاش ولا ذنبها انها اشتغلت وعاشت علشانهم ودخلت مدارس والعيال بقوا ادام عينها سنه وراه سنه نجاح وفرحه ودنيا هما اللى ملينها عليها

ولا اللى سابت ابوهم يعمل عنهم تنازل لا وبدافع منتهى البجاحه بتقول ده مش تنازل ده بصفه امانه على اساس انها كانت سايبه تلاجه عند الست مش سايبه حته من قلبها المفروض تموت مليون مرة فى بعدهم عنها وراحت واتجوزت ونسيتهم

وطبعا هنا القانون صريح ان الحضانه للام الاصليه

الام اللى اقل ما يقال عنها انها انسانه من غير قلب ولا تنفع تكون ام من اساسه

والست اللى بتموت فى فراق البنات عنها لانهم وجعنها اكتر من امهم الاصليه المفروض نقولها شكرا اوى وانتى كده عملتى اللى عليكى وزياده واتفضلى روحى موتى من القهر على فراقهم

يا جماعه الست ولا عندها اطفال ولا عندها حد يسئل عنها ولا ليها امل فى الدنيا الا البنات دى ولا طالبه حاجه اكتر من انها تشوفهم وتطمن عليهم بعد ما امهم خدتهم بالعافيه

والمصيبه كمان انها حرمت البنت من دخول امتحان الاعداديه

انا مش وجعنى غير دموع الست وهى بتقول حسبنا الله ونعم الوكيل هى الام اللى تولد وترمى ولا اللى تسهر وتراعى وتكبر

بالله عليكم اى فيهم الام؟؟؟

غياااب

2009-02-18T20:04:00.000+02:00

السلام عليكم ...

وحشتووووونى قوى قوى

واسفة جدا لانقطاعى الفترة الماضية عن متابعتكم

بس ده غصب عنى كله بسبب المحروق النت

واحتمال اغيب فترة كمااان لحد ما يرجع تاااااااانى

هتوحشونى ... واعذرونى

خالص التعازى

2009-02-01T14:57:00.000+02:00

بسم الله الرحمن الرحيم

كل نفس ذائقة الموت

صدق الله العظيم

خالص التعازى القلبية للاخت الحبيبة نوران الشاملى ( بت خيخة واى كلام ) فى وفاة المغفور له باذن الله والدها الكريم

اللهم اسكنه فسيح جناتك

والهم اهله الصبر والسلوان

والبقاء لله

الحياه بقى لونها ابيض

2009-01-19T06:21:00.000+02:00

السلام عليكم ورحمه الله وبركاته وحشتونى موت والله اولاً انا بعتذر عن تقصيرى وعدم متابعتى ليكم فى الوقت اللى فات بس ده غصب عنى والله انا هحكى لكم اللى حصل يوم الاربع 7\1 ده كان اصلا اجازة رسمى ولاننا شركه عليها اقبال قرروا اننا نشتغل اليوم ده وفعلا روحت شغلى واليوم كان تمام وعادى لحد الساعه 1 ونص لقيت خير اللهم اجعله خير غطا الماتور وقع على رجلى وطبعا بقيت عماله اعيط وخدونى المستشفى وغمضت عينى وفتحتها الا والاقى خير يا رب فيه حاجه ادامى بيضا وبما انى كان جوزى جه واصحابى حواليا ندهت جوزى هو ايه الابيض ده قالى زغردتى انتى اتجبستى وطبعا لان رجلى كانت مرفوعه مش حسيت بمعنى الكلمه اوى لان دى اول مرة اتجبس فى حياتى بس قولت الحمد لله وخلاص المصيبه بقى لما الدكتور قال خلاص ممكن تروح بس رجلها مش تدوس عليها نهائى وقومت من على السرير وبنزل والاقى حاجه بتقع على الارض يا ربنا ايه الدكتور اللى عنده ضمير ده ده مش جبسها بس ده عمل فيها خرصانه حديد وجبس اسمنت وكان فاضل يركب ورق الحائط بس انا اللى استعجلت بجد يا جدعان الجبس ده تقيل جدا وخنقه المهم بقى انى مش عارفه امشى نهائى وخرجت من المستشفى جوزى شايلنى وانا حاطه العرجه المكسورة لالالالا قصدى السليمه على المكسورة وهو يا عينى حيله اتهد روحت البيت وكل ما احب اروح فى حته انده جوزى حواش شلنى يا حواش وحواش قصدى اشرف يا عينى يشيل من سكات ودى مش جدعنه بس غصب عنه هجيب ونش فى الشقه مثلا يشلنى المهم انا كويسه جدا والحمدلله والموضوع مش كسر ولا حاجه هو مجرد تمزق فى الاربطه انا بجد عايزة اشكر كل اللى سالوا عليه واتصلوا بيه وهما خالد همس الاحباب \وبجد يا خالد انت اكتر من اخ والجدعنه والشهامه مش غريبه عليك بس مش هان عليك تجيب ليه 2 كيلو لحمه ارمم بيهم العضم اللى اتكسر عبده الرايق \والله ما عارفه اشكرك ازاى ولا اقولك ايه ؟؟ بس يا روقه انت نعم الاخ وبجد كنت بسعد جدا لما اسرتك الكريمه بتكلمنى وتطمن عليه وسلملى على احمد ومحمود ومحمد واسراء ومامتهم ربنا يبارك ليك فيهم ويخليك ليه صبرنى يا رب \ صبرنى حبيبه قلبى الف شكر على سؤالك الدائم عنى وربنا مايحرمنى منك ولا طيبتك دى ابدا وخفى شويه على حبيبه قلبى رحمه البت مش قدك واحده مفروسه \شكرا يا مفروسه على سؤالك وربنا يكرمك ويخليكى داليا قوس قزح \ ربنا يكرمك يا دوللى وشكرا على اهتمامك بيه وبوسيلى نور واخص بالشكر واحده حست ان فيه حاجه وانى موجوعه من غير ما تعرف عنى اى حاجه احب اقولها عينى دمعت لما لقيتك بتقولى قلبى وكلنى عليكى ومش عارفه مالك ربنا يخليكى ليه يا ام قلب اصفى من اللبن ولا يحرمنى من حنيه قلبك وحبك ليه دى يا جماعه حبيبه قلبى ورحى ( فاتيما روح قلب ماما) والله ما تعرفى تعليقك ده عمل فيه ايه بس حسيت انك معايا وشيفانى يمكن مش بعنيكى انما بقلبك فطوم انا بحبك اوى والله وربنا يرجعلك يوسف ويفرحك بيه الف شكر ليكم كلكم والله انا بحبكم فى الله بس خلاص كان معكم حنين المجبسه اللى هترمم قريب

