RSS

الأحد، 28 ديسمبر، 2008

سنه جديده

كل سنه وانتم طيبين
بمناسبه العام الهجرى والميلادى كمان
ويا رب السنه الجايه تكون احسن من اللى فاتت

واتمنى من الله ان السنه الجايه تكون بلدنا احسن

وتكون فلسطين اترحمت من الحرب اللى فيها والناس اللى بتموت وتترمى على الارض من غير عدد ومش لاقيين حد يقف جنبهم ولا حد يقول كفايه حرب ودمار وظلم وافتراه

بحلم بسنة جديده فيها خير وحب بين كل البشر

يا رب حقق حلمى

كل عام وانتم بخير

الخميس، 25 ديسمبر، 2008

تضامنا مع مدونى تونس

التدوينة البيضاء

الجمعة، 12 ديسمبر، 2008

هلال العيد

هل هلال العيد على الاسلام سعيد كل سنه وانتى كلكم طيبين و فى اتم صحه واحسن حال دايما يارب وهذا العالم دايما متجمعين انا ادبست يا جدعان فى التاج ده وللعلم انى اول مرة اجاوب على تاج لانى اصلا مش بحب اجاوبه بس جالى من اتنين مستحيل اقولهم لا خالد همس الاحباب وبقوله شكرا يا ابو همس على التدبيسه وصبرنى يا رب وماااااااشى يا ام مريم لينا قعده مع بعض ده التاااااج ماذا يمثل لك العيد؟ العيد على راى صفاء ابو السعود فرحه وعلى راى محمد سعد العيد فرحه ماااااااااء واكيد انا مش هعرف اكتر منهم يبقى العيد فرحه وما أكثر شئ يبهجك في مظاهر العيد ؟ تكبيرات العيد وفرحه الاطفال فى الشارع اوصف لنا طقوسك في العيد .. من ليلة العيد لآخر يوم ؟ زى كل الستات بروق البيت وانضفه واشغل التليفزيون على اخره على اغنيه هل هلال العيد وبعدين اروح اصلى وارجع اجهز الفطار اللى بكون طبخاه من ليله الوقفه افطر وبعدين نروح لحماتى وبعدين لامى وبس احكى لنا اطرف موقف حصلك فى العيد ؟ مرة كنا فى العيد وكان عندى وقتها 13سنه وقولنا نروح نتفسح طبعا روحنا حديقه الحيوان زى العيال وطلعت السلالم ولسه هدخل ولقيت نفسى واقعه تحت رجلين الناس وطبعا الدنيا زحمه جدا وكنت هموت مش من الناس اللى بدوس عليه لالالا من ريحه الشربات تخيلوا عيد والناس عماله تلف من الصبح والاخر يدوسوا عليه انا بس الحمد لله جت سليمه بتحرص على تهنئه الاهل والاقارب والاصدقاء فى العيد ...ولا مش بتهتم ؟ طبعا لازم اهنى الكل والغريب قبل القريب واجيب التليفون وابعت لكل اصحابى والغاليين عندى رسايل واقعد بقى ارخم عليهم واصحيهم فى العيد من الساعه 5 الفجر طبعا لازم يصلوا واللى مش هيصلى برضه هصحيه رخااااامه هههههههههههههههههه مين اول حد تزوره او تكلمه فى التليفون\الموبايل علشان تهنيه بالعيد؟؟ اول حد بزوره حماتى وده طبعا مش بمزاجى ده غصب واقتدار واول حد اكلمه فى التليفون اقرب حد لقلبى من اصحابى ايه الفرق بين العيد الحالى...والعيد ايام الطفوله ؟ الفرق كبير جدا زمان كنا اطفال ومش عندنا مسئوليه ولا حاجه تعكر صفو العيد كنا بنجرى ونتفسح ونلعب ولا فى دماغنا حاجه انما دلوقتى صعب اوى لما الواحد يحس انه فى عيد مشاكل الحياه والشغل والبيت بس الحمد لله انا بحس بالعيد علشان الاجازة ههههههههههههه كلمنا عن ذكرياتك في العيد تفتكر الحياة من غير عيد .. هتفرق كتير؟؟ بابا الله يرحمه كان هو اللى علطول يعمل لينا فطار العيد وده طبعا مزاج عنده ورغم انه يقعد يشخط ويزعق ونقعد نقول مش عايزين نفطر يا عم الحج حقك علينا وهو ابدااا بس بجد العيد معاه كان ليه طعم تانى الله يرحمه طبعا كانت هتفرق كتير العيد مهما كبرنا كل واحد بيشوف فرحته فيه وبعدين دى حاجه ربانى ازاى بقى مش تفرق وكنا هناكل لحمه كتييييييير ازاى لو مش كان فيه عيد إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟ اجمل رساله جاتلى بتقول: شعور مليان حب وحنان اهديه لاغلى واعز انسان واهنيه بعيد الاضحى واقوله كمان كل عام وانتى بخير وامان ...وحشتينى ودى كانت من اغلى حد عندى صحبتى رشا وبقولها ربنا يحفظك ويخليكى ليه ولا يحرمنى منك ابدا يا حبيبه قلبى لسه بتاخد عيدية ؟؟ من مين ؟؟ وبتديها لمين ؟ لغايه السنه اللى فاتت كنت باخد عديتى من بابا الله يرحمه ومن يوم ما اتجوزت باخد عديه من جوزى وبديها لاخواتى ايه رايك فى التاج ؟؟ جميل اوى بجد ويسلم ايد كل اللى كاتبه وجاوبه وبعته ليه تحب تمرره لمين من المدونين ؟ اذكر على الأقل 10 يا ربنااااا 10 طيب آبى بتناجى وخرفانها فاتيما حبيبه قلبى واحده مفروسه احمد سكر فشكول داليا قوس قزح سوووو عجوز وعندى 30 سنه مها زين هى فوضى نهر الحب خلاص كده ؟؟ طيب الحمد لله كل سنه وانتم بخير وعيد سعبد على الامه الاسلاميه جميعا

السبت، 6 ديسمبر، 2008

عيد سعيد

السلام عليكم وحشتووونى قوى وجاية النهاردة علشان اقولكم كل سنة وانتم بخير ويارب عيد سعيد عليكم وعلى المسلمين جميعا كل سنة وانتم طيبين وفى الفتة عايمين

الاثنين، 17 نوفمبر، 2008

كفايه .. حرام

السلام عليكم اخواتى واخوانى المدونين

وندخل علطول فى الموضوع علشان انا دمى محروق الصراحه

شهد...طفله عمرها 5 سنين زى اى طفل عندها اللوز بس ملتهبه شويه والدكتور قرر ليها عمليه وعلشان هى الوحيده عند والدتها قررت انها تعمل ليها العمليه فى عياده خاصه يعنى مش مستشفى حكومى وكانت البدايه من اول العمليه جرعه بنج زياده وبعدين فيه خطأ فى العمليه تسبب فى دخول الهوا فى القصبه الهوائيه ومش عارفه ايه اللى حصل بعد كده بس اللى اعرفه ان البنت بقالها 5 ايام فى العنايه المركزه وربنا يعلم اخرتها ايه؟؟

