RSS

الجمعة، 12 ديسمبر، 2008

هلال العيد

هل هلال العيد على الاسلام سعيد كل سنه وانتى كلكم طيبين و فى اتم صحه واحسن حال دايما يارب وهذا العالم دايما متجمعين انا ادبست يا جدعان فى التاج ده وللعلم انى اول مرة اجاوب على تاج لانى اصلا مش بحب اجاوبه بس جالى من اتنين مستحيل اقولهم لا خالد همس الاحباب وبقوله شكرا يا ابو همس على التدبيسه وصبرنى يا رب وماااااااشى يا ام مريم لينا قعده مع بعض ده التاااااج ماذا يمثل لك العيد؟ العيد على راى صفاء ابو السعود فرحه وعلى راى محمد سعد العيد فرحه ماااااااااء واكيد انا مش هعرف اكتر منهم يبقى العيد فرحه وما أكثر شئ يبهجك في مظاهر العيد ؟ تكبيرات العيد وفرحه الاطفال فى الشارع اوصف لنا طقوسك في العيد .. من ليلة العيد لآخر يوم ؟ زى كل الستات بروق البيت وانضفه واشغل التليفزيون على اخره على اغنيه هل هلال العيد وبعدين اروح اصلى وارجع اجهز الفطار اللى بكون طبخاه من ليله الوقفه افطر وبعدين نروح لحماتى وبعدين لامى وبس احكى لنا اطرف موقف حصلك فى العيد ؟ مرة كنا فى العيد وكان عندى وقتها 13سنه وقولنا نروح نتفسح طبعا روحنا حديقه الحيوان زى العيال وطلعت السلالم ولسه هدخل ولقيت نفسى واقعه تحت رجلين الناس وطبعا الدنيا زحمه جدا وكنت هموت مش من الناس اللى بدوس عليه لالالا من ريحه الشربات تخيلوا عيد والناس عماله تلف من الصبح والاخر يدوسوا عليه انا بس الحمد لله جت سليمه بتحرص على تهنئه الاهل والاقارب والاصدقاء فى العيد ...ولا مش بتهتم ؟ طبعا لازم اهنى الكل والغريب قبل القريب واجيب التليفون وابعت لكل اصحابى والغاليين عندى رسايل واقعد بقى ارخم عليهم واصحيهم فى العيد من الساعه 5 الفجر طبعا لازم يصلوا واللى مش هيصلى برضه هصحيه رخااااامه هههههههههههههههههه مين اول حد تزوره او تكلمه فى التليفون\الموبايل علشان تهنيه بالعيد؟؟ اول حد بزوره حماتى وده طبعا مش بمزاجى ده غصب واقتدار واول حد اكلمه فى التليفون اقرب حد لقلبى من اصحابى ايه الفرق بين العيد الحالى...والعيد ايام الطفوله ؟ الفرق كبير جدا زمان كنا اطفال ومش عندنا مسئوليه ولا حاجه تعكر صفو العيد كنا بنجرى ونتفسح ونلعب ولا فى دماغنا حاجه انما دلوقتى صعب اوى لما الواحد يحس انه فى عيد مشاكل الحياه والشغل والبيت بس الحمد لله انا بحس بالعيد علشان الاجازة ههههههههههههه كلمنا عن ذكرياتك في العيد تفتكر الحياة من غير عيد .. هتفرق كتير؟؟ بابا الله يرحمه كان هو اللى علطول يعمل لينا فطار العيد وده طبعا مزاج عنده ورغم انه يقعد يشخط ويزعق ونقعد نقول مش عايزين نفطر يا عم الحج حقك علينا وهو ابدااا بس بجد العيد معاه كان ليه طعم تانى الله يرحمه طبعا كانت هتفرق كتير العيد مهما كبرنا كل واحد بيشوف فرحته فيه وبعدين دى حاجه ربانى ازاى بقى مش تفرق وكنا هناكل لحمه كتييييييير ازاى لو مش كان فيه عيد إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟ اجمل رساله جاتلى بتقول: شعور مليان حب وحنان اهديه لاغلى واعز انسان واهنيه بعيد الاضحى واقوله كمان كل عام وانتى بخير وامان ...وحشتينى ودى كانت من اغلى حد عندى صحبتى رشا وبقولها ربنا يحفظك ويخليكى ليه ولا يحرمنى منك ابدا يا حبيبه قلبى لسه بتاخد عيدية ؟؟ من مين ؟؟ وبتديها لمين ؟ لغايه السنه اللى فاتت كنت باخد عديتى من بابا الله يرحمه ومن يوم ما اتجوزت باخد عديه من جوزى وبديها لاخواتى ايه رايك فى التاج ؟؟ جميل اوى بجد ويسلم ايد كل اللى كاتبه وجاوبه وبعته ليه تحب تمرره لمين من المدونين ؟ اذكر على الأقل 10 يا ربنااااا 10 طيب آبى بتناجى وخرفانها فاتيما حبيبه قلبى واحده مفروسه احمد سكر فشكول داليا قوس قزح سوووو عجوز وعندى 30 سنه مها زين هى فوضى نهر الحب خلاص كده ؟؟ طيب الحمد لله كل سنه وانتم بخير وعيد سعبد على الامه الاسلاميه جميعا

