RSS

الاثنين، 25 أغسطس، 2008

اه... يا بلد

تحديث

كل سنة وانتم طيبين وبصحة وسعادة بمناسبة شهر رمضان
انا اجازة طوال شهر رمضان
انتم عارفين بقى
===============
السلام عليكم اخوانى واخواتى المدونين
النهارده وعلى غير العاده قريت جريدة الجمهوريه وانا اصلاً مش بقرا الا صفحه الحوادث بس فيه خبرين شدونى فى الصفحه الاولى :
الخبرالاول بيقول:
د/ الجمل : لن يضار معلم من نتيجه اختبار الكادر بدأت امس اختبارت التسكين بالمرحله الثانيه لكادر المعلمين يشارك فى الاختبارت نحو 945 الف معلم ومعلمه على مستوى الجمهورية واكد الدكتور يسرى الجمل وزير التربيه والتعليم اثناء تفقده سير الاختبار انه تم اعتماد 2.5 مليار جنيه من ميزانيه الدوله لتنفيذ المرحله الثانيه من الكادر بهدف رفع المستوى المادى للمعلمين وقال ان هذه الاختبارت تعد علامه فارقه للانتقال بالمعلم من مجرد موظف يترقى بالاقدميه والرسوب الوظيفى الى مصاف الاستاذ الجامعى الذى يتم ترقيته وفق معايير محدوده واضاف انه لا يضار اى معلم لن يجتاز الاختبارت وسوف يحصل على كل الامتيازات والحوافز المقررة له (ده الخبر بالنص ) بصوا بقى انا اللى فهمته من الخبر ده ان الكادر ده ولا ليه اى لازمه وزى قلته لان اللى هيسقط فيه ولا هيحصل ليه حاجه ولا اللى فيه هياخد حاجه يبقى لازمته ايه ,وعندى سؤال والنبى معلش اصلى فهمى تقيل شويه ال 2.5 مليار دول هيرحوا فين يعنى للمعلمين ولا للكادر ولا للناجح يرفع ايده حد يجاوبنى ويكسب فيه ثواب (ملحوظه اللى يا خد حاجه من المليارات دى من المعلمين يبقى يقولى )
الخبر التانى : عاطل يبيع لحوم الكلاب .
تمكنت مباحث اللبان فى الاسكندريه من ضبط عاطل يقوم بذبح الكلاب الضاله فى شقته بحارة الريديه ثم ضبط جثتين كلبين بدون رأس واخرين معدين للذبح ... اعترف العاطل انه يقوم باصطياد الكلاب الضاله من الشوارع ويقوم بذبحها ويعرضها بالاسواق على انها لحوم بلدى .
انا الصراحه بعد الخبر ده بلعت ريقى وافتكرت اخر مرة اشتريت فيها لحمه وتخيلت انها لحمه كلاب صحيح اكيد كنت ههوهو بس افتكرت انها كانت مسكرة وقبل كده جه مسئول كبير فى التليفزيون وقال اللحمه المسكرة تبقى لحمه حمير والله يا جماعه مش فارقه حمير من كلاب هنقول ايه حسبنا الله ونعم الوكيل السنه اللى فاتت لقوا فى اسكندريه اكتر من 200 راس حمار ومش لقيوا جثثهم والسنه دى كلاب يا ترى السنه الجايه المينيو ايه ؟؟؟؟

51 التعليقات:

همس الاحباب يقول...

غتاتة اول تعليق
واللى بعده كمان

همس الاحباب يقول...

ههههههههه ههههههههه
مش ممكن انتى بقرا
الحمدلله انك اعترفتى بكده
وربنا كرمك تقرى جرايد ما لاقيتش غير الجمهورية
يلا ما علينا
تستاهلى علشان تحرمى تقرى جرايد
ماله ميكى ماوس وميكى جيب

همس الاحباب يقول...

