RSS

الأربعاء، 25 مارس 2009

تصدقوا وحشتونى

السلام عليكم
امبارح كان يوم روووعه وطبعا بغظيكم
ليه بقى ؟؟؟؟
علشان امبارح كان تجمع المدونين فى اسكندريه ودى طبعا فرصه استحاله اضيعها
واليكم الاخبار بالتفصيل (مش بعرف احكى كويس مااااشى):
الساعه 11 ادام نادى الاطباء واول واحده شوفتها وعينى وقعت عليها حبيبه قلبى اللى رايحه مخصوص علشانها ايووووووووووون فاتيما صاحبه مدونه روح قلب ماما وبعدين شوفت خالد همس الاحباب واللى مش عارفه جه ليه اصلا بس يلا اهه نورنا وشوفت كمان هنوده صاحبه مدونه غربة فى اجازة واللى اللقاء كله كان على شرفها وشيماء صاحبه مدونه اعترفات قلب وهشام صاحب مدونة جعلونى مريضاً نفسياً دول اول ناس شوفتهم وبعدين جت العسوله الصغننه دكتورة مروة صاحبه مدونة لماضه وبعد كده دخلنا نادى الاطباء وجت دكتورة داليا صاحبة مدونة كورنور وجت اسماء صاحبه مدونه نبض اسكندريه وسالى صاحبه مدونه الحروف وعاشقه الرومانسية وحنان الشافعى صاحبة مدونه رياح الحنين واحمد صاحب مدونة اسير الجراح
دول اللى اتشرفت بيهم وكنت مبسوطه اوى وانا وسطهم
اتكلمنا فى حاجات كتير وكل واحد قال دخل التدوين ازاى وبقاله قد ايه واسماء نبض اسكندريه اقدم واحده فينا وبتقول انها جديده والصراحه حسيت انها قريبه منى وانى اعرفها من زمان وهى كمان قالت انها شافتنى قبل كده بس مش عارفه فين
فاتيما بجد مبسوطه انى شوفتك اوى وقعدت اتكلمت معاكى براحتى وكان نفسى والله اكمل معاكم اليوم بس الدكتور بقى ان شاء الله المرة الجايه هقعد معاكى لاخر اليوم
هنوده السكرة بجد دمها عسل وعليها ضحكه تحس فيها ببراءة الاطفال وحنينه وطيبه وحسيت انها قريبه اوى منى ومش غريبه عنى بجد هتوحشينى وتسافرى وترجعى لينا تانى بالف مليون سلامه
وعاشقه الرومانسيه اللى حسيت انها طيبه اوى وجدعه بجد ويا عينى الكاكاو وقع على هدومها والعقد بتاعها اتقطع وكانت يا عينى لابسه ابيض بقى ابيض فى كاكاوى معلش يا حبيبتى
ولماضه العسوله حسيت انى اول مرة اقعد معها رغم انى شوفتها قبل كده بس المرة دى قعدنا مع بعض اكتر وبجد حسيت انها شخصيه لذيذه وصريحه وطيبه
وسالى البنت دى سكرة دمها عسل وحنان الشافعى كانت هاديه اوى ومش عرفت اتكلم معاها كتير وداليا كان نفسى اقعد اتكلم معاها اكتر
وداليا قوس قزح وعبده الرايق كلمونا فى التليفون وبجد يا دوللى كان نفسى اوى تكونى معانا فرحتى كانت هتكمل بوجودك وانت يا روقه مش هتنازل انك تكون معانا المرة الجايه
ومش عرفت اتكلم مع هشام ولا احمد بس سعدت جدا انى اتعرفت بيكم بجد محترمين وعلى خلق وربنا يوفقكم
وطبعا خالد همس الاحباب ومش هقول عنه حاجه لانكم اغلبكم عارفينه
طول عمرك رمز للجدعنه والرجوله والشهامه يا محمد ابو سويلم وبجد فرحت انى شوفتك اوى بس عارف لو كنت مش جيت كان اكيد هيبقى اليوم احلى بكتير
تصدقوا والله كلكم وحشتونى اوى من امبارح
يا ترى هشوفكم تانى امتى ؟؟؟

55 التعليقات:

شيماء جمال(شيمو القمر) يقول...

أكبر أسف ليكى والله بس أنا كنت خايفة أكتب اسم مدونتك غلط وكنت منتظرة بوست فاتيما علشان أخد منه الاسم وكان تعريفك كنت كتباه وكنت مستنية أتأكد من اسم المدونة وأنا مش ممكن أنساكى

سعدت وتشرفت بلقائك جدا

تحياتى
شيمو القمر

Unknown يقول...

