RSS

الاثنين، 9 مارس 2009

وانا ذنبى ايه ؟؟

فى يوم وهى ماشيه لقت طفله عمرها اقل من 5 سنين واخدتها ربتها وبعدين امها لقيتها وقالت للست دى ربيها ولان الاب والام كانوا منفصلين الاب قرر انه يتنازل عن البنت للست اللى لقيتها وطبعا الام ولا فيه حاجه مهمه عندها ولا بنتها ولا غيره لا وكمان لما لقيت الست بتربى بنتها كويس اديت ليها بنتين كمان يتربوا مع اختهم راحت اتجوزت وفتحت بيت تانى ولا خافت على بناتها ولا قبلها وجعها عليهم وقدرت تنام وتعيش واولادها بعيد عن حضنها ونسيتهم وبعد ما البنت الكبيرة بقى عندها 16 سنه والتانيه 14والثالثه 11سنه
اخيرا الام اللى هى اسم مش على مسمى ولا تعرف يعنى ايه أمومه والقطط اللى فى الشارع ارحم على اولادها منها بطالب بالبنات
بطالب ان الام اللى ربت وكبرت وعملت تتعدم وبمنتهى اللامبالاه بتقول ليها مين قال ليكى ربى وعلمى وكبرى !!
ذنبها ايه الست اللى كبرت وربت وشافت بناتها ادام عينها بيكبروا لحظه بلحظها انها مرة واحده تتحرم منهم انا اللى اعرفه ان الام اللى تفهم معنى ضنى مش تفرط فيه ولا تسيبه لست تانيه تربيه حتى لو هتشيله فى عنيها
عايزة افهم حاجه
الام مين؟؟؟؟
اللى ربت وكبرت وعاشت معاهم فرحت اول خطوه واول كلمه ماما منهم واول حضن وشافتهم بعنيها بيكبروا ادامها
علمت وكبرت وصرفت طبعا رغم ان هنا الموضوع مش مادى هو معنوى للست دى بس برده مش فيه حد بيتعلم ببلاش ولا ذنبها انها اشتغلت وعاشت علشانهم ودخلت مدارس والعيال بقوا ادام عينها سنه وراه سنه نجاح وفرحه ودنيا هما اللى ملينها عليها
ولا اللى سابت ابوهم يعمل عنهم تنازل لا وبدافع منتهى البجاحه بتقول ده مش تنازل ده بصفه امانه على اساس انها كانت سايبه تلاجه عند الست مش سايبه حته من قلبها المفروض تموت مليون مرة فى بعدهم عنها وراحت واتجوزت ونسيتهم
وطبعا هنا القانون صريح ان الحضانه للام الاصليه
الام اللى اقل ما يقال عنها انها انسانه من غير قلب ولا تنفع تكون ام من اساسه
والست اللى بتموت فى فراق البنات عنها لانهم وجعنها اكتر من امهم الاصليه المفروض نقولها شكرا اوى وانتى كده عملتى اللى عليكى وزياده واتفضلى روحى موتى من القهر على فراقهم
يا جماعه الست ولا عندها اطفال ولا عندها حد يسئل عنها ولا ليها امل فى الدنيا الا البنات دى ولا طالبه حاجه اكتر من انها تشوفهم وتطمن عليهم بعد ما امهم خدتهم بالعافيه
والمصيبه كمان انها حرمت البنت من دخول امتحان الاعداديه
انا مش وجعنى غير دموع الست وهى بتقول حسبنا الله ونعم الوكيل هى الام اللى تولد وترمى ولا اللى تسهر وتراعى وتكبر
بالله عليكم اى فيهم الام؟؟؟

36 التعليقات:

Yahia يقول...

اولا ازيك وكيف احوالك ؟ يا رب كله يبقى تمام .... ثانياً بالنسبة لموضوعك من جانب الدين والقانون فالأم هي اللي ولدت بس بالعاطفة اللي انت بتكتبي بيها اكيد تبقى اللي ربت. ومهما يكون معاكي حق بس في الاخر الدين والقانون هو اللي بيكون

سلام

يحيى

همس الاحباب يقول...