انا شفت منظر المدرسين
وقعدت اضحك على منظرهم وهما قاعدين مكان الطلبة ومزنوقين قوى ومش عارفين يجاوبوا
عجبنى قوى المنظر وكما تدين تدان ويا سلام لو المدرس حب يغش ولا معاه برشامة
اتبقى وقعته هباب
بس يا ترى المراقبين ايبقى من الطلبة
ولا اولياء الامور ؟؟؟؟

همس الاحباب يقول...

طبعا الكادر ده شغل 3 ورقات ونصباية جديدة ولكى الله يا مصر .
اما موضوع الكلاب فده كارثة
مش كفاية الحمير اتعودنا عليها وعلى لحمها كمان كلاب
وفى الاسكندرية يا نهاركم ابيض يعنى الكبدة اللى انتى كلتيها طلعت بتاعت كلاب انا كنت فاكر انها كبدة حمير يلا بالهنا والشفا فكرينا المرة الجاية اعزمك على كلب مشوى .
انا كده حرمت اكل اى حاجة فى اسكندرية ماله الفول والكشرى

همس الاحباب يقول...

اه نسيت اقولك على المينيو الجديد
ده طبعا اتبقى وجبات خفيفة
وانتى اتحبيها قوى
لحم القطط بالمسقعة
ولا ضفادع بالمايونيز
ولا اقولك خليها قطط بالكارى طعمها احلى
وبالهنا والشفا يا شعب مصر
ورمضان كريم

همس الاحباب يقول...

لا كده 5 تعليقات بس
ولا اقولك كفاية كده
احسن حاسس انى قرفت الناس اللى جاية بعدى
وعلشان كده الحق اهرب بسرعة من الباب الخلفى للمدونة والحمد لله انه معايا نسخة من المفاتيح

أبو خالد يقول...

أبني الحبيب خالد
أترك لنا فرصة نعلق من فضلك
أبنتي الغالية صاحبة مدونة حنين القلب
يا من تجعلين لهذا العالم الأفتراضي قيمة عالية
كل عام و أنتي و الأسرة الكريمة بخير
أما عن الكادر و مستحقيه فهي محاولات
من حكومتنا الموقرة لسحب وعودها
و أما عمن يبيعون لحومالكلاب و الحمير
فحسانا الله و نعم الوكيل
و علي العموم أنا مش أكلت لحمه في الأسكندرية
الحمد لله
دمتي أغلي الناس

د/اجدع بنوته يقول...

هههههههههههههههههههههههه

ياحرام منظر المدرسين

ومنظر ليه

منظر امى وعمتى ومرات عمى

مرات عمى ياحرام عكت ف العربى

وعمتى عندها بعد بكره

هع هههههههههههههههههههههههه

والله فرصه علشان المدرسين يحسوا بمعناتنا

ال ايه اضايقوا م جو الامتحان والاسئله

ومفيش مية شرب

هههههههههههههههههههههههه

اما عن لحمة الكلاب

الحمدلله طالما بتبقى حاجه صاحيه ويدبحوها

يبقى الحمدلله

ف امل منوصلش للحم الميتين

تحياتى

حسن حنفى يقول...

كادر المعلمين انا مش شايف ليه لازمه غير

اني كل ما اشوف ماما عاوزه تذاكر

ققعد اضحك

ههههههه

بالنسبه للحوم ده شيء لطيف

لانه بالطريقه دي الناس هتخاف تشتريها

فاسعار اللحمه تقل او مش حد يشتريها خالص

هههه

(احمد سكر ) يقول...

السلام عليكم

ازيك ياحنين كل سنه وانتى طيبه

ههههههه كلاب وحمير

احلا حاجه ان الواحد لما بينزل الدوله بتاعتكم دى

مش بياكل غير سمك

هههههههههههه

وانا ااقول حاطا وشها ف الارض ليه

ومتنحا كدا ليه

اتاااريه من لحم المعيز بتاعتكم

اهااااااا وبخصوص المعلمين

طب ياعم الامور لما ملهوش لازمه الامتحان

عملت ليه

وطبعت ورق ليه

ولا دى سبوبه

تحياتى

احمد سكر

زُمُرده يقول...

