RSS

الخميس، 5 يونيو 2008

احنا فين؟؟

السلام عليكم ورحمه الله وبركاته
اخواتى واخوانى المدونين
والله وحشتونى جدا المهم ندخل فى الموضوع علطول
اولاً البوست ده ولا حلم وخيال ولا بيتهيألى ده حصل وادامى نبداء...

كنت واقفه مكانى فى شارع طويل عريض وللعلم ده شارع رئيسى وطبعا انا بخرج الساعه 6 صباحا المهم كنت واقفه زى كل يوم ومش كان فيه ناس كتير يعنى يا دوب 3 شباب ورجليين كبار فى السن ووقفت جانبى بنت امورة لابسه لابس مغرى شويه صحيح انما ما كلنا بنلبس عادى يعنى المهم واحنا واقفين فى هدوء جدا وقف ادامنا ميكروباص ونزل منه 3 شباب ومسكوا البنت وضربوها حته الم ؟؟
البنت زى ما يكون جت ليها حاله ذهول وهما التلاته فى نفس الصوت عايزة تهربى من اهلك يا......دى شتيمه طبعا المهم البنت بقت تصرخ انتوا مين انا مش اعرفكم وهما نازلين فيها ضرب وشد من شعرها وتدخل شاب من اللى واقفين وقاله ممكن تورينى بطاقتك ونتاكد انك اخوها راح واحد من التلاته طلع مطوه وقاله خليك فى حالك احسنلك
البنت بقت عماله تستنجد والراجل الكبير قال للشاب خليك فى حالك يا ابنى احسن ما يضروك واحد تانى دمه حامى وشهم راح قاله لا احنا مش هنسكت ويادوب قرب منهم وراح واحد منهم هوووووب عوره بالمطوه بطول وشه والدم والصريخ انا بعدت شويه وقولت اخد رقم الميكروباص وكانى ماشيه بعيد عنهم خصوصا ان الناس ابتدت تلم ولا لقيت نمرة للعربيه !!!!
يا لهوى فين الرقم والمرور وازاى العربيه ماشيه كده وفى غمضه عين كانوا واخدين البنت فى العربيه وطارت العربيه ناس هتقول ليه مبلغتوش البوليس الموضوع مش اخد اكتر من 4 دقايق والبنت الله اعلم بيها وفعلاً اتصالنا بالبوليس والاسعاف للراجل
المجروح بس بعد ايه ؟
انا عايزة افهم احنا فين فى مصر ولا شيكاغو احنا الناس اللى كانوا موجودين من زمان ولا ايه اللى حصلنا فين الناس اللى بيحكى عنهم ابى العزيز ابو خالد فين ابن البلد اللى يخاف على بنت بلده زى ما تكون اخته
يا جماعه الشباب خلاص عليه العوض فيهم عندنا الشباب بيفرقوا الحشيش فى الشوارع وفى ارقى الاماكن وانظفها يبقى فاضل ايه ؟؟
اغتصاب ... وادمان..... واعتداء على بنت فى النهار
بالله عليكو قولولى فين الامان فى البلد دى
البنت بتخرج ويا عالم هترجع تانى ولا لاء ومش شرط انها تكون لابسه لبس مغرى لالالا طفله من كام يوم عمرها 6 سنين وخطفوها برضه واغتصبوها وتانى يوم اهلها لقوها مرميه فى شارع فاضى راحوا بيها المستشفى البنت ماتت من النزيف
انا بقول لكل شاب كلمه واحده بس وانت بتعمل اى شىء يغضب ربنا افتكر ربنا
افتكر امك...اختك...زوجتك.....بنتك ....وداين تدان
وحسبيا الله ونعم الوكيل
السلام عليكم ورحمه الله








24 التعليقات:

Yahia يقول...