بخصوص الايميلات .. منقول من رئيس جمهورية نفسه

2009-01-03T18:00:00.000+02:00

بخصوص موضوع الايميلات اولا فى فيديو قصير نازل على مدونات نوارة نجم واابى بلانت دة مطلوب نشرة بكافة الطرق منتديات اجنبية اصدقاء اجانب وممكن يتبعت على قائمة الايميلات الموجودة فى بوست ابى القديم وقائمة الايميلات اللى حضيفها اخر البوست ثانيا: فى دعوة للتبرع بالدم وزيارة مصابى غزة فى مستشفى الهلال الاحمر اللى فى رمسيس العنوان والتفاصيل كلها موجودة فى البلوجات دى بنت خيخه واى كلام وقوس قزح واوتار وكمان فى قائمة من الاحتيجات الطبية عند نوارة نجم ياريت تتطلعوا عليها علشان لو حد حيقدر يوفر اى حاجه منها ثالثا: فى جروب على الفيس بوك باسم صوت غزة اتعمل لنشر الفكرة ياريت اللى مهتم يسجل هناك ويبعت دعوات لكل قائمة الاصقاء عندة لنشر الفكرة فى اوسع نطاق ممكن ثالثا : دى ايميلات جديدة ممكن نستغلها فى ارسال البوست القديم مرة تانى والفيديو الموجود عند اابى بلانت ونوارة نجم وعلى فكرة الايميلات دى اسهل لانى كل المطلوب انكم تعملوا كوبى وباست لكل مجموعه منهم سواء كان الارسال للبوست او الفيديو

hrwnyc@hrw.org, berlin@hrw.org, hrwbe@hrw.org, chicago@hrw.org, hrwgva@hrw.org, hrwuk@hrw.org, hrwlasb@hrw.org, paris@hrw.org, hrwsf@hrw.org, toronto@hrw.org, hrwdc@hrw.org, hrwnyc@hrw.org; berlin@hrw.org; hrwbe@hrw.org; chicago@hrw.org; hrwgva@hrw.org; hrwuk@hrw.org; hrwlasb@hrw.org; paris@hrw.org; hrwsf@hrw.org; toronto@hrw.org; hrwdc@hrw.org, publisher@nytimes.com;president@nytimes.com;executive-editor@nytimes.com;managing-editor@nytimes.com;foreign@nytimes.com, ombudsman@washpost.com;foreign@washpost.com;ceo-carolinelittle@wpni.com, stletters@telegraph.co.uk;dtletters@telegraph.co.uk;telegrapheditorial@telegraph.co.uk;newlook@telegraph.co.uk;weeklytelegraphsubs@telegraph.co.uk, online.editor@timesonline.co.uk;news@timesonline.co.uk;foreign.news@thetimes.co.uk;newsrev@sunday-times.co.uk;newsdesk@sunday-times.co.uk;foreigndesk@sunday-times.co.uk, customercare@gazette.com;announcements@gazette.com, masson@lemonde.fr, mailto:publisher@nytimes.com;president@nytimes.com;executive-editor@nytimes.com;managing-editor@nytimes.com;foreign@nytimes.com;ombudsman@washpost.com;foreign@washpost.com,ceo-carolinelittle@wpni.com;stletters@telegraph.co.uk;dtletters@telegraph.co.uk;telegrapheditorial@telegraph.co.uk;newlook@telegraph.co.uk;weeklytelegraphsubs@telegraph.co.uk;online.editor@timesonline.co.uk;news@timesonline.co.uk;foreign.news@thetimes.co.uk;newsrev@sunday-times.co.uk;newsdesk@sunday-times.co.uk;foreigndesk@sunday-times.co.uk;customercare@gazette.com;announcements@gazette.com;masson@lemonde.fr, ahramdaily@ahram.org.eg, http://www.harakamasreya.org/, al.ahaly@yahoo.com, Dostor.eg@gmail.com, Dostor_eg@yahoo.com, ibrahimman@gmail.com, kerbek@hotmail.com, ragaa66@hotmail.com, abeersoliman@gmail.com, abeersoliman@gmail.com, walid_taher@yahoo.com, dostourmail@yahoo.com, yehiarakhawy@yahoo.com, bothainakamel@hotmail.com, koddosi@hotmail.com, zakisalem@myway.com, emad.abughazi@gmail.com, edawoud61@hotmail.com, t_rdwan@yahoo.com, eme55@hotmail.com, naglabedeir@hotmail.com, Mohamedal3zab@gmail.com, ahmedtawab@gmail.com, aktowfik@hotmail.com, fhoweidy@gmail.com, dr.nabil@ragolalmosta7eel.com, Kandel2002@hotmail.com, ayman@freeaymannour.org, elbadeel@elbadeel.net, Galal_Amer@hotmail.com, opinion@elbadeel.net, hamdeensabahy@hotmail.com, Amin_eskander@hotmail.com, Kamal.arafa@hotmail.com, Kamal.arafa@hotmail.com, Mashhad6666@hotmail.com, alkaheraalyoum@orbit.net, al3ashera@dreams.tv, mostafabak@hotmail.com, watani@watani.com.eg, nabdelsalam@dailystaregypt.com, webmaster@mena.org.eg, info@alwafd.org, waelabrashy@yahoo.com, elhaea@dreams.tv, bothainakamel@hotmail.com, 90min@elmehwar.tv, salahmont@ahram.org.eg, saad.mashakel@gmail.com, hewar@bbc.co.uk, dostor_eg@yahoo.com; dostor.eg@gmail.com; ibrahimman@gmail.com; kerbek@hotmail.com; ragaa66@hotmail.com; abeersoliman@gmail.com; walid_taher@yahoo.com; kh_kassab@yahoo.com; dostourmail@yahoo.com; yehiarakhawy@yahoo.com; bothainakamel@hotmail.com;koddosi@hotmail.com; zakisalem@myway.com; emad.abughazi@gmail.com; edawoud61@hotmail.com; t_rdwan@yahoo.com; eme55@hotmail.com; naglabedeir@hotmail.com; mohamedal3zab@gmail.com; ahmedtawab@gmail.com; aktowfik@hotmail.com; fhoweidy@gmail.com; dr.nabil@ragolalmosta7eel.com; kandel2002@hotmail.com; ayman@freeaymannour.org; hamdeensabahy@hotmail.com;amin_eskander@hotmail.com;kamal.arafa@hotmail.com; mashhad6666@hotmail.com; alkaheraalyoum@orbit.net; al3ashera@dreams.tv; mostafabak@hotmail.com; 90min@elmehwar.tv; salahmont@ahram.org.eg; saad.mashakel@gmail.com; hewar@bbc.co.uk; watani@watani.com.eg; nabdelsalam@dailystaregypt.com; webmaster@mena.org.eg; info@alwafd.org; elhaea@dreams.tv; waelabrashy@yahoo.com, hrwnyc@hrw.org; berlin@hrw.org; hrwbe@hrw.org; chicago@hrw.org; hrwgva@hrw.org; hrwuk@hrw.org; hrwlasb@hrw.org; paris@hrw.org; hrwsf@hrw.org; toronto@hrw.org; hrwdc@hrw.org; publisher@nytimes.com; president@nytimes.com; executive-editor@nytimes.com; managing-editor@nytimes.com; foreign@nytimes.com; ombudsman@washpost.com; foreign@washpost.com; ceo-carolinelittle@wpni.com; stletters@telegraph.co.uk;dtletters@telegraph.co.uk;telegrapheditorial@telegraph.co.uk; newlook@telegraph.co.uk; weeklytelegraphsubs@telegraph.co.uk; customercare@gazette.com; announcements@gazette.com;online.editor@timesonline.co.uk; news@timesonline.co.uk; foreign.news@thetimes.co.uk; newsrev@sunday-times.co.uk; newsdesk@sunday-times.co.uk; foreigndesk@sunday-times.co.uk; masson@lemonde.fr

سنه جديده

2008-12-28T05:27:00.001+02:00

كل سنه وانتم طيبين

بمناسبه العام الهجرى والميلادى كمان

ويا رب السنه الجايه تكون احسن من اللى فاتت

واتمنى من الله ان السنه الجايه تكون بلدنا احسن

وتكون فلسطين اترحمت من الحرب اللى فيها والناس اللى بتموت وتترمى على الارض من غير عدد ومش لاقيين حد يقف جنبهم ولا حد يقول كفايه حرب ودمار وظلم وافتراه