حمدلله على السلامة من الرحلة الجميلة دى
ويارب تكرررررررر وتبقى تحكى لنا بالتفصيل كل حاجة لاجل الناس
اللى مالهم نصيب فى اللقاءات
دى لكن والله ببقى كانى معاهم
وخصوصاً لما بيبقى فيه
صور للقاء وكده
مرة تانية
حمدلله على
السلامة.

hasona يقول...

السلام عليكم

بجد اللقاء الجميل ده فرصة كبيرة

وأكيد كانت تحفه الملائكة
ده غير ملائكة البشر اللي كانوا حاضرين

نتمني يتكرر ويتكرر
وربنا يجمعكم دايما علي الخير والمحبة

تحياتي

Asmaa mahaba يقول...

طب انا بقى عينى فى البوست دا وشوفى بقى المدونه حيجرالها ايه:)

همس الاحباب يقول...

حتى انت يا بروتس
كتبت عن اللقاء
هى بقت مهزلة يا جدعان
كل من هب بقى يكتب
وخالد همس الاحباب اللى مش عارفه جه ليه اصلا
اهو نورنا ده شىء اكيد على اساس انى لمبة 200 وات
استغفر الله
انتى عارفة اجمل ما فى اللقاء انك مشيتى وريحتينا بدرى
اعتقد اننا لو عملنا لقاء بعد كده هيكون سرى خصوصا علشان خاطرك

dahlia.. يقول...

عزيزتي حنين القلب
أول مرة أعلق عندك بس مش أول مرة أزورك
بجد أنا ارتحتلك جدا و خصوصا ان احنا طلعنا جيران..و حاسة ان ممكن يبقى بيننا كلام كتييييرقويي.مبسوطة قوي اني شوفتك انت و كل الناس الجميلة اللي كانوا موجودين

همس الاحباب يقول...

تصدقى انك احرجتينى
بس برده ده ما يمنعش انى اخد حقى منك
المهم طبعا انتى من الناس اللى بحس انه من جواهم طفل برىء
بيعمل شقاوة بس مش بتحب تضربه
ممكن تعمل حاجة تانية
تبوسه وتحطه جنب الحيطه
ههههههههه
مش عارف امسك لسانى بجد

همس الاحباب يقول...

وبعدين انتى صدقتى ما شوفتى فاتيما
وهات يا رغى
كلتى ودنها وصدعتيها
وعمالة لوك لوك
ارحمى نفسك شوية
ههههههه
بجد طبعا اليوم كان جميل واسكندرية طول عمرها جميلة يا حورية
وسعيد جدا انى قابلتك طبعا وجها
لوجه وكان نفسى تقعدى معانا 13 دقيقة كماااان
بس الحمد لله

حنين القلب يقول...

اعترفات قلب
ولا يهمك يا حبيبتى
المهم انى سعدت جدا بالتعرف عليكى وبجد كان يوم روعه اتمنى يتكرر

واتمنى نكون اصحاب يا قمر

حنين القلب يقول...

norahaty
الله يسلمك بس انا مش سافرت لانى اصلا اسكندرانيه
يا ريت تكونى معانا المرة الجايه
بجد هبقى سعيده اوى لو اتعرفت عليكى

نورتينى

فاتيما يقول...

يا خالد بسسسسسسس
يا عيال أتهدوا شوية بقى
مفيش فايدة فيكم ؟؟!!
طب سيبنى يا خالود أقول لكمتين للبونية و أمضى فى حال سبيلى طيب ...
أنتى كمان حنونة وحشتينى و ملحقناش نقعد معاكى أساساً ...الواد خالد كان باصصلنا فى الحكاية و لا إيه ؟؟
يا رب تكونى إطمنتى من المشوار اللى كنتى رايحاه ...طمنينى عليكى يا حبيبتى
و إن شاء الله تتكرر اللقاءات دى
و أشوفك و أشوف كل الاحباب فى البلد التحفة دى اللى حتة من الجنة
بحبك و يا رب تكونى علطول بخير
آه ...
و متفتحيش الباب لحد أى كان ... هاه
سلام يا حبيبتى

حنين القلب يقول...

hasona

عليكم السلام ورحمه الله وبركاته

كنا نتمنى تكون موجود معانا اكيد كانوا الملايكه زادوا واحد

نورتنى

حنين القلب يقول...