فعلا حاجة تحرق الدم وبرده معاكي حق الناس اتغيرت عن زمااان ، راح زمن الشهامه والجدعنه وكل واحد بقى فنفسه عشان يعيش، وده بقى ثقافة شعب ...... شعب عاش الفقر والذل والمهانه ..... شعب بيتخانق عشان رغيف العيش ومكان يقف فيه في الاتوبيس .... شعب كل حاجه بتحصل غصبن عنه ..... يبقى عايزه بقى لما يشوف مصيبه بتحصل لحد غيره يتحرك ؟؟؟ لأ طبعا كل واحد في نفسه ......... للأسف

سلام

M. Selim يقول...

حسبنا الله ونعم الوكيل
يا استاذة حنين احنا القانون والشرطة بتوعنا في اجازة مفتوحة فممكن تكون العربية دي مسروقة وهي من غير نمر زيها زي عربيات كتير اوي في مصرنا المحروسة
وللاسف احنا فعلا في مصر وان كانت شيكاغو اكثر منا تحضرًا
انما لسه في امل في ناس وشباب مصر اللي اكيد مامثلتهمش اتنين تلاتة من الشباب اسائوا التصرف مع الموقف
الشباب الصالح -او اللي فاضل بمعنى اصح- هما عزائنا الوحيد في الحال اللي وصلنا ليه ده
حسبنا الله ونعم الوكيل

عبده الرايق يقول...

والله حاجه تخلى الواحد عقله يطير
يعنى انتى قلتى ان البنت لابسه لبس عادى
مش مغرى قوى
ده يخلى الواحد يخاف على مستقبل بناته
لان الموضوع بالشكل ده لازم يتخذوا فيه اجراءت صارمه واحكام مغلظه
حتى لا يفكر احدا فى القدوم على مثل هذه الحاله
يارب
يارب استرها على بناتنا واخواتنا

همس الاحباب يقول...

حسبى الله ونعم الوكيل
ولا حول ولا قوة الا بالله
ايه اللى بيحصل ده مش ممكن يكونوا بنى ادمين وعندهم دم ومشاعر
ربنا ينتقم منهم ويرحمنا برحمته الواسعة
بس فين الضمير فين الدين فين الخوف من عذاب الله وانتقامه
حسبنا الله ونغم الوكيل
تحياتى وتقديرى

Empress appy يقول...

يعنى لو خمسه سته ولا عشرة اتلموا وضربوهم وخدوا البنت مش كان ده الصح لا احنا بقى عندنا سياسه وانا مالى وتكبير الدماغ فهمتى يعنى عيب فينا وفى نخوة بعض الرجاله
ثانيا هنفترض المرور ساب العربيه من غير نمر ممكن تكون طالعه من بين الشوارع اللى مش فيها ظابط او امين او حتى خد رشوه الامين بس المصيبه الاكبر فى اللى حصل للبنت ومحدش اتحرك
افتكرى موضوع الظابط المتناوى اللى راح بحياته ومات علشان ينقذ واحده من الخطف ربنا يرحمه
يعنى المشكله تصرف فردى او من سلبيتنا

أبو خالد يقول...

أبنتى الغالية /حنين القلب
المشهد الذى تصفين من صنع
1 -إهمال التربية فى البيت.
2 -البعد عن منهج الله .
3 -البطالة.
4 -الحكومة التى تشجع هؤلاء
و تستخدمهم فى المظاهرات للأعتداء على المتظاهرين.
5 - إنعدام النخوة و الإنشغال بكسب
لقمة العيش.
6 -عدم تطبيق حدود الله من أول واقعة أختطاف.
أتعلمين ما هو حد الله فى هذة الحالة
حد الحرابة قال الله تعالى فى كتابه الكريم
"إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلَافٍ أَوْ يُنْفَوْا مِنَ الْأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الْآَخِرَةِ عَذَابٌ عَظِيمٌ (33) إِلَّا الَّذِينَ تَابُوا مِنْ قَبْلِ أَنْ تَقْدِرُوا عَلَيْهِمْ فَاعْلَمُوا أَنَّ اللَّهَ غَفُورٌ رَحِيمٌ (34)
سورة المائدة
و هكذا بنيتى أهملنا حد الله فى أول حادثة و كانت حادثة شهيرة فتاة العتبة و اليوم نجنى حصاد الأهمال.
دمتى بنيتى الغالية صرخة عالية تنبه و تحذر من غد حزين

موناليزا يقول...

