RSS

الاثنين، 17 نوفمبر، 2008

كفايه .. حرام

السلام عليكم اخواتى واخوانى المدونين

وندخل علطول فى الموضوع علشان انا دمى محروق الصراحه

شهد...طفله عمرها 5 سنين زى اى طفل عندها اللوز بس ملتهبه شويه والدكتور قرر ليها عمليه وعلشان هى الوحيده عند والدتها قررت انها تعمل ليها العمليه فى عياده خاصه يعنى مش مستشفى حكومى وكانت البدايه من اول العمليه جرعه بنج زياده وبعدين فيه خطأ فى العمليه تسبب فى دخول الهوا فى القصبه الهوائيه ومش عارفه ايه اللى حصل بعد كده بس اللى اعرفه ان البنت بقالها 5 ايام فى العنايه المركزه وربنا يعلم اخرتها ايه؟؟

احمد ... 4 سنين عنده ازمه فى صدره وعلى فكرة ده ابن اختى وكان قاعد بيعلب عادى وفاجأه جاله ضيق نفس ووشه ازرق وجرينا بيه على عياده جنب البيت واخد ابره غلط كان هيروح فيها لان كان فيها نسبه كورتيزون عاليه على طفل فى السن ده ولولا ستر ربنا والمستشفى الخاصه اللى كملت علاجه كان راح فيها

ومن فترة كنت بتفرج على برنامج العاشرة مساء ولقيت طفله فى سنه رابعه ابتدائى واخدت برضه ابره غلط فى الوريد واتسببت فى تسمم فى دراع البنت واخرتها بتروا الدراع وكانت الاولى على مدرستها من سنه اولى لسنه رابعه

واخرتها ايه ؟؟؟

اهمال وعدم احترام اداميه حد

هو مش المفروض ان الدكاترة دول يكونوا على قدر من المسئوليه علشان يعرفوا ان بين ايديهم ارواح ومش لعبه

الطفل اللى بيجربوا فيه الادويه ويمكن دى تنجح ويمكن تفشل لو ابنه هيتحمل عليه كده

هيتحمل يشوفه نايم على سرير ومتوصل بخراطيم وابر مزرقه جسمه

هيتحمل ايه ولا ايه ؟؟

كفايه .. حرام

اتقوا الله وراعوا ضميركم واعرفوا ان اكبر ظلم هو ظلم الانسان فى صحته

حسبناالله ونعم الوكيل

46 التعليقات:

همس الاحباب يقول...

لا حول ولا قوة الا بالله
الاهمال انتشر والفوضى واللا مبالاة
حتى فى الطب ومع الاطفال
حاجة تحزن بجد
ربنا يشفى مرضانا ومرضى المسلمبن

عمرو يقول...

ما هو لأن مافيش وقفه حازمه مع المخطئين و بتعدى يبقى ليه ما يكونش فيه مزيد من الأخطاء ؟

انا حره يقول...

معلش يعنى مع احترامى وتقديرى

وانا طبعا لو ابنى عمرى مااقدر استحمل عليه كدا

بس التعميم غلط زى مافى دكتور بيغلط هوا نفسه ربنا بيكتب الشفا للالاف على اديه

ربنا يشفى كل مريض

أحــوال الهـوي يقول...

هذا ما هو منتظر
بعد الغش و الرشوة و النجاح بلا حق سيكون الناتج انصاف متعلمين ضرهم اكثر من نفعهم
و ستجدي العمارات المنهارة و الاخطاء التخطيطيه و المصائب التصنيعية الخ
و لله الامر من قبل و من بعد

تحياتي

صبرني يارب يقول...

عارفه يا حنين

انا مره دكتور قالي
وده دكتور اطقال

ايه يعنى لما الدكتور يغلط
ما كل الناس بتغلط احنا بشر

قلتله يا سلااااااام

ده انت لوالميكانيكى بوظلك عربيتك هاتخرب بيته

وانت عايز تبوظ ابن واحد ويسكتلك

طبعا ده كان احد مالكي المستشفيات الخاصه ا لى كان ابنى بيتعالج فيها

والى كان بيعاني من اهمال وتلوث حضانات وتعامل غير متخصص مع طفل حديث الولاده

قررررررررررررررررف

غلط لا يغتفر لو كان غلط من دكتور

ولما قالي يعنى الىيغلط نقطع رقابته
قلتله اقل واااااااجب

حسن حنفى يقول...

حسبي الله ونعم الوكيل

مش عاد فيه ضمير للاسف

واحدة مفروسة يقول...

حبيبتى
و الله انا قلبي و جعنى و مش عرفت اقول ايه
يعنى الدكاترة اللى الناس بيبقى عندها امل فيهم من بعد ربنا سبحانه و تعالى
همه اللى بيكونوا سبب المصايب
و الله فعلا
حسبنا الله و نعم الوكيل

الربان يقول...