بحلم بسنة جديده فيها خير وحب بين كل البشر

يا رب حقق حلمى

كل عام وانتم بخير

تضامنا مع مدونى تونس

2008-12-25T08:42:00.000+02:00

التدوينة البيضاء

هلال العيد

2008-12-12T06:01:00.000+02:00

هل هلال العيد على الاسلام سعيد كل سنه وانتى كلكم طيبين و فى اتم صحه واحسن حال دايما يارب وهذا العالم دايما متجمعين انا ادبست يا جدعان فى التاج ده وللعلم انى اول مرة اجاوب على تاج لانى اصلا مش بحب اجاوبه بس جالى من اتنين مستحيل اقولهم لا خالد همس الاحباب وبقوله شكرا يا ابو همس على التدبيسه وصبرنى يا رب وماااااااشى يا ام مريم لينا قعده مع بعض ده التاااااج ماذا يمثل لك العيد؟ العيد على راى صفاء ابو السعود فرحه وعلى راى محمد سعد العيد فرحه ماااااااااء واكيد انا مش هعرف اكتر منهم يبقى العيد فرحه وما أكثر شئ يبهجك في مظاهر العيد ؟ تكبيرات العيد وفرحه الاطفال فى الشارع اوصف لنا طقوسك في العيد .. من ليلة العيد لآخر يوم ؟ زى كل الستات بروق البيت وانضفه واشغل التليفزيون على اخره على اغنيه هل هلال العيد وبعدين اروح اصلى وارجع اجهز الفطار اللى بكون طبخاه من ليله الوقفه افطر وبعدين نروح لحماتى وبعدين لامى وبس احكى لنا اطرف موقف حصلك فى العيد ؟ مرة كنا فى العيد وكان عندى وقتها 13سنه وقولنا نروح نتفسح طبعا روحنا حديقه الحيوان زى العيال وطلعت السلالم ولسه هدخل ولقيت نفسى واقعه تحت رجلين الناس وطبعا الدنيا زحمه جدا وكنت هموت مش من الناس اللى بدوس عليه لالالا من ريحه الشربات تخيلوا عيد والناس عماله تلف من الصبح والاخر يدوسوا عليه انا بس الحمد لله جت سليمه بتحرص على تهنئه الاهل والاقارب والاصدقاء فى العيد ...ولا مش بتهتم ؟ طبعا لازم اهنى الكل والغريب قبل القريب واجيب التليفون وابعت لكل اصحابى والغاليين عندى رسايل واقعد بقى ارخم عليهم واصحيهم فى العيد من الساعه 5 الفجر طبعا لازم يصلوا واللى مش هيصلى برضه هصحيه رخااااامه هههههههههههههههههه مين اول حد تزوره او تكلمه فى التليفون\الموبايل علشان تهنيه بالعيد؟؟ اول حد بزوره حماتى وده طبعا مش بمزاجى ده غصب واقتدار واول حد اكلمه فى التليفون اقرب حد لقلبى من اصحابى ايه الفرق بين العيد الحالى...والعيد ايام الطفوله ؟ الفرق كبير جدا زمان كنا اطفال ومش عندنا مسئوليه ولا حاجه تعكر صفو العيد كنا بنجرى ونتفسح ونلعب ولا فى دماغنا حاجه انما دلوقتى صعب اوى لما الواحد يحس انه فى عيد مشاكل الحياه والشغل والبيت بس الحمد لله انا بحس بالعيد علشان الاجازة ههههههههههههه كلمنا عن ذكرياتك في العيد تفتكر الحياة من غير عيد .. هتفرق كتير؟؟ بابا الله يرحمه كان هو اللى علطول يعمل لينا فطار العيد وده طبعا مزاج عنده ورغم انه يقعد يشخط ويزعق ونقعد نقول مش عايزين نفطر يا عم الحج حقك علينا وهو ابدااا بس بجد العيد معاه كان ليه طعم تانى الله يرحمه طبعا كانت هتفرق كتير العيد مهما كبرنا كل واحد بيشوف فرحته فيه وبعدين دى حاجه ربانى ازاى بقى مش تفرق وكنا هناكل لحمه كتييييييير ازاى لو مش كان فيه عيد إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟ اجمل رساله جاتلى بتقول: شعور مليان حب وحنان اهديه لاغلى واعز انسان واهنيه بعيد الاضحى واقوله كمان كل عام وانتى بخير وامان ...وحشتينى ودى كانت من اغلى حد عندى صحبتى رشا وبقولها ربنا يحفظك ويخليكى ليه ولا يحرمنى منك ابدا يا حبيبه قلبى لسه بتاخد عيدية ؟؟ من مين ؟؟ وبتديها لمين ؟ لغايه السنه اللى فاتت كنت باخد عديتى من بابا الله يرحمه ومن يوم ما اتجوزت باخد عديه من جوزى وبديها لاخواتى ايه رايك فى التاج ؟؟ جميل اوى بجد ويسلم ايد كل اللى كاتبه وجاوبه وبعته ليه تحب تمرره لمين من المدونين ؟ اذكر على الأقل 10 يا ربنااااا 10 طيب آبى بتناجى وخرفانها فاتيما حبيبه قلبى واحده مفروسه احمد سكر فشكول داليا قوس قزح سوووو عجوز وعندى 30 سنه مها زين هى فوضى نهر الحب خلاص كده ؟؟ طيب الحمد لله كل سنه وانتم بخير وعيد سعبد على الامه الاسلاميه جميعا

عيد سعيد

2008-12-06T14:48:00.000+02:00

السلام عليكم وحشتووونى قوى وجاية النهاردة علشان اقولكم كل سنة وانتم بخير ويارب عيد سعيد عليكم وعلى المسلمين جميعا كل سنة وانتم طيبين وفى الفتة عايمين

كفايه .. حرام

2008-11-17T20:45:00.000+02:00

السلام عليكم اخواتى واخوانى المدونين

وندخل علطول فى الموضوع علشان انا دمى محروق الصراحه

شهد...طفله عمرها 5 سنين زى اى طفل عندها اللوز بس ملتهبه شويه والدكتور قرر ليها عمليه وعلشان هى الوحيده عند والدتها قررت انها تعمل ليها العمليه فى عياده خاصه يعنى مش مستشفى حكومى وكانت البدايه من اول العمليه جرعه بنج زياده وبعدين فيه خطأ فى العمليه تسبب فى دخول الهوا فى القصبه الهوائيه ومش عارفه ايه اللى حصل بعد كده بس اللى اعرفه ان البنت بقالها 5 ايام فى العنايه المركزه وربنا يعلم اخرتها ايه؟؟

احمد ... 4 سنين عنده ازمه فى صدره وعلى فكرة ده ابن اختى وكان قاعد بيعلب عادى وفاجأه جاله ضيق نفس ووشه ازرق وجرينا بيه على عياده جنب البيت واخد ابره غلط كان هيروح فيها لان كان فيها نسبه كورتيزون عاليه على طفل فى السن ده ولولا ستر ربنا والمستشفى الخاصه اللى كملت علاجه كان راح فيها

ومن فترة كنت بتفرج على برنامج العاشرة مساء ولقيت طفله فى سنه رابعه ابتدائى واخدت برضه ابره غلط فى الوريد واتسببت فى تسمم فى دراع البنت واخرتها بتروا الدراع وكانت الاولى على مدرستها من سنه اولى لسنه رابعه