احمد ... 4 سنين عنده ازمه فى صدره وعلى فكرة ده ابن اختى وكان قاعد بيعلب عادى وفاجأه جاله ضيق نفس ووشه ازرق وجرينا بيه على عياده جنب البيت واخد ابره غلط كان هيروح فيها لان كان فيها نسبه كورتيزون عاليه على طفل فى السن ده ولولا ستر ربنا والمستشفى الخاصه اللى كملت علاجه كان راح فيها

ومن فترة كنت بتفرج على برنامج العاشرة مساء ولقيت طفله فى سنه رابعه ابتدائى واخدت برضه ابره غلط فى الوريد واتسببت فى تسمم فى دراع البنت واخرتها بتروا الدراع وكانت الاولى على مدرستها من سنه اولى لسنه رابعه

واخرتها ايه ؟؟؟

اهمال وعدم احترام اداميه حد

هو مش المفروض ان الدكاترة دول يكونوا على قدر من المسئوليه علشان يعرفوا ان بين ايديهم ارواح ومش لعبه

الطفل اللى بيجربوا فيه الادويه ويمكن دى تنجح ويمكن تفشل لو ابنه هيتحمل عليه كده

هيتحمل يشوفه نايم على سرير ومتوصل بخراطيم وابر مزرقه جسمه

هيتحمل ايه ولا ايه ؟؟

كفايه .. حرام

اتقوا الله وراعوا ضميركم واعرفوا ان اكبر ظلم هو ظلم الانسان فى صحته

حسبناالله ونعم الوكيل

الأربعاء، 12 نوفمبر، 2008

عيد ميلاد سعيد

عيد ميلاد سعيد عيد ميلاد مين يا حلوين عيد ميلاد ست الحلوين عيد ميلاد قمر العيلة عيد ميلاد اختى وحبيبتى مفروسة كل سنة وانتى طيبة وعقبال مليون سنة يا جميل والكل معزوم عندنا الكل يمد ايده يا حلوين بس خلوا بالكم التورته بالتقسيط المريح

الجمعة، 10 أكتوبر، 2008

اصل ولا صورة

**تحديث **
*********
تهنئة قلبية للاخت العزيزة كاميليا
بمناسبة الزفاف السعيد
الف مليون مبروووووووك
================
السلام عليكم ورحمه الله وبركاته اخواتى واخوانى المدونين ازيكم والله وحشتونى اوى فيه حاجه شغلتنى الايام اللى فاتت دى وهى انى لما ابص لاى حد اسئل نفسى يا ترى اللى بيتعامل معايا ده اصل ولا صورة؟؟؟؟ يعنى هو فعلا اخلاق وتربيه وتدين واحترام ولا دى صورة وقناع رسمه لنفسه دايماً السؤال ده جوايا !!!!! ليه مش بنتعامل من جوانا!!! ليه فيه حاجات بنصمم نداريها وبنخاف تظهر قدام اى حد لننكشف ونظهر على حقيقتنا زى ما نكون المفروض نتعامل مع كل انسان بصورة يعنى مع مراتك بصورة وصورة مع رؤسائك وصورة مع اصحابك يعنى المفروض تكون اصل و6 صور علشان تتعامل براحتك بقى طيب يا ترى فى الاخر بيعرف هو مين ولا بيتوه وسط الصور؟؟؟ ويا ترى اللى مش بيعرف الاصل من الصورة ده بيكون غباء منه ولا اتقان من الاخرين فى تقمص صورتهم . نفسى افهم ليه اقول حاجه وانا اقصد حاجه تانيه ليه مش نبقى واضحين مع انفسنا قبل ما نبقى واضحين قدام اى حد والاخر يقعد يغنى انا مش عارفنى انا توهت منى انا مش اناااااااااااااااااا سلام بقى اروح اشترى صور لانى للاسف مش عندى غير الاصل بس

الاثنين، 22 سبتمبر، 2008

عيد ميلادى انا...

السلام عليكم ورحمه الله وبركاته اخوانى المدونين كل عام وانتم بخير العيد على الابواب بس النهارده عندى انا عيد لوحدى اااااااااه عيد خصوصى حد عنده مانع زى النهارده انا جيت نورت البيت اه نورت الدنيا كلها زى ما ماما قالت علشان انا كنت اول مولود لماما وبابا اه مهو انا البكريه العاقله حد قال حاجه تانيه !!! عارفين انا كل سنه لازم احتفل بعيد ميلادى وبحب اوى اليوم ده انما السنه دى مش عايزة احتفل بيه يمكن خايفه عمرى يجرى من غير ما احقق اللى بحلم بيه يمكن حاسه ان عمرى اتسرق فى شغل وبيت ودنيا مش عشتها بس انا قولت ان السنه دى حصلى حاجه مختلفه عن كل سنه وهى انى اتعرفت بيكم وقولت لازم احتفل معاكم سنه كانت بجد صعبه اوى بس الحمد لله عدت ويا رب السنه الجايه تكون احلى على قد ما السنه دى اخدت منى اغلى الناس والدى الله يرحمه على قد ما عوضتنى بناس بجد طيبين وحنينين ومحترمين جدا بجد بقولكم كلكم كل سنه وانتوا كلكم جانبى ودايما بيجمعنا الحب والصفاء . ودلوقتى كل واحد و واحده يقف حوالين التورته ويجيب الهديه الاول قبل ما يلمس التورته ولا الكاكولا ونغنى كلنا سوا هابى بيرزداى تو يو ويلا حالا بالا بالا هنو ابو الفصاد وكمان عيد ميلاد الليله مين عيد ميلاد النونه هنفرح ست الحلويين ونشلها فى عيونا . واووووووووووووووووووف وطفينا شمعه سنه فاتت واحتفلنا بسنه جديده يا رب تكون سعيده عليه وعليكم
كل سنه وانا وانتم طيبين..