بكره يامانشوف وندوق

المره الجايه عايزه قطط وصراصير بالمايونيز بقى

ههههه

اما المدرسين في دي مهزله
مش اللي يمتحن يبقى عارف المنهج اولا
ولا يدوه كورس نعنشه ذاكره كده
ولا ايه لازمتها مهو لن يضار في الاخر

حسب الخبر


كل شويه يلزقوا خبر في اسكندريه

احنا مش بناكلوا لحووووم
احنا بناكلوا سمك ونتغدوا سمك
ههههههههههه

حنين القلب يقول...

همس الاحباب عاااااااااااااااااااااااادى خالص ايه الجديد فى دى يعنى؟؟

kochia يقول...

عنوان موضوعك اوجز
اه يا بلد

بتسائل ليه بنعمل في بعض كدة
مش احنا اخوات وبلديات
بلدنا واحدة ودينا واحد وعيشتنا واحدة ؟؟؟

واللي بيعمل حاجة بكرة ممكن بسهولة جدا تتعمل فيه ؟؟

اه يا بلد
مش عارفة اجابة

تحياتي

A7MeD F@hMy يقول...

يسري الجمل ده فاشل اصلا و كل واحد ييجي يقعد يجرب فينا شوية
كنت اليوم ده ف الكلية بخلص ورق المدينة الجامعية و شفت المدرسين و هما زي التلاميذ بيمتحنوا و قعدت ابص لهم و انا فرحان اوي
هههههههههههه
كان شكلهم مسخرة و هما ماسكين جومة و قلم رصاص و اللي بيراقب عليهم معيدين متخرجين السنة اللي فاتت
و الله مهزلة
لا و يقول لك في بني سويف كان في غش جماعي بين المدرسين
ههههههههههههههههههه

الاتنين مليار و نص في الهواااااا
-------------------
المينيو بتتطور و هو ده المطلوب
ههههههههههه
ما شاء الله حمير و كلاب
الحيوان اللي بيمسك كلب يدبحه ده لا يمكن يكن زينا ابدا
طب انتي الساعة بعيدةعن اللبان
انما ف بحري بقي الخطر بيقرب
ههههههههه
لو لقيت جثة اي كلب هبقي اقول لك
و انا اقول الكلاب فين الكلاب فين
و الله قلوا
تحياتي
---------
رومانسي

فاتيما يقول...

حنوووووونة
ازيك يا حبيبتى
بصراحة الموضوع بتاع الكادر دا من بدايته و أنا حاسة إنه مجرد تهدئة بس عشان المدرسين ميقلبوش و يعتصموا فى الثانوية العامة و كانت على الأبواب ساعتها ...
إنما زيهم زى دكاترة الجامعة اللى برضو تظاهروا مطالبين بحقهم و فى الآخر بقت بتقييم و كل واحد و محلسته عند رئيسه ....
التغييرات مجرد إجراءات شكلية لا بتحل و لا بتربط
المهم اليوم يعدى و نخلص بس النهاردة
و بكرة نبقى نشوف
و على رأى صديقة عزيزة عليا كانت دايما تقول مثل مناسب للحالة الراهنة
وقت الله يعين الله
بوسة على خدك يا حبيبتى وأسفة لأنى إتأخرت عليكى بس كنت بهد حيطة و أوسع فى المدونة شوية
تحياتى يا حبيبتى

حنين القلب يقول...

همس الاحباب
ربنا يسامحك انا بقرا
انا بقول اقرا من القرايه مش من البقر يا بنى ادم
انا حرمت فعلا اقرى جرايد هو انا ناقصه اكتئاب
وهقرى ميكى واسمع شعبولا كمان وايييييييييييييييييييييييه

حنين القلب يقول...