تحياتي

اولا بالنسبة لاجراء الجراحات مهما كانت
صغيرة ام كبيرة...لابد ان تكون في مستشفي
موثوق فيه....و قبل اي شيء لابد من
السؤال عمن سيقوم بالتخدير و العناية المركزة...و من سيقوم باجراء الجراحة....
التخدير هو السهل الممتنع...و يسبب مشاكل كثيرة قد تؤدي الي الوفاة لاقدر الله.

ثانيا...حالات الطواريء لابد الذهاب الي المستشفي...رؤية الطبيب في عيادته لا تغني عن الذهاب الي المستشفي...قد يشخص الطبيب الحالة بالخطأ نتيجة الحالة
الطارئة التي بها المريض....
لابد من ان يتأكد من يرافق المريض من نوع الحبوب او الحقن التي قد تعطي للمريض...و الجرعه...و الفائدة المرجوة منها....وذلك قبل اعطائها للمريض....

يجب علينا جميعا ان نكون ملمين ببعض الثقافة الطبية التي قد تنقذ حياة اي فرد من اسرتنا....

و اخيرا الجراحة هي الحل الاخير...و لا تستسهل...و استشير طبيب و اخر و ثالث
قبل ان تجري اي جراحة حتي ان كانت بسيطة مثل جراحة في الاظافر.


تحياتي و الف سلامة للجميع من اي سوء.

جعلوني مريض نفسيا يقول...
أزال المؤلف هذا التعليق.
عاشقه وغلبانه يقول...

كالعاده ننظر لنصف الكوب الفارغ
مش بلوم عليكي والله
بس بجد زي مافي دكاتره بتغلط في مننا كتير وكتير جدا كمان شايف شغله كويس
وفي الاول والاخر الدكتور يتحمل جزء من المسؤليه بس مايتحملهاش كلها
اغلب حالات التقصير اللي بنسمع عنها بتكون في المستشفيات الحكوميه وناتجه عن نقص امكانيات
الحكومه مش مهتمه بالطب خالص
زي مايكون الدكتور علشان جاب مجموع حلو ودخل كليه الطب يبقي نابغه ويعلم روحه ومايغلطش
التقصير له كذا سبب والله
احد اسبابه من الدكتور نفسه انا مش بنكر
بس بلاش تحملونا كل المسؤليه بالله عليك
زي مانتي بتحسبني علينا وده بيوجعنا في ناس بتدعيلنا وده بيفرحنا
والله بنعمل اللي علينا
تحياتي ليكي ياجميل

~*§¦§ Appy §¦§*~ يقول...

طيب اعمل ايه اخنقهم انا بايدى يعنى
هقولك الفكره الدكاترة بيستقلوا المقابل اللى بيخدوه من الحكومه فالبتالى بيهملوا واللى هيقولى غير كده هدب صوابعى فى عنيه
ربنا يشفى الكل يا رب

maha zein يقول...

لا حول ولا قوة الا بالله
تصدقي
انا بعيط
ليه كده
الحمد الله علي كل شىء
بجد
قلوب ميتة وحجر
بذمتك مش دول المفروض اللى يتجلدوا وفى ميدان عام
منهم لله بجد
ضيعوا مستقبل اطفال بريئة
ذنبها ايه تكمل حياتها ببتر في الذراع
الحمد الله ويصبر اهلها

fashkool يقول...

ازيك يا حنين
والله يا اخى احنا غلبنا من الدكاتره دول واخطائهم المميته .. وحتى لو لم يخطئوا زهقونامن جشعهم وطمعهم وتلاقيهم يا اخى بيقولوا احنا اتعلمنا وتعبنا ومفروض بقى نجنى ثمن تعبنا .. طب هو مين اللى ما تعبش .. كلنا تعبانين .. بس احنا مش لا قيين حاجه نهبش فيها وهما بيهبشوا فينا عشان صحة الانسان غاليه عليه يقوموا يهبشوا فينا ويا اخى ما بيشبعوش ابدا .. حزبنا الله ونعم الوكيل

حنين القلب يقول...

همس الاحباب
اللهم امين يا خالد
ويصحى ضماير الناس مش الدكاترة بس
بجد احنا بقينا عايشين فى غابه مش دنيا
وكل حد بيعرف ياكل لحم اخوه بياكله

كله بياكل فى بعضه
الكبير بياكل فى الصغير والصغير بيحاول ياكل فى الكبير او الاصغر منه
الدكتور اما بيهمل او بيسرق الاعضاء او بيعمل عمليات غلط
ونادرا ما نلاقى حد بيعامل ربنا قبل اى حد وبيراعى ضميره

هنقول ايه بس
ربنا يهدينا كلنا
ويصلح حال المسلمين جميعا

حنين القلب يقول...

