RSS

الاثنين، 30 مارس 2009

الحمام افضل من الشارع

السلام عليكم ورحمه الله وبركاته ازيكم وحشتونى جدا وندخل علطول فى الموضوع علشان انا دمى محروق الصراحه
المكان \ حمام عادى خالص فى احدى شوارع اسكندريه الزمان \ من سنة تقريباً الحدث\ هى دى المصيبه بقى
اللى حصل يا جماعه ان فيه راجل الدنيا ضاقت بيه وكان متجوز وعنده بنت والبنت ماتت لانه مش كان معاه يجيب ليها علاج المهم ايجار البيت مش قادر يدفعه قام الراجل صاحب البيت الله يعمر بيته طرده من البيت الراجل باع العفش واداين تقولولى مش بيشتغل ليه ؟؟؟
اقولكم بيشتغل بس على قد حاله يعنى يوميته خمستاشر جنيه هيعمل بيهم ايه ؟؟
ياكل بيهم هو مراته والطفل اللى لسه مولود ولا يدفع نور وميه وايجار ده غير العلاج مش مهم ليهم على الاقل للمولود علشان مش يحصل اخته اللى ماتت
المهم الراجل بقى فى الشارع هو ومراته وابنه طيب يعمل ايه ؟؟ دخل حمام فى الشارع وهنا جت ليه الفكرة
ممكن؟؟ ليه لا ؟؟
يعنى هعمل ايه ولا هيعملوا فيه ايه اكتر من كده ؟؟؟
الراجل راح اشترى طبله باب وركبها واستنى لما الناس اللى فى الحمام خرجوا وراح مركبها وقفل على نفسه هو مراته وجاب كرسيين انتريه وسرير صغير حطه فى طرقه الحمام وقال مش طاااااااااالع من هنا الا على جثتى هعيش فين الواد هيموت من برد الشارع ومراتى بقيت اخاف عليها لما يجى الليل ومش عارف استرها من عيون اللى رايح واللى جاى وانا اسودت الدنيا فى عينى يا اما يسيبوا لينا الحمام ده ومش اظن من قله الحمامات فى الشوارع يعنى ده مش هياثر معاهم واما يجيوا يعدمونا ويريحونا
الطريف يا جماعه فى الموضوع ده
ان لما بيكلموا رئيس حى وسط والمسئول عن الموضوع ده رفض يتكلم ولا ينطق حتى وقال للسكرتير كلمتين قولهم (لا تعليق)
يا نهار مش فايت لالالالالا تعليق
اومال هتعلق امتى وهنقدر نعمل حاجه امتى بكرة نلاقى اللى بيسكن فى المساجد والطرقات والجناين والمقابر
بقينا نسكن حمامات الشوارع
يا ترى بكرة هنسكن فين ؟؟؟؟
واخرتها معاكم ايه ؟؟؟؟

28 التعليقات:

همس الاحباب يقول...

بصراحة هو ده التصرف اللى قدامه
هيعمل ايه يعنى على الاقل شارع اهون من شارع
اما رئيس الحى فربنا معاه لان الراجل تعب بصراحة لالالالا تعليق
ربنا يرحمنا

همس الاحباب يقول...

اما الجناين والمقابر دول اسكنوا من زماااااااان
ولا نسيتى كراكون فى الشارع
ولا الحب فى التخشيبة
والناس المرمية على الارصفة فى الميادين
حسبى الله ونعم الوكيل

همس الاحباب يقول...

بس المهم
اوعى تكونى بتخططى انك تستولى على باقى الحمامات
احسن انا عارف تفكيرك وتخطيطك

حروف يقول...

ياخبر لا حول ولاقوة الا بالله
موضوع صعب اوي واول مرة اعرفة

طب حتتحل ازاي بجد المشاكل دية

صبرني يارب يقول...

لا حول ولا قوة الا بالله

امال يا حنين الناس بتاكل فى بعض ليه

يا روح ما بعدك روح

والناس لحمها اتنهش يا حنين

حسبنا الله ونعم الوكيل فىكل من كان راعي ولم يراعي حدود الله فيهم

kochia يقول...