الاثنين، 1 سبتمبر، 2008

اللهم تقبل منا رمضان

اللهم تقبل منا رمضان

كل عام وانتم بخير

الاثنين، 25 أغسطس، 2008

اه... يا بلد

تحديث

كل سنة وانتم طيبين وبصحة وسعادة بمناسبة شهر رمضان
انا اجازة طوال شهر رمضان
انتم عارفين بقى
===============
السلام عليكم اخوانى واخواتى المدونين
النهارده وعلى غير العاده قريت جريدة الجمهوريه وانا اصلاً مش بقرا الا صفحه الحوادث بس فيه خبرين شدونى فى الصفحه الاولى :
الخبرالاول بيقول:
د/ الجمل : لن يضار معلم من نتيجه اختبار الكادر بدأت امس اختبارت التسكين بالمرحله الثانيه لكادر المعلمين يشارك فى الاختبارت نحو 945 الف معلم ومعلمه على مستوى الجمهورية واكد الدكتور يسرى الجمل وزير التربيه والتعليم اثناء تفقده سير الاختبار انه تم اعتماد 2.5 مليار جنيه من ميزانيه الدوله لتنفيذ المرحله الثانيه من الكادر بهدف رفع المستوى المادى للمعلمين وقال ان هذه الاختبارت تعد علامه فارقه للانتقال بالمعلم من مجرد موظف يترقى بالاقدميه والرسوب الوظيفى الى مصاف الاستاذ الجامعى الذى يتم ترقيته وفق معايير محدوده واضاف انه لا يضار اى معلم لن يجتاز الاختبارت وسوف يحصل على كل الامتيازات والحوافز المقررة له (ده الخبر بالنص ) بصوا بقى انا اللى فهمته من الخبر ده ان الكادر ده ولا ليه اى لازمه وزى قلته لان اللى هيسقط فيه ولا هيحصل ليه حاجه ولا اللى فيه هياخد حاجه يبقى لازمته ايه ,وعندى سؤال والنبى معلش اصلى فهمى تقيل شويه ال 2.5 مليار دول هيرحوا فين يعنى للمعلمين ولا للكادر ولا للناجح يرفع ايده حد يجاوبنى ويكسب فيه ثواب (ملحوظه اللى يا خد حاجه من المليارات دى من المعلمين يبقى يقولى )
الخبر التانى : عاطل يبيع لحوم الكلاب .
تمكنت مباحث اللبان فى الاسكندريه من ضبط عاطل يقوم بذبح الكلاب الضاله فى شقته بحارة الريديه ثم ضبط جثتين كلبين بدون رأس واخرين معدين للذبح ... اعترف العاطل انه يقوم باصطياد الكلاب الضاله من الشوارع ويقوم بذبحها ويعرضها بالاسواق على انها لحوم بلدى .
انا الصراحه بعد الخبر ده بلعت ريقى وافتكرت اخر مرة اشتريت فيها لحمه وتخيلت انها لحمه كلاب صحيح اكيد كنت ههوهو بس افتكرت انها كانت مسكرة وقبل كده جه مسئول كبير فى التليفزيون وقال اللحمه المسكرة تبقى لحمه حمير والله يا جماعه مش فارقه حمير من كلاب هنقول ايه حسبنا الله ونعم الوكيل السنه اللى فاتت لقوا فى اسكندريه اكتر من 200 راس حمار ومش لقيوا جثثهم والسنه دى كلاب يا ترى السنه الجايه المينيو ايه ؟؟؟؟

الأربعاء، 20 أغسطس، 2008

يوم من عمرى

تحديث
اول مرة اعمل تحديث فى حياتى
بس التحديث ده غالى عندى قوى ومش ينفع اعمل تحديث المفروض انى اعمل بوست كمان ما هو الخبر يستاهل اكتر من كده عايزين تعرفوا سبب التحديث طب استنوا خليكوا قاعدين شوية الخبر بيقول ان فرنسا هانم كلمتنى فى التليفون ايون كده والله كلمتنى انا حنين القلب وقالتلى طمنى كل الناس عليه وسلميلى عليهم كلهم نفر نفر ونفرية نفرية وقوليهم كل سنة وانتم طيبين بس خلاص احسن انا فرحانة وسعيدة قوى قوى .. =========== السلام عليكم ورحمه الله انا اول مرة احضر تجمع تدوينى وبصراحه بحلم بيه من ساعه ما دخلت العالم ده بحلم بالناس اللى ارتبط بيهم ونفسى اتعرف عليهم واشوفهم من كتر ما كنت بفكر فيهم حلمت بناس عمرى ما شوفتها بس تخيلتها فى الحلم زى عاشقه النقاب واللى لسه مش اتشرفت بيها ولماضه واللى الحمد لله قابلتها وفاتيما حبيبه قلبى ونوران بجد الناس دى من كتر تفكيرى فيها حلمت بيها وكنت اتمنى يكونوا كل المدونين موجودين علشان اتعرف عليهم بس خيرها فى غيرها المهم انا مش بعرف احكى يعنى هقول وخلاص واستحملونى بقى اليوم ابتداه الساعه 11 الصبح واول حد شوفته كان خالد همس الاحباب ايه يا جماعه الاخلاق دى وجدعنه وشهامه ولاد البلد وخفه دم بجد حسيت انه اخويا انسان من اول ما تشوفه تحس انه قريب منك وكأنك تعرفه من فترة وبعدين شوفت الاب الروحى للمدونين كلهم بابا ابو خالد صاحب مدونه ذكريات ابوخالد مش عارفه اقول عنه ايه حسيت جنبه بدفىء وحنيه وطيبه مش حستها الا مع والدى الله يرحمه وبجد يا بابا ابوخالد اشهد الله انى احتسبك ابى امام الله شوفت كمان حبيبه قلبى واللى كنت هتخنق جدا لو اعتذرت او مش جت لانى اصلا كنت هموت واتعرف بيها فاتيما صاحبه مدونه روح قلب ماما انسانه صافيه جدا ونقيه وطيبه لابعد الحدود جواها حب وحنان يغرق بلد ومن ساعه ما دخلت وانا عينى عليها وهى حست انى عايزة اقعد جنبها واكلمها وفعلا نجحت انى استفرد بيها ومش هقول فين وقعدنا ننم شويه كتير وكنت مبسوطه اوى انى اخيرا اتعرفت بالست اللى دخلت قلبى من قبل ما اشوفها ربنا يرجع ليكى يوسف يا حبيبتى علشان اشوف ضحكتك مليه عنيكى من غير الم وطبعا شوفت الشقيه مها زين واصحابها هبه ورحاب ودى اللى كانت فعلا مفاجاه ليه عليها خفه دم رهيبه واخلاق ودماغ كبيرة وبتموت فى التصوير واتصورت وهى بتكشف عليه الا بالحق يا مها هى الاستشارة امتى وفين الروشته ؟؟ واصحابها هاديين جدا واوحده منهم تاهت ومش هقول تاهت فين برضه وشوفت سوووو عجوز وعندى 30 سنه فنان وناقد هايل وبقولك لازم تمثل يا سوووو كمان بجد ليك حركه كده بتعملها بوشك بموت على نفسى من الضحك دمه زى العسل واى حد يلاحظ فيه مجدعه ورجوله من اول ما يتكلم وعلى طبيعته خالص ومع انه يا عينى حرق كربوهيدرات كتير بس بجد انبسطت اوى انى اتعرفت على شخصيه جميله كده ولماضه وصحبتها الدكتورة لماضه اخلاق وتدين وطيبه بس فعلا لمضه شويه وصحبتها اخلاق وهاديه واتكلمت معاها شويه صغنين بس اتشرفت بيها واحمد سكر انسان هادى واخلاق وكان اغلب الوقت ساكت وسعدت اوى انى اتعرفت بيه وشيماء سمير انسانه رائعة وطيبه وعسوله وهاديه وصغنونه بس عليها شعر وطريقه القاء تجنن تخطف اى حد بيسمعها موهوبه بجد ومستقبلك هايل باذن الله يا شيمو ودكتور محمود صاحب مدونه بطوط حبوب انسان متدين واخلاق وفخور جدا بالمنوفيه واللى منها وكان نفسه يا عينى ينام بس فقرة النوم كانت ملغيه معلش يا دكتور زمرده لذيذه واخلاق ودمها خفيف وكان نفسى اقعد معاكى ونتكلم اكتر من كده ومصطفى ساجى هادى جدا واخلاق بس مش كلمته معلش خيرها فى غيرها واميرة صاحبه مدونه سهر الليالى هاديه جدا ومش لحقت اقعد معاها تتعوض المرة الجايه والمهندس محمد حسن صاحب مدونه اسكندرانى اوى انسان ناضج واخلاق وفكر واعى وبجد وجهه مشرفه للمصريين بالخارج ومتجوز من 11 سنه صح يا هندسه مين تانى مين تانى ايمان انسانه هاديه جدا ورقيقه بس معلش نسيت مدونتك ورومانسى كان ساكت بس واضح عليه انه بيستكشف الناس الاول بس اخد مدوتناعلشان نتواصل اسفه جدا لو كنت نسيت اى حد سامحونى واعذرونى الزهيمر وحكم السن اتكلمنا فى ايه بقى اتكلموا فى حاجات كتير مثلا لماضه اتكلمت فى ازاى نحافظ على مدونتنا من السرقه خصوصا انها اتسرقت فعلا وسوووو اقترح انها تتسجل بالشهر العقارى وده برضه مش هيمنع سرقتها لان لو اى حد اضاف ولو فقرة بسيطه على الفكرة تبقى ملكه وخالد اتكلم عن صورتنا اللى بتتشوه فى الخارج بسبب السينما وافلام اللى كلها مشاهد اباحيه يا بتتكلم عن السرقه والقتل واحنا برضه لينا دور لان اغلب البوستات بتتكلم عن السلبيات بس اكيد فيه ايجابيات وبعدين اتغدينا بعينك يا رايق وروحنا القلعه وبابا ابو خالد كان عايز يلحق معرض الكتاب بس للاسف كان قفل وكلنا جيلاتى من عند عزة وسووووووووووو كل ام على وابو على وحلى بالعيله كلها بس اقولكم على حاجه انا بجد حسيت انى وسط اهلى الاب والاخوات اللى تحس انهم بجد بيحبوك وخايفين عليك والام فرنسا حبيبتى حتى لو كانت مش موجوده كفايه اننا كلنا حسينا بوجودها وسطنا والرايق اللى كنت بجد اتمنى يحضر بس ظروفه اقولكم على حاجه تانى كلكم وحشتونى جدا من امبارح لحد خالد الا هو الاجتماع الجاى امتى فى اسكندريه بكرة ولا بعد بكرة ؟؟؟؟؟ السلام عليكم ورحمه الله وبركاته

