RSS

الأربعاء، 22 يوليو 2009

الف حمد وشكر لله

تحديث ********* الف مليون مبروك لحبيبة قلبى دودو عاشقة الرومانسية على الخطوبة السعيدة وعقبال الليلة الكبيرة يا قمر
*****************
اولا طبعا الف مليون حمد وشكر لله كنت حاسه ان حلمى بعيد اوى عنى ومحتاج منى صبر وفلوس فوق طاقتى وكنت خايفه يعدى عمرى وانا بصبر وبحوش لعمليه بعد عمليه ويا عالم تنجح ولا تكون زى اللى قبلها وتعبت من اللف على الدكاترة اللى كان اخرهم دكتور ربنا يكرمه وكان صريح جدا قالى مستحيل يحصل انجاب طبيعى ولازم عمليه حقن مجهرى وانا قولت الحمد لله لسه فيه امل اشوف ليه طفل حتى لو الامل ضعيف بس المهم انه موجود المهم بقى انى اخدت كلام الدكتور ده بس كان جوايا يقين ان ربنا هيكرمنى سواء بعمليه او من غير عمليه المهم ان املى فى ربنا كبير وايمانى بيه اكبر والشهر ده اكتر شهر واظبت فيه على الصلاه والفجر بالذات وبقيت ادعى كتير
ربى لا تذرنى فردا وانت خير الوارثين
يا رب مش تحرمنى من نعمتك بالذريه الصالحه المهم يا جدعان مطولش عليكم من اسبوع حسيت انى تعبانه ومغص وحاجات كده غريبه عليه جوزى قالى يمكن يكون لغبطى فى الاكل قولت ليه لالالا انا باكل كتير اه انما من غير لغبطه ههههههههههههههههههههههههههه قالى طيب قبل ما تاخدى اى علاج نروح نعمل تحليل حمل الاول يمكن ؟؟ قولت ليه لا انا متعقده من موضوع التحاليل دى وكرهت كلمه سالب اللى بتطلع كل مرة والبت دودو عاشقه الرومانسيه برضه قالت ليه تعالى نروح سوا نعمله التحاليل وكنت عماله آجل التحليل علشان صدمتى اللى كل مرة باخدها وهى هى نفس الكلمه ..للاسف يا مدام مش فيه حمل المهم جوزى صمم انه ياخدنى وفعلا روحنا المعمل والبت وهى بتاخد منى الدم بقولها والنبى اتاكدى بس انه مش فيه حمل علشان اروح اخد علاج للمغص ده وقعدت بره وانا بصبر نفسى واقنع نفسى ان النتيجه هتكون زى كل مرة بعمل فيها تحليل من سبع سنين والممرضه ندهت عليه ودخلت ومتوقعه تقولى للاسف مش فيه ويادوب لسه بتقولى انتى وكنت بدير وشى وهمشى ولقيتها بتقول مبروك انتى حاااااااااااااااااااااااااااااااامل انا طبعا مش عارفه تنحت والدموع عماله تنزل منى واللى طالع عليه بالله عليكى طيب اتاكدى والنبى بجد انا حامل يا اشرررررررف الحق بتقول حامل الف حمد وشكر لله ونزلت بوس فى الممرضه لدرجه انها عيطت هى كمان واشرف عيط وكل اللى فى المعمل ويشوفنى يعيط وروحت على ماما وقعدت تعيط واهل اشرف طبعا يحضنوا فيه ويعيطوا الظاهر ان ده يوم العياط العالمى بس بجد فرحتى مش كان ليها حدود احساسى ان ربنا حاسس بيه وواقف جانبى احساس جميل احساسى ان دايما فيه اكبر من كلام الدكاترة وهى اراده الله ويقينى بالله احساس اجمل انا بدعى لكل انسان لسه ربنا مش كرمه ولازم يصلى ويكتر من الدعاء وياخد بالاسباب اه انما يكون متاكد ان الفرج والزرق من عند الله وحده وشكرا خالص لكل اللى كانوا واقفين جانبى اليوم ده و البت دودو عاشقه الرومانسيه اللى جت عند حماتى اول ما عرفت وحسيت فى عنيها بفرحه بجد عمرى ما هنساها وبقولك بجد يا دودو انتى اجدع صاحبه وربنا يخليكى ليه وشكرا كمان للى كان كان متابعنى بالموبيل وفرح ليه زى اخته وحسيت ده طبعا من صوته لانه الجدعنه والشهامه والرجوله مش غريبه عنه طبعا هو خالود همس الاحباب وعقبال ما تخاوى همس يا احن ابو همس فى الدنيا وطبعا شكرا خاااااااااص لبابتى اللى والله العظيم بحس انه اخويا الكبير ومش عايزة اقول بابا علشان مش اكبرك يا روقه واللى اول ما قولت ليه حسيت ان الدموع نازله من عنيه والله العظيم يا بابتى حسيت بيك كانى شيفاك وصبرنى يا رب وفاتيما ومفروسه وكل اللى بارك ليه على الاميل او موبيل ربنا يخليكم ليه ولا يحرمنى منكم ابدا انا والله بحبكم كلكم فى الله وبالله عليكم ادعولى ربنا يتمم نعمته عليه ويفرحنى ببنوته شبه القمر دى ومش حد يقولى هتطلع حلوة كده لمين

100 التعليقات:

همس الاحباب يقول...