سومه مجنونه فى بلد عاقل

بصى
لا البوست ولا المدونه ولا صاحبتهم يغلوا عليكى بس والنبى بلاش عينيكى
هههههههههههههههههه

نورتينى

حنين القلب يقول...

همس الاحباب


يا فتاح يا كريم
ايه اللى جابه هنا ده
يعنى ايه حتى انا ؟؟
ع الاقل ادينى رفعت روحك المعنويه وقولت عنك بوقين حلوين رغم انك تستاهل قطم رقبتك
بس يلا كله بثوابه

عيييييييب
انت برضه لمبه 200 وات ده انت كبيرك لمبه سهارى ومحروقه كمان
ههههههههههههههههههههههه

برضه هعرفه وهاجى غصب عنك علشان اقعد على قلبك ومش همشى بدرى المرة الجايه

وش بيغيظك

حنين القلب يقول...

داليا

والله وانا كمان ارتحت ليكى وحسيت انى اعرفك من زمان وانك قريبه منى

بصى ده اميلى ضفينى واتمنى نتكلم وقت ما تدخلى

shahd_hneen2008@yahoo.com

وانا كمان مبسوطه اوى انى اتعرفت بيكى

نورتينى

حنين القلب يقول...

همس الاحباب

يا رب بس يتمر فيك حكم انت زى القطط تاكل وتنكر

والنبى انا اللى عايزة حد يجبلى حقى منك

الحمد لله انها مش وصلت للضرب
انت بقى شبه العيل الصغير اللى تحس انك عايز تخنقه بايديك

وانت من امتى بتعرف تمسك لسانك

ربنا يصبرنى عليك

حنين القلب يقول...

همس الاحباب

الصراحه اااااااه
ما صدقت شوفتها كانت وحشانى اوى وبعدين انا جايه اصلا علشانها انت مالك ومالنا بقى يا حشرى

اسكندريه طول عمرها حلوة بس هتبقى احلى لو كنت مش نورتها امبارح

تصدق انا مش سعيده خااااااااالص انى شوفتك انا من امبارح عماله اشرب فى لمون وبرضه نفسى غمه عليه

يا رب ارحمنا

حنين القلب يقول...

فاتيما

حبيبه قلبى
شوفتى بنفسك اهه
علشان امبارح اقولك نحط ليه السم فى الشاى تقوليلى حرام اخدتيه منى
امانه عليكى لو شوفتيه تانى سميه واطمنى والله ما هبلغ ولا هقول حاجة

الحمد لله اهه هشوف اخرتها ايه معاهم واللى ربنا عايزة هيكون

فطوم وحشتينى اوى والله واتمنى اشوفك كل يوم واتكلم معاكى اكتر من كده


حااااااااااضر مش هفتح الباب حتى لو حد اعرفه يلا كده احسن واوفر
ههههههههههههههههههههههه

سلام يا حبيبه قلبى
موووووووووووووووووه دى ليوسف

أسير الجراح يقول...

ام انا متاخر كدة عندكم

ربنا يعزك يارب

ودة شرف ليا طبعا بمعرفتى بحضرتك

وفرصة سعيدة يا قمرايا

تسلمى يارب على اليوم الجميل



هههههههههههههههههههههة

كلام الاستاذ خالد الاخ الرائع

هو حطك فى دماغة كدة لية

ههههههههههههههة

بس والله لقاء جميل

وان شاء الله نتجمع قريب جدا


كل الحب

اسير الجراح

Unknown يقول...

انا حأكون الاسعد
لو حدث هذا

mohamed ghalia يقول...

واضح إنه فعلا كان يوم رائع
المهم إنكم استمتعتم بوقتكم

عاشقه الرومانسيه يقول...

يابت انا اللى اتقلب عليا قهوه
فاتيما قالت لى كده
وانا بصدقها
ياااالهوى
هو انا جانى زهيمر ولا ايه؟
عااااااااااا
ماكنش يومك يادودو

انتى كمان وحشتينى مووووت

عاشــــــ النقاب ـقــــة"نونو" يقول...

ان شاء الله دوما متجمعين في الخير
وباذن الله اشوفك في الصيف هصيف في اسكندرية علشان اشوف حبايبي كلهم يلا عندك شقة نؤجرها للمصيف
ههههههههههههه
وحشاني
احبك في الله
وكل عام وانتِ بخير وسعادة
ايه موضوع الدكتور دة عاوزة اطمئن طمنيني

Unknown يقول...