لا حول ولا قوة الا بالله
طبعا الموضوع صعب جدا من الناحية النفسية
ما فيش شك ان الام هى اللى ولدت
لكن الست اللى ربت وعلمت وسهرت
اعتقد انها افضل واحق من الام اللى ولدت ورمت عيالها
وتستحق لقب ام مثالية
تحياتى

Kiara يقول...

لا حول ولا قوة الا بالله

طبعا الام هي اللي ربت وكبرت

بجد ذنبها ايه

جنّي يقول...

السلام عليكم

التدوينة ممتازة .. وتساؤلك اجابته معروفة ولا يختلف عليها احد .. وكان من الواجب ان تخير البنات في العودة لامهم القاسية والبقاء مع امهم الحنون .. واظن ان البنات كن سيخترن من ربتهم وعلمتهم لا من رمتهم يتضاون من الجوع والحرمان ..

عندما خير سيدنا زيد وكان ممن رباهم رسول الله صلى الله عليه وسلم في العودة الى والديه او البقاء مع النبي اختار البقاء مع النبي الذي رباه وعلمه ..

تحيتي

حسن حنفى يقول...

للاسف التانيه مش ام ولا اعتقد انها تستحق لقب الانسانه اساسا

التانيه اللي كبرتهم وسهرت عليهم تستحق انهم يفضلوا معهاها لاخر عمرها ويفضلوا شاكرين فضلها بعد وفاتها

فاتيما يقول...

مش عارفة المفروض يؤخذ رأيى و لا مينفعشى ....
بس طبعاً الام الحقيقة مش بالجينات
الام هيا اللى ربت و شالت و تعبت
مش اللى من بعيد
اومال أنا ساعات ببقى هتجنن ليه يا حنين ؟!!
عشان كل يوم بعيد عن يوسف بينقص من امومتى
و بيخلينى حاسة بالتقصير فى حق إبنى
بس أرجع و اقولك عن تجربة
البلد دى البنى آدم فيها عبارة عن كومة اوراق ...
تتستف تمام ... تبقى خلاص الحكاية صح
ربنا معاها و يثبت قلبها
خالص حبى يا حبيبة قلبى

Mahmoud Ibrahim يقول...

في الحاله دي هيبقي عندها اتنين أم

أم حنينة ربت واستحملت

وأم تانية بس حملت وولدت

شكرا لكلامك المؤثر

حنين القلب يقول...

yahia

الحمد لله يا ابو يوسف ازاى حضرتك وازاى دوبااتمنى انكم تكونوا بخير

ماشى عارفين ان القانون هو اللى بينتصر فى النهايه بس ليه مش يكون فيه قانون عنده قلب
قانون يحس بالست دى وينصرها
القانون اللى بيحكمنا مالوش قلب ولا روح بس احنا لينا

نورتنى
سلام

حنين القلب يقول...

همس الاحباب

صعب جدا يا خالد
انت لو كنت تشوف الست وهى بتعيط وتقول اشوف البنت الكبيرة ولو ساعه واحده وبعدين خدوا روحى كنت حسيت قد ايه المرارة اللى فى قلب الست

اكيد طبعا هى اللى تستحقهم
بس مين يفهم
ومين يحس

نورتنى يا ابو همس

حنين القلب يقول...

كيارا

مش ليها ذنب
غير انها كان عندها قلب وحبتهم وخافت عليهم وربتهم

عارفه انا لو من البنات دى اهرب واروح ليها لان اكيد الام الاصليه مش هتعرف تكمل معاهم لانها ولا تعرف طباعهم ولا عاشوا واتربوا ازاى
تبقى هتتعاما معاهم ازاى

حنين القلب يقول...

