RSS

السبت، 19 أبريل، 2008

التغيير السلام عليكم اخوانى واخواتى المدونين\ اولا اعرفكم بنفسى انا اختكم حنين القلب يمكن تعرفونى من تعلقاتى عندكم بس احب اقول انى ولا دماغ عاليه زى خالتى فرنسا حبيبتى ولا انا دمى عسل زى عبده باشا الرايق ولا حته سكرة زى بنت خيخه اوى ولا بعرف اعبر كويس زى دوبا ولا كلامى جميل وبسيط زى يحيى ولا شاهى ولا اجدع بنوته ولا ولا ولا........................ انا بس حبيتكو وحبيت اكون معاكم زى اختكم الصغننه واتبنونى بقى حظكم كده. المهم ندخل فى الموضوع انا حبيت ابداء بموضوع شاغلنى اوى وهو ازاى اتغير يعنى مثلا انا عصبيه ازاى اخرج بره عصبيتى دى واشوف نفسى واحاول اهدى كمان . ممكن الانسان يتدرب ويحاول يصلح عيوبه ؟ اظن ان اغلب الناس يعرفوا عيوبهم ولو مش يعرفوها يبقى العيب فيهم هما انما يا ترى كلنا قادرين على تصحيح عيوبنا طيب انا عندى خطوات يمكن اقدر اصلح بيها عيوبى وهى: اولا :اعرف العيب اللى عندى ومثلا تكون العصبيه ثانيا :احاول اشوف نفسى ازاى بكون وانا متعصبه اكيد شكلى مرعب عينى مبرقه وصوتى عالى وبتنطط زى القرد اللى كان فى فيلم محمود عبد العزيز يا نهار دنا لازم ابطل . ثالثا :احاول اهدا من غير ما حد يهدينى لان اغلب اللى بيحاولوا يهدوه بيعصبوا اكتر من انهم بيهده . انا مثلا سمعت ان من الحاجات اللى ممكن تهدى الاعصاب لما يكون الانسان متعصب انه يغيير الوضع اللى هو فيه يعنى مثلا لو واقف يقعد ولو قاعد يقف وسمعت كمان ان الانسان ممكن يعد من واحد لعشرة بس الطريقه بتاعه العد دى مجبتش معايا اى فايده جربت طريقه تغيير الوضع يعنى جابت نتيجه بس برضه مش اللى انا عايزاها عرفت انى لازم اتغيير من جوايا كما قال رسول الله صلى الله عليه وسلم :ان الله لا يغيير ما بقوم حتى يغيروا ما بانفسهم.صدق رسول الله بس اتغيير ازاى كل حاجه تعصب العيشه والشغل والعيش والاكل والاسعار كلللللللله يعصب. طيب هعمل ايه ؟ المهم انا هحاول وهفضل احاول اهو لو معرفتش ابطل هبقى قللت وده برضه مش وحش. وكل ما اسمع اغنيه الاستاذ موسيقار الاجيال تامر حسنى طبعا اوعى حديقول محمد عبد الوهاب ده مات من زمان وتامر خد مكانه مع احترامى الشديد ليه ولمحبيه بس تامر برضه حلو ومش هخرج بره الموضوع كل ما اسمع اغنيه انا مش عارف اتغير احس انى بقولها لنفسى . صحيح ربنا خلقنا بعيوبنا بس لازم نحاول نبطلها او على الاقل نقلل منها مش نسبيها تزيد لحد ما نبقى مليانين عيوب. واللى عنده عيوب وعنده طريقه لحلها يقولى واللى عنده حاجه تخلينى مش عصبيه يقولى .. والسلام عليكم ورحمه الله وبركاته

29 التعليقات:

فرنسا هانم يقول...

يشرفنى انى اكون اول معلقه فى مدونتك

فرنسا هانم يقول...

ويشرفنى انى اكون تانى معلقه فى مدونتك
وكفايه على الاول والتانى
واروح اقراء التدوينه

فرنسا هانم يقول...

