RSS

الأربعاء، 2 فبراير، 2011

كفااااااااية

كفاية لحد كده اوى

كفاية الايام السودة اللى فاتت علينا واحنا فى بيوتنا

مرعوبين من السرقة والنهب
كفاية الاقتصاد اللى باظ

والاسعار اللى ولعت بزيادة  والبطالة اللى زادت

كفاية اللى حصل فى السجون والبلطجية اللى هربوا ومحدش عارف هربوا ازاى او مين اللى فتح ليهم السجون

كفاية الشهداء اللى ماتوا وهما بيدافعوا عن كلمة حق وقضية هما مؤمنين بيها
كفاية القنوات اللى زى ما تكون كل اللى عايزاه انها تسخنا وتحرضنا على الخراب

والاخر مظاهرتين قصاد بعض بيضربوا فى بعض دول عايزين مبارك ودول مش عايزينه

يعنى اللى عايزينه دول مش هما اللى كانوا برضه فى جمعة الغضب وهما اللى كانوا عمليين يشتموا ويقولوا عليه عميل ولا دول اللى كانوا فى البيوت بيتفرجوا

واللى مش عايزينه وعماليين يقولوا تلاتين سنه كاتم على نفسنا وقرفنا 
ممكن اسئلكم سؤال
الراجل ده مش عمل اى حاجة يستاهل انكم تستحملوه الكام شهر الفاضليين ليه؟
يعنى التلاتين سنه اللى كنتوا عماليين تشكروا فيه وفى عيد ميلاده الجرنال يبقى كله تهانى ليه والرسايل على القنوات كل سنه وانت معانا يا ريس 

كل ده انتهى لمجرد انكم الحمد لله صحيتم من النوم

والله العظيم انا لا مع دول ولا دول 

بس عايزة اقول ليكم حاجة واحدة 

اللى عايزه واللى مش عايزه فيه انتخابات جاية  والراجل قال انه مش هيرشح نفسه 
وحط ليكم نائب الكل بيقول عليه انه انسان محترم ومصدر ثقة خلاص بقى اختاروا اللى انتوا عايزينه فى الانتخابات وهانت يعنى الموضوع كله شهور 

انما لازمته ايه المظاهرات دى كلها واللى عايز يصطاد فى الميه العكرة 
والبرادعى يقول ده عميل لامريكا واسرائيل طيب لو هو عميل حضرتك تبقى ايه انت تعرف عننا ايه جاى بعد ما قضيت اغلب عمرك بره جاى تصلح لينا اللى احنا فيه 

ابقى قابلنى 

واللى يقول فى قناة الجزيرة مبارك الخنزير والفنانة تيسير فهمى وجوزها اللى تتصل تقول ما يغور بقى بدل ما نضربوا بالجزمة 

ايه قلة الادب دى ده مهما كان رئيسنا لمدة 30 سنه 
انظلمنا فيها اه 
اتبهدلنا وجوعنا اه
انما يغلطوا فى رمزنا بالمنظر ده لا 
حسيت ان الاهانة لينا احنا برضه 
بالله عليكم ما حستوها كده ؟؟

والله ما مصدقة ان دى مصر

يا جماعه عايزين نتظاهر ماشى 
عايزين تغيير واصلاح  وتغير مواد فى الدستور وحل مجلس الشعب طبعا 
انما عايزين نموت فى بعض وكل حد يسخنا شوية لا طبعا 

ارجوكم نقف لحد هنا ونشوف بكرة هيحصل ايه

9 التعليقات:

عاشقه الرومانسيه يقول...

ضاقت فلما استحكمت حلقاتها فرجت وكنت اظنها لاتفرج

ربنا يطلع بلدنا من المرحله دى على خير

carmen يقول...

مساء الخير والأمل
قلوبنا معكم وندعو الله أن يحفظكم و يلهمكم لما فيه خير بلادكم

hasona يقول...

السلام عليكم
معاك مش ينفع حد يغلط وهو بيطلب حقه
ومبارك رئيس مصر- بصرف النظر عن سلبياته أو ايجابياته

hasona يقول...

السلام عليكم
معاك مش ينفع حد يغلط وهو بيطلب حقه
ومبارك رئيس مصر- بصرف النظر عن سلبياته أو ايجابياته

لكن -أختلف معاك في قول كفاية
المفروض ان المشوار بدأ -لا يصح أن يقف في وسط الطريق- أو في عمق البحر
لابد من أن يصل الي شاطئ وبر يرسي عليه

المتظاهرين ليسو سبب في أي من تلك السلبيات اللي حضرتك ذكرتيها

والبلد والحياة ممكن تمشي بالتوزاي مع المظاهرات

وربنا يسهل ويعديها علي خير

Yahia يقول...

أنا معكي جداً يا حنين ..... خلاص المظاهرات جابت نتائج لم يكون يتوقعها أحد على الإطلاق ويجب على الشباب الواعي أن يعرف أنه الآن يضر أكثر من 6 مليون مصري لا يجدون قوت يومهم. خلاص مصر هتبق أحسن بيكم وبحركتكم واللي هيجي بعد الرئيس هيكون عامل حسابه كويس أنه لو محققش راحة الشعب والعدل هيكون مصيره واضح ومحدش هيصبر عليه. إنه ليحزني جداً المعامله السيئة للرئيس والتعدي عليه بالقول فهذه ليست أخلاق المسلمين ولا المصرين فقد قال رسول الله صلى الله عليه وعلى آله وسلم ما بعثت سباباً ولا لعاناً وإنما بعثت لأتمم مكارم الأخلاق. على كل عاقل الآن أن يعرف متى يتوقف ولسوف نرى خلال الأشهر القادمه من سوف يحكم مصرنا الغالية متمنياً من الله أن يقودنا إلى مستقبل أفضل ...... يحيى حامد

hasona يقول...

هل نحترم شهدائنا ومطالبهم
هل تأخذنا الأنين أم تعتكف في محراب الأنانية
قد نتحاور مع الجاني وندوس علي دمائهم باقدامنا ونهدر حقهم بل نهدر كل ما تبقي لنا ولهم من حقوق خلف ستائر من الحوار التي قد لا تنتهي
وقد نسجد علي دمائهم فتترك أثراً في جبهتنا فتعلوا قامتنا فنسير معتدلي القامة لنكمل المشوار
هل نبقي علي جسر بين التشائم والتفائل

جنّي يقول...

السلام عليكم

صباح العزة والكرامة..

صباح الثورة والحرية والفخار ..

والخلود لشهدائنا..

فرنسا هانم يقول...

ام عمر حبيبه قلبى
بوووووووووووووووووووووووسه
كنت فى وقت كتابه البوست بتاعك ده لو علقت وقتها كنت هاقول عندك حق كفايه كده احنا خدنا كل مطالبنا والحمد لله ونستحمل الكام شهر الجايين دجول
لكن دلوقتى اقول برضه الحمد وربنا يرجع حقوق مصر من اللى اغتصبوها

منجي بـــــــــــــاكير يقول...

https://sociopoliticarabsite.wordpress.com/