همس الاحباب
انا برضه فرحانه فيهم اوى احسن علشان يحسوا بالطالبه
المراقبين بيقولك رومانسى من المعيدين اللى لسه متخرجين
والله عيييييييييييييب يا جدعان

حنين القلب يقول...

همس الاحباب
والله انا حسيت بكده يا خالد اول ما قالوا 2.5 مليار من ميزانيه الدوله حسيت انها سبوبه على راى بشله الحرامى

وبالنوسبه لموضوع الحمير احنا كل ما نتعود على لحمه يغيروها والله حرام

ههههههههههههههههه
هو انا لوحدى اللى كلت الكبده البركه فيك انت كلتها كلها الف هناااااااااااااااا
لا عايزة سحليه محمرة
منتا طلبت كشرى وبرضه كلت كبده اعوز بالله طفاسه

حنين القلب يقول...

همس الاحباب
اه نسيت اقولك على المينيو الجديد
لحم القطط بالمسقعة
ولا ضفادع بالمايونيز
ولا اقولك خليها قطط بالكارى طعمها احلى

لا يا سيدى انا عايزة تعابين مقليه وفيران مشويه ماشى وخلى الضفادع نحلى بيها
وروح العب قدام مدونتك بقى وكفايه عليك كده

حنين القلب يقول...

همس الاحباب
لا يا سيدى كده 6 تعليقات وسيب بقى نسخه المفاتيح اللى انا اديتها ليك على رأى المثل سلموا القط مفتاح الكرار

حنين القلب يقول...

ابى العزيز \ابو خالد

خلاص يا بابا خالد استولى على مدونتى ده فاضل يرد على التعليقات
يلا المهم
كل سنه وانت بالف خير وصحه وسلامه ويا رب تفضل وسطنا منورنا برايك وبصيرتك دايما
هى اصلا يا بابا الحكزمه من امتى بتوعد وتوفى ما طول عمرها بتسحب وعودها وعلى راى حنفى هتنزل المرة دى ايووووووووووووووه انت مش رضيت تاكل لحمه علشان كده وسبتنى انا وخالد ناكل فى كبده لما كان فاضل لينا شويه نهوهو

دمت اعز واغلى اب لى فى الكون

حنين القلب يقول...

د\ اجدع بنوته
هو انتى عايشه فى وزراه التربيه والتعليم ولا ايه بسم الله ما شاء الله كل العيله مدرسين

ربنا يوفقهم ومش يعكوا فى مواد تانيه يعنى انتى راضيه اننا ناكل كلاب وكل خوفك نوصل للحم الميتين

ياحبيبتى ايه الفرق بين اللحم النجس ولحم الميتين
حسبيا الله ونعم الوكيل
فى اللى وصلنا لكده
كل سنه وانتى طيبه
رمضان كريم

حنين القلب يقول...

حسن حنفى
ولا انا شايفه ليه اى لازمه والله يا ابو على
ماما عازة تذاكر ابقى ساعدها عيب يا حسن هى ياما ساعدتك وبطل تضحك
اسعار اى لحمه اللى هتقل بتاعه البقر ولا الحمير ولا الكلاب بكرة هيعملوا لكل حاجه تسعيرة وناخد فوقها فرورة كلب بدل فروة الخروف
رمضان كريم
وكل سنه وانت طيب

حنين القلب يقول...

احمد سكر
ازيك يا سنكرة كل سنه وانت طيب

بكرة يدبحوا كلب البحر واهه برضه اسمه كلب ومن البحر ومش هتاخد بالك زى الجمبرى اللى اتحول لزيتون ههههههههههههههه فاكر
انا متنحا ؟؟
ده بس من الكبده اومال لو كنت طلبت لحمه ولا بفتيك كان طلعلى ديل ولا ايه؟؟

ارحمنا يا رب هى فعلا سبوبه انا لسه قايله كده والله يا سنكرة
يا عم ربنا يزيدهم وبلاش احنا
رمضان كريم

حنين القلب يقول...