35 التعليقات:

أحــوال الهـوي يقول...

كل سنة و انت طيبة

و اسرتك الكريمة بخير و دايما متجمعين علي الحب و السعادة

تحياتي

همس الاحباب يقول...

كل سنة وانتى طيبة
وعيد سعيد عليكى وعلى اسرتك

همس الاحباب يقول...

اجاباتك حلوة وصادقة جدا
تسلم ايديكى
وربنا يخليكوا لبعض يا ستى
وترخمى على اصحابك
اصل الرخامة ده طبع فى البنى ادمين
ههههههههه

همس الاحباب يقول...
أزال المؤلف هذا التعليق.
مولان يقول...

اجاباتك بتعبر عنك فعلا ومعلش استحملي حماتك


كل سنه وانتي طيبه

حسن حنفى يقول...

كل سنه وانتي طيبه ومبروك علي اجابه التاج

fashkool يقول...

حنين القلب:
حبيبى .. بالراحه وفى سرك .. يعنى ايه تاج .. واعمل بيه ايه .. من غير ما حد يحس ابعت لى خطوه خطوه.. عشان فشكول الله ينور طور الله فى برسيمه فى الكمبيوتر .. صحيح انا بقراها كتير فى مدونات كتيره بس مش عارف يعنى ايه تاج .. فى الخباسه كدا واشرح لى وقول لى اعمل ايه .. بلاش فضيايح .. كل عام وانت بخير

maha zein يقول...

شوف بقه
يعني تستنزا العيد يمشي وتعزموا
خلاص بقه بعد العيد مبيتفتلش الكحك ولا معرفش ايه
كل سنة وانتي طيبة يا حنين
محسساني انك طفلة والله وانتي بتجاوبي التاج
وبجد انتي اصلا جواكي طفلة فعلا صغننه
كل سنة وانتي بصحة وسلامة
بقولك ايه يا ست انتي
بسرعة كده ومن غير ما حد ياخد باله
ابعتي ساندوشت اللحمة بسرعة انا مهبطة وهفتانة

صبرني يارب يقول...

حيااااااااتي

ميرسي على قبول التاج يا جميل

طيب ممكن لما تروحي حديقة الحيوان تاخدينى معاكي هههههههههههههههههههههه

كل سنه وانتى طيبه يا جميل

~*§¦§ Appy §¦§*~ يقول...

اجرى يا بنت من هنا قال اجاوب قال انا جاوبت يا اختى هناك عند سالى من بدرى البسوا نضارات بقى
بقولك سورى والله نسيت امبارح معلش المهلبيه اللى فى بالى بقى

حنين القلب يقول...

احوال الهوى
وحضرتك طيب وبالف خير وسلامه

نورتنى

حنين القلب يقول...

همس الاحباب
كل سنه وانت بالف صحه وخير
والسنه الجايه تكون جوزت همس وبقيت جدو
خالد تعالى اقولك كلمه فى ودنك
عارف انت هتبقى اقصر جد فى العالم وممكن تدخل الموسوعه بتاعه جيمز الا هى جيمز ولا جينز فينك يا روقه كنت قولت لينا منتا العلامه اللى فاهم كل حاجه

المهم انك هتبقى اقصر جد فى العالم وخلاص

حنين القلب يقول...