احسن حاجه انك تعرفى عيوبك
واظن العصبيه دى كلنا بنعانى منها
وانا شخصيا بعانى منها وبحاول اقلل منها
لكن
محاولتى بتنهار لما بتعصب
وممكن اتنرفز زياده عن اللزوم
واحسن حاجه انك بتحاولى تغيرى من طباعك
تحياتى لكى
والف مليون مبروك على المدونه
عندك اربع صناديق كاكولا صاروخ
وصندوقين فيروز
وعشر دست جاتوه
سبتهم عندك فى المدونه علشان الحبايب لما يجوا يهنوا

عبده الرايق يقول...

هى فرنسا احتلت المدونه ولا ايه؟؟؟
الاستقلال التام او الموت على الرخاااام

الف مبروك على المدونه الجديده
والف تانى مبروك برضه
يبقى كده الفين
انا جيت ابارك وجبت معايا عشره من اصحابى واقفين بره ..فين الساقع والجاتوه ؟؟؟؟؟؟؟؟؟؟؟؟؟؟؟

سكــر يقول...

السلام عليكم

اولا الف مبروك للمدونه

وزى ماقالت فرنسا انتى لازم تعرفى عيوبك

وشوفيها فى الاخرين

يعنى دايما خدى راى المقربين منك

اللى بيحيوكى بجد
واساليهم عن عيوبك

دى حاجه

تانى حاجه
واهم شىء

وزى ماانتى قلتى
لما تكونى عصبيه اومدايقه

غيرى مكانك

ودا اللى امرنا بيه رسولنا الكريم

(اذا غضب احدكم فليغير من مكانه فالشيطان ...... الى اخر الحديث)

تحياتى لكى اختى الفاضله

وارجو ان تتقبلى مرورى

احمد سكر

حنين القلب يقول...

فرنسا هانم
يشرفنى ان انتى اول من دخل تدوينتى وعلق عندى وانا اصلا عامله التدوينه دى علشانك مخصوص علشان نتكلم والف شكر على الجاتوه والساقع مع ان الرايق اكل الجاتوه هو واصحابه وشكرا يا فرنستى كمان مرة

حنين القلب يقول...

عبده باشا الرايق
شرفتنى والله يا رايق ونورت المدونه بس اللى يجى يبارك على مدونه يجى لوحده مش هو و10 من اصحابه حرام انا كده هاكل ايه واصحابى هياكلوا ايه وعلى العموم خد انت بس حتيتين جاتوه وواحده حاجه ساقعه وروح اصحابك معلش خليها لما فرنسا تجيب لينا تانى وشكرا يا رايق

حنين القلب يقول...

احمد سكر
مرورك ايه ده انت صاحب بيت يعنى تدخل وتطلع الجاتوه من التلاجه وتشرب الساقع كمان من غير ما حد يعزم عليك عيب يا سكر ونورت المدونه وفعلا انا بحاول اعرف عيوبى والله واغيرها بس ربنا يقوينى .سلام

Yahia يقول...

اولا الف مبروك على المدونه وان شاء الله اكون زائر دائم ليها، ثانياً موضوع العصبيه ده بيكون ليه عوامل كتتتير زي انها طبع في الانسان او يمكن عقد منذ الطفوله او حتى المناخ والتنشئة الاجتماعية سبب في كده كمان ممكن تكون الزحمه والفساد والظلم والغلاء كلها اسباب في العصبيه، بس الرسول الكريم لما سئل أصحابه عن القوي قالوا ان القوي بالصرعه اي الذي يصرع الرجال (يضربهم يعني) لكن الرسول فهمهم وعلمهم ان القوي هو الذي يملك نفسع هند الغضب، انا مش عايز اطول عليكي بس من وجهة نظري ان التحكم في الغضب ممكن يتم من خلال التركيز والإرادة وممكن يتم لما تعرفي كويس ايه عواقب العصبيه عليكي وعلى اللي حواليكي.

تحياتي

حنين القلب يقول...

yahia
نورت المدونه والله وحاضر هحاول اغير من نفسى واهدى من نفسى ومن عصبيتى .اوعى تنسى تاخد الجاتوه والساقع وخد مناب دوبا ويوسف والف هنا.

الطائر الحزين يقول...

