RSS

الخميس، 2 يوليو 2009

ممكن اساعدك ؟؟

السلام عليكم ورحمه الله وبركاته
ممكن اساعدك؟؟
كلمه بقت تقيله على لسانا رغم اننا اكتر ناس محتاجين ليها
بتقولها وانت من جواك كلك رحمه وحب للانسان اللى عايز تقدم ليه المساعده
وفى نفس الوقت بتقوله ساعدنى انى اخد ثواب بمساعدتك
مش شرط نقولها لحد نعرفه
لو لقيت راجل كبير مش قادر يمشى ساعده ومش تقول متاخر عن الشغل
لو لقيت طفل شايل حاجه تقيله ساعده ومش تقول انا تعبان ومش قادر
لو لقيت قطه او كلب اسقيه ولو معاك اكل اكله ومش تقول هو انا لاقى اكل نفسى ولا عيالى
يا جماعه الرحمه
ارحموا من فى الارض يرحمكم من فى السماء
دى الست اللى حبست قطه لحد ما ماتت دخلت النار
والراجل اللى سقى كلب دخل الجنه
فما بالك انت انك بتساعد انسان من لحم ودم وكمان بيدعى ليك
ما يمكن تكون انت محتاج منه دعوته اكتر ما يكون هو محتاج مساعدتك
فيه واحد اسمه عم جابر عمره 80سنه وعنده سرطان فى المعدة
عم جابر عنده 5اولاد كلهم كبرهم وعلمهم وجوزهم ودلوقتى ولا حد بيخبط على بابه
الراجل بيقول بفرح اوى لما الباب يخبط حتى لو بتاع النور او الميه
ولو حد دخل قعد معايا 5دقايق بيحسسنى انى عايش وموجود
الراجل مش طالب مساعده غير الرحمه من الوحده اللى بيحس فيها انه بيموت مليون مرة
دور على قريبك
على جارك
على طفل يتم
فكر ازاى تساعد مش شرط فلوس او مجهود زياده عليك
ساعد باللى تقدر عليه ولو حتى انك تسئل عليه
وربنا عالم انك بتعمل كده لوجهه تعالى ولا رياء ولا نفاق يبقى اكيد هيساعدك ويقف جانبك
ويجعله فى ميزان حسناتك

36 التعليقات:

همس الاحباب يقول...

البوست رائع جدا
ومؤلم وواقعى
ويحمل مرارة والم

همس الاحباب يقول...

وفعلا احيانا بنحتاج حسنة او دعوة اكتر من احتباج الشخص للمساعدة
لابد ان يكون هناك تكافل ما بينا
اما عم جابر ربنا يكون فى عونه
مرض لعين وعقوق الابناء
لا حول ولا قوة الا بالله

همس الاحباب يقول...

طبعا بمانى مشغول جدا ومش فاضى اليومين دول هبعتلك القطة بتاعتى تخلى بالك منها وتاكليها بس بلاش تا كلى اكلها
احسن انا عارفك وعارف عمايلك

Kiara يقول...

والله معاكي حق ياحنونه

دا ربنا هو الرحمن

كلمه رحمه بتررررررريح اوي

اشطه ياحنونه

Kiara يقول...

ايه ياخالد

مستغل التعلقات

مش معامله دي

همس الاحباب يقول...

كبارا
تحبى كماان احتل المدونة
مش التعليقات
انا قفلت مدونتى
وبدور على مدونة ايجار جديد
ربنا كريم
احتليت مدونة ببلاش

Kiara يقول...

قفلتها لييييييييييييييييييييييييييه

همس الاحباب يقول...

علشان احتل مدوناتكم
يراحتى
عندكم مانع

Kiara يقول...

عندي ماااااااااااااااااااااااانع ونص

احتل مدوناتنا من غير قفل مدونة

حنين القلب يقول...

همس الاحباب

الواقع اللى بيقينا عايشين فيه هو اللى مؤلم ومليان مرارة
وبقينا بندوس على بعض ولا بنفكر غير فى مصلحتنا

منور دايما يا ابو همس

Sweet Violet يقول...
أزال المؤلف هذا التعليق.
Sweet Violet يقول...

منتظرة ايه فى زمن بقت الانانية و حب النفس هما اللى منتشرين مابين الناس

بوست موجع قوى ياحنونة
v_v

yoyo يقول...

صباحك سكر يا نونو

ياربى تكونى بالف خير


ايه يا عم خالد
الناس اللى بتحتل دى بقى
وتقول عليا بعمل احتلال
طيب يالا بقى هات اللى عليك
هههههه

yoyo يقول...

و الله تسلم ايدك يا قمر

المساعدة مش شرط تكون مادية
المهم اننا نتعامل برحمة ومودة
دى البسمة فى وش الناس صدقة ودى اقل حاجة يعنى
ربنا يقدرنا ونساعد ونرحم عشان ربنا يرحمنا

دمتى اختى بالف خير و سعادة
تحياتى
يويو

shaimaa samir يقول...

ةحشانى
ووحشانى اسكندرية

ادعيلى حبيبتى

حنين القلب يقول...

همس الاحباب

طبعا يا خالد احنا بنكون اشد الاحتياج لدعوة او حسنه وده والله اللى هينفعنا فى اخرتنا مش اى شىء تانى

اما عم جابر ربنا معاه

حنين القلب يقول...