همس الاحباب
وربنا يخليك ليه وتعيش وترخم عليه
يا سيدى ده انت ارخم واحد شوفته على سطح الارض بقى انا الرخامه فيه طبع
ماشى يا سيدى
ربنا يسامحك

حنين القلب يقول...

مولان
انا بحبها والله بس البنات سووووس
يلا ربنا يسهلهم ويتجوزا
وانتى بالف صحه وسلامه

همس الاحباب يقول...

مش مهم اقصر ولا اطول
المهم انا جدو
يعنى احترام ووقار
مش زى ناس هتفضل عيال صغيرة
تلعب فى التراب وتوسخ ايديها

حنين القلب يقول...

حسن حنفى
كل سنه وانت طيب
ويا رب السنه الجايه تحقق كل اللى بتتمناه

حنين القلب يقول...

fashkool
بص يا عم الحج
اولا التاج ده اسئله جاوب عنها زى ما تحب بطريقتك واسلوبك
ثانيا انا اهديت التاج ليك علشان تجاوبه
ثالثا والاهم هو حضرتك ليه مش مقتنع انى مؤنث والله العظيم انا انثى

نورتنى يا عم فشكول
ملحوظه
دمك عسل والله

حنين القلب يقول...

maha zein

كل سنه وانتى بالف صحه وسلامه
دمك عسل وربنا يا مها
بصى بقى الصراحه كده ومن الاخر انا هفتانه اكتر منك وبما انى اكلت اللحمه اللى عندنا فى العيد وخلصت عليها كلها بطالب من موقعى هذا
ب 3 كيلو لحمه لانى فى المستشفى ومش لقيين جلوكوز

مها كلام فى سرك
انا زدت 2 كيلو بس والله هاخس علشان الموضوع كده زاد اوى

بحبك موووووووووووه

حنين القلب يقول...

صبرنى يا رب
هو انا اقدر ارفضلك حاجه
اومرى انتى بس يا ست الكل

الصراحه بطلت اروح حديقه الحيوان من يومها لحسن حد يكون لسه فاكرنى

ممكن اخدك دريم بارك باذن الله رايحه الشهر ده هبقى اخدك ولا اقولك انا هاخد رحمه حبيبتى بس

وحشتينى والله اوى

حنين القلب يقول...

Appy
هشترى نضارة حاضر

ولا يهمك يا ستى انا كنت بس عايزة اكلمكم
وكل سنه وانتى طيبه دايما يا احلى آبى فى الدنيا
فييييييين حته التورته بتاعتى

حنين القلب يقول...

همس الاحباب
مش مهم اقصر ولا اطول
المهم انا جدو
يعنى احترام ووقار

وايه ؟؟؟؟ وقار
يا ابنى انت هتبقى اقصر من احفادك يعنى اللى يركب على ضهرك ويقولك شى يا حصان واللى يلطشك بالقلم

مش زى ناس هتفضل عيال صغيرة
تلعب فى التراب وتوسخ ايديها
ماشى انا عيله ويا رب افضل عيله دايما
انت هتعجز وسنانك هتقع وهتقرع وانا لسه صغيره وهالعب فى التراب واحدفك بيه كمان
يلا بقى هىء

بعبعه يقول...

كل سنه وانتى طيبه

kochia يقول...

ادام الله الاعياد
واحلي حاجة في الاعياد طقوسها مهما كانت متعبة

تحياتي

حنين القلب يقول...

بعبعه

وانتى طيبه يا حبيبتى
نورتينى

حنين القلب يقول...

kochia

كل سنه وانتى طيبه
وطبعا هى الحياه كلها متاعب اصلا بس لازم نعيشها


نورتينى

البت المشمشية حلوة بس شقية يقول...

كل سنة وانتى طيبة ياجميل ولو انها متاخرة شوشة
قريت ردودك
جميلة ومنطقية
بس اوعى ترخمى عليا زى اصحابك كدة احسن اقبلك المدونة مراجيح

حنين القلب يقول...