واخرتها ايه ؟؟؟

اهمال وعدم احترام اداميه حد

هو مش المفروض ان الدكاترة دول يكونوا على قدر من المسئوليه علشان يعرفوا ان بين ايديهم ارواح ومش لعبه

الطفل اللى بيجربوا فيه الادويه ويمكن دى تنجح ويمكن تفشل لو ابنه هيتحمل عليه كده

هيتحمل يشوفه نايم على سرير ومتوصل بخراطيم وابر مزرقه جسمه

هيتحمل ايه ولا ايه ؟؟

كفايه .. حرام

اتقوا الله وراعوا ضميركم واعرفوا ان اكبر ظلم هو ظلم الانسان فى صحته

حسبناالله ونعم الوكيل

عيد ميلاد سعيد

2008-11-12T14:49:00.001+02:00

عيد ميلاد سعيد عيد ميلاد مين يا حلوين عيد ميلاد ست الحلوين عيد ميلاد قمر العيلة عيد ميلاد اختى وحبيبتى مفروسة كل سنة وانتى طيبة وعقبال مليون سنة يا جميل والكل معزوم عندنا الكل يمد ايده يا حلوين بس خلوا بالكم التورته بالتقسيط المريح

اصل ولا صورة

2008-10-10T15:19:00.000+02:00

**تحديث **

*********

تهنئة قلبية للاخت العزيزة كاميليا

بمناسبة الزفاف السعيد

الف مليون مبروووووووك

================

السلام عليكم ورحمه الله وبركاته اخواتى واخوانى المدونين ازيكم والله وحشتونى اوى فيه حاجه شغلتنى الايام اللى فاتت دى وهى انى لما ابص لاى حد اسئل نفسى يا ترى اللى بيتعامل معايا ده اصل ولا صورة؟؟؟؟ يعنى هو فعلا اخلاق وتربيه وتدين واحترام ولا دى صورة وقناع رسمه لنفسه دايماً السؤال ده جوايا !!!!! ليه مش بنتعامل من جوانا!!! ليه فيه حاجات بنصمم نداريها وبنخاف تظهر قدام اى حد لننكشف ونظهر على حقيقتنا زى ما نكون المفروض نتعامل مع كل انسان بصورة يعنى مع مراتك بصورة وصورة مع رؤسائك وصورة مع اصحابك يعنى المفروض تكون اصل و6 صور علشان تتعامل براحتك بقى طيب يا ترى فى الاخر بيعرف هو مين ولا بيتوه وسط الصور؟؟؟ ويا ترى اللى مش بيعرف الاصل من الصورة ده بيكون غباء منه ولا اتقان من الاخرين فى تقمص صورتهم . نفسى افهم ليه اقول حاجه وانا اقصد حاجه تانيه ليه مش نبقى واضحين مع انفسنا قبل ما نبقى واضحين قدام اى حد والاخر يقعد يغنى انا مش عارفنى انا توهت منى انا مش اناااااااااااااااااا سلام بقى اروح اشترى صور لانى للاسف مش عندى غير الاصل بس

عيد ميلادى انا...

2008-09-22T14:54:00.000+02:00

السلام عليكم ورحمه الله وبركاته اخوانى المدونين كل عام وانتم بخير العيد على الابواب بس النهارده عندى انا عيد لوحدى اااااااااه عيد خصوصى حد عنده مانع زى النهارده انا جيت نورت البيت اه نورت الدنيا كلها زى ما ماما قالت علشان انا كنت اول مولود لماما وبابا اه مهو انا البكريه العاقله حد قال حاجه تانيه !!! عارفين انا كل سنه لازم احتفل بعيد ميلادى وبحب اوى اليوم ده انما السنه دى مش عايزة احتفل بيه يمكن خايفه عمرى يجرى من غير ما احقق اللى بحلم بيه يمكن حاسه ان عمرى اتسرق فى شغل وبيت ودنيا مش عشتها بس انا قولت ان السنه دى حصلى حاجه مختلفه عن كل سنه وهى انى اتعرفت بيكم وقولت لازم احتفل معاكم سنه كانت بجد صعبه اوى بس الحمد لله عدت ويا رب السنه الجايه تكون احلى على قد ما السنه دى اخدت منى اغلى الناس والدى الله يرحمه على قد ما عوضتنى بناس بجد طيبين وحنينين ومحترمين جدا بجد بقولكم كلكم كل سنه وانتوا كلكم جانبى ودايما بيجمعنا الحب والصفاء . ودلوقتى كل واحد و واحده يقف حوالين التورته ويجيب الهديه الاول قبل ما يلمس التورته ولا الكاكولا ونغنى كلنا سوا هابى بيرزداى تو يو ويلا حالا بالا بالا هنو ابو الفصاد وكمان عيد ميلاد الليله مين عيد ميلاد النونه هنفرح ست الحلويين ونشلها فى عيونا . واووووووووووووووووووف وطفينا شمعه سنه فاتت واحتفلنا بسنه جديده يا رب تكون سعيده عليه وعليكم

كل سنه وانا وانتم طيبين..

اللهم تقبل منا رمضان

2008-09-01T14:41:00.001+02:00

اللهم تقبل منا رمضان

كل عام وانتم بخير

اه... يا بلد

2008-08-25T19:49:00.000+03:00

تحديث

كل سنة وانتم طيبين وبصحة وسعادة بمناسبة شهر رمضان

انا اجازة طوال شهر رمضان

انتم عارفين بقى

===============

السلام عليكم اخوانى واخواتى المدونين

النهارده وعلى غير العاده قريت جريدة الجمهوريه وانا اصلاً مش بقرا الا صفحه الحوادث بس فيه خبرين شدونى فى الصفحه الاولى :

الخبرالاول بيقول:

د/ الجمل : لن يضار معلم من نتيجه اختبار الكادر بدأت امس اختبارت التسكين بالمرحله الثانيه لكادر المعلمين يشارك فى الاختبارت نحو 945 الف معلم ومعلمه على مستوى الجمهورية واكد الدكتور يسرى الجمل وزير التربيه والتعليم اثناء تفقده سير الاختبار انه تم اعتماد 2.5 مليار جنيه من ميزانيه الدوله لتنفيذ المرحله الثانيه من الكادر بهدف رفع المستوى المادى للمعلمين وقال ان هذه الاختبارت تعد علامه فارقه للانتقال بالمعلم من مجرد موظف يترقى بالاقدميه والرسوب الوظيفى الى مصاف الاستاذ الجامعى الذى يتم ترقيته وفق معايير محدوده واضاف انه لا يضار اى معلم لن يجتاز الاختبارت وسوف يحصل على كل الامتيازات والحوافز المقررة له (ده الخبر بالنص ) بصوا بقى انا اللى فهمته من الخبر ده ان الكادر ده ولا ليه اى لازمه وزى قلته لان اللى هيسقط فيه ولا هيحصل ليه حاجه ولا اللى فيه هياخد حاجه يبقى لازمته ايه ,وعندى سؤال والنبى معلش اصلى فهمى تقيل شويه ال 2.5 مليار دول هيرحوا فين يعنى للمعلمين ولا للكادر ولا للناجح يرفع ايده حد يجاوبنى ويكسب فيه ثواب (ملحوظه اللى يا خد حاجه من المليارات دى من المعلمين يبقى يقولى )

الخبر التانى : عاطل يبيع لحوم الكلاب .