الف ملييووووون مبروك
لوووووووووووووووووووووولى
لووووووووووووووووووووووولى
الحمد لله طبعا
وربنا يتمم بخير ويقومك بالف سلامة

همس الاحباب يقول...

احم احم
ممكن 2 ينسون احسن صوتى راح من الفرحة
ويا ريت 2 كيلو لحمة بتلو من جاموسة بترضع من امها وما تكونش تمت 40 يوم
الحرص واجب برضه
طبعا بما ان الخبر انتشر والكل عرف والحمد لله
كده بقيتى ام رسمى بس يا ترى ام ايه

حنين القلب يقول...

همس الاحباب

الله يبارك فيك ويخليك

هى دى اخرتك والنبى زغرودتك حلوة
تنفع
هههههههههههههههههههههههه

ربنا ما يحرمنى منك ابدا

همس الاحباب يقول...

ههههههههه
ههههههههه
ام همس بتسالنى وحنين لما عرفت عملت ايه
قولتلها تتوقعى ايه من واحدة لاسعة
فرجت عليهم المعمل واسكندرية كلها
والعياط اشتغل
لحد المحافظ ما جه وجاب بطيخة و2 كيلو خيار بعدها صوتها راح ونامت

حنين القلب يقول...

همس الاحباب

والنبى اسكت دنا اللى اسمى محتاجه تغذيه مش اكلت لحمه من 15سنه
ومستنيه دور الواجب ده من اخويا خالود

خالد مش انت هتبقى خاله ابقى اتبرع ببقرة ندبحها فى العقيقه ماشى

ام حنين باذن الله يا غلس

همس الاحباب يقول...

وبهذه المناسبة
ندعو الاخوة والاخوات على عزومة سمك وجمبرى وفول نابت على حساب حنين القلب
والدعوة عامة للجميع

همس الاحباب يقول...

هههههههه
ام مين
ام حلموس
ام اربعة واربعين
ام جلمبو
ام هراس
ام عتريس
تصدقى لايقة عليكى الاسماء
هههههههههه

حنين القلب يقول...

همس الاحباب

انت بتقول فيها
والله يا خالد
بجد لميت الدنيا
كان فاضل ارقص بس خوفت على الحمل
هههههههههههههههههه

سلملى على ام همس وعقبال ما تخاوى همس يا خالود

حنين القلب يقول...

همس الاحباب

انا موافقه على العزومه
بس انا هدفع حق الفول النابت بسسسسسسسسس

انما الجمبرى الجامبو والكابوريا عليك طبعا يا خالود
ولا ههون عليك اغسل الاطباق وانا حامل؟

همس الاحباب يقول...

وبعدين انا ممكن ابعتلك صورتى وانا عندى 40 يوم تتوحمى عليها
صورة طبق الاصل من المحطوطة فى البوست
واحتمال تكون صورتى وانا مش واخد بالى
توكلى على الله وانتى هتجيبى شبهى

صبرني يارب يقول...

مبروووووووووووووك مبرووووووووووووووووك مبروووووووووووووك


بجد يا بت يا حنين انا فرحانه اوي اوي اوي

وكنت بجد واخداكي فى بالي على طول

ربنا يصلح حالك ويتملك على خير ان شاء الله

بصي احنا ندعيلك اه

انما تجيبى بيبى شبه البنوته دي يعنى مش وسعت منك شويه

طيب ماشي مافيش حاجه بعيده على ربنا
هههههههههههههههههههههه

عاشقه الرومانسيه يقول...

ايه الفضايح دى؟
هو خالد على طول مسيح لك كده؟
عموما الاسماء حلوه
انا موافقه على ام جلمبو
ههههههههههه

حنين القلب يقول...

همس الاحباب

ماشى يا ابو عتريس
اذا كنت انت يا صعيدى شحط محط اصيل ومسمى همس يبقى اقل ما فيها اسمى انا

حنين او شهد او بسمله

هراس ده خليه ليك لما تجيب ولد
يا ابو جلمبو

عاشقه الرومانسيه يقول...

بت ياحنين تعالى اتوحمى عليا
انا خاله النونه
والنبى ده انا قمرررررررر

همس الاحباب يقول...

لا طبعا ازاى تغسلى الاطباق
ومال مين هيمسح الارضيات والحمام
وشوارع اسكندرية
ههههههههه
متخافيش احنا هنأجل العزومة لبعد الولادة
ما ليكش عذر بقى

حنين القلب يقول...

صبرنى يا رب

ربنا يخليكى ليه
عارفه يا حبيبتى انك فرحتى ليه

يا رب يتمم بخير

عاااااااااااااااااااااا

ليه بقى ياختى هو انا وحشه ولا ايه ؟
طيب باذن الله هتكون احلى منها
بس بقى هىء

عاشقه الرومانسيه يقول...

بت ياحنين
قعدنا نلعب ونسيت اقولك مبرووووووووووك

همس الاحباب يقول...

عاشقة الرومانسية
انا بقول ام جلمبو ماشى معاها
وبعدين تتوحم عليكى ليه اساسا
وانا رحت فين
انا خالو فبلك يا ماما
ومش عايزين نخسر بعض
من اولها كده
ههههههههه

حنين القلب يقول...