البت المشمشيه حلوة بس شقيه
وانتى طيبه يا سكرة
هو انا اقدر ارخم عليكى
وايه التهديد ده؟؟
هههههههههه
طيب انا بموووووت فى المراجيح
اقلبيها بقى

نورتينى يا شقيه

الدفاع يقول...

كل سنه وانتى وكل حابيبك واسرتك وكل الناس اللى هنا بخير وطيبين اسف ع التاخير كنت مشغول جدا وارجو دوام التواصل
ملحوظه
=====
طبعا احنا لسا شركا بامارة الشيك اللى وصلك بارباحك الفتره الى فاتت عن نصيبك فى الشركه والى وصلك فى العيد مع الخروف اللى بعته عشان تدبحيه بالمناسبه الا هو وصل؟؟؟؟؟اوعى تنكرى الاعتراف مش هايفيدك اااااقصد الانكار مش هايفيدك

Doba يقول...

كل سنة وانتى طيبة وبخير وسعادة يارب ويحققلك أمنيتك الغالية

قلبك مليان طيبة وحب وخير
اوعى تضيعى اى حاجة منهم
ودايما عيونك الشقية دى تفضل شقية كده

بوسى نفسك بوستين
تحياتى
هبة
========
على فكرة انا قلت لخيخة تديلك رقمى - ابقى خديه منها

حنين القلب يقول...

الدفاع
كل سنه وانت وكل اللى حواليك بالف خير
عندك خصم الشهر ده علشان التاخير ولازم يدوم التواصل احنا اخوات ياسيدى

اما بالنسبه للشركه
شركا فى ايه يا عم الحج هو انت اصلا بتيجى المكتب وبعدين انت ناسى انى مضيتك على توكيل عام وبعت لنفسى المكتب والبيت والروب بتاعك كمان
مش روب الحمام لالالالا روب المحاماه
وارباح ايه؟؟
ايووووووووه يا جدعان على الظلم
الشيك من غير رصيد يا متر
وخروف ايه؟؟
انت بعت ليه الفروة بس وانت اخدت الخروف يا طماع
بقولك شوفلك محامى كويس علشان انا قدمت الشيك للمحكمه
واعترف او انكر كده كده هتتحبس

والله نورتنى بجد

حنين القلب يقول...

Doba
كل سنه وانتى وزوجك وابنك بالف خير
ويا رب تشوفى يوسف احسن واحد فى الدنيا

ربنا يخليكى ليه يا حبيبتى
بس انتى شوفتى عنيه فين؟؟؟
خيخه مش بتفتح تليفونها الا فى التجمعات
اول ما هاكلمها هاخده منها واكلمك علطول

موووووووووووووه دى ليكى وليوسف

دوبا
انتى بجد انسانه رائعه ربنا يحفظك
بحبك

الدفاع يقول...

بدون رصيد برصيد المهم ان الشيك وصل
يعنى حقك مضمون
نتقابل بقى فى المحكمه

حنين القلب يقول...

الدفاع

ماااااااشى يا عم
نتقابل فى المحكمه
والنعمه لاحبسك وهجيب محامى اشطر منك وهيجيب ليه الفلوس وبرضه هتتحبس

هنجبلك عيش وحلاوة
يلالالالا

الدفاع يقول...

حنين يعنى ايدى الممدوده بالسلام ماجابتش نتيجه معاكى
تريدينها حرب اذاَ (ولكنكم تحرقون اغصان الزيتون)
للاسف هى الحرب اذاَ نخوضها دفاع عن اى حاجه مش عارفها دلوقتى بس هاعرفها بعدين (لما اتفرج تانى على فيلم صلاح الدين هابقى اقولهالك)
انا مش باتحبس خلى بالك حتى لو صدر عليا حكم بالحبس هاقضيه فى المكتب وهاجيب عسكرى مخصوص اعمله حراسه عليا وانفذ الحكم من منازلهم
وش بيطلع لسانه
هاهاهاهاهاهاهاهاهاهاها
تحياتى واحتراماتى

ann يقول...

滿..........................................................