عمرو
والله عندك حق يا استاذ عمرو
بس مين اللى مفروض يعاقب
النقابه
القضاء
الحكومه
تفتكر مين فى دول لسه بيحكم بالعدل
حسبنا الله ونعم الوكيل
نورتنى يا استاذ عمرو

حنين القلب يقول...

انا حرة
انا مع حضرتك وانا مش بعمم
بس يعنى احنا مش بنطالب غير بالاهتمام
دى ارواح ناس مش لعبه
وبعدين الاهمال فى الارواح مش بسيطه ولا ايه ؟؟
نورتينى

حنين القلب يقول...

أحوال الهوى
لله الامر من قبل ومن بعد
كله بقى فى النازل
اهماااااااااااااااال
سرقه

حسبيا الله ونعم الوكيل
نورتنى

حنين القلب يقول...

صبرنى يا رب
بالظبط يا صبرنى
هما من كتر الحالات والناس فاكرين ان اروحنا رخيصه
يعنى وفيها ايه لما واحد يموت
وفيها ايه لما عمليه تطلع غلط
وايه ايه
ولحد امتى
تصدقى يا صبرنى انا كنت محتاجه عمليه ورفضت خالص اعملها فى التامين وصممت اعملها على حسابى وفى مستشفى خاصه كبيره ودكتور كبير بس برضه طلعت غلط ولحد دلوقتى تعبانى
بس هقول ايه
حسبيا الله ونعم الوكيل
وحشتينى ونورتينى

حنين القلب يقول...

حسن حنفى

حسبيا الله ونعم الوكيل
لا مااااااااااااات
البقاء لله

حنين القلب يقول...

واحده مفروسه
والله كلنا قلوبنا وجعتنا يا مفروسه
بس يا رب يحيى قلوب الجميع علشان يحسوا بينا

حسبيا الله ونعم الوكيل

حنين القلب يقول...

الربان
طيب ايه المستشفى الموثوق فيها
حضرتك تقصد حكومى ولا خاصه

وهتسئل مين؟
زمايله الدكاترة مين هيقولك ايوه ده دكتور مش كويس ولا ده مات على ايده حد
والله اهم ان الانسان يراعى ربنا فى عمله مهما كان الاجر اللى بياخده منه

انا معاك اننا لازم يبقى عندنا فكره عن الاسعافات الاوليه
نورتنى

حنين القلب يقول...

عاشقه وغلبانه

والله ابدا
ربنا يبارك للى بيعامل ضميره ويخاف من ربه
انما معلش سؤال من فضلك
اللى بيدخل يعمل عمليه بيعملها ليه؟
علشان تنجح ويكون كويس
ولا علشان تبوظ وصحته تبوظ معاها
اللى بيدخل يعمل عمليه مش هيقبل باقل من النجاح
مفيش اغلى من الصحه
احنا مش بنحمل حد المسئوليه
احنا بس عايزين الكل يخاف الله ويعرف ان دى ارواح وحرام الاهمال فيها
انا مش بحسبن على الكل
انا بس بقول على المهمل وبلاش حسبنه كمان مدام بتوجعك
ربنا يهدينا جميعا
انتى تؤمرى يا ستى
ونورتينى يا دكتورة

حنين القلب يقول...

APPY
لا يا آبى
صلى كده على النبى
اللهم صلى وسلم وبارك عليك يا حبيبى يا رسول الله
بالظبط كده يا حبيبتى
دبى يا آبى ولا يهمك واحنا هنتصل بمستشفى الرمد تشيل من وراكى

آبى وحشتينى بجد والله

حنين القلب يقول...

مها زين
لا يا حبيبه قلبى
دحنا كده هنشيل البوست
لالالا دحنا نفقل المدونه كلها
الا دموعك انت (على راى هانى شاكر )
لا يتشنقوا فى ميدان عام
ذنبها انها من عيله بسيطه على قد حالها ومش قدروا على مصاريف المستشفى الخاص
ربنا يصبر الجميع

حنين القلب يقول...

fashkool
الحمد لله ازاى حضرتك
اولا انا ياختى مش يااخى
والله عندك حق
مين فينا مش تعب

بجد تعليقك هايل
تسلم ايدك ونورتنى

بت خيخة وأى كلام يقول...

لما بسمع حوداث زى دى
بخاف على شريف

وبقعد اقول حولنا وماعلينا يارب

مش عايزة اتحط ابدا فى موقف زى ده

ربنا يستر على عيالنا جميعا


سلام
اختك خيخة

حنين القلب يقول...