عاشقه الرومانسيه

اااااااااااه ياختى شوفتى
ربنا يسامحه

نعم انتى كمان
طيب انا مش كنت عايزة اقول على اسمك الحقيقى يا نفيسه
انا ابقى ام جلمبو
ماشى يا نفيسه
ربنا يسامحك يا نفسفس

عاشقه الرومانسيه يقول...

خالد
انت تسكت خاااااااالص انا متغاظه منك
تتوحم عليك ليه
انا خاته
تتوحم عليا انا
علشان يطلع النونو قمر

همس الاحباب يقول...

وبعدين النونو هيولد يقول خالو خالد خالو خالد
بدل واء
هو قالى كده
مش ينزل يقول دودو
ايه الاسماء دى

عاشقه الرومانسيه يقول...

حنين
انا نفسيه ياام سحلول؟
ماااااشى
لما اشوفك
لكى ابن يترد عليه

حنين القلب يقول...

عاشقه الرومانسيه

يا رب مش تسمع منها
انا عندى تطلع شبه اسماعيل يس
او عبد الفتاح القصرى ارحم بكتير

انما شبهك ليه كده يا ماما
ده انتى لو خالتها وبتحبيها بجد مش تخلينى اشوفك لحد ما اتوحم
ههههههههههههههههههههههههههههه
وش بيغيظك

عاشقه الرومانسيه يقول...

خالو خالد؟
ايه الخيله الكدابه دى ياابنى
روح غير اسمك ده
هيصرفولك واحد على بطاقه التموين

همس الاحباب يقول...

عاشقة الرومانسية
زى الفل طالما متغاظة
وهى كماان متغاظة
كده ضمن ت انه يطلع شبهى
وبعدين مين القمر ده
خلى الطابق مستور يا نفيسه
هههههههههههه

حنين القلب يقول...

همس الاحباب

حتى بعد الولاده باذن الله
هتكون برضه عليك العقيقه

بص يا خالد انا حاطه عينى لما كنت بتصور بلدكم على جاموسه حلوة كده اللى كنت واقف جنبها فاكرها؟؟؟

انا عايزها وبس
وتشكر اوى لحد كده

عاشقه الرومانسيه يقول...

انتى اخرك تتوحمى على اسماعيل يس
او عبد الفتاح القصرى
اذا كنتى انتى شبهه زيات صدقى

حنين القلب يقول...

همس الاحباب

اتوحم على مين
وانت شبه الصورة
تصدق بالله انت لو جبت صورتك ليه وانت عندك 40يوم اكيد هلاقيها فاضيه اذا كنت انت دلوقتى 34سنه و50سم فمابالك وانت 40يوم

شكراااااااا انا عايزة بنتى تطلع طويله
هههههههههههههههههههههههههه

Kiara يقول...

الف مبروك ياااااااقمر وربنا يكمل البيبي علي خير وهيطلع احلي كمان من البيبي دا

حنين القلب يقول...

همس الاحباب

عاشقه الرومانسيه

انا مش هتوحم على حد فيكم
انا بنتى غاليه عندى وعايزها تتجوز مش تعنس

ربنا يكرمكوا ابعدوا عنى لحد ما التلات شهور دول يعدوا
مااااااااااااااااااااشى

عاشقه الرومانسيه يقول...

ابداااااااااا
على قلبك
ومفيش قدامك غيرى
طيب خالد بينك وبينه سفر
انما انا فى كل مشوار معاكى
مش هاتنازل عن حقى ابدااااااااا

صاحب المضيفة يقول...

وكان فضل الله عليك عظيما


احمدي ربنا سبحانه وتعالى على النعم الكبيرة دي وطبعا محتاجه تترجمي الشكر ده بحاجه عملية

طلعي صدقة لله تعالى وادعي ان ربنا يتم عليه فضلك وتعدي مدة الحمل على خير ان شاء الله


تحياتي ودعواتي

حنين القلب يقول...

همس الاحباب

خالد
النونو هينزل يقول خالو خالد
تصدق بقى لو النونو عمل كده هخليه يندم طول عمره

قال خالو خالد قال
هو احنا ناقصين
هههههههههههههههههههههههه

حنين القلب يقول...

عاشقه الرومانسيه

لما تشوفيه ابقى خليه يرد عليكى

بس يجى بالسلامه يا رب

حنين القلب يقول...

عاشقه الرومانسيه

انا شبه زينات صدقى
يا مهدى الى الحديقه يا وارد افريقا
مش زينات صدقى بتقول كده

دنا عسل وربنا وهتشوفى بكرة بنتى هتبقى امورة ازاى

وش بيغيظك

حنين القلب يقول...

كيارا

ربنا يخليكى ليه يا حبيبه قلبى

اهو دى الناس اللى بتفهم

باذن الله هتكون احلى
موووووووووووووووووووووه

حنين القلب يقول...

عاشقه الرومانسيه

حق مين يا بت
ده بنتى انا مش انتى

ولا شبهك ولا شبه خالو ده

يا سااااااااااتر

حنين القلب يقول...

صاحب المضيفه

طبعا والله دى نيتى اول ما عرفت ان ربنا كرمنى

وطبعا الف حمد وشكر لله
يا رب يتم على خير ويفرحنى بيه

نورتنى

Lady E يقول...