تمكنت مباحث اللبان فى الاسكندريه من ضبط عاطل يقوم بذبح الكلاب الضاله فى شقته بحارة الريديه ثم ضبط جثتين كلبين بدون رأس واخرين معدين للذبح ... اعترف العاطل انه يقوم باصطياد الكلاب الضاله من الشوارع ويقوم بذبحها ويعرضها بالاسواق على انها لحوم بلدى .

انا الصراحه بعد الخبر ده بلعت ريقى وافتكرت اخر مرة اشتريت فيها لحمه وتخيلت انها لحمه كلاب صحيح اكيد كنت ههوهو بس افتكرت انها كانت مسكرة وقبل كده جه مسئول كبير فى التليفزيون وقال اللحمه المسكرة تبقى لحمه حمير والله يا جماعه مش فارقه حمير من كلاب هنقول ايه حسبنا الله ونعم الوكيل السنه اللى فاتت لقوا فى اسكندريه اكتر من 200 راس حمار ومش لقيوا جثثهم والسنه دى كلاب يا ترى السنه الجايه المينيو ايه ؟؟؟؟

يوم من عمرى

2008-08-20T22:05:00.000+03:00

تحديث

اول مرة اعمل تحديث فى حياتى

بس التحديث ده غالى عندى قوى ومش ينفع اعمل تحديث المفروض انى اعمل بوست كمان ما هو الخبر يستاهل اكتر من كده عايزين تعرفوا سبب التحديث طب استنوا خليكوا قاعدين شوية الخبر بيقول ان فرنسا هانم كلمتنى فى التليفون ايون كده والله كلمتنى انا حنين القلب وقالتلى طمنى كل الناس عليه وسلميلى عليهم كلهم نفر نفر ونفرية نفرية وقوليهم كل سنة وانتم طيبين بس خلاص احسن انا فرحانة وسعيدة قوى قوى .. =========== السلام عليكم ورحمه الله انا اول مرة احضر تجمع تدوينى وبصراحه بحلم بيه من ساعه ما دخلت العالم ده بحلم بالناس اللى ارتبط بيهم ونفسى اتعرف عليهم واشوفهم من كتر ما كنت بفكر فيهم حلمت بناس عمرى ما شوفتها بس تخيلتها فى الحلم زى عاشقه النقاب واللى لسه مش اتشرفت بيها ولماضه واللى الحمد لله قابلتها وفاتيما حبيبه قلبى ونوران بجد الناس دى من كتر تفكيرى فيها حلمت بيها وكنت اتمنى يكونوا كل المدونين موجودين علشان اتعرف عليهم بس خيرها فى غيرها المهم انا مش بعرف احكى يعنى هقول وخلاص واستحملونى بقى اليوم ابتداه الساعه 11 الصبح واول حد شوفته كان خالد همس الاحباب ايه يا جماعه الاخلاق دى وجدعنه وشهامه ولاد البلد وخفه دم بجد حسيت انه اخويا انسان من اول ما تشوفه تحس انه قريب منك وكأنك تعرفه من فترة وبعدين شوفت الاب الروحى للمدونين كلهم بابا ابو خالد صاحب مدونه ذكريات ابوخالد مش عارفه اقول عنه ايه حسيت جنبه بدفىء وحنيه وطيبه مش حستها الا مع والدى الله يرحمه وبجد يا بابا ابوخالد اشهد الله انى احتسبك ابى امام الله شوفت كمان حبيبه قلبى واللى كنت هتخنق جدا لو اعتذرت او مش جت لانى اصلا كنت هموت واتعرف بيها فاتيما صاحبه مدونه روح قلب ماما انسانه صافيه جدا ونقيه وطيبه لابعد الحدود جواها حب وحنان يغرق بلد ومن ساعه ما دخلت وانا عينى عليها وهى حست انى عايزة اقعد جنبها واكلمها وفعلا نجحت انى استفرد بيها ومش هقول فين وقعدنا ننم شويه كتير وكنت مبسوطه اوى انى اخيرا اتعرفت بالست اللى دخلت قلبى من قبل ما اشوفها ربنا يرجع ليكى يوسف يا حبيبتى علشان اشوف ضحكتك مليه عنيكى من غير الم وطبعا شوفت الشقيه مها زين واصحابها هبه ورحاب ودى اللى كانت فعلا مفاجاه ليه عليها خفه دم رهيبه واخلاق ودماغ كبيرة وبتموت فى التصوير واتصورت وهى بتكشف عليه الا بالحق يا مها هى الاستشارة امتى وفين الروشته ؟؟ واصحابها هاديين جدا واوحده منهم تاهت ومش هقول تاهت فين برضه وشوفت سوووو عجوز وعندى 30 سنه فنان وناقد هايل وبقولك لازم تمثل يا سوووو كمان بجد ليك حركه كده بتعملها بوشك بموت على نفسى من الضحك دمه زى العسل واى حد يلاحظ فيه مجدعه ورجوله من اول ما يتكلم وعلى طبيعته خالص ومع انه يا عينى حرق كربوهيدرات كتير بس بجد انبسطت اوى انى اتعرفت على شخصيه جميله كده ولماضه وصحبتها الدكتورة لماضه اخلاق وتدين وطيبه بس فعلا لمضه شويه وصحبتها اخلاق وهاديه واتكلمت معاها شويه صغنين بس اتشرفت بيها واحمد سكر انسان هادى واخلاق وكان اغلب الوقت ساكت وسعدت اوى انى اتعرفت بيه وشيماء سمير انسانه رائعة وطيبه وعسوله وهاديه وصغنونه بس عليها شعر وطريقه القاء تجنن تخطف اى حد بيسمعها موهوبه بجد ومستقبلك هايل باذن الله يا شيمو ودكتور محمود صاحب مدونه بطوط حبوب انسان متدين واخلاق وفخور جدا بالمنوفيه واللى منها وكان نفسه يا عينى ينام بس فقرة النوم كانت ملغيه معلش يا دكتور زمرده لذيذه واخلاق ودمها خفيف وكان نفسى اقعد معاكى ونتكلم اكتر من كده ومصطفى ساجى هادى جدا واخلاق بس مش كلمته معلش خيرها فى غيرها واميرة صاحبه مدونه سهر الليالى هاديه جدا ومش لحقت اقعد معاها تتعوض المرة الجايه والمهندس محمد حسن صاحب مدونه اسكندرانى اوى انسان ناضج واخلاق وفكر واعى وبجد وجهه مشرفه للمصريين بالخارج ومتجوز من 11 سنه صح يا هندسه مين تانى مين تانى ايمان انسانه هاديه جدا ورقيقه بس معلش نسيت مدونتك ورومانسى كان ساكت بس واضح عليه انه بيستكشف الناس الاول بس اخد مدوتناعلشان نتواصل اسفه جدا لو كنت نسيت اى حد سامحونى واعذرونى الزهيمر وحكم السن اتكلمنا فى ايه بقى اتكلموا فى حاجات كتير مثلا لماضه اتكلمت فى ازاى نحافظ على مدونتنا من السرقه خصوصا انها اتسرقت فعلا وسوووو اقترح انها تتسجل بالشهر العقارى وده برضه مش هيمنع سرقتها لان لو اى حد اضاف ولو فقرة بسيطه على الفكرة تبقى ملكه وخالد اتكلم عن صورتنا اللى بتتشوه فى الخارج بسبب السينما وافلام اللى كلها مشاهد اباحيه يا بتتكلم عن السرقه والقتل واحنا برضه لينا دور لان اغلب البوستات بتتكلم عن السلبيات بس اكيد فيه ايجابيات وبعدين اتغدينا بعينك يا رايق وروحنا القلعه وبابا ابو خالد كان عايز يلحق معرض الكتاب بس للاسف كان قفل وكلنا جيلاتى من عند عزة وسووووووووووو كل ام على وابو على وحلى بالعيله كلها بس اقولكم على حاجه انا بجد حسيت انى وسط اهلى الاب والاخوات اللى تحس انهم بجد بيحبوك وخايفين عليك والام فرنسا حبيبتى حتى لو كانت مش موجوده كفايه اننا كلنا حسينا بوجودها وسطنا والرايق اللى كنت بجد اتمنى يحضر بس ظروفه اقولكم على حاجه تانى كلكم وحشتونى جدا من امبارح لحد خالد الا هو الاجتماع الجاى امتى فى اسكندريه بكرة ولا بعد بكرة ؟؟؟؟؟ السلام عليكم ورحمه الله وبركاته