الأربعاء، 6 أغسطس، 2008

نصيحة لكل انسة مخطوبة

اختي العزيزة.. لو ربنا فك عقدتك.. واتخطبتي.. فإليكى نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..أجمل ما في الخطوبة العزومات الرومانسية .. على أحلى محلات أكل فى البلد.. واللي عمرك ماهاتشوفيها بعد الجواز.. المهم نصائحي لك عند أي عزومة مع خطيبك..
قلناايه ؟؟؟؟ برافو عليكى شاطرة ايووووون الرقَّه ....
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًااا .
2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي...العيش بيتقطع بالسكينة فى الطبق. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه...
3- الشورررربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص. . ومن غير ماتقعدي تنفخي فيها.. زي القهوجي اللي بينفخ فى الحجر للزبون.. وطبعــاً عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك.. بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....
4- الرز طبعاً .. بيتاكل بالشوكة.. أوعي إيدك تتمد ع المعلقة. . وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..
5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها فى بؤك من سكات.. مش تشفطي المكرونة عود عود..
6- السمك.. مشكلة.. شوفي.. بتفصلي اللحم عن الشوك.. إزاي..؟؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فضايح.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..
7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت بابـا.. وأتنهدي جامد وقولي.. برضه..؟؟؟ وتروحي قاطعة راس الجمبري ياية.. بالشوكة.. أنا فى عرضك إنسي المصمصة دلوقتى..
8- البطاطس سواء مسلوقة أو محمرة.. أوعي تهرسيها وتدبيها على الرز وتدي ...لا..لآ...لآ...بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي..
9 -الفاكهة.. لو الفاكهة فيها بذر.. طلعيه من بؤك بالراحة وحطيه فى إيدك وهي مقفولة.. وبعدين فى طفاية السجاير اللي على الترابيزه.. أوعي ياحبيبتي من نظام التفتفة للبذر.. إنسي....
10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه.....وبعدين تمسكي الفوطة اللي دايمًا موجودة على التربيزة من غير لازمة.. وتبوسيها.. آل يعني بتمسحي بؤك.. وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفـــا

الخميس، 17 يوليو، 2008

عيد زواج


السلام عليكم ورحمه الله وبركاته
اخواتى واخوانى المدونيين
والله كلكم وحشتونى
هى \ صباح الفل والورد والياسمين يا روحى
هو \ (صاحى مفزوع ) خير فيه ايه ؟؟
هى \ مش فيه يا روحى بقولك صباح الفل والورد والياسمين
هو \ منا عارف اليوم اللى اصحى فيه على دلع بيبقى يوم مش معدى . ربنا يستر
هى\ نعم نعم ليه هو انا منكده عليك
هو \ لا يا حبيبتى صباح الحب والهنا
هى \ قوم يلا انا مجهزه ليك فطار يجنن
هو \ (مستغرب جدا ) مجهزاه ليه اناااااااااا
هى \ اومال للجيران مالك يا راجل
هو \ اصلها غريبه اوى انتى فاكرة اخر مرة جهزتى ليه الفطار كان يوم عيد تحرير سينا
هى \ يا اخى حرام عليك تحرير سينا ايه بس والله شكلى هحررك النهارده
هى \ انت مش عارف فيه ايه النهارده ؟
هو \ خير فيه ايييييييييييييييييه ؟
هى \ النهارده فيه مناسبه مهمه جدا
هو \ مناسبه مهمه ... ممممممممممممممممممممممممممم
يبقى النهارده عيد الام الحق اقوم البس واروح اشترى هديه لماما
هى \ ماما مين وانا مالى ومال مامتك هو فيه عيد ام شهر 7
هو \ اه صحيح اومال مناسبه ايه ؟؟
هى \ افتكر دى حاجه تخصنا احنا الاتنين
هو \ اااااااااااااااه يبقى النهارده عاشورا الحق اقوم البس واشترى البليله علشان تعمليها لينا
هى \ يا لهووووووووووووووووى عاشوا ايه ؟؟ وكل شويه الحق اقوم البس انت عايز تهرب وخلاص هو فيه عاشورا فى رجب يا راااااجل
هو \ انا غلب حمارى قوليلى انتى
هى \ زى النهارده من 6 سنين اتنيلت واتجوزتك يلا بقى قوم ورينى جبت هديه ليه ايه ؟؟
هو \ وده مناسبه محتاجه هديه .. دى محتاجه نقف 8 ساعات حداد او نصلى ونستغفر
ربنا على الذنب ده وندعى ربنا يسامحنا عليه
هى \ليه ان شاء الله انت ندمان انك اتجوزتنى نسيت لما كنت بتقف ليه فى البلكونه طول الليل فى عز الشتا زى الكتكوت المبلول علشان بس تشوفنى دلوقتى بقيت ذنب .
هو \ (لسه رايح يمد ايده على الفطار ضربته على ايده وشالت الفطار)
هى \ عندك حق هى فعلا غبطه ولازم تتصلح
طالقنى .................. طالقنىىىىىىىىىىىىىى
هو \ انا قولت انه نهار مش فايت . لا يا حبيبتى انا فاكر وهنزل اشترى الهديه اللى انتى عايزاها
هى \ ولازمته ايه ده كله من الاول صحيح رجاله مش بتيجى الا بالعين الحمره
هو \ كل سنه وانتى طيبه يا حبيبتى
هى \ وانت طيب يا روح قلبى ونبضه
ملحوظه صغننه
ده فعلا عيد جوازى السادس
عايزة اقول كمان لخالد همس الاحباب كل سنه وانت طيب وعقبال مليون سنه
ولهمس كمان عيد ميلادها الشهر ده ويا رب نشوفك احلى عروسه ويحفظك
وداليا قوس قزح عيد ميلادها برضه كل سنه وانتى طيبه
كل سنه وانتم كلكم طيبين
السلام عليكم

الأربعاء، 2 يوليو، 2008

أحساس غريب

السلام عليكم ورحمه الله وبركاته اخواتى واخوانى المدونين ازيكم كلكم والله وحشتونى جدا من اخر بوست كتبته وانا مش عارفه اكتب ايه وبصراحه وفاه والدى اثرت عليه اوى حسستنى انى مش عايزة اتكلم وساعات اتكلم واقعد اهزر مع اصحابى واول ما اكون لوحدى القى عينى غررت بالدموع وحسيت بالوحده تانى . بس اللى حصلى من اخر بوست كتابته انى حسيت بجد ان ليه وجود وفيه ناس حست بيه كتير وناس بعتت ليه اميلاتها تسئل عنى وتطمن عليه وناس تتصل بيه بجد انا بشكركم كلكم وطبعا اول واحد اقوله بجد شكرا خالد همس الاحباب لانه بجد اخ بمعنى الكلمه انسان اخلاق وادب بجد وبابا خالد وعاشقه النقاب وآبى وسكر وكل اللى سئلوا واطمنوا عليه . انما بجد كل ده شئ واللى حصل النهارده شئ تانى خالص حاجه هزتنى بجد والله انسانه جدعه واقل ما يقال عنها انها رمز للطيبه والحنيه والاحساس المرهف طبعا كلنا كده عرفنا مين ؟ دى خيخه واللى هى مش خيخه خالص بالعكس والله من مكالمه بسيطه بينى وبينها النهارده خففت عنى كتير وكفايه انها بكت لمجرد انها قرت بوست من واحده ولا تعرفها ولا شافتها بس حست انها مجروحه .والله حسيت فى صوتها بحبها ليه وخوفها عليه . ايه الشفافيه والنقاء والحب والحنان اللى فى المدونين دى؟ خيخه عايزة اقولك حاجه بجد انتى انسانه بمعنى الكلمه وانا والله كنت بحبك قبل ما اتكلم معاكى وحبيتك اكتر من بعد ما اتكلمت معاكى ربنا مش يحرمنى منكم كلكم ملحوظه صغننه يا جماعه اللى هينزل اسكندريه للمصيف يقولى وانا هعزمكم كلكم على جيلاتى وفيشار ودرة كمان ووجبه كامله من قدوره سمك وسبيط وجمبرى جامبو وكل اللى نفسكو فيه واطمنوا حساب الجيلاتى والفيشارو الدرة عليه والوجبه بس على ابو الكرم خالد همس الاحباب هو اللى قال كده وانا خليته يمضى على كلامه علشان لو فيه غسيل مواعين بعد الاكل يبقى عليك يا ابو همس ماااااااااااااااااشى....... السلام عليكم

الجمعة، 13 يونيو، 2008

قلبى ينزف

السلام عليكم ورحمه الله وبركاته اخوانى واخواتى المدونين يا رب تكنوا كلكم فى احسن حال انا مخنوقه جدا يمكن اكون مش عارفه السبب ويمكن عارفاه وبستعبط يمكن الشغل يمكن البيت يمكن الدنيا كلها بس ما هيه دى حياتى ايه اللى خانقنى دلوقتى منها كده من اول ما اتجوزت يمكن وحشنى ؟؟ لا مش يمكن هو فعلا وحشنى .. وحشنى لدرجه انى حاسه انه عايش معايا شايفاه وحساه وساعات والله بسمعه كمان ساعات بتمنى اضمه اوى علشان اتاكد انه معايا وابكى وامسح دموعى واقول اكيد هو حاسس بيه واكيد ربنا هيكرمنى بيه وحشتنى اوى اسمع كلمه اى ست بتتمناها ماما وحشنى احس بيه جوايا والمسه بقلبى قبل ايدى وحشنى اوى اشوفه وهو بيضحك وبيبكى وبيحبى وبيكبر ادامى طبعا الحمد لله على كل شىء واللهم لا اعتراض انا بس بقول انه وحشنى اوى وخايفه اوى لحسن مش اشوفه انا اسفه لو كلامى هيضايق حد بس ده احساسى اللى عايشه فيه ليل ونهار . عارفين لما بشوف نونو فى اى مكان بسرح وبتمنى يكون ابنى انا وممكن ابوسه اقعد العب معاه وانسى خالص اى حاجه تانيه والاخر القيه بيعد عنى افوق وافتكر انه مش ابنى وانى لسه ربنا مش كرمنى هو صحيح اتاخر شويه بس انا عندى يقين من ربنا ان ربنا هيكرمنى بيه ان شاء الله وهربيه واشوفه وهو بيكبر ادامى وهفرح بيه واحساس الحرمان الفظيع ده يمشى بقى لانى مليت منه . معلش انى بحكى عن حياتى الخاصه بس حسيت انى عايزة افضفض ومش لقيت احسن منكو افضفض معاهم . كفايه نكد بقى لحسن انا عارفه نفسى نكديه اوى السلام عليكم ورحمه الله وبركاته

الخميس، 5 يونيو، 2008

احنا فين؟؟

السلام عليكم ورحمه الله وبركاته
اخواتى واخوانى المدونين
والله وحشتونى جدا المهم ندخل فى الموضوع علطول
اولاً البوست ده ولا حلم وخيال ولا بيتهيألى ده حصل وادامى نبداء...