ربنا يتمم لك على خير يا قمرايا

وتكون اجمل واحن بنوتة واحلى من بنوتة توم كروز اللي في الصورة كمان :)

Me7'o يقول...

ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف

Me7'o يقول...

هاه هاه هاه تعبت

ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف ألف

مبروووووووووووووووووووووووووووووووووووك

هاه هاه هاه
بس خلاص

غير معرف يقول...

لووووووووووووووى لولولوللوووووووووى

الف الف الف مليون مبروووووووووووك

يارب تقومى بالسلامه ويرزقك بطفل صالح

ينور حياتك ويسعدها يارب

والله فرحتلك مووووووووووووووووت

ربنا يدوم عليكى الفرحه يارب

خلى بالك بقى من نفسك ومتشليش حاجه تقيله

ومتعمليش حاجه فى الشقه خلى جوزك يقوم بكل حاجه

امال ايه لازمه الرجاله لما انتى تكونى حامل

هههههههههههههههههههههه

مبروووووووووووووووووووووك

حنين

ديالا يقول...

اولا الف الف مبروك

يارب يتمللك حملك علي الف خير يارب

عارفه بجد انا جسمي قشعر اوي وكنت هعيط

فرحانلك اوي وحاسه بجد بسعاده اوي

ربنا فعلا كريم اوي

ربنا يثبتلك حملك يارب

ويتشوف بنوتك او ابنك احسن الناس

ومبروووووووووووك

موناليزا يقول...

الحمدلله ياحبيبتى
اذا كنت انا دمعت والله وانا بقرأ كلماتك:)
ربنا يتمم لك على خير يارب وتقومى بالف سلامة ويرزقك بالذرية الصالحة اللهم امين

عاشقه الرومانسيه يقول...

طيب ازاااااااااى
ربنا يكرمك ببنوته زى دى ازاى؟
انتى عارفه مين دى؟
دى بنت توم كروز
يعنى قمر لابوها وامها كمان حلوه
انما انتى بنتك هتطلع قرعه لابوها ومعقده لامها
(وش بيطلع لسانه)

انا نزلت لك البوست ياحنونه ويارب يعجبك

حاجات جوايا يقول...

حنووووووووووونة
الف مليوووووووون مبروووووووووووووووك
مبرووووووووووووووووووووووووووووك
مبرووووووووووووووووووووووووووووووك

هو ده بقى الخبر اللى كنتى بعتالى عليه
ربنا يتمملك على خير يارب ويكملك الحمل بالسلامة ويبقى كده خفيف خفيف ودمه لطيف

ربنا يرزقك باصلح ابن وبنت فى الدنيا
واجمل من رات عينك
واتقى من تمنى قلبك
ويرزقك برهم وحسن خلقهم

خلى بالك من نفسك اووووووووى فى اول تلات شهور
واهتمى بغذائك عشان البيبى وعشانك
ربنا يكملك على خير يارب ويفرح قلبك بقرة عينك

Sweet Violet يقول...

الف الف مبروك ياحنونة
ربنا يتمم لك على خير
وتكون بنوته قمر زى مامتها
^_^

غير معرف يقول...

اول مرة امر هنا والحمد لله
يكون علشان ابارك للخبر الحلو ده
ربنا يتمم بخير ليكى كل شهور الحمل
وخلى بالك من نفسك
وبشر الصابرين
تحياتى

سمكه واحده يقول...

ياشيخه لما قعدتي تقولي كل اللي في المستشفي عيط والممرضه والدكتوره
والناس كها
قلت اشمعني انا كمان
والله انهارده شكله يوم الدموع في المدونات كلها ولا ايه
عموما دموع الفرح احلي بكتير من الحزن
ربنا يسعدك يارب ويكملك علي خير يارب
انا فرحانه ليكي اوي والله
ويرزقك بذريه صالحه
وبنوته او بيبي زي القمر
ويبقي رخم اقلك بلاش رخم عشان نبقي نشيله ونلعب بيه وشقي ويطلع عينك
ويسعدك بيه يارب
الف الف مبرووووووك
تحياتي

أمل حمدي يقول...

الله أكبر الله أكبر

بسم الله ما شاء الله لا قوة الا بالله

ألف ألف مبروووووك يا حبيبة قلبي

ربنا يكمل فرحتك على خير ان شاء الله

ويكرمك اللهم امين

hasona يقول...

السلام عليكم

ألف ألف الف مبروك

وربنا يبارك لك فيه ويرزقك الذرية الصالحة
ويعينك علي تربيتهم تربية سليمة تنهض بأمتنا الاسلامية

وكل سنة وانت بكل خير

Hannoda يقول...

ألف مبروك يا جميل

فرحتلك جدددا جدددا
يارب يتمملك على خير يااارب و تشوفي أجمل ثمرة للصبر اللي صبرتيه يا حبيبتي

انا يا دوب عرفت الخبر من عند عاشقة الرومانسية وجيت جري افرح معاكي.. مالحقتش اقرى البوست كويس عشان النص ساعة البريك بتاعتي خلاااص بس راجعة تاني اقراه و اعلق تاني

الف مبروك يا حنين
واحشاني جدا

غير معرف يقول...