وجعتى قلبى بجد حسبى الله ونعم الوكيل فيهم وربنا ينتقم منهم
فكرتينى بفيلم عربى مش فاكرة اسمه بس دى كانت نفس القصة
انا لله وانا اليه راجعون

حنين القلب يقول...

yahia
والله عندك حق يا يحيى فعلا راح زمن الجدعنه والشهامه دى كمان الناس بقت سلبيه جدا وبتختلق ليهم الاسباب اللى يقول يا عالم واللى يقول يمكن فعلا اختهم !!
يعنى هما شجعوهم على الغلط
حسبيا الله ونعم الوكيل
وفعلا يا يحيى كل واحد فى نفسه
سلام

حنين القلب يقول...

mohamed
حسبنا الله ونعم الوكيل
فعلا القانون والشرطه فى اجازة
بس يا محمد المشكله مش فى 3 شباب اللى عملوا الجريمه دى لالالا
المشكله بقت فى كل بنت بتطلع من بيتها ويا عالم هترجعه ولا لاء
عارف يا محمد سألت نفسى سؤال
انا كان بينى وبين البنت دى خطوتين يعنى ممكن كنت اكون انا مكانها وربنا يعلم باللى حصلها اغتصاب وسرقه وتعذيب وقتل؟؟؟
ده مش يخلى اى واحده تخاف من اى حد فى الشارع
ده مش يخلق حاله زعر وخوف فى الشارع
المشكله فى قله الامان احنا مبقاش عندنا امان فى بلدنا .
ربنا يهدى الجميع
سلام

حنين القلب يقول...

عبده الرايق
والله يا عبده باشا ما حكايه لبس مش قريت حادثه البنت اللى عندها 5 أو6 سنين واتخطفت برضه
لازم يكون فيه قانون صارم الخطف والاغتصاب عقوبتهم الاعدام مش كام سنه او انه يصلح غلطته ويتجوزها ده مش حل
ربنا ينتقم من كل ظالم
وينصر كل مظلوم
سلام

حنين القلب يقول...

همس الاحباب
دم ومشاعر وضمير ايه بس يا خالد
دول شباب شاربين حشيش ويمكن حاجات تانيه كمان يعنى مفيش فى دماغهم حاجه من الكلام ده دول اصلا لو بيخافوا ربنا مكنوش شربوا حاجات تخليهم يفكروا فى شهواتهم وخلاص
اللى بيفكر فى شهواته وبس الحيوانات واحنا ربنا كرمنا عنهم بالعقل انما دول بيتوهوا العقل ويموتوا الضمير بالمخدرات
وحسبيا الله ونعم الوكيل
سلام يا ابو همس

حنين القلب يقول...

appy
يا آبى يا حبيبتى خمسه او سته ايه احنا كنا الصبح بدرى فى الوقت ده مش بيكون فيه ناس كتير والشابين اللى كانوا واقفين وعايزين يخلصوا البنت واحد منهم شيخ كبير قاله وانت مالك والتانى خد مطوه فى وشه متخيله المنظر اكيد الكل هيخاف .
مفيش حد هيقول دى لو بنتى او اختى هموت علشانها لالالا كله بيقول انا وبس
حتى انا لما حاولت اساعد ولا نفعتها
تصدقى بالله يا آبى انا حاسه ان ذنبها فى رقبتى انا علشان مش عرفت اساعدها ولا اعمل ليها حاجه بس هعمل ايه حتى النمرة مش لقيتها.
ربنا يسامحنى ويسامحنا كلنا
سلام يا آبى

حنين القلب يقول...