نصيحة لكل انسة مخطوبة

2008-08-06T20:30:00.000+03:00

اختي العزيزة.. لو ربنا فك عقدتك.. واتخطبتي.. فإليكى نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..أجمل ما في الخطوبة العزومات الرومانسية .. على أحلى محلات أكل فى البلد.. واللي عمرك ماهاتشوفيها بعد الجواز.. المهم نصائحي لك عند أي عزومة مع خطيبك..

قلناايه ؟؟؟؟ برافو عليكى شاطرة ايووووون الرقَّه ....

1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًااا .

2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي...العيش بيتقطع بالسكينة فى الطبق. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه...

3- الشورررربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص. . ومن غير ماتقعدي تنفخي فيها.. زي القهوجي اللي بينفخ فى الحجر للزبون.. وطبعــاً عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك.. بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....

4- الرز طبعاً .. بيتاكل بالشوكة.. أوعي إيدك تتمد ع المعلقة. . وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..

5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها فى بؤك من سكات.. مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك.. إزاي..؟؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فضايح.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت بابـا.. وأتنهدي جامد وقولي.. برضه..؟؟؟ وتروحي قاطعة راس الجمبري ياية.. بالشوكة.. أنا فى عرضك إنسي المصمصة دلوقتى..

8- البطاطس سواء مسلوقة أو محمرة.. أوعي تهرسيها وتدبيها على الرز وتدي ...لا..لآ...لآ...بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي..

9 -الفاكهة.. لو الفاكهة فيها بذر.. طلعيه من بؤك بالراحة وحطيه فى إيدك وهي مقفولة.. وبعدين فى طفاية السجاير اللي على الترابيزه.. أوعي ياحبيبتي من نظام التفتفة للبذر.. إنسي....

10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه.....وبعدين تمسكي الفوطة اللي دايمًا موجودة على التربيزة من غير لازمة.. وتبوسيها.. آل يعني بتمسحي بؤك.. وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفـــا

عيد زواج

2008-07-17T20:20:00.001+03:00

السلام عليكم ورحمه الله وبركاته

اخواتى واخوانى المدونيين

والله كلكم وحشتونى

هى \ صباح الفل والورد والياسمين يا روحى

هو \ (صاحى مفزوع ) خير فيه ايه ؟؟

هى \ مش فيه يا روحى بقولك صباح الفل والورد والياسمين

هو \ منا عارف اليوم اللى اصحى فيه على دلع بيبقى يوم مش معدى . ربنا يستر

هى\ نعم نعم ليه هو انا منكده عليك

هو \ لا يا حبيبتى صباح الحب والهنا

هى \ قوم يلا انا مجهزه ليك فطار يجنن

هو \ (مستغرب جدا ) مجهزاه ليه اناااااااااا

هى \ اومال للجيران مالك يا راجل

هو \ اصلها غريبه اوى انتى فاكرة اخر مرة جهزتى ليه الفطار كان يوم عيد تحرير سينا

هى \ يا اخى حرام عليك تحرير سينا ايه بس والله شكلى هحررك النهارده

هى \ انت مش عارف فيه ايه النهارده ؟

هو \ خير فيه ايييييييييييييييييه ؟

هى \ النهارده فيه مناسبه مهمه جدا

هو \ مناسبه مهمه ... ممممممممممممممممممممممممممم

يبقى النهارده عيد الام الحق اقوم البس واروح اشترى هديه لماما

هى \ ماما مين وانا مالى ومال مامتك هو فيه عيد ام شهر 7

هو \ اه صحيح اومال مناسبه ايه ؟؟

هى \ افتكر دى حاجه تخصنا احنا الاتنين

هو \ اااااااااااااااه يبقى النهارده عاشورا الحق اقوم البس واشترى البليله علشان تعمليها لينا

هى \ يا لهووووووووووووووووى عاشوا ايه ؟؟ وكل شويه الحق اقوم البس انت عايز تهرب وخلاص هو فيه عاشورا فى رجب يا راااااجل

هو \ انا غلب حمارى قوليلى انتى

هى \ زى النهارده من 6 سنين اتنيلت واتجوزتك يلا بقى قوم ورينى جبت هديه ليه ايه ؟؟

هو \ وده مناسبه محتاجه هديه .. دى محتاجه نقف 8 ساعات حداد او نصلى ونستغفر

ربنا على الذنب ده وندعى ربنا يسامحنا عليه

هى \ليه ان شاء الله انت ندمان انك اتجوزتنى نسيت لما كنت بتقف ليه فى البلكونه طول الليل فى عز الشتا زى الكتكوت المبلول علشان بس تشوفنى دلوقتى بقيت ذنب .

هو \ (لسه رايح يمد ايده على الفطار ضربته على ايده وشالت الفطار)

هى \ عندك حق هى فعلا غبطه ولازم تتصلح

طالقنى .................. طالقنىىىىىىىىىىىىىى

هو \ انا قولت انه نهار مش فايت . لا يا حبيبتى انا فاكر وهنزل اشترى الهديه اللى انتى عايزاها