زمرده
اه يا زمرده بكره لسه هناكل وناكل يعععععععععع
نو
نو
نو
الا الصراصير بقرف منها جدا ممكن قطط

يا حبيبتى ولازمته ايه الكورس ما زى قلته
الخبر فى الصفحه الاولى شوفيه بنفسك

قوليلهم لحسن سكر فاكرنى كنت متنحه من اللحمه رغم انى اصلا اخر مرة اكلت فيها لحمه كانت العيد الكبير اللى فات ومش هشتريها السنه دى هقضيها سمك
يلا بقى هىء
كل سنه وانتى طيبه يا حبيبتى
وحشتينى

حنين القلب يقول...

kochia
علشان الجوع
علشان الفقر والحرمان
علشان فيه عواطلين هيموتوا من الجوع فبالتالى كل واحد بيقول يلا نفسى اعيش انا والباقى يتحرق يموت مش مهم
واذا كانوا اصحاب الملايين بيدوسوا علينا ومن غير ما يكونوا محتاجين فما بالك بالفقراه اللى مجربين الجوع والبرد طبعا ده مش سبب علشان يعملوا كده بس اهه طريقه تفكيرهم كده
نورتينى
كل سنه وانتى طيبه

حنين القلب يقول...

احمد فهمى
ازيك يا احمد
بص يا سيدى الراجل مش فاشل اهه بيخلى المدرسين يذاكروا من الاول وينشطوا ذاكرتهم مش ده المهم المهم المليارات هتروح فين نفسى حد يقولى
الهوا هيشيل الملبارات دى ازاى

يااحمد المشكله مش فى بعيده ولا قريبه ما الحمير كانت مدبوحه فى اسكندريه ووصلت القاهرة والمنوفيه والدقهليه ومش وصلت لبور سعيد والحمد لله علشان بابا ايوة طبعا اهم حاجه بابا ابو خالد
كل سنه وانت طيب
نورتنى

حنين القلب يقول...

فاتيما
والله وحشتينى مووووووووووت
ازيك انتى وازاى ماما يا رب تكونوا بخير
كل سنه وانتى طيبه والسنه الجايه يكون يوسف فى حضنك يا رب
وهو لو مش هدو المدوسين هيعملوا ايه يعنى اضراب وبعدين اولها زى اخرها والله يا حبيبتى ولا فارقه معاهم
حسبيا الله ونعم الوكيل
وحلو المثل بتاع عزيزة ده
وايه حكايه الهد دى خلى بالك علشان انتى هتوقعى السقف بتاع مدونتى
ليكى احلى بوستين واحده ليكى وواحده ليوسف واوعى تاكلى لحمه فى اسكندريه مااااااااااشى
سلام يا نقاء القلب

الدفاع يقول...

مش المدرس اللى بيختبر ده اللى هو كان زمان بيقولولنا عليه
قف للمعلم وفه التبجيلا


كاد المعلم ان يكون رسولا
؟؟؟؟؟يا حنين العيب فينا فى الناس اللى بترضى بالمهانه مش العيب فى اللى بيهين الناس
مفيش سبب نهائيا يجبر الناس على تحمل الاهانه
حتى ولا لقمة العيش لانها بقت دلوقتى لقمة عيش معفنه ماتستاهلش حد يطاطى راسه علشانها
اما بالنسبه للحمه فياتاكلى من سكات يا تبطلى اكل لحمه وكلى حاجه تانيه سمك مثلا
اهو ده مضمون شويه
تحياتى

حنين القلب يقول...