واللهالراجل صعبان عليا جدا
طيب يعمل ايه
الفقر مش مشكلة لكن المشكلة هو السكن والعوز زي ما بيقولوا
واعتقد الحاجات الاساسية دي الدولة هي المسؤولة عنها
ولا ايه

موضوع مؤلم

تحياتي

عاشقة النسيان يقول...

والله ياحنان انا مش عارف ازا كانت القصة دى حقيقة ولا خيال

بس ال اعرفة ان دا فعلا حالنا من زمان بقينا عايشين اغراب فى بلدنا

الربان يقول...

تحياتي

مشاكل متعددة من خلال بوست واحد...

قلب بلا رحمة لصاحب البيت... تفكير عقيم
لصاحب المشكلة ...لانه معرض للطرد في اي
وقت من البيت الحمام....

المشكلة الثالثة هي رئيس الحي الذي يفترض فيه انه يعمل علي النهوض بما وكل اليه من اعمال ضمن حدود الحي...الا انه ايضا اختار الاسهل..

بالمناسبة الناس بالفعل تسكن بالمقابر
و مقابر القاهرة في الامام الشافعي و البساتين عامرة بالاحياء القانطين بها.

نسأل الله الا ينزع الرحمة من قلوبنا..
و أن يسترنا فوق الارض و تحت الارض ويوم
العرض...

تحياتي و تقديري

Empress appy يقول...

طيب مفيش حد يأجر له اوضه على سطوح حتى يا حنين مفيش حد عنده اوضه فى اسكندرية كلها
محدش قادر يروح للحى الناس تلم بعضها وتروح هيلبسوه قضيه كده على فكره

Ehab يقول...

يا سلام لقى حمام اهو وضبط حياته

امال اللي على الأرصفه وعلى كباري المشاه وفي المقابر وفي الخرابات وفي وفي وفي
كل دول هيلحقوا يعلقوا عليهم امتى يا بنتي

بصي ربنا بيحاسب كل واحد عن الناس اللي مسؤلين منه وبما ان الراجل ده ملقاش حته يعيش فيها الناس اللي مسؤلين منه غير دي فهو عمل اللي عليه
اما بقى الدور والباقي على اللي نسي هو مسؤل عن كام مليون
الله يكون في عونه بقى

سلااااااااااااااااااااام
اشمعنى انا لا تعليق

mohamed ghalia يقول...

ربنا يستر
وشكلى هعمل زى رئيس الحل وهقول لا تعليق

صيدلانيه طالعه نازله يقول...

هو فعلا الموضوع مش محتاج تعليق محتاج تصرف سريع لان الناس اللى زى دول بقوا قنابل موقوته لانها كرهه المجتمع اللى مش بيساعدها و نفسها تئذيهم عشان تحس بالمساواه و ربنا يستر

وردة يقول...

اصله حيعلق حيقول ايه
حيقول ان البلد الغلبان اللي فيها يموت هو وعياله علشان التأمين الصحي مجرد يافطة
حيقول خليه في الشارع هو ومراته لحد ما يحصلها مصيبة وهو مش قادر يحميها
ولا حيقول خليه في الحمام حعمله ايه وبكده يبقي خي المنافع العامة لكل من هب ودب
اما الراجل فربنا يعينه
حيعمل ايه
سلام

حسن حنفى يقول...

الراجل مش قدامه يعمل حاجه غير كده يعني هيقعد في الشارع بمراته وابنه ولاهيموت نفسه ويموت عيلته معاه ؟

فاتيما يقول...

ماهو للأسف يا حنونة
الحق لما مييجيش بهدوء ..
بيتاخد بالعافية
و البلطجة
مش عارفة أعلق أقول إيه ؟؟
انتى دايما حكاياتك بتلجمنى ..

فاتيما يقول...

آه ...
وحشتينى

Hanan Elshafey يقول...

سبحانك يا ربي
والل قدر عليه لالالالا تعليق
حاجه تخنق والله
بجد ربنا معانا كلنا
ويجازي كل انسان علي قد ضميره

خالص ودي

micheal يقول...

حاجة تقطع القلب
للأسف وصلنا إلي هذا الحال وربنا ينتقم من اللي كان السبب
تحياتي

عاشــــــ النقاب ـقــــة"نونو" يقول...