هى \ ولازمته ايه ده كله من الاول صحيح رجاله مش بتيجى الا بالعين الحمره

هو \ كل سنه وانتى طيبه يا حبيبتى

هى \ وانت طيب يا روح قلبى ونبضه

ملحوظه صغننه

ده فعلا عيد جوازى السادس

عايزة اقول كمان لخالد همس الاحباب كل سنه وانت طيب وعقبال مليون سنه

ولهمس كمان عيد ميلادها الشهر ده ويا رب نشوفك احلى عروسه ويحفظك

وداليا قوس قزح عيد ميلادها برضه كل سنه وانتى طيبه

كل سنه وانتم كلكم طيبين

السلام عليكم

أحساس غريب

2008-07-02T17:54:00.001+03:00

السلام عليكم ورحمه الله وبركاته اخواتى واخوانى المدونين ازيكم كلكم والله وحشتونى جدا من اخر بوست كتبته وانا مش عارفه اكتب ايه وبصراحه وفاه والدى اثرت عليه اوى حسستنى انى مش عايزة اتكلم وساعات اتكلم واقعد اهزر مع اصحابى واول ما اكون لوحدى القى عينى غررت بالدموع وحسيت بالوحده تانى . بس اللى حصلى من اخر بوست كتابته انى حسيت بجد ان ليه وجود وفيه ناس حست بيه كتير وناس بعتت ليه اميلاتها تسئل عنى وتطمن عليه وناس تتصل بيه بجد انا بشكركم كلكم وطبعا اول واحد اقوله بجد شكرا خالد همس الاحباب لانه بجد اخ بمعنى الكلمه انسان اخلاق وادب بجد وبابا خالد وعاشقه النقاب وآبى وسكر وكل اللى سئلوا واطمنوا عليه . انما بجد كل ده شئ واللى حصل النهارده شئ تانى خالص حاجه هزتنى بجد والله انسانه جدعه واقل ما يقال عنها انها رمز للطيبه والحنيه والاحساس المرهف طبعا كلنا كده عرفنا مين ؟ دى خيخه واللى هى مش خيخه خالص بالعكس والله من مكالمه بسيطه بينى وبينها النهارده خففت عنى كتير وكفايه انها بكت لمجرد انها قرت بوست من واحده ولا تعرفها ولا شافتها بس حست انها مجروحه .والله حسيت فى صوتها بحبها ليه وخوفها عليه . ايه الشفافيه والنقاء والحب والحنان اللى فى المدونين دى؟ خيخه عايزة اقولك حاجه بجد انتى انسانه بمعنى الكلمه وانا والله كنت بحبك قبل ما اتكلم معاكى وحبيتك اكتر من بعد ما اتكلمت معاكى ربنا مش يحرمنى منكم كلكم ملحوظه صغننه يا جماعه اللى هينزل اسكندريه للمصيف يقولى وانا هعزمكم كلكم على جيلاتى وفيشار ودرة كمان ووجبه كامله من قدوره سمك وسبيط وجمبرى جامبو وكل اللى نفسكو فيه واطمنوا حساب الجيلاتى والفيشارو الدرة عليه والوجبه بس على ابو الكرم خالد همس الاحباب هو اللى قال كده وانا خليته يمضى على كلامه علشان لو فيه غسيل مواعين بعد الاكل يبقى عليك يا ابو همس ماااااااااااااااااشى....... السلام عليكم

قلبى ينزف

2008-06-13T16:42:00.000+03:00

السلام عليكم ورحمه الله وبركاته اخوانى واخواتى المدونين يا رب تكنوا كلكم فى احسن حال انا مخنوقه جدا يمكن اكون مش عارفه السبب ويمكن عارفاه وبستعبط يمكن الشغل يمكن البيت يمكن الدنيا كلها بس ما هيه دى حياتى ايه اللى خانقنى دلوقتى منها كده من اول ما اتجوزت يمكن وحشنى ؟؟ لا مش يمكن هو فعلا وحشنى .. وحشنى لدرجه انى حاسه انه عايش معايا شايفاه وحساه وساعات والله بسمعه كمان ساعات بتمنى اضمه اوى علشان اتاكد انه معايا وابكى وامسح دموعى واقول اكيد هو حاسس بيه واكيد ربنا هيكرمنى بيه وحشتنى اوى اسمع كلمه اى ست بتتمناها ماما وحشنى احس بيه جوايا والمسه بقلبى قبل ايدى وحشنى اوى اشوفه وهو بيضحك وبيبكى وبيحبى وبيكبر ادامى طبعا الحمد لله على كل شىء واللهم لا اعتراض انا بس بقول انه وحشنى اوى وخايفه اوى لحسن مش اشوفه انا اسفه لو كلامى هيضايق حد بس ده احساسى اللى عايشه فيه ليل ونهار . عارفين لما بشوف نونو فى اى مكان بسرح وبتمنى يكون ابنى انا وممكن ابوسه اقعد العب معاه وانسى خالص اى حاجه تانيه والاخر القيه بيعد عنى افوق وافتكر انه مش ابنى وانى لسه ربنا مش كرمنى هو صحيح اتاخر شويه بس انا عندى يقين من ربنا ان ربنا هيكرمنى بيه ان شاء الله وهربيه واشوفه وهو بيكبر ادامى وهفرح بيه واحساس الحرمان الفظيع ده يمشى بقى لانى مليت منه . معلش انى بحكى عن حياتى الخاصه بس حسيت انى عايزة افضفض ومش لقيت احسن منكو افضفض معاهم . كفايه نكد بقى لحسن انا عارفه نفسى نكديه اوى السلام عليكم ورحمه الله وبركاته

احنا فين؟؟

2008-06-05T19:03:00.000+03:00

السلام عليكم ورحمه الله وبركاته
اخواتى واخوانى المدونين
والله وحشتونى جدا المهم ندخل فى الموضوع علطول
اولاً البوست ده ولا حلم وخيال ولا بيتهيألى ده حصل وادامى نبداء...

كنت واقفه مكانى فى شارع طويل عريض وللعلم ده شارع رئيسى وطبعا انا بخرج الساعه 6 صباحا المهم كنت واقفه زى كل يوم ومش كان فيه ناس كتير يعنى يا دوب 3 شباب ورجليين كبار فى السن ووقفت جانبى بنت امورة لابسه لابس مغرى شويه صحيح انما ما كلنا بنلبس عادى يعنى المهم واحنا واقفين فى هدوء جدا وقف ادامنا ميكروباص ونزل منه 3 شباب ومسكوا البنت وضربوها حته الم ؟؟
البنت زى ما يكون جت ليها حاله ذهول وهما التلاته فى نفس الصوت عايزة تهربى من اهلك يا......دى شتيمه طبعا المهم البنت بقت تصرخ انتوا مين انا مش اعرفكم وهما نازلين فيها ضرب وشد من شعرها وتدخل شاب من اللى واقفين وقاله ممكن تورينى بطاقتك ونتاكد انك اخوها راح واحد من التلاته طلع مطوه وقاله خليك فى حالك احسنلك
البنت بقت عماله تستنجد والراجل الكبير قال للشاب خليك فى حالك يا ابنى احسن ما يضروك واحد تانى دمه حامى وشهم راح قاله لا احنا مش هنسكت ويادوب قرب منهم وراح واحد منهم هوووووب عوره بالمطوه بطول وشه والدم والصريخ انا بعدت شويه وقولت اخد رقم الميكروباص وكانى ماشيه بعيد عنهم خصوصا ان الناس ابتدت تلم ولا لقيت نمرة للعربيه !!!!
يا لهوى فين الرقم والمرور وازاى العربيه ماشيه كده وفى غمضه عين كانوا واخدين البنت فى العربيه وطارت العربيه ناس هتقول ليه مبلغتوش البوليس الموضوع مش اخد اكتر من 4 دقايق والبنت الله اعلم بيها وفعلاً اتصالنا بالبوليس والاسعاف للراجل
المجروح بس بعد ايه ؟
انا عايزة افهم احنا فين فى مصر ولا شيكاغو احنا الناس اللى كانوا موجودين من زمان ولا ايه اللى حصلنا فين الناس اللى بيحكى عنهم ابى العزيز ابو خالد فين ابن البلد اللى يخاف على بنت بلده زى ما تكون اخته
يا جماعه الشباب خلاص عليه العوض فيهم عندنا الشباب بيفرقوا الحشيش فى الشوارع وفى ارقى الاماكن وانظفها يبقى فاضل ايه ؟؟
اغتصاب ... وادمان..... واعتداء على بنت فى النهار
بالله عليكو قولولى فين الامان فى البلد دى
البنت بتخرج ويا عالم هترجع تانى ولا لاء ومش شرط انها تكون لابسه لبس مغرى لالالا طفله من كام يوم عمرها 6 سنين وخطفوها برضه واغتصبوها وتانى يوم اهلها لقوها مرميه فى شارع فاضى راحوا بيها المستشفى البنت ماتت من النزيف
انا بقول لكل شاب كلمه واحده بس وانت بتعمل اى شىء يغضب ربنا افتكر ربنا
افتكر امك...اختك...زوجتك.....بنتك ....وداين تدان
وحسبيا الله ونعم الوكيل
السلام عليكم ورحمه الله