الدفاع
اسامه باشا
والله الواحد ما بقى عارف العيب فى مين اصلى لو مش وافقوا وكلوا لقمه العيش حتى لو كانت معفنه هيعيشوا ازاى اى حد عنده استعداد يقبل باى شىء علشان لقمه العيش هيعملوا ايه يعنى
اكل كلاب من سكات يعنى يا اسامه ماشى موافقه بس لو جالى صرع انت اول حد هقرمه موافق ؟؟
يا اخى بقى ده حل انى اكل سمك طيب واللحمه الهبر اعيش ازاى من غير لحمه خلاص انا لقيت الحل انا هشترى جاموسه صغننه وادبحها واكل منها وكده تبقى مضمونه
عارف فيه جزار عندنا بيبيع الجاموسه الصغننه ب 150جنيه بس مش فيها لحم ورفيعه اوى وديلها طويل وملوى وليها انياب الصراحه شكيت انها كلب بس الراجل حلف بالطلاق انها جاموسه وصدقته يعنى هيطلق الوليه
يلا مش مهم الشكل المهم ان اسمها فى الاخر جاموسه
كل سنه وانت طيب
ورمضان كريم

appy يقول...

يا نونو يا حبيبتى المدرسين ضايعين راحين فى شجره انتى ممكن تتخيلى مدرس مش عارف يستخدم كمبيوتر واللى فى ابتدائي عارف دول مدرسين ايه دول بجد انا مبسوطه فيهم خليهم يتقدموا هو لازم يعنى يبقى فيه امتحان علشان يطوروا نفسهم رتمهم واحد
على فكره خالى مدرس ههههههههههه

حنين القلب يقول...

appy
والله يا حبيبتى وحشتينى
هما مش بيغيروا من نفسهم الا بالامر اما ترقيه او حوافز واهه

وانا كمان فرحانه فيهم وابقى سلميلى على خالك ليه مش قولتى حاجه عن موضوع دبح الكلاب
كل سنه وانتى طيبه

مـجـنـووون يقول...

كل سنه وأنتي بالف خير

حال البلد في انهيار ، وكل يوم بتطلع حاجات غريبه
بس علي فكرة موضوع لحمة الكلاب والحمير ده من زمان

يعني من الأخر متشتريش لحمة غير من حد تثقي فيه

تقبلي مروري
مجنووون

دعاء مواجهات يقول...

كل سنة وانتى طيبه وبخير

ياارب ديما

كل عام وانتى من الله اقرب

سلااام

الدفاع يقول...

يا حنين يا اختى السؤال بتاع هما هايعملوا ايه ده سؤال تعجيزى بيسبب الياس والسلبيه وخلاص لو المدرسين دول مثلا قالوا ناخد موقف جماعى باى شكل الموضوع هايتحل انما الخوف بيعمل اكتر من كده وانا بصراحه مش فاهم الخوف على ايه؟
هما بياخدوا كام يعنى؟؟؟حتى بعد الكادر ربنا ياخد بادينا ويفوقنا احسن احنا نايمين قوى
اما بالنسبه للجاموسه ام 150 جنيه فده بس يادوب تمن الانياب بتاعتهابس ياترى ايه علاقتها بالهبر واللحمه؟؟؟وخايف اقولك ربيها لا تكبر وتطلع ديب ولا كلب ولف تبقى نصيبه
اقولك قبل ماتشتريها حطي لها حتة لحمه بس بلدى لو كلتها تبقى مش جاموسه
ولو ان الواحد خايف اليومين دول للبهايم تكون انسعرت وبتاكل لحمه
لو ماكلتهاش تبقى كلب بس شبعان
ههههههه
وكل سنه وانتى طيبه وماتنسيش تبقى تبعتيلى حته من الجاموسه لو حتى الانياب
تحياتى

انسان بلا عنوان يقول...

كل سنه وانتى طيبه

عليكى بالمنيو الخمسه

والله يرحم ابه محمد ابو سويلم

مهو لو احنا ...كنا رجاله ووقفنا وقفة رجاله

حنين القلب يقول...