جنى

وعليكم السلام ورحمه الله وبركاته

مفيش تخير المحكمه حكمت بضم الاولاد لامهم الاصليه بدون رحمه بالام التانيه

فى زمن الرسول كان فيه عدل

انما دلوقتى تعتقد فيه عدل ؟؟

حنين القلب يقول...

حسن حنفى

اكيد يا حسن هما هيفضلوا فاكرينها مفيش حد بينسى مين اللى رباه وسهر على راحته


نورتنى

حنين القلب يقول...

فاتيما

طبعا تقولى رايك
عارفه ليه يا فاتيما لانك الاتنين الام اللى ولدت وربت وكبرت واتاخد منها ابنهاواللى حاسه ببعده عنها

اومال أنا ساعات ببقى هتجنن ليه يا حنين ؟!!
عشان كل يوم بعيد عن يوسف بينقص من امومتى

بالعكس كل يوم بيزيد من امومتك لانه فى قلبك وكل يوم حبه بيزيد وانتى اكيد فى قلبه وفاكر كل حاجه انتى عملتيها ليه

البلد دى البنى آدم فيها عبارة عن كومة اوراق..

فعلا الانسان فى بلدنا عبارة عن ورق

يا رب يثبت قلبها وقلبك وقلب كل ام ضناها بعيد عنها

وحشتينى يا اطهر واطيب قلب

حنين القلب يقول...

zidane

لا طبعا البنات مش ليهم غير ام واحده اللى ربت وكبرت التانيه دى مش تتسمى ام اصلا

نورتنى

موناليزا يقول...

حقيقى مش عارفة أقول ايه
بس البنات كان المفروض يرفضوا يروحوا معاها

عاشقة الشهاده. يقول...

السلام عليكم

فى زيارتى الاولى للمدونه قلبى اتوجع الصراحه


عموما الام اللى تربى او اللى يبقى عندها قلب مش بايعه قلبها واصلا ملهاشش حق تاخدهم
ده ظلم والله


عارفه انا لو مكان العيال اهرب من امهم الوحشه ديه
ههههههههههههههههههه


لا بجد فعلا ربنا معاهم


تحياتى:عاشقة الشهاده.

غير معرف يقول...

بصي انا والله العظيم اقول الحق
ده اللي سرق المعزة وده اللي جري بيها

نياهاهاهاهاها

حنووووون.. اخبارك ايه
انا هقولك بصراحة اني اول ما دخلت وقريت اتلخبطت وقلت يقدر طبق طبقنا يطبق في طبق طبقكو زي ما طبق طبقنا طبق في طبق طبقكو؟؟

وبعدين استهديت بالله وعرفت ان الله حق وقلت لازمن ولابد ارجعلها ابوس على يدها واحب على راسها

حنون.. شوية جد بأه

الام اللي بتربي.. الام مش كلمة بس.. دي احساس ومعاملة.. الام مش لقب بس.. دي كلمة مليانة معاني ومسئوليات وحقوق وواجبات

وانتي عارفة

ان الراجل مش بس بكلمته.. الراجل بشرابه وجزمته
:)

حنووووووووون.. وحشتيني

مها ميهوووو

حنين القلب يقول...

موناليزا

يا حبيبتى البنات فعلا رفضينها

بس ده حكم محكمه
يعنى غصب عنهم

طيب والنبى هيحصل ايه لو وافقت ان الست اللى ربتهم تشوفهم ولو مرة كل اسبوع واهه يبقى من رد الجميل ليها

نورتينى

حنين القلب يقول...

عاشقه الشهاده

عليكم السلام ورحمه الله وبركاته
سلامه قلبك يا سكره

منا بقول كده
الست اتظلمت كتير
ده اللى بيربى قطه او كلب ويضيع منه بيصعب عليه شوفتى اللى كان فى برنامج انا والناس بتاع حسين فهمى وكان عامل مكافاه 5000جنيه للى يلاقى الكلب بتاعه؟؟؟
فما بالك بانسان ربتيه وسهرتى على راحته وشوفتيه بيكبر ادامك وحبتيه وحبك

حسبيا الله ونعم الوكيل

نورتي مدونتى الصغننه

حنين القلب يقول...