كنت واقفه مكانى فى شارع طويل عريض وللعلم ده شارع رئيسى وطبعا انا بخرج الساعه 6 صباحا المهم كنت واقفه زى كل يوم ومش كان فيه ناس كتير يعنى يا دوب 3 شباب ورجليين كبار فى السن ووقفت جانبى بنت امورة لابسه لابس مغرى شويه صحيح انما ما كلنا بنلبس عادى يعنى المهم واحنا واقفين فى هدوء جدا وقف ادامنا ميكروباص ونزل منه 3 شباب ومسكوا البنت وضربوها حته الم ؟؟
البنت زى ما يكون جت ليها حاله ذهول وهما التلاته فى نفس الصوت عايزة تهربى من اهلك يا......دى شتيمه طبعا المهم البنت بقت تصرخ انتوا مين انا مش اعرفكم وهما نازلين فيها ضرب وشد من شعرها وتدخل شاب من اللى واقفين وقاله ممكن تورينى بطاقتك ونتاكد انك اخوها راح واحد من التلاته طلع مطوه وقاله خليك فى حالك احسنلك
البنت بقت عماله تستنجد والراجل الكبير قال للشاب خليك فى حالك يا ابنى احسن ما يضروك واحد تانى دمه حامى وشهم راح قاله لا احنا مش هنسكت ويادوب قرب منهم وراح واحد منهم هوووووب عوره بالمطوه بطول وشه والدم والصريخ انا بعدت شويه وقولت اخد رقم الميكروباص وكانى ماشيه بعيد عنهم خصوصا ان الناس ابتدت تلم ولا لقيت نمرة للعربيه !!!!
يا لهوى فين الرقم والمرور وازاى العربيه ماشيه كده وفى غمضه عين كانوا واخدين البنت فى العربيه وطارت العربيه ناس هتقول ليه مبلغتوش البوليس الموضوع مش اخد اكتر من 4 دقايق والبنت الله اعلم بيها وفعلاً اتصالنا بالبوليس والاسعاف للراجل
المجروح بس بعد ايه ؟
انا عايزة افهم احنا فين فى مصر ولا شيكاغو احنا الناس اللى كانوا موجودين من زمان ولا ايه اللى حصلنا فين الناس اللى بيحكى عنهم ابى العزيز ابو خالد فين ابن البلد اللى يخاف على بنت بلده زى ما تكون اخته
يا جماعه الشباب خلاص عليه العوض فيهم عندنا الشباب بيفرقوا الحشيش فى الشوارع وفى ارقى الاماكن وانظفها يبقى فاضل ايه ؟؟
اغتصاب ... وادمان..... واعتداء على بنت فى النهار
بالله عليكو قولولى فين الامان فى البلد دى
البنت بتخرج ويا عالم هترجع تانى ولا لاء ومش شرط انها تكون لابسه لبس مغرى لالالا طفله من كام يوم عمرها 6 سنين وخطفوها برضه واغتصبوها وتانى يوم اهلها لقوها مرميه فى شارع فاضى راحوا بيها المستشفى البنت ماتت من النزيف
انا بقول لكل شاب كلمه واحده بس وانت بتعمل اى شىء يغضب ربنا افتكر ربنا
افتكر امك...اختك...زوجتك.....بنتك ....وداين تدان
وحسبيا الله ونعم الوكيل
السلام عليكم ورحمه الله








الأحد، 18 مايو، 2008

فرنسا حبيبتى








السلام عليكم ورحمه الله وبركاته

أنا لما بحب بحب بكل ما فيه

بقلبى وروحى وعقلى وحتى الدمع فى عنيه

وحبيتك يا بنت الناس بكل صدق الاحساس

ولقيتك اعزواغلى ما ليه فى المدونه ديه

والله ما عارفه اقول ايه دماغى مشتته حاسه انى مش ظبوطه

ممكن اكون عاطفيه زياده عن اللازم

ممكن اكون بتعلق بالناس بسرعه وبحبهم بسرعه اكتر من اللازم

ممكن اكون مش طبيعيه لانى بنهار لما اى حد بحبه بيغيب عنى

الله اعلم

بس الحاجه الوحيده اللى اعرفها انى بجد بحب فرنسا جدا من اول مرة دخلت عن طريق صديق عزيز هو اللى عرفنى على العالم ده الاول كان النت زهق وملل

واول مرة ادخل عالم المدنون لقيت صورة عبله كامل شدتنى الصورة قولت ادخل اشوف ايه جوا .

لقيت موضوع عن واحده اسمها ام دبوه وعن صفيحه الزباله اللى مصممه تخليها بره الشقه وضحكت جدا طول ما انا بقرى البوست والاخر افأجى بان اللى بتكتب البوست بتقول انها قعدت تكتبه اكتر من 5 ساعات لانها لبسه قميص جبس وممنوعه من الحركه الجامده .

من اول مرة حسيت قد ايه الانسانه دى بجد عظيمه وجامده وبتقدر تصبر على المتاعب وحسيت انها حته منى لانى حصلى تقريبا نفس الحادثه بتاعتها بس انا وقت الحادثه كرهت نفسى وكنت بتمنى الموت انما هى قاعده بتكلم اصحابها وبتضحك وبتكون سبب فى ضحكهم وممكن تكون هى بين ضحكها بتبكى من الالم .

فاكرة يا فرنسا لما علقت عندك على موضوع الدكاتره الفاشله وقولت ليكى الدكتور عايز يعيد العمليه تانى علشان نفسيتى ترتاح رغم انه عارف ان العمليه كلها غلط وقولت ليكى بفكر اعمل لضهرى سوسته علشان يبقى سهل الفتح لو حب يغير حاجه تانى ؟؟

فرنسا انا من اول ما دخلت هنا وانا بحبك وكنت كل يوم اول حاجه اعملها لما ارجع من الشغل انى افتح مدونتك واشوفك كاتبه ايه ولما كنتى بتتاخرى فى البوست شويه كنت والله بدخل على المدونين التانيين ادور على تعليقك واقراه .

تخيلى واحده اتعلقت بيكى كده وبتحبك كل الحب ده مش تستاهل منك انك تطمنيها عليكى ولو بكلمه واحده ؟؟؟

والله يا فرنسا ما طالبه الا كلمه انك بخير واتمنى من الله ان يكون بعدك عننا مش يكون بسبب قهرى .