ماشي ماشي ماشي
المرة الجاية هيبقي فيه تجمع برضه في تفاهنا العزب مع سيد ابو حفيظة
غيظي براحتك يا ستي

شكرا بس انتي بقي مولودة في شهر كام :D
شكلك كده في نوفمبر!

شفـقــة و إحســــان يقول...

بقى كده تروحى من غيرى قال وايه جاية زعلانة انى مردتش عليكى
ده انا اللى زعلانة وهموت نفسى من العياط عندك وهعملك مناحة على باب المدونة وهقلبها صوان عزاء
اعاااااااااااااااااااااااااااااااااااااااااااااااااااااااااااااااااااااااااااااااااااااااااا
اهىءءءءءءءءءءءءءءءءءءءءءءءءءءءءءءءءءء
اهههههههههههههههههههههههههههههههههههه

Hanan Elshafey يقول...

وحشتيني بجد بجد بجد
كلكم وحشتوني
كان نفسي ومني عيني اقعد اكتر
بس بجد والله ظروفي كانت كده اليوم ده
ان شاء الله تتعوض
بعدين ده احنا اسكندرانيه يا جدعان
المفروض كل يوم مع بعضنا ولا ايه
حسيتك قلب طيب وروح حلوه وحنينه جداااااااااااااااااااااااااا
ربنا يسعدك يارب


حبي ليكي

صبرني يارب يقول...

ماشي ماشي ماشي

غيظوا فيا اوووووووووووي

نبض اسكندرية يقول...

مش عارفة اكتب اية بعد الكلام اللى قولتية

بجد انت بنوتة رائعة واحساسك جميل وانا بجد حبيتك من قبل ما اشوفك

وركزى على قبل ما اشوفك دى شوية

وبجد انا سعيدة جدا جدا جدا باللقاء دة يمكن عشان كنا كلنا قريبين من بعض والمواضيع كنا كلنا بنشارك فيها بنضحك مع بعض وعنينا كان باين فيها الفرحة قوى بجد يوم مش هنساة واتمنى انة يتكرر كتير قوى

وفرحانة اكتر انى عرفت مدونات اسكندرنيات قمرات كدة وعسولات خالص بجد واتشرفت بكل الناس اللى كنت اول مرة اشوفهم بس اكتر حاجة زعلتنى ان الوقت جرى هوا

مش ممكن بجد على اللحظات الحلوة اللى قضيناها مع بعض

مش لاقية حاجة اقولها

غير انك بجد انتى كمان وحشتينى ياحنين وان شاء الله اكون من متابعينك الدائمين

يارب يتكرر تانى

دمتى بخير وخالص تحياتى

حروف يقول...

انا جيتتتتتتتتتتتتتت
انا خلاص حبيتك نفسك في بنت شبهي طب خديني اعتبريني بنتك عادي يعني بس انا كبيرة شوية بس مش ححسسك بنقطة دية واكيد اكيد ماما حتدعييللك وحترتاح من شقاوتي ههههههههههه
بجد حبيتك جدا جدا كنت اتمني تقعدي اكتر يارب تتكرر تاني وربنا يخليكي علي كلام الحلو يارب
سلميلي علي استاذ خالد وخليه يزورنا بئا انا مليش دعوة لاحسن اعيط

هههههههههه
دمتي بالف خير

حروف يقول...

صحيح اخدت اميللك وحضيفه

حنين القلب يقول...

أسير الجراح

لا متاخر ولا حاجه
انا اللى اسعد والله وكفايه انى عرفت ان الاسكندرانيه كلهم دمهم عسل
طبعا بلدياتى
هههههههههههههههههههههه

الاستاذ خالد ؟؟؟؟
هو احنا كان معانا حد اسمه الاستاذ خالد
اااااااااااااااه تقصد خالد
هو علطول كده يا سيدى حاطتنى فى دماغه
ربنا موجود

نتمنى اليوم الجميل ده يتكرر تانى ان شاء الله
نورتنى

حنين القلب يقول...

norahaty

انا هبقى الاسعد والله

الاميل موجود لو تحبى تضفينى

اتمنى دوام التواصل

حنين القلب يقول...

محمد غاليا

فعلا كان يوم رائع بس كان ناقصه تشرف حضرتك


نورتنى

حنين القلب يقول...

عاشقه الرومانسيه

يا بنتى اللى اللى فقدتى الاكرة القهوة بتاعه فاتيما جات بعد ما اتكب عليكى الكاكاو بتاعه سالى
بس عارفه البدى بقى لونه احلى بالكاكاو

تعيشى وتاخدى غيرها المرة الجايه هجيب معايه برسيل لزوم الحاجات دى
ههههههههههههههههههههه

انتى اللى وحشتينى والله

حنين القلب يقول...