ايه يا حنين انت مش عايشة معانا ولا ايه
ما فيه سكان مقابر من زماان وجناين وعشش ومساجد بتتفتح بالليل للغلابة يباتوا فيها
كان دة بس اللي فاضل
الحمام
وحسبي الله ونعم الوكيل
ولسة قايلة لخالد همس دوقتي ان فيه مؤامرة لخراب البلد اللي مليانة خير وحسبنا الله ونعم الوكيل
على فكرة قريب اوي هكون عندك
يارب اشوفك
تحياتي

Asmaa mahaba يقول...

بصراحه والله راجل جدع يعنى حيعمل ايه
بس بصى يا حنين لازم برضو نسعى للرزق مش حنستنى يجيلنا لحد عندنا يعنى نخرج نشتغل نبيع ان شاء الله نكنس شوارع بس لازم يكون فى سعى للرزق
ربنا يعينه ويعفينا
احنا لو مجتمع اسلامى صح وسليم مكانش دا حدث لازم نظام الكفاله فى الاسلام يحل كل المشاكل دى
اما المسؤل فخدى بالك انه فعلا لا تعليق دا على حد علمى واحد عادى من مش فى ايده حاجه حيروح يرفع القضيه للاعلى منه وحيقولوا ليه لا تعليق ومن لا تعليق للا تعليق خلصت الحكايه
ولا تعليق

د. إيمان مكاوي يقول...

لا لا لا لا لا تعليق
ربنا يرحمنا ويقينا جميعا شر الحاجة
وحشتيني حنين ..بقالك كتير مش بتزوريني ..أين أنت
دمت بكل الود

فاتيما يقول...

حنونة
عاملة إيه يا حبيبتى
وحشتينى و قولت اعدى أسلم
يا رب تكونى بخير و صحتك تمام
إبقى اكتبى أى حاجة طمنينا يعنى
بوسة و حضونة يا حبيبتى

شاب كــ طخين ـــــا يقول...

لاحول ولا قوة الابالله
بعد المقابر دلوقتى الحمامات
ربنا يرحمنا ويكفينا شر الحاجه

سلااااااام

blue-wave يقول...

ربنا يلطف بينا يارب

عاشقه الرومانسيه يقول...

ياساتر يارب على الدنيا
اييييييه ده
ارحمنا برحمتك يارب

Unknown يقول...

هذه القصة أهديه إلة السيد الرئيس مبارك ولأبنه جمال لو كان عايز يمسك من بعدع عشان يعرف أن التركة كبيرة وتقيلة

بس هما أصلا معبرينا

حسبي الله ونعم الوكيل

Hannoda يقول...

الحكاية فكرتني بواجد بينام على البحر كل يوم عند كليوباترا بين البلوكات
الراجل ده عمري ماشفت وشه.. كل يوم بعدي من هناك الساعة 9 الصبح ألاقيه متكلفت في بطانية مغطياه لآخره
كل يوم كل يوم
لدرجة اني شكيت يكون ميت مثلا فقصدت أعدي في وقت في نص اليوم بس مالقتهوش

قلبي بيوجعني قوي لما بشوف حال الفقراء فبلدنا
و بيوجعني اكتر لما أحصر تفكيري فسؤال
مش ده مصر؟
و اللي بيحصل فيهم كده مصريين؟
طيب لما يحصلهم ده كله فبلدهم... بيتهم ..طيب يدورةا على الكرامة فين؟؟

و اللي يحزن ان براها بتلاقي اللي يعاملك على ان ليكي كرامة وليكي حق في حياه تليق بكونك انسان

بلدنا يا حنين بقت ملكية خاصة لناس أغبية.. وصحاب البلد ياعيني عليهم

ذكرى رحيل قلم يقول...

السلام عليكم
لا حولا ولا قوة الا بالله
ده اقل حاجة يقدر ياخدها من الدولة ولو عارف ياخد اكتر من كده وضع يد اشجعه واقول له خد برحتك ديه بلدك ولما يجوا ويكلموك قلهم عايز حقي
تحياتي