مجنووون
وانت طيب يا سيدى والله صدقت احنا كل يوم البلد بننزل عن اليوم اللى قبله

طيب بص انا واثقه فيك ابعت ليه 15 كيلو لحمه وانا هدفع تمنهم كاش 19.5 كويس بالتبس كمان اومال الخمسين قرش دول بتوع ايه تبس طبعا
كويس كده
نورتنى

حنين القلب يقول...

دعاء مواجهات
كل سنه وانتى طيبه يا عسوله ويا رب رمضان الجاى تكونى حققتى كل اللى تتمنيه
وصومى بقى مش زى كل سنه ههههههههههههه
انا كمان هصوم انا كبرت خلاص
السنه اللى فاتت صومت لحد الظهر والسنه دى بما ان الساعه اتغيرت هصوم للساعه 2 كويس كده يا دودو انا شاطرة؟؟
الا والنبى سؤال كاتم على نفسى
هو ليه كل ما رمضان يقرب الساعه تتغيير بدرى يكنوش الناس الكبيرة بيجوعوا بسرعه علشان كده بيقدموها؟؟
سلام يا سكرة المدونات

حنين القلب يقول...

الدفاع
بص يا اسامه يااخويا فيه ناس يا دوب عايشين على مرتبهم ولو راح بيقعدوا يصوتوا ويلطموا لانهم عايشين يوم بيوم

الخوف على عيالهم الخوف
من الجوع الخوف من بكرة اذا كنا النهارده ومش عارفين نعيشه اومال بكرة هنعمل ايييييييييييييه؟؟؟

بياخدوا كام دى اقولك
بياخدوا اللى فاتح بيتهم
اللى سادد جوعهم
اللى مش يخليهم يمدوا ايدهم علشان يشحتوا اللقمه او يسرقوها زى غيرهم كتير
فخمتو با عم
ملحوظه
ده مش دفاع عنهم انا رائى برضه ان الموضوع لازمه واقفه انا بس بقول وجهه نظهرهم لو حد سالهم السؤال بتاعك

طبعا منتا امنيه حياتك تخلص منى عايزنى اربى ديب طييييييييب
انا هربيه فعلا وابعته ليه
مهى المصيبه انى مش لقيه لحمه بلدى يا عم انت مش متخيل اسكندريه دلوقتى دحنا بقينا نروح للعربجى بدل الجزار ونقوله 2 كيلو من الموزة ويدبح الحمار ويديلك اللحمه بتاعته ادامك خلاص مش بقى فيه خشى ولا خوف
طيب عارف اروح اول امبارح اشترى كوارع القيها عامله 40 جنيه والاخر طلعت كوارع طور وجوزى يحاول ياكل منها حاجه ابدا وانا اكسر فيها ابدا الاخر روحت بدلتها بفروة كلب بنى اصلى بحب الكلاب البنى اوى
هههههههههههههه
وكل سنه وانت طيب يا سيدى وهبقى اشيل ليك حته من الكوارع والفروة

حنين القلب يقول...

انسان بلا عنوان
كل سنه وانت طيب
حاضر بس ايه المنيو الخمسه دى قولى انا اعلمهم
الله يرحم ابو سويلم وسعد زغلول ومحمد عرابى والحاج وجدى اييييييييه ده ابويا عندك اعتراض؟؟

الحشرى - سيد يونس يقول...

يعنى مينفعش تقرى غير الحوادث

طيب والكادر فعلاً أكبر حادث علشان زل المعلمين كتير وخلاهم أصبحوا ولا ليهم أى قيمة

لما واحدة تقعد معاها بنتها وتقولها يا ماما أوعى تسقطى لحسن أصحابى يعيرونى بيكى والثانية اللى بتبكى قدام اللجنة وتقول هعمل أيه فى اللى بيحصل فينا وكتير وكتير

حسبنا الله ونعم الوكيل

ňįĝŗő يقول...