بنت مش خيخه ولا اى كلام

يا حبيبه قلبى ربنا يحفظلك شريف ومش تشوفى فيه حاجه وحشه ابدا

بس ده واقع احنا عايشينه
نفسنا يتغير
عارفه يا خيخه
بحلم بمكان نقى اوى فيه حب ووفاء وضمير
فيه الكبير بيخاف على الصغير والصغير بيساعد الكبير من غير ما يطلب
فيه كل حد بيعمل عمل بيتقى ربنا فيه وبيخاف يغلط لحسن ربنا يعاقبه فى اللى منه
مش فيه غش ولا نميميه ولا سرقه ولا نهب ولا قتل ولا اهمال ولا لامبالاة
تفتكرى هنلاقى العالم ده ؟؟
ربنا يستر علينا من اللى جاى

نورتينى يا حبيبه قلبى

fashkool يقول...

حنين القلب .. تحياتى .. تقبلى مرورى

البحث عن أنا شىء جنونى يقول...

اسف انى هكتب خارج نص الموضوع

يله ضيف / ضيفى مدونتك حسب القسم بتاعك وخلى العالم يتعرف عليك

وادى لغيرك فرصة يقرا خطوط قلمك

خلى البحث عنك اسهل

اتبع اللينك ده

مدونه كل العرب

http://arabwriters.blogspot.com/

رندا يقول...

أسعد الله أوقاتكـِ اينما كنتــِ
إنه العيد الذي يملأ الأيام والليالي بأقدس اللحظات
والقلوبـ بالبركة والصفاء والإيمان
الله يديم الاعياد، والافراح
وكل عام وانتم بخير

عيد سعيد عليكـِ وعلى اسرتكِ الكريمة

دمتى بود

EmY يقول...

بوست بيقلب المواجع

للاسف احوال القطاع الطبي في مصر من سيء لاسوأ

تخافي تعيي و تتعالجي او تاخدي اي قنه بسيطه لانك مش واثقه لا في الدكتور ولا في المستشفي

مش عارفه دي مشكلة ضمير ولا علم ولا المنظومه الصحيه كلها عايزه اعادة تفكير

تحياتي

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

fashkool يقول...

ابنتى حنين القلب : اسف يا أختى ما علهش .. فوتى لعمك فشكول الهفوه دى .. كل عام وانت بخير

حنين القلب يقول...

fashkool
نورتنى
ويسعدنى ويشرفنى مرورك

حنين القلب يقول...

البحث عن انا شىء جنونى

ولا يهمك
البيت بيتك

حنين القلب يقول...

رندا

ربنا يخليكى ليه يا رب ومش يحرمنى منك ابدا
وكل سنه وانتى طيبه ومن ربك قريبه دايما

عيد سعيد عليكى وعلى اسرتك ويبارك ليكى فيهم

وحشتينى

حنين القلب يقول...

Emy

طيب نعمل اييييييييه؟؟؟

والله ايوة يا ايمى الواحد بقى بيخاف ياخد اى حاجه لتكون غلط خصوصا ان ولا بقى فيه دكتور بيهتم ولا فيه عقاب للى يغلط

بالظبط هى المنظومه دى عايزة تتنظم صح شويه
نورتينى

حنين القلب يقول...

احوال الهوى

وحضرتك بخير
واسرتك الكريمه بخير

نورتنى

حنين القلب يقول...

fashkool

ولا يهمك يا عمى
وكل سنه وانت واسرتك الكريمه بخير
ومنورنى دايما

فين العديه يا عمو

اقصوصه يقول...

حسبنا الله ونعم الوكيل..!

DR.HAMAS يقول...

بالتأكيد الإهمال مرفوض و غير مبرر

المفروض اللى ميعرفش يقول معرفش

و اللى يعرف لا يمتص قوت الناس

عاوزين توازن

ربنا يعيننا على التغيير و الإصلاح لهذه الوقائع



جزاكم الله خيرا على إثارة القضية






د.حماس

فاتيما يقول...

حنونة
ربنا كريم و قادر يخلص لكل حد حقه
لكن الفوضى و الاهمال و الفساد هم أسياد الزمن دا
أنا جاية أعيد عليكى و لو إن موضوع البوست مش مناسب
لكن كل سن و إنتى طيبة يا حبيبتى و دايما وسطنا و منورة إسكندرية الجميلة
يا اجمل جنية بحر
سلامنا لزوجك العزيز

حنين القلب يقول...

أقصوصه

حسبنا الله نعم الوكيل

وكل سنه وحضرتك طيب

حنين القلب يقول...

DR.HAMAS

لا طبعا اللى مش يعرف يتعلم فى البنى ادمين واللى يموت مش مهم هو فيه فى بلدنا ارخص من الانسان

يا ريت يبقى فيه توزان وعدل ورحمه

حسبيا الله ونعم الوكيل

كل سنه وحضرتك طيب

حنين القلب يقول...

فاتيما

يا رب يرحمنا من الاهمال وقرفه
ربنا يخليكى ليه يا حبيبه قلبى
وكل سنه وانتى طيبه
والسنه الجايه يكون معاكى يوسف

ann يقول...

滿..........................................................