عاشقه النقاب نونو

امتى يجى الصيف بقى يا رب
وحشتينى والله واتمنى اشوفك واتعرف بيكى قريب


عيوووووووووووووونى
شقه بس قولى فيلا شاليه ع البحر 6 غرف زى ما تؤمرى
نونو
بصى تعالى خدى قوضه وانا قوضه ونقعد سوا وكده نبقى وفرنا
ههههههههههههههههههههههه

وموضوع الدكتور ده حاجه بسيطه
عملت عمليه والدكتور نسى جوا الفوطه والمقص والمشرط وابره الخياطه وقالى تعالى كمان شهر اعملك عمرة وانا كسلت بس الحمد لله كله موجود فى الامانات
هههههههههههههههههه
اطمنى يا حبيبتى انا كويسه
ربنا يخليكى ليه

وانا احبك فى الذى احببتنى فيه

حنين القلب يقول...

طعميه سخنه

هااااااااااجى برضه واقعد معاكم

ههههههههههههههههههههههه

انا مواليد شهر 9 تسمع عنه شهر العظماء

هههههههههههههههه
نورتنى ومستنيه الهديه بتاعتى فى عيد ميلادى قشمعنه انا؟؟؟

حنين القلب يقول...

شفقه هانم واحسان بيه

انا عماله ادخل كل شويه
واقول اله هى مش بترد عليه ليه
هى زعلانه منى ولا ايه وفضلت اعيط لحد ما جه جوزى وقالى انتى نكديه روحى وانتى طااااااااا
روحت بطلت عياط وشغلت اغنيه العنب وقعدت ارقص معلش يا ستى الواحده ما صدقت لقت حد
ههههههههههههههههههههههه


لالا يا حبيبه قلبى انتى تنورى اسكندريه فى اى وقت
ومن غير عياط لحسن احسان بيه يقلد جوزى
هههههههههههههههههههههههه

حنين القلب يقول...

حنان الشافعى

وانتى كان وحشتينى يا حنان والله

انتى اللى مشيتى بدرى
معلش تتعوض المرة الجايه
باذن الله

يا ستى ضيفى ايميلى ونتكلم كل يوم وكب ساعه
وانا كمان ارتحت ليكى جدا والله وحسيت انك طيبه وسكرة

ويسعدك انتى كمان يا رب

نورتينى

حنين القلب يقول...

صبرنى يا رب

والله يا حبيبتى مش بنغيظك
وحياه ربنا كنا بنتكلم عنك
انتى الحاضر الغائب يا حبيبتى

بس خالد قعد يقول عنك كلام
بصى انا لو منك اسلط عليه حد يموته ويريحنا منه

انا جايه اهدى النفوس وبس

وحشتينى يا ام مريم
مووووووووووووووووه

حنين القلب يقول...

نبض اسكندريه

ده اقل حاجه اكتبها عنك
انتى اللى عسل والله ودمك سكر وخجوله كده وهاديه
مركزة على قبل ما تشوفينى اهه
هههههههههههههههههه

انا اللى اسعد انى اتعرفت بناس شفافه ونقيه وبجد بعتز بصداقتهم

اتمنى اليوم ده يتكرر تانى
واتمنى اشوفك تانى لو حتى مش فى لقاء

وحشتينى
مووووووووووووووه

حنين القلب يقول...

حرررروف

اخيرا الشقيه جت

هو انا اطول اجيب بنت سكرة وحلوة وتغلبنى معاه كده والعرسان تفضل تيجى وتروح عليها وهى عماله تتامر لحد اما تعنس
هههههههههههههههه

سلميلي علي استاذ خالد وخليه يزورنا بئا انا مليش دعوة لاحسن اعيط

لا يا ستى ولا تعيطى ولا غيره
انا هقوله يجى يزورك وهسلملك عليه رغم انى مش طيقاه اصلا بس يلا علشان خاطر احلى عيون

سلام يا سكرة

حنين القلب يقول...

حررررروف

ماشى وانا مستنيه نتكلم قريب ان شاء الله

مووووووووووه

صاحب المضيفة يقول...

كان نفسي اكون معاكم يومها

الا ان السبب كالعادة هو العمل الممل والخنيق اللي مش عارف هيخلص امتى

ربنا يسهل ويخلص بقى شوية قبل ما نموت

:):):):):)

ربنا يسعدكم دنيا واخرة يارب

داليا ..قوس قزح يقول...