ابو خالد
ابى العزيز والله بعد كلامك وختامه بأيات الله ما فيه كلام تانى يتقال وفعلا التربيه والخوف من ربنا والاسرة كل دى اسباب بس هنعمل ايه يا بابا كله دلوقتى مشغول بالمال وسايبين البنون
مفيش حد دلوقتى بيحاسب ابنه ويقول جبت الفلوس دى منين لالالا يقولم مدام بيتشغل ومش بيطلب منى مليش حاجه عنده
بقى ده تفكير اب خلف وربى وكبر
حسبيا الله ونعم الوكيل فى كل اب اهمل فى تربيه اولاده .
ربنا يهدينا ويتوب علينا اجمعين
سلام يا بابا

حنين القلب يقول...

monaliza
والله انا كمان قلبى وجعنى
وحياتنا كلها بقت افلام يا حبيبتى دى بقت كمان اغرب من الخيال افتحى صفحه الحوادث كل يوم وانت تتفرجى ولا اخبار الحواث وانتى تعرفى ان حياتنا دى اكتر من الافلام والتمثيل هقولك على موضوع حصل لواحده اعرفها:
الست دى عندها 3 تؤوام صبيان عندهم 4 سنين المهم كان فيه فرح والعيال بتلعب عادى خلص الفرح وبندور على واحد منهم ولا لقيناه عدى يوم واتنين وتلاته ومش لقينه يوم واتنين وتلاته والله العظيم هى اللى عرفت مكانه وتروح وتيجى على البحر مكان الصخور وتنده عليه وتقول انا حاسه بابنى هنا يبصوا ويدوروا ومش لقيينه عارفه الاخر لقوه فين متكتف ومغتصب ومرمى بين الصخور مقتول .
والله العظيم الموقف ده حصل بالله عليكى شوفيه فى اى فيلم علشان تعرفى بس ان حياتنا اغرب من الخيال .
حسبيا الله ونعم الوكيل
سلام وابقى نورينى دايما

قوس قزح يقول...

انا مش مصدقة ان ده حصل .. ازاى يعنى ناس تكون بالجراءة دى .. و تخطف بنت من وسط الناس بالقوة و الغصب ..و ازاى رجل كبير بدل ما يشجع الشباب يقولهم خاليكوا فى حالكم !!
انتم لو كنتم اتلمتوا كلكم و انتى مع البنت صرختوا جامد كان العيال دى خافت و هربت

اسمعى يا حنين الحادثة دى بدام حصلت و محدش عمل حاجة ممكن جدا تتكرر تانى .. خدى بالك على نفسك الله يخليكى و بلاش النزول بدرى كده لوحدك خدى اى حد معاكى يوصلك لحد ما تركبى بس حتى

ربنا يستر علينا و على كل بناتنا

حنين القلب يقول...

قوس قزح
وربنا حصل وبيحصل انتى مش بتتفرجى على الجرائم اللى بتيجى فى التليفزيون
والله يا حبيبتى انا من ساعتها خايفه جدا ولو فيه حد يوصلنى كنت قولت ليه انما جوزى مواعيده غير مواعيد ومش ينفع اغير الميعاد لان ده باص شغل
ومتخافيش عليه يا حبيبتى قل لن يصيبنا الاما كتب الله لنا
ربنا يسترنا ويستر بنات المسلمين اجمعين
سلام يا حبيبتى وابقى نورينى دايما

(احمد سكر ) يقول...

ربنا يسترها

خلى بالك ياحنين

بس من الواضح انهم كانو مراقبيين البنت دى كويس

وعارفين مواعيد نزولها

ربنا يتلاها برحمته

خالى بالك من نفسك

واعملى اللى داليا قوس قزح قالتلك عليه

تحياتى لاختى الرقيقه

احمد

عاشــــــ النقاب ـقــــة"نونو" يقول...

حنين بجد دة
احنا في فيلم اغتصاب هنا ولا ايه
طيب مفيش حس ولا خبر ربنا يسترها يارب
خلي بالك على نفسك والله بجد
ربنا يرحمنا يارب

maiosha يقول...