همس الاحباب

عينى فى عينك كده
انت عندك قطه ؟؟؟
يا خالود انا عارفه انك بتربى جاموس وحمير وبقر
انما قطه دى جديده
الا اذا كنت هتاكلها
هههههههههههههههههههههه
عمايلى انا برضه
والله انت اللى عميلك تجنن
قطط يا خالود
ااااااااااه صحيح ربتهم من ساعه ما لقيت الفار فى بيتكم
لا كده يبقى عندك حق
ههههههههههههههههههههههههههههه

حنين القلب يقول...

كيارا

الرحمه دى اعظم شى اتخلق على وجه الارض
انك تحس برحمه تجاه انسان ولا تعرفه
ربنا خلقها جوا قلوبنا
بس للاسف ساعات احنا بنقتلها

اثطه بالعثل يا كيكى

حنين القلب يقول...

كيارا

ده ياختى علطول على بابا المدونه
انا هولع فيها علشان نخلص منه

ههههههههههههههههههههههه

وش بيغمز

حنين القلب يقول...

همس الاحباب

انت محسسنى انه بيتك
وبترد على التعليقات
وقفلت مدونتك علشان تيجى تحتل مدونتى
دور بعيد عنى يا خالد انت عارف انا لحمى مررررررررر

ببلاش ؟؟؟
ماااااااااااشى

حنين القلب يقول...

كيارا

قفالها غلاسه
علشان يجى يرخم على خلق الله
ههههههههههههههههههههه

حنين القلب يقول...

همس الاحباب

عندكم مانع

شوفتى البلطجه يا كيارا
اهه ده اللى حرامى وبجح

ههههههههههههههههههههههههههههههههه

حنين القلب يقول...

كيارا

اتكلمى عن نفسك
عايزاه تسبيه يحتل مدونتك انتى حرة
انا لا

ماااااااااثى

حنين القلب يقول...

سويت فيوليت

نفسى نرجع للفطرة
اللى ربنا خلقها علينا
ربنا خلق جوانا الرحمه والحب والموده
ليه بنقتلها

الدنيا هى اللى بقت كل حاجه فيها توجع

حنين القلب يقول...

يويو

صباحك عسسسسسسسسل يا حبيبتى
فينك وحشاااااااااانى
يا رب انتى كان تكون بخير
هههههههههههههههههههه
شوفتى يا يويو
الظلم
قال بيحتل مدونتى مش يعرف الاسكندرانيه

دحنا نقطعوه
ههههههههههههههههههههههه

حنين القلب يقول...

يويو

الله ينور عليكى يا يويو
ده بالظبط اللى اقصده
ان المعامله بينا يكون فيها موده وحنيه


اللهم امين
نورتينى يا سكرة

حنين القلب يقول...

شيماء سمير

وانتى كمان وحشانى يا شيمو
ايه فينك
يا رب تيجى تنورى اسكندريه
انتى كمان وحشتيها

ربنا يوفقك ويكرمك يا رب

جنّي يقول...

السلام عليكم

ازيك يا حنين ..

ما شاء الله البوست جميل..

بس ممكن نسميه : ممكن تساعدني ..

فبمساعدتي للآخرين فهم يساعدوني في الحصول على الخير حتى دخول الجنة باذن الله ..فانا المستفيد اولا ..

جزاكي الله خيرا

واللي يشوفك هنا يشوف وش تاني خالص غير وش البوست الاخير في الضاحكون ..
الرقة والرومانسية والواقعية ..

تحيتي

أمل حمدي يقول...

ازيك يا حنين وحشاني قوي

هذا الزمن يا حبيبتي زمن العجائب

ربنا يرحمنا منه ويحسن ختامنا على خير

ويكفينا شر المستخبي

اللهم امين

سلام يا نونة

صبرني يارب يقول...

اه والله يا حنين عندك حق

حقيقى باشوف ناس كتير بتكون بس مش طالبه غير حب ووقت وحد يونسهم

موضوع جميل يا قمر

عل فكره الصوره مش مظبوطه

بكره اقفشك على الاميل واظبطهالك

صوت من مصر يقول...

اظن ان المساعده مش تقيله على الغلابه الى زى حالى وحالك
واظن برضه ان اهلنا علمونا ان الانسان وهو صغير لازم يكون ايجابى
عكس المرفهين

قوس قزح يقول...

مش عارفة اقولك ايه
المشكلة مش فى ان الناس بطلت تساعد
المشكلة ان الناس بقة تستغل اللى بيساعد

زمان كان الفقير قلبه على الفقير اللى زيه و يمكن كمان يساعده ..لكن دلوقتى كل واحد عينه فى رزق غيره و بيقول انا اولى بالرزق ده

قصة عن جابر دى فى منها كتير
بقينا نعانى من اطفال الشوارع و من كبار السن بدون عائل

ربنا يرحمنا جميعا

انتى وحشتنى اوى .. مش بتيجى ليه على الهوت ميل ؟

♥نبع الغرام♥♪≈ يقول...

السلام عليكم

اخبارك ايه حبيبتى يارب تكونى بخير
معلهش كنت مسافره وقلت اجاى اطمن عليكم وكده
اخبارك ايه يارب تكونى بخير وصحة
دمتى بكل حب
ايناس

mahasen saber يقول...

ارحموا من فى الارض

وليس منا من لا يرحم صغيرنا ويوقر كبيرنا

والراحمون يرحمهم الرحمن

مين يا حنين بيعمل بدا الايام دى للاسف

ربنا يتولانا برحمته الواسعه

غير معرف يقول...

البوست رائع

ارحموا من فى الارض يرحمك من فى السماء

حنين

♥نبع الغرام♥♪≈ يقول...

السلام عليكم

حبيبتى الجميله برده جايا اطمن عليكى بجد وحشتينى قووى

طمنينى عليكى
اختك
انوسه