الف الف مبرررررررررررروك ياحبيتي

والله بفرررررررح اووي بحمل اي بنووتة معنا وبقووول عقبال ما يجي عليي الدووور ياررررررررررب

ربنا يتمملك حملك وتقومي بالف سلامة وتطلع البنت شبهي :]

اوووعك تقولي لأ دا انا قمر :) كح كح هههههههههههه

ادعيلي يابت بضمير وذمة مش دعوة كدا وكدا :)

والف مبروووووووووووووك

ربنا يفرحك كمان وكمان

دمتي بحفظ الرحمن

Pink Dreams يقول...

لوووووووووووووووووووووووووووووووووووووووووووووووووووووووووووووووووووووووووووووووووووووووووووووولى

يا خبر صوتى راح فين

ههههههههههههههههه

الف الف الف الف مليوووووووووون مبروك

بجد انا فرحتلك جدااااااااااااااااا

يا رب يطلع طفل كدا شبه اللى فى الصوره واحلى كمان

ما هو طالع لحنونه القمر

تحيانى

♥نبع الغرام♥♪≈ يقول...

السلام عليكم

مليوووووووووووووووووووووون مبروك

حبيبتى ربنا يكملك بخير يارب ويكمل فرحتكم بالسعاده يارب

وكمان يرزق اخويا بالذريه الصالحه اللهم امين يارب العالمين


تحياتى
ايناس

أحمد زاهر يقول...

ألف مبروك وربنا يجعل أيامك كلها أفراح
وربنا يعينك على تربيتهم ليصبحوا زرية صالحه بإذن الله

منــار فايد يقول...

انا بجد عيطت وانا بقرا موضوعك
الف مبروك شويه
انا لو كنت عارفاكي كنت جيت وحضنتك
يارب لك الحمد يارب
انتي عرفتي ربنا ودعيتيه وربنا استجابلك
بتمنى بتمنى بتمنى
ماتنسيش نعمه ربنا وتفضلي فاكراه
ويارب يارب يتمملك بخير
ويرزقك بالذريه الصالحه اللي تعوضك خير....
انا فرحانه من غير مااعرفك والله
ربنا يحققلك يارب كل اللي تتمنيه
حاولي لو تقدري تشكري ربنا او تطلعي حاجه لله او صدقه جاريه او اللي تقدري عليه شكر لله.....

يارب ان شاء الله نسمع خبر ولا ديك على المدونه برضو باذن الله


منار فايد

شيماء جمال(شيمو القمر) يقول...

ألف مليون مبروووووووووووووووووووووك يا حنين

وأنا بقرأ البوست دموعى نزلت وفرحتلك قوى والله

مشاعرك جميلة قوى

يارب يتملك على خير

تحياتى

شبه إنسانه .....( سهوره ) يقول...

الف مبروك

بجد أنا أول مرة أدخل مدونتك

ومبسوطة جدا انى دخلت على الخبر الحلو ده

وبجد من كل قلبى الف مبروووووووووك وربنا ييسر لك

ويكرمك يارب

تحياتى ليكى يا أحلى أم حنين فى الدنيا

dramaqueen يقول...

الف مبروك يا قمر
ان شاء الله تجيبى احلى بنوتة او اجدع ولد

ربنا يتمم لم الحمل والولادة على خير

تصدقى انا كمان عيطت


الف مبروك

Unknown يقول...

الف مبروك
الف الف مبروك
الف الف الف مبروك
ربنا سبحانه وتعالى
يكمل حملك بالسلامة وتقومى
انتى والمولود بكل خير وكمان تصوريه
وتحطى صورته هنا فى المدونة يعنى يثبت
حضور.اهم حاجة خلى بالك من نفسك ومن صحتك وما تجهدى نفسك كتير وووووووووو....معلش نسيت
نفسى وعرق الدكترة نقح
عليا :)المهم ربنا يتمم
لك يارب بكل خير ويهب
لكل مشتاق الذرية
الصـــــــالحــــة

Unknown يقول...

ياخسارة ماكنتش موجودة
لما المحافظ جه وجاب البطيخ
والخيييييييييييييياررررر
كمان :)معلش تتعوض فى العقيقة
واحنــــــــــــــــــــــا
شعب مصر الحرة الابية حنجى
الليلة دى من غير عزومة
حنتعزم حنتعزم حنتعزم :)

ذو الوجه المبتسم يقول...

الف مبروك
وايه كماااااان
مليون مبروووووك
متقلقيش الهدية جاهزة
بس الاول ناوية تسمى الواد ايه ؟؟
ناجى
مش كده
ناجى اشرف
اسم حلو
هههههههههههههههههه
ربنا يبارك لك
ويتمم حملك على خير
وان شاء الله تخلفي لنا دستة عياااال

تقبلى تحياتى اختى الصغيرة

saragebaly يقول...

حنين القلب ،،

ألف مليووووون مبرووووك

ربنا يتمملك على الف خير

وتكون ذرية صالحة تتباهى بها الملائكة

ربنا يفرحك ويسعدك كمان وكمان

فرحت ليكي كتييييير

ربنا يسعد قلبك دايما

تحياتي لكـِ

دمتـِ بحب

سارة

تلميحاتى - يوسف الشافعى يقول...