السلام عليكم

والله يا حنين أنا طول ما أنا بقرا البوست وأنا مش مصدقة نفسى .. ده حقيقة ده ولا فيلم ولا إيه؟؟

يعنى الواحد يبقى نازل من بيته عادى ممكن يحصل فيه كده

واللى إستغربتله أصلا إن الشباب الصغير بينه شوية شهامة والراجل الكبير هو اللى منعهم .. لاحول ولا قوة إلا بالله

والله الواحد مش عارف يقول إيه؟؟ إحنا بقينا فى غابة ولا إيه؟؟ عايشين مع بنى أدميين لحم ودم ولا مع حيوانات بتاكل بعضها

المهم دلوقتى إنك تخلى بالك من نفسك ربنا يخليك .. أما البنت دى بقى .. فربنا معاها

حنين القلب يقول...

سكر
ربنا يسترها علينا اجمعين
والله يا احمد مش اعرف اذا كانوا مرقبينها ولا ايه بس البنت من ساعتها ولا حس ولا خبر ولا اعرف ايه اللى حصل ليها.
ربنا يكرمك يا ابو محمود والف مليون حمدالله على سلامتك ونورتنى والله
سلام يا سكر

حنين القلب يقول...

nonoymm
والله يا حبيبتى حصل وبيحصل
بس انتى عارفه الغريب ايه ان الناس دى مش بتتعظ عارفه ليه لان العقاب سهل اما حد منهم يتجوزها واما كام سنه سجن وخلاص انما لو العقوبه اعدام اكيد الموضوع ده هينتهى مع ان مفيش حد عاقل وفى وعيه ويعمل كده اغلبيتهم بيكونوامدمنين مخدارت
ربنا يسترنا فوق الارض وتحت الارض ويوم العرض امين يا رب العالمين
سلام ونورتينى

حنين القلب يقول...

maiosha
بالله عليكى مش ساعات الحقيقه بتبقى غرب من الخيال عمرنا ما شوفنا فى فيلم اب بيغتصب بنته بس فى الحقيقه حصلت كتير .
واى حد معرض لكده بس ربنا اللى بيستر
ربنا يسترنا جميعا
الراجل الكبير نصحه لانه شاف الشباب سكرانين وشكلهم شارب مخدارت وخاف على الشاب بس الشاب التانى ربنا يلطف بيه جرحه كان جامد اوى رغم انه فى وشه بس كان جامد
لا احنا فى دنيا بس مش كل الناس لحم ودم منهم حيوانات مش بيفكروا الا فى شهوتهم وخلاص .
ربنا يستر الملمين اجمعين
نورتينى وسلام

زُمُرده يقول...

حسبنا الله ونعم الوكيل

تعليق صغير
ما اهو لسه في خير في شبابنا

والدليل الشابين اللي اتعرضوا ليهم
وانت لما حاولتي تاخدي الرقم

اما الراجل العجوز معذور
حسبها بالعدد ويمكن في لحظه قالك بنت لابسه وحش تستاهل
او يمكن قالك دول مستبيعين ممكن يضربوا العيال او يشدوكي انت كمان

ربنا سترها معاك
وربنا يتولى البنت دي حيه ولا ميته

والشباب دول جزاهم عند ربنا شديد

اما اللي حاولوا يوقفوهم ففي ميزان حسناتهم وربنا يبارك فيهم

حنين القلب يقول...

زمرده
تحليك للموضوع عجبنى جدا
فعلا انا حسيت ان ده اللى حصل بس مش عارفه ليه برده حسيت بتقصير من ناحيه البنت دى وعلى فكرة دى طبيعتى دايما لما القى حد مظلوم مهما اعمل احس انى برضه مقصرة ويمكن ده لانى بكرة الظلم جدا
ربنا يسترها على البنت ويرحمها حيه او ميته
سلام يا سكرة