استودعتك الله الذى لا تضيع ودائعه .

امنيه وحيده اتمنى من الله ان يحققها ليه(انك تكونى اول تعليق على البوست ده يا فرنسا)

السبت، 17 مايو، 2008

تحديث
الحمد لله الفكرة اتلغت من اساسها واللى قدموا استقالات سحبوها وهيعملوا طلب نقل اخيرا بقى لينا صوت وبنعرف نثبت على رائينا.

الأحد، 11 مايو، 2008

فكر جديد لنصب شديد


السلام عليكم اخواتى واخوانى المدونين \
النهارده صحيت زى كل يوم على اغنيتى المفضله يا حبيبتى يا مصر يا مصر
ولبست هدومى ونزلت شغلى زى كل يوم وعادى ابتدينا شغل وفأجاه:
المدير باعت عايزنا انا ومجموعه من زمايلى كلنا فى نفس
الصوت
ليه؟؟؟
المهم روحنا ودخلنا المكتب الفخم ودار الحمار الاتى سورى قصدى الحوار الاتى :
احنا : السلام عليكم
هو : عليكم السلام اتفضلوا لحظه وافضى ليكو
احنا: فضلنا مستنين وبعدين بص لينا بصه زى ما يكون بيقول اقول ليهم ايه ؟؟
هو : بصوا يا جماعه الشركه دى بتاعتنا كلنا وفاتحه بيوتنا ولازم نخاف عليها
وكلنا زى بعض هنا وانتوا عارفين طبعا ان مكتبى مفتوح ليكم 24 ساعه ..
احنا: فى عقل بالنا اه صح شغالين مين يا عم احنا كل قبضنا ملاليم بالنسبه ليك انت بتقبض فى الشهر اكتر من 15000 جنيه واحنا احسن حد فينا شغله بالاوفر تيم 650 جنيه وباب مين اللى مفتوح الباب ده مش بنشوفه مفتوح الا لما تكون داخل وخارج ومرة كل اسبوعين بتيجى ايه يا عم انت فاكرنا مش من هنا ولا ايه يلا ما علينا ..
هو: لما لقانا ساكتين قال افاجئهم ؟انتوا يا جماعه هتقدموا استقاله دلوقتى وهتاخدو كمان استمارة 6 يعنى هتخرجوا من التامينات؟؟؟؟؟؟
احنا: اللى سورقت واللى لطمت واللى اغم عليها وانا فتحت بقى وتنحت قولت فى عقلى يا لهوى هيخصخصونا بس هيخصخصوا واحنا اصلا قطاع خاص المهم فوقنا من الصدمه ....
احنا: خير فيه ايه يا فندم
هو: يا جماعه احنا شركه كبيرة وبندفع ضرايب كتير وفكرنا فى حل لقينا الحل الوحيد اننا
ننقل المصنع من مكانه ونغير اسمه وطبعا انتوا كمان لازم تتنقلوا بس بعقد جديد وتأمينات جديده علشان بتوع الضرايب الوحشيين ومتقلقوش نفس المرتب ونفس التأمينات بس العقد بس هو اللى هيكون جديد واهه ناخد كام سنه اعفاء من الضرايب واحنا اولى بفلوسنا ولا ايه
انا : فى عقلى بالى يا ولاد الحراميه احنا شركه كبيرة وبتكسب ملايين وصاحبها احد الوزراء الحاليين ازاى نعمل كده اومال خلينا ايه للناس الغلابه اللى قرفنهم طول النهار فى
التليفزيون هفوترك ولا اظبطك لا ومين اللى بيظبط اول واحد المفروض انه يدفع الضرايب
ولا هى الضرايب دى على الغلابه وبس بقى ده اسمه كلام!!!!!!
طيب سؤال اخير بالله عليكو ده نصب ولا فلوسنا وحقنا زى ما حضره المدير ما بيقول ؟؟
ملحوظه صغننه:
انا رفضت انا وزميلاتى موضوع الاستقاله وجارى المناقشات بيننا
السلام عليكم ورحمه الله وبركاته