اولا الف مبرووووووووك
انا قريت موضوعك ودموعى نزلت والله لان الايمان واليقين بالله كان باين فى كلامك
الف مبرووووووووووووووووووووك وربنا يفرحك يارب ويجعله خلف صالح
معلش انا لما لقيت التعليقات كتير ماكنتش هاعلق لكن المناسبه تستدعى انى ابارك واهنى
للمولود
ياقادما فى علم الغيب
اوعى تدلع وتعرف انك حبيب
بنحبك من قبل ماتيجى
ونتمنى تكبر وتبقى طبيب
ياقادما ومنعرفش انته جنسك ايه
مستنينك ومحضرين لك حصان تركب عليه
مستين حلاقاتك وبرجلاتك ومطعيتش وتسال ليه
تحياتى وتقديرى

أعـــ * أصحاب * ـــز يقول...

يلا بسرعه الحق عيد ميلاد ديالا فى شقاوة اخر حاجه واعز اصحاب

اوعى الحفله تفوتك

اعز اصحاب

شمس النهار يقول...

الف الف الف مليون مبروك
ربنا كبير
وعلي قد مايكون ظننا بالله بتكون المكافئه
ربنا يتم لك حملك غلي خير ويرزقك الزريه الصالحه
الف مبروك يااصبر واحلي ام في الدنيا

فاتيما يقول...

الأول
وضع إستعداد
فتح البوق على الآخر
و ابين اللوز تمام
و اديها
لووووووووووووووووووووووولى
زغروطة ألكترونية محترمة اهو
ألف مليون مبروك يا حنونة
و إن شاء الله ربنا يتمللك بألف خير
أنا عيطت معاكم فى يوم العياط العالمى دا برضو ...تخيلت الموقف بس حسيت إن ربنا عاوز يفاجئك من حيث لم تتوقعى عشان الفرحة تبقى مضاعفة
إنتى تستاهلى كل الخير و إستنيتى كتير قوى و صبرتى و ربنا كريم يا حبيبتى و بعدين انتى هتكونى أم هايلة كفاية حنيتك يا بنتى و حضنك الدافى و طيبة قلبك ...
أنا بقى هطمع فى كرم ربنا اكتر
و اطلب منه يرزقك بتوائم ..
ولد و بنوتة
عشان تبقى عوضتى السنين اللى فاتت دى كلها بعيلين نوبة واحدة و تخلصى
إيه ؟!!!
هتقولى إحنا كنا طايلين ؟!! ..
هقولك ربنا قادر و كرمه كبير قوى و إنتى لها و تستحقيها يا حنونة
ربنا يكرمك و يكملك الحمل على خير و ييجى اللى ربنا قاسمه بكل الصحة و العافية
يا لهوووووووووووى دنا من دلوقتى هموت من الفرحة اومال لما يشرف النونو الواحد هيجراله إيه؟!!!
ربنا يفرح قلبك يا حنين
يا رب
يا رب
يا رب
بوسة ليكى و الحضونااااااااات للبيبى بقى
خلى بالك من صحتك و نامى على ضهرك و إرتاحى اد ما تقدرى و متجيش على نفسك خصوصا فى الحر دا
و كلى كويس عشان أول أربع شهور البيبى عضمه بيتكون و لازم تديها كالسيوم كتير ..
لبن زبادى رز بلبن أيس كريم مدمر من بتاع عزة بتاعكو الخطير دا ..
كدا يعنى
خدى بالك من نفسك و النبى
و أسفة على التاخير يا حبيبتى
باركى لأشرف بالنيابة عنى
و عن يوسف بإعتبارهم رجالة زى بعضيشهم

GiGi world يقول...

ياااااااااااااااااااااه ربنا يباركلك فيه ويخليه ليكى ياحبيبتى
ويارب ييجى بالسلامه ويتمملك بخير
ادعى ربنا يجيبه على خير وافرحى لان الاطفال فرحه الدنيا
ربنا يابركلكل فى الضبف الجديد ويمكن ضيفين
ربنا يباركلكل ياحبيبتى يارب

dreem يقول...

ان شاء الله يارب ربنا يكمل لك على خير وتجيبى بنوتة احلى مالقمر
الف مبروك ويسعدك المولى ويقر عينك بالذرية الصالحة

akeed يقول...

الف الف مبروك ربنا يتتم الحمل على خير و يرزقك الذرية الصالحة و يسعدك مع زوجك و الابن او الابنه القادمة

ربنا يرزق كل من لم يرزق بالاطفال اللهم امين

صيدلانيه طالعه نازله يقول...

مبروووووووووووووووووووك الف مبروك

كل اللى بتحكى عليه انا جربته قبلك و حسيته قوى و انتى بتحكيه لدرجه ان دموعى نزلت
ريحى نفسك بقى و بلاش مجهود و ربنا يكمل الحمل على خير و سلام يارب و يرزقك بتوأم تمام عشان يخليكى تشدى شعرك و تجرى منكوشه فى الشارع
ههههههههههههههههههه

funky girl يقول...

الف مبرووووووووووووووووووووووووووووووووووووووووووووووووووووووووووووووووووووووووووووووووك
بجد فرحتينا جدا
و ربنا يتمملك بخير يا رب و ان شاء الله ربنا هيرزقك بنت احلى من دي كمان :)
بجد الف الف الف مبروك

Mina يقول...

الف مبروك
وربنا يتملك علي خير
ويتربي في عز باباه وحنانك

بوبو يقول...