مبروك المدونة

افاد الله بك

العصبية كلنا يتسم بها واحيانا تكون العصبية واجبه تبعا للموقف

المشكلة هو العصبية لمواقف لا تستحق

حاولى تمررى رد فعلك على عقلك قبل ان ينطلق لسانك

Rainbow يقول...

مبروك على المدونة
و الله يا اخت حنين مش انتى بس اللى عصبية كل الناس كده ابقى بصى على وشوش الناس وقت خروجها من شغلها تحسى ان انتى لو قربتى من حد هيديكى بالقلم

تخياتى

حنين القلب يقول...

الطائر الحزين

والله دايما بحاول امرر رد فعلى على عقلى بس العصبيه بتوقف العقل وبعدين انا عصبيتى لحد برضه يعنى مستحيل هضرب حد مثلا.
بس بحاول اكون مش عصبيه نهائى لان العصبيه دى حماقه.
والله يبارك فيك ونورت مدونتى الصغنونه
سلام

حنين القلب يقول...

Rainbow
بس لو اتغيرنا وهدينا ده هيبقى رد فعله واضح علينا كلنا هتلاقينا مبتسمين فى وشوش بعض مفيش حد بيتخانف لاتفه الاسباب ولا حد بيقتل علشان رغيف عيش مثلا دى برضه عصبيه.
وكوس انك نبهتنى لحكايه القلم ده علشان ابعد عن وشوشهم ساعه خروجهم من الشغل انا وشى مش ناقص
سلام

جيهان علي يقول...

السلام عليكم ورحمة الله وبركاته

حلو انك تعرفي عيبك وتحاولي تتغيري
ولو في إرادة بجد العيوب هاتتغير طالما الإنسان عرف عيبه وعايز فعلا يغيره

وحاولي اوقات عصبيتك انك لما تحسي انك في البداية وعلى وشك قومي اتوضي
أو اذكري الله عدة مرات هاتلاقي نفسك هديتي :)

حنين القلب يقول...

جيهان على
وعليكم السلام ازيك يا جيجى والله نورتينى وكلامك طبعا صح احسن حاجه الصلاه بتهدى النفس والروح وبتخلى الانسان يقلل من اخطائه وحاضر هسمع الكلام وهبقى اقوم اتوضا واصلى ونورتينى الحبه الصغنين دول

Doba يقول...

أولا ألف مليون مبروك عالمدونة
هتبقى مدونة فظيعة لان صاحبتها تملك قلب طيب وعقل راجح

ثانيا احلى حاجة للتحكم فى العيوب هو التحايل عليها بمعنى آخر تضحكى عليها ولما تلاقى عيب جاى قدامك تقوليله طيب بالعند فيك مهطلعك وهغلس عليك وهطلع الحاجة الحلوة اللى جوايا احسن انا مش ناقصة قرف ونكد وخنقة

ولازم تبقى بتشخطى كده فى عيوبك علشان مترجعيش فى كلامك

طبعا اوقات هتنجحى جدا فى تنفيض ده
وممكن برده تفشلى فشل زريع ولكن يكفيكى شرف المحاولة ولحظان من السعادة ان نجحتى فى التنفيذ

بيعجبنى قوى اسمك دايما حطيه قدامك
حنين القلب

كل لما تتعبى من عيوبك طلعى حنين قلبك وحنيته هتلاقى الدنيا بقت فللى والحاجت الوحشة حواليكى تأكدى انها من أخطاء اللى حواليكى فسيبيهم يتحملوا نتاج أفعالهم الأثيمة

كل الامنيات بمستقبل مشرق وباسم
ومدونة ناجحة دائما وفى تواصل مستمر

انا اخدت منابى من الجاتوه قبل ميهفه الرايق ويحيى اللى قاللى عالمدونة

سلامى وتحياتى
هبة

حنين القلب يقول...

Doba
الله يبارك فيكى يا دوبا والله نورتينى يا ام يوسف تعرفى رغم انى مش اعرفك بس احب اقرى البوست بتاعك جدا بحس ان الكلام طالع من قلبك .
المهم انا فعلا والله بحاول اعند مع العيب واقوله مش هطلعك بس بيغظنى ويطلع برضه على العموم هحاول.والف هنا وشفا على الجاتوه واوعى تنسى مناب يوسف واتمنى نكون اصحاب بجد وتعزمينى على النسكافيه زى خالتى فرنسا .
سلام يا هبه

nonoymm يقول...