السبت، 26 أبريل، 2008

اللهم ثبت قلوبنا

السلام عليكم اخوتى واخواتى المدوني: عايزة اعرف حاجه ليه الحاجات الكويسه هى اللى بتتغير فينا والحاجات الوحشه ثابته مع ان المفروض العكس يعنى مثلا تلاوة القراءن تكون فى شهر واحد رمضان والزكاه فى مواعيدها وبس مع اننا طول السنه بنغلط وبكنون محتاجين لحاجه تخفف من زنوبنا يعنى احنا متهيألى اقل شهر بنغلط فيه وبنواظب على الصلاه والسنن والطاعه والاستغفار بيكون فى رمضان طيب وباقى السنه ليه ارادتنا بتضعف ليه بنقع فى نص السنه ونغلط وممكن نبطل الاستغفار والزكاه وممكن كمان الصلاه كل يوم يقع مننا فرض او اتنين عندى حكايه عايزة احكيها يا رب تعجبكم وعلى فكرة حصلت بجد يعنى مش تأليف ولا حاجه بس من زماااااااااااااااان . كان فيه شيخ عايش فى اعلى الجبل عاش 40 سنه مش بيعمل اى حاجه الا انه يعبد ربنا صلاه وصوم وقيام ليل عباده حقيقيه من قلبه والناس اللى فى المدينه هما اللى بيبعتولوا الاكل وكلهم عارفين انه شيخ صالح زاهد فى الدنيا لا اتزوج ولا خلف اولاد عايش لربنا وبس فى المدينه دى كا فيها اسرة من 3 رجاله واختهم الوحيده وجالهم شغل سفر بره البلد وقعدوا يفكروا هيودوا البنت فين ملقوش فى القريه الا الراجل الصالح اللى عايش فى الجبل وطالعوا ليه اخواتها وطالبوا منه انهم يسبوها عنده وانه اكتر شخص هيحفظ الامانه لانه يعرف ربنا كويس المهم الشيخ وافق وهما سابوا اختهم وسافروا لمده سنه . اول شهر كان بيودى ليها الاكل ادام البيت من بره ويسيبه ويمشى وهى لما تفتح الباب تاخده وتاكل قعدوا على الحال ده شهر وبعدين الشيطان وسوس ليه انه مش هيحصل حاجه لما يخبط عليها واداها الاكل بأيده ويطمن عليها دى امانه طبعا ولازم يطمن عليها واكرام الضيف واجب برضه وربنا امرنا بكده وفعلا خبط عليها وشافها لاول مرة فهى صغيرة وجميله واطمئن عليها واداها الاكل ومشى وقعدوا كده 10 ايام وبعدين الشيطان وسوس ليه وقاله ادخل كل معاها وسليها هى برضه بنت ولوحدها اكيد بتتخنق وانت برضه مش هتغضب ربنا بالعكس ده انت هتخليها متتخنقش من قعدتها لوحدها المهم بقى فعلا بيدخل ياكل ويقعد معاها. ويوم وراه يوم طبعا اتشالت الحدود اللى بينهم ووقع فى الغلط وزنا بيها وساعتها الشيطان قاله ان ربنا غفور رحيم وانت حسناتك كتير واكيد ربنا هيسمحك وفضل عايش معاها زنا وحياه حرام فى حرام وبعد كام شهر بقيت حامل طلب منها تنزله رفضت واستنى عليها ما ولدت وبعدين الشيطان قاله لو سيبت الطفل امرك هيتفضح واخوتها هيعوفوا هيفضحوا واحتمال يشتكوا للملك راح اخد منها ابنه وموته دبحه ودفنه فى الصحراه . الشيطان وسوس ليه وقاله ممكن قلبها يوجعها على ابنها وتفضحك يبقى لازم تموتها هى وفعلا قتلها ودفنها جنب ابنها واخوتها كانوا رجعوا لما سالوا عليها قالهم هى من بعد ما سافرتم بشهر هربت ولا اعرف عنها اى حاجه طبعا اخوتها مصدقوش بس هيكدوبوا الشيخ اللى معروف بصدقه واخلاقه العاليه المهم روحوا وهما نايمين راح ليهم الشيطان ووراهم كل اللى حصل فى الحلم ليهم هما التلاته فى نفس الوقت وصحيوا على اذان الفجر راحوا فتشوا مكان ما كانت اختهم عايشه لقوا حاجات تاكد الرؤيه راحوا حفروا مكان ما شافوا فى الحلم لقوا اختهم وابنها مدفنين راحوا للملك واشتكوا ليه وحكوا ليه على الحكايه كلها الملك امر بقطع راس الشيخ وجه ليه الشيطان قبل تنفيذ الحكم بدقايق قاله تحب اخلصك من الموت ده قاله يا يا ريت قاله اكفر واؤمن بيه قاله كفرت واومنت بيك راح الشيطان ضاحك وقاله زنيت واتبعتنى وقتلت روحين منهم ابنك وكفرت انى ليس على بك سلطان انى اخاف الله رب العالمين وفى نفس اللحظه اتقطعت راسه ومات كافر. ودى كانت نهايه الشيخ 40 سنه طاعه وقيام ليل وصلاه وصيام وسنه واحده كفر وزنا وقتل . ربنا يبعدنا عن الحرام. عندى سؤال مهم ياريت القى اجابه عليه ليه الشيخ ده مش ثبت على الطاعه والعباده رغم انه اتعود عليهم 40 سنه ؟؟؟ يا ترى قله ايمان ولا الشيطان اقوى منه ولا انه عبادته دى اصلا كانت من الظاهر والباطن كان غير كده عارفين ليه ربنا قال ان الحسنات يذهبن السيئات وان اللى يغلط ويتوب لربنا اجره اعلى من اللى مش غلط اصلا لان اللى بيغلط وبيجرب الغلط ويبطله بيكون عنده اراده انه يرضى ربنا ويرجع لربنا تانى دى مش دعوة اننا نغلط بس برضه لازم نتعلم ازاى نفضل ثابتين على حب الله وطاعته .اللهم ثبت قلوبنا والسلام عليكم ورحمه الله وبركاته

السبت، 19 أبريل، 2008

التغيير السلام عليكم اخوانى واخواتى المدونين\ اولا اعرفكم بنفسى انا اختكم حنين القلب يمكن تعرفونى من تعلقاتى عندكم بس احب اقول انى ولا دماغ عاليه زى خالتى فرنسا حبيبتى ولا انا دمى عسل زى عبده باشا الرايق ولا حته سكرة زى بنت خيخه اوى ولا بعرف اعبر كويس زى دوبا ولا كلامى جميل وبسيط زى يحيى ولا شاهى ولا اجدع بنوته ولا ولا ولا........................ انا بس حبيتكو وحبيت اكون معاكم زى اختكم الصغننه واتبنونى بقى حظكم كده. المهم ندخل فى الموضوع انا حبيت ابداء بموضوع شاغلنى اوى وهو ازاى اتغير يعنى مثلا انا عصبيه ازاى اخرج بره عصبيتى دى واشوف نفسى واحاول اهدى كمان . ممكن الانسان يتدرب ويحاول يصلح عيوبه ؟ اظن ان اغلب الناس يعرفوا عيوبهم ولو مش يعرفوها يبقى العيب فيهم هما انما يا ترى كلنا قادرين على تصحيح عيوبنا طيب انا عندى خطوات يمكن اقدر اصلح بيها عيوبى وهى: اولا :اعرف العيب اللى عندى ومثلا تكون العصبيه ثانيا :احاول اشوف نفسى ازاى بكون وانا متعصبه اكيد شكلى مرعب عينى مبرقه وصوتى عالى وبتنطط زى القرد اللى كان فى فيلم محمود عبد العزيز يا نهار دنا لازم ابطل . ثالثا :احاول اهدا من غير ما حد يهدينى لان اغلب اللى بيحاولوا يهدوه بيعصبوا اكتر من انهم بيهده . انا مثلا سمعت ان من الحاجات اللى ممكن تهدى الاعصاب لما يكون الانسان متعصب انه يغيير الوضع اللى هو فيه يعنى مثلا لو واقف يقعد ولو قاعد يقف وسمعت كمان ان الانسان ممكن يعد من واحد لعشرة بس الطريقه بتاعه العد دى مجبتش معايا اى فايده جربت طريقه تغيير الوضع يعنى جابت نتيجه بس برضه مش اللى انا عايزاها عرفت انى لازم اتغيير من جوايا كما قال رسول الله صلى الله عليه وسلم :ان الله لا يغيير ما بقوم حتى يغيروا ما بانفسهم.صدق رسول الله بس اتغيير ازاى كل حاجه تعصب العيشه والشغل والعيش والاكل والاسعار كلللللللله يعصب. طيب هعمل ايه ؟ المهم انا هحاول وهفضل احاول اهو لو معرفتش ابطل هبقى قللت وده برضه مش وحش. وكل ما اسمع اغنيه الاستاذ موسيقار الاجيال تامر حسنى طبعا اوعى حديقول محمد عبد الوهاب ده مات من زمان وتامر خد مكانه مع احترامى الشديد ليه ولمحبيه بس تامر برضه حلو ومش هخرج بره الموضوع كل ما اسمع اغنيه انا مش عارف اتغير احس انى بقولها لنفسى . صحيح ربنا خلقنا بعيوبنا بس لازم نحاول نبطلها او على الاقل نقلل منها مش نسبيها تزيد لحد ما نبقى مليانين عيوب. واللى عنده عيوب وعنده طريقه لحلها يقولى واللى عنده حاجه تخلينى مش عصبيه يقولى .. والسلام عليكم ورحمه الله وبركاته