يا حبيبة قلبي انا اول مرة ادخل عندك بس والله العظيم فرحتلك خالص وربنا يتملك على خير ويقومك بالسلامة يا رب.. تابعي الحمل مع دكتور ضروري جدا عشان فيه فيتامينات مهمة بتتاخد من اول ما تعرفي انك حامل وبلاش حركات عنيفة ولا شيل حاجات تقيلة ولا مشي كتير في الاول.. اتدلعي براحتك وعلى الااااااااااااخر وهتلاقي الدنيا كلها بتدلعك حتى الناس اللي متعرفكيش لما بيلاحظوا انك حامل هتلاقيهم بقوا حنينين كدة ولطاف.. حتى سواقين التاكسيات والله بتصعب عليهم الست الحامل.. ربنا يقومك بالسلامة.. واحدة صاحبتي على فكرة ولدت النهاردة 3 تواءم ولدين وبنت.. عقبالك

Remas يقول...

الف مليوووووووووت مبرووووووووووووووووك ياقمر

انا لسا عارفة حالا ومش عندك فكرة انا فرحانة ازاى دلوقتى

يا حبيبتى ربنا يتمم لك على خير ويقومك بالف سلامة انتى واحلى بيبي في الدنيا


بجد مش كتر ما انا فرحانى بيكى وليكى مش عارفة اكتب

مبروووووووووووووك لكى ولاشرف

Remas يقول...

الف مليوووووووووت مبرووووووووووووووووك ياقمر

انا لسا عارفة حالا ومش عندك فكرة انا فرحانة ازاى دلوقتى

يا حبيبتى ربنا يتمم لك على خير ويقومك بالف سلامة انتى واحلى بيبي في الدنيا


بجد مش كتر ما انا فرحانى بيكى وليكى مش عارفة اكتب

مبروووووووووووووك لكى ولاشرف

Beram Elmasry يقول...

هذة مدونتي الجديدة فزوروها وعلقوا

سبهللة يقول...

مبروووووووووك من هنا لحد ما تقومى بالسلامة ان شاء الله

ومن يتق الله يجعل له مخرجا ويرزقه من جيث لا يحتسب

انا فرحانة لك اوى اوى
وان شاء الله ربنا يرزقك باللى نفسك

تعرفى لما كنت حامل فى بنتى اسراء
كنت بدعى ربنا انه يرزقنى ببنت عينها خضرا وشعرها اصفر
وكل ما حد يسافر يعمل عمره او حج كنت اقوله ادعيلى بالدعوة

والحمد لله ربنا استجاب لى ورزقنى ببنت ايه فى الجمال
هى صحيح لسانها طويل حبتين
بس ان شاء الله بكرة تعقل

ربنا يرزقك باللى تتمنيه
وانتى ساجدة ادعى ربنا فهو قادر على كل شىء
وان شاء الله يرزقك بننت اجمل من اللى فى الصورة

بالمناسبة بنتى فيها شبه من الصورة اللى بتاعتك فى البروفايل

Soooo يقول...

الف الف الف الف الف الف الف الف الف الف الف الف الف الف الف الف الف الف الف الف الف مليون مبروك

ربنا يارب يارب يهبك الذريه الصالحه

والله العظيم عارف اني مقصر في حق متابعتي لمدونات الناس
بس معلش والله اول ماعرفت جيت اباركلك

انا سمعت طراطيش كلام عن ان في ناس هتروح اسكندريه
لو كده هاجي معاهم مخصوص عشان اباركلك
ربنا يارب يارب يسعدك دنيا وآخره يارب

قوس قزح يقول...

الف مبروووووووك
ربنا يتمم لك على خير يارب و يديكى بيبى ينور دنيتك كلها

انا كنت حاسة ان ربنا هيكرمك

و زى ما قلت لك يوم السبوع هيجى ان شاء الله

خدى بالك من نفسك و ياريت ترتاحى على اد ما تقدرى
مبروك يا حبيبتى الف مبروك

حـــلـــم كـــان يقول...

الف الف مبروك

وان شاء الله ربنا

هيدكى احلى نونو

ف الدنيا

سفروتة يقول...

الف الف الف مليووووووووووووون مبروك
انا اول مرة ادخل مدونتك
بس بجد البوست مؤثر اوي وعيطت كمان
اشمعني يعني كل دول يعيطوا وانا لأ
ربنا يكرمك ياااااااااااااااارب
وتقومي بالسلامة ان شاءالله
وتجيبي بنوتة زي القمر

دمتي بخير
:)

شوكولاتة يقول...

أنا عارفة إني جاية في السبنسة بس ماقدرتش اقرا الخبر ده ومباركلكيش
ويارب تجيبي بنوتة أحلى من دي وتحبك وتكون طيبة زي مامتها كده
أسيبك بقى علشان أروح أوزع الشوكولاته
لولوولولولووولولولوولولوولوللييييييي
ربنا يقومك بالسلامة بس ابقي سميها شوكولاتة

mimi يقول...

ألف ألف مبروك
ربنا يتمم حملك علي خير

انا دي أول زيارة ليكي

بس وربنا الكريم فرحتلك من كل قلبي

تحياتي

yoyo يقول...