السلام عليكم حبيبتي
اهلا بيكي في عالم المدونات اللي ممكن يعصبك فعلا
من عصبية جامدة زي حالاتي اقدر انصحك بانك اول ما تتعصبي تفتكري قول الرسول الكريم[ الذي يملك نفسه عند الغضب] وعلى طول افتكري ان الصب هتؤجري عليه
وحاولي تعملي لحصن العصبية لجام واتوضأي ويا سلام بقى لو ابتعدتي عن اللي بيعصبك والتزمتي بشوية صمت
باذن الله الموضوع هيعدي
بصي بقى لحسن اتعصب
تاكيد الكلمة ارفعيه من التعليق :)
تحياتي ونورتي مدونتي المتواضعة واتمنى دوام التواصل

monaliza يقول...

جميل انك عايزة تتغيرى والاجمل ان تحاولى وتقدرى
----------------------------------
ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html

حنين القلب يقول...

nonoymm
السلام عليكم انتى اللى نورتى مدونتى وفعلا انا بحاول اتغيير ولما القى نفسى اتعصبت جامد اقوم اتوضا واصلى وافضفض مع ربنا.
مش فاهمه تقصدى ايه ب تاكيد الكلمه
ارفعيه من التعليق ؟؟؟؟؟تقصدى ايه
سلالالالالالالالالام

حنين القلب يقول...

monaliza
ان شاء الله هقدر يا انا يا عيوبى دى
ونورتينى
سلام

almasry يقول...

انا شخصيا هستحمل


تحياتى
المصــــــرى

حنين القلب يقول...

almasry
للدرجه دى انا تقيله على قلبك يا مصرى شكرا يا سيدى وتعيش وتستحمل ونورتنى
سلام

د/اجدع بنوته يقول...

مبدئيا كده ..

تهانى وتمنياتى ليكى بمستقبل باهر ف عالم التدوين

وواضح ان عندك افكار وان دماغك كبيره وان اسلوبك جيد

حلو جدا البرنامج اللى حطتيه علشان تغيير العصبيه

وياريت تعرفينا باسمك وعمرك والحجات دى

وبالتوفيق باذن الله

Dr. Diaa Elnaggar يقول...

أولا مبروك على المدونة

ثانيا: لو تسمحي لي بتصويب صغير

من قال بإن الله لا يغير ما بقوم ... ليس رسول الله صلعم، بل هي آية 11 من سورة الرعد.

عميق تحيتي وخالص مودتي

آه بالمناسبة: يا ريت لو تلغي موضوع تأكيد الكلمة بالحروف المكتوبة لأنه موضوع ضاغط على أعصاب أي معلق.

شكرا جزيلا

حنين القلب يقول...

dr.diaa alnaggar
السلام عليكم
والف شكر على التصحيح وجلا من لا يسهو وبالنسبه لتعليق الكلمه دى مضايقانى اكتر من المعلقين بس مش عارفه اشيلها ازاى لو حد يتكرم ويقولى اشيلها ازاى ابقى شاكرة ليه.
سلام

جيهان علي يقول...

حنين القلب

لإلغاء كلمة التأكيد في التعليق
ادخلى لوحة التحكم وروحي للإعدادات وادخلي على التعليقات هاتلاقي في فقرة عن كلمة التأكيد في التعليق
تقدري منها تلغيها

يارب اكون افادتك :)

Dr. Diaa Elnaggar يقول...

هذه طريقة الغاء تأكيد الكلمة:


من أعلى المدونة عندك ستجدي أمر اسمه

1. Customize

انقري عليه وستجدين أوامر أخرى من بينها


2. Settings

ثم قائمة أخرى من بينها

3. Comments

ثم إذا نزلت بالصفحة لأسفل ستجدي الجملة الآتية: 0

4. Show word verification for comments?

فأختاري

5. No

ولا تنسي حفظ التعديلات. 0

Save Settings

جربي وإن شاء الله تنفع

عميق تحيتي وخالص مودتي