لعلمك بقى ده حظ خالد انى مش روحت
لان كنت انا و انتى هنريحوه و نواضبوه و على القاهرة نشحنوه
ههههههههه

المرة الجاية ان شاء الله هكون موجودة
و نخليها قبل ما امتحانات ثانوية عامة تبدا علشان نستمتع قبل الزحمة

انا فرحانة ان اللقاء كان ناجح و يارب دايما كل لقاء كده

maha zein يقول...

ماشي ماشي
انتوا بتهزروا يعني
ده انتوا اتفقتوا امتي يعني

يعني ولا مين شاف ولا مين دري
مطمرش فيكو مقابلتي ليكوا في اسكندرية الصيف اللى فات
ماشي يا حنين
شاطرة بس تقوليلي وحشتيني علي الورق لكن في الحق و الحقيقي متجيش تقوليلي علي اللقاء

اوك
اوك
انتوا احرار

روحي كده
لا خلاص

انتهي

تبعيني كده يا حنين

محمد عبدالرحمن شحاته يقول...

مشكور على موضوعك دمتي متألقه ومبدعه

حاجات جوايا يقول...

كل مرة وانتوا طيبين يا قمر
ربنا يجمعكم دايما فى الخير

خالص ودى
سالى

حنين القلب يقول...

صاحب المضيفة

واحنا كمان كان نفسنا حضرتك تكون معانا
حضرتك لو عايزة يخلص
دى حاجه سهله جدااااااا
قدم استفاله منه واتفرغ للتدوين والتجمعات بس والنبى لو عملت كده اوعى تدعى عليه

بعد الشر على حضرتك
وربنا يسعدك انت كمان

حنين القلب يقول...

قوس قزح


يا ريتك كنتى جيتى
كنا فعلا خلصنا منه وارتحنا
نشحنوه ليه ؟؟
انا هحنطه
هههههههههههههههههه

ان شاء الله يا حبيبتى تكونى معانا المرة الجايه
فعلا اليوم كان هيكمل بيكى
يا رب يسعدك يا حبيبتى

حنين القلب يقول...

maha zein

انتى لو بتدخلى عندى تشوفى ردى عليكى كنتى شوفتى انا قولت ليكى من قبلها باسبوع
يبقى مين اللى غلطان
والله العظيم وحشتينى وجبنا سيرنك بالخير
واليوم كان نقصك والله
وناقص صورك وكشفك عليه يا حبيبتى

فاكرة

معلش تتعوض المرة الجايه

انا متبعاكى يا حبيبتى هو انا عندى اغلى منك

مووووووووووووووه بحبك

حنين القلب يقول...

الشاعر محمد عبد الرحمن

ان شاء الله تكون معانا التجمع الجاى ونتشرف بحضرتك

نورتنى

حنين القلب يقول...

حاجات جوايا

وانتى طيبه يا روحى ويا رب تكونى المرة الجايه وسطنا ونتشرف باحلى قمر فى التدوين

نورتينى يا سالى

همس الاحباب يقول...

قوس قزح
تريحوا مين وتظبطوا مين
انتى وهى
يا بنتى ده من حسن حظك انك ما رحتيش كان زمان السمك بيتغذى عليكم من ساعتها
وبعدين يا ام نور بلاش انتى تدخلى اللعبة مع البت حنين لانها فى البلاك لست من زمااااان
والواضح انك هتحصليها قريب
بس اللى مسكتنى عليكى نور بصراحة

حنين القلب يقول...

همس الاحباب

وربنا يا خالد كنا خلصنا منك بجد
تخيل بقى يا عبد العال وانت بين ريا وسكينه

ام نور تدخل اى مكان براحتها
انا فى البلاك لست وانت ان شاء الله على ايدى هتبقى فى صفحه الوفيات

Hannoda يقول...

حنيييين

أنا آسفة على التأخير كل ده بس كان لأسباب قلتها في المدونة

بالفعل اللقاء كان جميل جدا

الجو العام اللي كان مسيطر عليه المحبة والود كان أكتر حاجة بهرتني بجد

سعدت جدا كمان بالتعرف عليكي و حسيتك حد قريب جدا جدا
يمكن ماعرفتش اتكلم معاكي أكتر بس بجد بهرني قدرتك على الاستماع و الاهتمام بكل حد كان بيتكلم..

ياارب يدوم الود دايما
وآسفة بجد على التأخير

وحشتوني قوي

تحياتي