السلام عليكم
إزي حضرتك يا حنين هانم
كل سنة و حضرتك طيبة يا أفندم
كل عام و انت إلى الله أقرب و على طاعته أدوم

بلغنا الله شهر رمضان الكريم و أعاننا على صيامه و قيامه على الوجه الذي يُرضيه عنا و أعاده علينا أعواماً عديدة و أزمنة مديدة و بلغنا فضل قيام ليلة القدر


يلا سلام

shaimaa samir يقول...

حنين
وحشتينى
كل سنةوانتى طيبة يا جميلة
بدعيلك والله
ربنا يريح قلبك
ويرزقك كل اللى تتمنيه فى حياتك
بحبك فى الله

حنين القلب يقول...

الحشرى - سيد يونس
لا مش ينفع علشان بحب اشوف الستات اللى بتقتل اجوزها فخمتو ليه بحب الحوادث
يا سيدى تبكى ليه ما الوزير بلسانه قال مش فيه حد هيضر وهياخده حقوقهم كامله يبقى ايه سبب البكاء ولا صعبت عليها نفسها لما لقت انها معلمه وعاجزة عن حل امتحان طيب ليه مش تبقى على مستوى الكلمه
اقولك انا فرحانه فيهم دول ياما عذبونى تعذيب الكفار يا اخى
نورتنى
وكل سنه وانت طيب
رمضان كريم

حنين القلب يقول...

نيجرو
وعليكم السلام
ازيك انت يا محمد وايه اخبارتك يا باشا
وايه كميه حضرتك دى مش بحب حضرتك دى خالص انت لما بتكلم اختك بتقولها حضرتك ؟؟ولا بتقولها يا بنت خلاص قولى زيها
هههههههههههههه
كل سنه وانت طيب ولربنا اقرب وربنا يعيده عليك وعلى الاسرة الكريمه بالخير دايما يا رب
يلا سلام

حنين القلب يقول...

شيماء سمير
شيمو والله انتى وحشتينى اكتر وكنت لسه فى سيرتك طبعا بالخير
كل سنه وانتى طيبه
والله انا كمان بدعى اشوفك احسن شاعرة فى الدنيا
وعلى فكرة كتابك لسه مش جه عندنا انا سألت عليه
ربنا يوفقك لما يحب ويرضى
يا رب اشوف حنين بنتى امورة ورقيقه زيك بس تيجى الاول وانا هديهالك تربيهالى ماااااااااشى
وانا كمان بحبك فى الله

قوس قزح يقول...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

حنين القلب يقول...

قوس قزح
اللهم امين
كل سنه وانتى طيبه يا دوللى
وربنا يكرمك دايما
ويتقبل منك صيامك وقيامك
وكل سنه وانتى دايما وسطينا

maha zein يقول...

اهه انتي بقه
ايوة ااه انتي اللى وحشتيني اكتر
كل سنة وانتي بصحة وسلامة
وليه بس كده تجيبي سيرة اللحمة المسكرة والحجات المؤرفة دي
والله انا بعد اتخيل حجات
ومبقتش اكللحمة خالص
بقيت اقرف
وانا اصلا مش باكل اي حاجة اصلا
كده كملت
تمام
انتي عملة ايه
انشاء الله بخير
هتمشي ليه
ما تخليكي في رمضان
عموما لو فضيتي ابقي ادخلي عندي انا مش همشي
وكل يوم هكتب قصة حلوة اوي تفيدكوا انشاء الله
تحياتي

خديجة محسن "لؤلؤة الاسلام" يقول...

اختى حنين القلب
اصلا الكادر ده
هيصقتوه نص امدرسي علشان مش يدفعوا اوى
ثانيا
بتاعةالحمار و الكلاب ديه
انا قرفت اوى
بس ما شاء الله موضوع متميز
و مدونة رااااااااائعة
و جزاك الله خيرا
و تحياااااتى
رمضان كريم
كل عام وا نتم بخير

ann يقول...

滿..........................................................