احسن تستاهل

طيب اعمل فيكى ايه ؟؟
يا بنتى الموضوع درامى
بس والله خلتينى اموووت من الضحك

الحمد لله يا روحى انا تمام واتمنى انك تكونى فى احسن حال

صح يا مها
الام مش كلمه الامومه احساس ربنا بيخلقه فى كل انثى انما فيه ستات مش عندها احساس اصلا


تصدقى مش كنت اعرف ان الراجل بشرابه وجزمته
استنى اروح اشوف شراب جوزى وجزمته واوعدك لو مش عجبونى هخلعه
هههههههههههههههههههههههه


بت يا مها ابقى تعالى بيتنا هينور بيكى
الضاحكووووووووووون
هروح اعلق عندك بيه علشان تعرفيه

انتى اللى وحشتينى موت والله

hasona يقول...

السلام عليكم

حمد لله علي السلامة
عودة قوية وجميلة
والموضوع بجد خطير ومهم
،،،
الام لفظا هي اللي ولدت
لكن الام الفعلية
الام هي اللي علمت وكبرت وربت
وسهرت وأكلت
مش اللي دروت علي متعة وقتية ودورت علي الدنيا ولما ضاعت منها الدنيا بتدور تخطف الفرحة من قلوب الناس وبتدور تبني فرحتها وسعادتها علي حساب الاخرين
،،،،
لأن لو اللي ولدت هي الام - هناك أمهات الان عبارة عن حضانات تفريخ لا أكثر
،،،
والبنات ذنبهم ايه؟؟؟
ومصيرهم هيكون ايه ؟؟

حسبنا الله ونعم الوكيل

طيب والام اللي ربت كيف سيتم تعويضها عن خسارتها الجسيمة ؟؟
وهي زرعت وروت وجاء من أخذ المحصول علي الجاهز بلا رحمة أو شفقة أو عدل

تحياتي

mohamed ghalia يقول...

أكيد معاكى حق الأم الى ربت وسهرت وتعبت معاهم

ستيتة يقول...

كده يا حنين؟
اجي اتواصل قلبي يصرخ من الألم

البنات لأمهم
في الشرع للي ولدتهم
بس لو نظرت القضية امام قضاء مصري واعي كان عمل الآتي

اولا نزع لقب ام من اللي ولدتهم تماما

ثانيا حط البنات في امانة الست اللي ربتهم مع وجود اشراف اجتماعي "صوري طبعا لأنها أحن من اي حد"

ثالثا الحكم على الام والاب بالسجن لتضييع الأمانة

رابعا قولي للست دي البنات دول ها يرجعوا ليكي تباعا
كل ما واحدة تتم 18 سنة ها تتفل في وجه اللي اسمها مجازا امها وها ترجع لحضنك

اللي يفرس "اقول فيكي ايه يا حنين" ان اللي ولدت مش رمت بس لأ دي بتحارب تعليمهم كمان

اللهم اصرف عن هذه البنات السوء بما شئت وكيف شئت وردهم لحضن هذه المرأة الجميلة ردا سريعا باسمك الرحمن الرحيم

قرأت انك اتجبستي وقعدت اضحك بعد العياط .. يعني دلعتيني
ادتيني امينة رزق وشادية في بلوج واحد

تحياتي

حاجات جوايا يقول...