فرنسا حبيبتى

2008-05-18T17:37:00.000+03:00

السلام عليكم ورحمه الله وبركاته

أنا لما بحب بحب بكل ما فيه

بقلبى وروحى وعقلى وحتى الدمع فى عنيه

وحبيتك يا بنت الناس بكل صدق الاحساس

ولقيتك اعزواغلى ما ليه فى المدونه ديه

والله ما عارفه اقول ايه دماغى مشتته حاسه انى مش ظبوطه

ممكن اكون عاطفيه زياده عن اللازم

ممكن اكون بتعلق بالناس بسرعه وبحبهم بسرعه اكتر من اللازم

ممكن اكون مش طبيعيه لانى بنهار لما اى حد بحبه بيغيب عنى

الله اعلم

بس الحاجه الوحيده اللى اعرفها انى بجد بحب فرنسا جدا من اول مرة دخلت عن طريق صديق عزيز هو اللى عرفنى على العالم ده الاول كان النت زهق وملل

واول مرة ادخل عالم المدنون لقيت صورة عبله كامل شدتنى الصورة قولت ادخل اشوف ايه جوا .

لقيت موضوع عن واحده اسمها ام دبوه وعن صفيحه الزباله اللى مصممه تخليها بره الشقه وضحكت جدا طول ما انا بقرى البوست والاخر افأجى بان اللى بتكتب البوست بتقول انها قعدت تكتبه اكتر من 5 ساعات لانها لبسه قميص جبس وممنوعه من الحركه الجامده .

من اول مرة حسيت قد ايه الانسانه دى بجد عظيمه وجامده وبتقدر تصبر على المتاعب وحسيت انها حته منى لانى حصلى تقريبا نفس الحادثه بتاعتها بس انا وقت الحادثه كرهت نفسى وكنت بتمنى الموت انما هى قاعده بتكلم اصحابها وبتضحك وبتكون سبب فى ضحكهم وممكن تكون هى بين ضحكها بتبكى من الالم .

فاكرة يا فرنسا لما علقت عندك على موضوع الدكاتره الفاشله وقولت ليكى الدكتور عايز يعيد العمليه تانى علشان نفسيتى ترتاح رغم انه عارف ان العمليه كلها غلط وقولت ليكى بفكر اعمل لضهرى سوسته علشان يبقى سهل الفتح لو حب يغير حاجه تانى ؟؟

فرنسا انا من اول ما دخلت هنا وانا بحبك وكنت كل يوم اول حاجه اعملها لما ارجع من الشغل انى افتح مدونتك واشوفك كاتبه ايه ولما كنتى بتتاخرى فى البوست شويه كنت والله بدخل على المدونين التانيين ادور على تعليقك واقراه .

تخيلى واحده اتعلقت بيكى كده وبتحبك كل الحب ده مش تستاهل منك انك تطمنيها عليكى ولو بكلمه واحده ؟؟؟

والله يا فرنسا ما طالبه الا كلمه انك بخير واتمنى من الله ان يكون بعدك عننا مش يكون بسبب قهرى .

استودعتك الله الذى لا تضيع ودائعه .

امنيه وحيده اتمنى من الله ان يحققها ليه(انك تكونى اول تعليق على البوست ده يا فرنسا)

2008-05-17T21:11:00.000+03:00

تحديث

الحمد لله الفكرة اتلغت من اساسها واللى قدموا استقالات سحبوها وهيعملوا طلب نقل اخيرا بقى لينا صوت وبنعرف نثبت على رائينا.

فكر جديد لنصب شديد

2008-05-11T17:31:00.000+03:00

السلام عليكم اخواتى واخوانى المدونين \

النهارده صحيت زى كل يوم على اغنيتى المفضله يا حبيبتى يا مصر يا مصر

ولبست هدومى ونزلت شغلى زى كل يوم وعادى ابتدينا شغل وفأجاه:

المدير باعت عايزنا انا ومجموعه من زمايلى كلنا فى نفس

الصوت

ليه؟؟؟

المهم روحنا ودخلنا المكتب الفخم ودار الحمار الاتى سورى قصدى الحوار الاتى :

احنا : السلام عليكم

هو : عليكم السلام اتفضلوا لحظه وافضى ليكو

احنا: فضلنا مستنين وبعدين بص لينا بصه زى ما يكون بيقول اقول ليهم ايه ؟؟

هو : بصوا يا جماعه الشركه دى بتاعتنا كلنا وفاتحه بيوتنا ولازم نخاف عليها

وكلنا زى بعض هنا وانتوا عارفين طبعا ان مكتبى مفتوح ليكم 24 ساعه ..

احنا: فى عقل بالنا اه صح شغالين مين يا عم احنا كل قبضنا ملاليم بالنسبه ليك انت بتقبض فى الشهر اكتر من 15000 جنيه واحنا احسن حد فينا شغله بالاوفر تيم 650 جنيه وباب مين اللى مفتوح الباب ده مش بنشوفه مفتوح الا لما تكون داخل وخارج ومرة كل اسبوعين بتيجى ايه يا عم انت فاكرنا مش من هنا ولا ايه يلا ما علينا ..

هو: لما لقانا ساكتين قال افاجئهم ؟انتوا يا جماعه هتقدموا استقاله دلوقتى وهتاخدو كمان استمارة 6 يعنى هتخرجوا من التامينات؟؟؟؟؟؟

احنا: اللى سورقت واللى لطمت واللى اغم عليها وانا فتحت بقى وتنحت قولت فى عقلى يا لهوى هيخصخصونا بس هيخصخصوا واحنا اصلا قطاع خاص المهم فوقنا من الصدمه ....

احنا: خير فيه ايه يا فندم

هو: يا جماعه احنا شركه كبيرة وبندفع ضرايب كتير وفكرنا فى حل لقينا الحل الوحيد اننا

ننقل المصنع من مكانه ونغير اسمه وطبعا انتوا كمان لازم تتنقلوا بس بعقد جديد وتأمينات جديده علشان بتوع الضرايب الوحشيين ومتقلقوش نفس المرتب ونفس التأمينات بس العقد بس هو اللى هيكون جديد واهه ناخد كام سنه اعفاء من الضرايب واحنا اولى بفلوسنا ولا ايه

انا : فى عقلى بالى يا ولاد الحراميه احنا شركه كبيرة وبتكسب ملايين وصاحبها احد الوزراء الحاليين ازاى نعمل كده اومال خلينا ايه للناس الغلابه اللى قرفنهم طول النهار فى

التليفزيون هفوترك ولا اظبطك لا ومين اللى بيظبط اول واحد المفروض انه يدفع الضرايب

ولا هى الضرايب دى على الغلابه وبس بقى ده اسمه كلام!!!!!!

طيب سؤال اخير بالله عليكو ده نصب ولا فلوسنا وحقنا زى ما حضره المدير ما بيقول ؟؟

ملحوظه صغننه:

انا رفضت انا وزميلاتى موضوع الاستقاله وجارى المناقشات بيننا

السلام عليكم ورحمه الله وبركاته