الف مليون مبروك
ربنا يتم عليكى بالف خير يارب
و ان شاء الله يرزقك بنونو زى العسل كدا
و يعيش فلا عز وهنا بين احلى ام و بابا
يارب يرزقك الجميع يارب
الف مبروك مرة تانية يا ام حنين
تحياتى
يويو

Soul.o0o.Whisper يقول...

ألف ألف ألف مبروووووووووووك لأحلى أم فى الدنيا

ربنا يتم عليكى على خير ياااااااااارب

و معلش على التأخير
بس والله لسه عارفة حالا الخبر الجميل دا



تحياتى يا أم حبيبة
من عندى دى

maha zein يقول...

والله عيني دمعت
يا روح قلبي
ليكي حق وربنا تزعلي
لا اله الا الله
والله ربنا كبير
ربنا يباركلك
الف مبروك
وربنا يتمم علي خير
والله فرحت جددددددددددددددددددا
ومكنتش اعرف ان ربنا مش رزقك بطفل
مع انك ما شاء الله ولا حول ولا قوة إلا بالله حنينة اوي وده بان لما عرفتك يوم ما جيت
كنتي مهتمة كمان بالاطفال اللى كنا هنتبرع ليهم يوم اسكندرية

ربنا يسعدك
ومبروك لزوجك
ربنا يفرح قلبك
اعذريني
والله ما عندي جهاز
انا قدرا عند تيتا كده ولقيت انك زعلانة


علي فكرة انتي ربنا بيحبك
قربي لربنا
وحاولي تشكري ربنا عملي بانك تزودي الطاعات

تشوفي كنتي مقصرة في ايه
تعاهدي ربنا تبطلي اي معصية وتقربي بطاعات

انتي ربنا بجد بيحبك انه رزقك وخاصة لانك صبرتي


يا حبيبة قلبي
وانا هشحن انا واكلمك موبايل


بس ملحوظة صغيرة
خلي بالك متقوليش كلمة ونبي تاني
انتي قلتي مرة بالله عليكي وقلتي مرتين ونبي
بلاش ونبي
من حلف بغير الله فقد اشكرك
وحدي الله و متنسيش

ومبروك لرودي

واستنيني ان شاء الله احتمال اجي اسكندرية قريب

ربنا يسعدك

shaimaa samir يقول...

منذ ان عرفت
ودمعت عينى
ووالله ودت لو اسافر الاسكندرية خصيصا لك
كى اقبلك واحضنك

والله فرحتى كانت اكثر من فرحة النتيجة
رربنا يسعدك
ويتممهالك بخير
وعيزاكى تدعى كتيييييييييييير جدا

وحشانى
ووحشنى المطعم اللى اكلنا فيه
:)


شيماء سمير

مامة مازن يقول...

السلام عليكم ورحمة الله وبركاته
والله عيطت فرحه ليكى ربنا يفرح قلبك يارب ويتمم لكى بكل خير
قرات الخبر عند العزيزة ام مالك الف الف مبروك ربنا يفرحك يارب وتبقى احلى من احلى بنوتة فى الدنيا

حسن حنفى يقول...

الف مليووووووون مبروك

متأخره شويه

بس الظروف بقي

Asmaa mahaba يقول...

مبروك يا حنين حكمة ربنا سبحانه وتعالى يا رب يتملك على خير على فكره انا كان ليا قريبه فضلت اربع سنين دايخه من دكتور للتانى وعملت حقن مجهرى وفشل وانابيب وفشلت وفى الاخر ربنا رزقها طبيعى
ربنا يجعله الولد الصالح يا رب انا بجد مش عارفه اقولك ايه بس انا نفسى اشوف القرد دا ونحضر سبوعه باذن الله ونقوله اوعى تطلع لحنين هههه وخليك ديما مع المجانين

Asmaa mahaba يقول...

انا والله مش عارفه اعيط ولا اضحكلك بسانا حاسه بفرحتك قوى

Asmaa mahaba يقول...

مبروك يا ام زعبوله انا حسميه زعبوله ههههه عشان الحسد

فاتيما يقول...

حنونة
وحشتينى و قلبى كلنى عليكى فقولت أعدى اطمن
انا بدعيلك ربنا يتملك على ألف خير و ييجى تؤام و ما زلت اتمنى و اطلب و لا يكتر على ربنا
المهم تكونى دايما بخير
ربنا يطمنى عليكى يا حبيبتى

-_- يقول...

مبروك

أعـــ * أصحاب * ـــز يقول...

كل سنه وانتو طيبين

مدونه شقاوة اخر حاجه

تدعوكم لزياره مدونه طيور الجنه بمناسبه شهر رمضان المبارك

ستجد رابط المدونه فى مدونه شقاوة اخر حاجه

هيا بنا لنساعد على نشر الاسلام وطاعه الله

وكل سنه وانتو طيبين

اعز اصحاب

اســ الغربه ـــير يقول...

الف مليون مبروك لعاشقة الرومانسيه ولحبيبة حنين يلا بقى خلينا نعمل سبوع كدا ونور الشموع والناس تفرح انا عليا هجبلك المغات يام حنين تحياتى اخوكى الاسير

Asmaa mahaba يقول...

كل سنه وانتى طيبه والسنه الجايه تكونى شايلاه على ايدك

sab7al5air يقول...

الف مبروك ع حنين القلب وان شا الله ربنا يتم ليك علي خير
انا الصراحه اول مره اجي هنا بس فرحت ليك جدا ع خير