لا إله إلا الله
حب ايه ده اللى يتاخد بالعافية
ازاى الام تقبل ان ولادها يرجعولها غصب عنهم وبحكم محكمة

وهى لسه فاكرة اصلاااااا
وكمان ضيعت على بنتها امتحان الاعدادية
لا بجد ونعم الامهات

بس الاعمار اللى بتقولى عليها .. أعمار ناس كبيرة فى ثانوى واعدادى
يعنى ممكن ببساطة البنات يروحوا للام اللى ربتهم يزوروها على الاقل ويطمنوا عليها ويطمنوها عليها
ولا هما فى بلد تانية ؟؟

بجد ربنا يدى كل واحد اللى يستاهله

خالص تحياتى يا قمر
سالى

MaNoO يقول...

يااااااااه سبحان الله ان تكون اول زيارة لمدونتك على الموضوع دا
انا كنت بسال اصحابى نفس السؤال دا قرب جدا
وتوصلت مع اقتناع تام ان الأم اللى ربت وكبرت وعملت وكونت مبادىء بداخلهم سورى يعنى فى الكلمة اى ست فى الدنيا ممكن تحمل وتخلف اولاد لكن مش ى ست فى الدنيا ممكن تربى أولادها تربية صحيحة ولا تكبرهم على مبادىء تليق بالمجتمع والام اللى ربت
وهذا رأيى
تحياتى ليكى واتمنى التواصل بالمدونات

صبرني يارب يقول...

حنونه هى الدنيا كده

وطبعا طبعا الست دي تعبها مش هايروح على الفاضي ابدا خصوصا لو كانت بتعمل ده لله ورسوله

والبنات دول هايرجعولها وبكره يكبروا ويعرفوا ويفهموا خصوصا انهم اصلا دلوقتي كبار

لكن طبعا ما ينفعش نقول للام الاصليه ما تاخدهمش

لكن هو الحل انها الست الى ربتهم دي تحاول تتقرب وديا من امهم
وتبقى موجوده فى حياتهم وتساعدهم ماديه عشان البنات تتعلم

وديا

غير كده مش هاينفع

وربنا يجازيها خير ان شاء الله ويعوض عليها

حنين القلب يقول...

hasona

عليكم السلام ورحمه الله وبركاته

الله يسلمك ويكرمك

تعليقك بجد اكثر من رائع
فعلا فيه امهات مش تستاهل لفظ ام اصلا

اكيد البنات لما تكبر هتحن لامهم اللى ربتهم

نورتنى بجد

حنين القلب يقول...

mohamed ghalia

انشاء الله هيرجعولها تانى

نورتنى

حنين القلب يقول...

ستيته حسب الله الحمش
معلش بقى يا ستى حظك كده
المفروض ان ده اللى يحصل امهم الاصليه دى مش امينه عليهم ولا هتحس بيهم

اكيد هيرجعوا ليها تانى

"ان الله لا يضيع اجر من احسن عملا"

صدق الله العظيم

قرأت انك اتجبستي وقعدت اضحك بعد العياط .. يعني دلعتيني
ادتيني امينة رزق وشادية في بلوج واحد

اى خدمه اهه مش كله نكد
طيب سمعتى انى اتجبست مش فيه اى زيارة كده حتى لو 17 كيلو فاكهه بس

نورتينى والله

حنين القلب يقول...

حاجات جوايا

ما لولا حكم المحكمه مش كانوا رجعوا ليها اصلا لانهم مش حاسين تجاهها باى حب

عارفه يا سالى
انا حاسه انها واخده البنات علشان تقعدهم من الدراسه وتجوزهم بالدور وتاخد من وراهم فلوس برضه وبكده تبقى باعتهم مرتين

بس الاعمار اللى بتقولى عليها .. أعمار ناس كبيرة فى ثانوى واعدادى
يعنى ممكن ببساطة البنات يروحوا للام اللى ربتهم يزوروها على الاقل ويطمنوا عليها ويطمنوها عليها
ولا هما فى بلد تانية ؟؟

يا حبيبتى كلهم اقل من 18 سنه والمحكمه حكمت بضمهم للام الاصليه وامهم رافضه نهائى اى اتصال او خروج من البيت
شافت البنت الكبيرة وهو بتتصل بيها ضربتها وحذرتهم من انهم يتصلوا بيها

نورتينى يا سالى

حنين القلب يقول...

manoo


بالظبط ده اللى عايزة اقوله
لان فيه امهات بتحمل وتبيع اولادها وفيه ناس بتتبنى اولاد بتربى وتكبر
واكيد الاتنين مش زى بعض

هروح حالا ازورك
نورتنى

حنين القلب يقول...

صبرنى يا رب

حبيبه قلبى

ونعما بالله
عارفه يا صبرنى منظر الست مش عايز يروح من دماغى حاسه انها مظلومه رغم انها مش عملت حاجه غلط وكنت متغاظه من امهم اوى وهى بتقولها مش حد قال ليكى ربيهم وكبريهم ودخليهم مدارس

اكيد هيرجعوا ليها تانى مش حد بينسى حد كان حنين عليه ووقف جانبه


لكن طبعا ما ينفعش نقول للام الاصليه ما تاخدهمش
ليييييييييييييييه يا صبرنى
والنبى دى امينه عليهم ؟؟؟
انا مش معاكى نقول ليها مش تاخدهم لانها مش ليها حق فيهم
والام الاصليه رافضه اى صله بين الست وبين البنات

ربنا يصبرها

وحشتينى يا ام مريم

قوس قزح يقول...

من الواضح ان الام حبت ترجع بناتها لها لمصلحة معينة
يعنى يخدموها او تجوزهم و تكسب من وراهم من جوازة لقطة
او حتى يشتغلوا و يصرفوا عليها

لكن البنات مهما حصل .. لو هم فعلا بيحبوا الام البديلة هيرجعوا لحضنها مجرد ما يتموا السن القانونى لخرجوهم من حضانة الام الاصيلة

طبعا الام هى اللى ربت و كبرت
الامومة مش ابدا بالخلفة بس
بدليل ان فى كتير دلوقتى بيولدوا و يبيعوا ولادهم
و نلاقى اللى اشتروا الولاد بيتعاملوا معهم على انهم ولادهم من دمهم و لحمهم

بس ربنا اكيد هيعوض تعبها و حنانها معهم خير ..بكرة البنات دول يرجعوا لحضنها تانى و باولادهم كمان

maha zein يقول...

ايييييييييييييييييك يا حنين
انا دلوقتي مش فاهمة
يعني ايه يعني
يعني دي تبع انهي ناس يعني
حد انتي تعرفيهم
ولا جت في التلفزيون

طيب العيال ليه ميتخانقوش مع مامتهم الاصلية عشان يروحوا لامهم اللى ربتهم
عموما الامومة مش بالخلفة وبس
وهما اكيد مش بيحبوا امهم الاصلية لانها اتخلت عنهم

هم ايه ده
وتلاقي الست الام الاصلية دي عوزة مصلحة
يعني ايه يعني اللى هيفكرها تاخد عيالها
تكونش عوزة تطلب نفقة من جوزها ولا ايه
ولا ايه ما انا مش عارفة

وحشتيني يا حنين يا حنين يا حنين

حنين القلب يقول...

قوس قزح

انا كمان بقول كده يا داليا
اصلها رمتهم السنين دى كلها افتكرتهم ليه دلوقتى ؟؟
الحكايه دى وراها حاجه

صح يا داليا اللى بيعمل خير بيلاقيه

حنين القلب يقول...

maha zein

انا شوفتهم فى برنامج الحقيقه بتاع وائل الابراشى
تعرفيه؟؟؟

العيال طبعا اتخانقوا بس ده حكم محكمه يعنى اى خناق زى قلته

انا حاسه انها هتجوز البت الكبيرة لانها منعتها من الدراسه
وممكن تشغل البنتين التانين

والله يا مها انتى اللى وحشتينى موووووووووووووووووووووووت
حاولى تيجى اللقاء بتاع يوم التلات التفاصيل عند فاتيما
اتمنى اشوفك
سلام