RSS

الأحد، 11 مايو 2008

فكر جديد لنصب شديد


السلام عليكم اخواتى واخوانى المدونين \
النهارده صحيت زى كل يوم على اغنيتى المفضله يا حبيبتى يا مصر يا مصر
ولبست هدومى ونزلت شغلى زى كل يوم وعادى ابتدينا شغل وفأجاه:
المدير باعت عايزنا انا ومجموعه من زمايلى كلنا فى نفس
الصوت
ليه؟؟؟
المهم روحنا ودخلنا المكتب الفخم ودار الحمار الاتى سورى قصدى الحوار الاتى :
احنا : السلام عليكم
هو : عليكم السلام اتفضلوا لحظه وافضى ليكو
احنا: فضلنا مستنين وبعدين بص لينا بصه زى ما يكون بيقول اقول ليهم ايه ؟؟
هو : بصوا يا جماعه الشركه دى بتاعتنا كلنا وفاتحه بيوتنا ولازم نخاف عليها
وكلنا زى بعض هنا وانتوا عارفين طبعا ان مكتبى مفتوح ليكم 24 ساعه ..
احنا: فى عقل بالنا اه صح شغالين مين يا عم احنا كل قبضنا ملاليم بالنسبه ليك انت بتقبض فى الشهر اكتر من 15000 جنيه واحنا احسن حد فينا شغله بالاوفر تيم 650 جنيه وباب مين اللى مفتوح الباب ده مش بنشوفه مفتوح الا لما تكون داخل وخارج ومرة كل اسبوعين بتيجى ايه يا عم انت فاكرنا مش من هنا ولا ايه يلا ما علينا ..
هو: لما لقانا ساكتين قال افاجئهم ؟انتوا يا جماعه هتقدموا استقاله دلوقتى وهتاخدو كمان استمارة 6 يعنى هتخرجوا من التامينات؟؟؟؟؟؟
احنا: اللى سورقت واللى لطمت واللى اغم عليها وانا فتحت بقى وتنحت قولت فى عقلى يا لهوى هيخصخصونا بس هيخصخصوا واحنا اصلا قطاع خاص المهم فوقنا من الصدمه ....
احنا: خير فيه ايه يا فندم
هو: يا جماعه احنا شركه كبيرة وبندفع ضرايب كتير وفكرنا فى حل لقينا الحل الوحيد اننا
ننقل المصنع من مكانه ونغير اسمه وطبعا انتوا كمان لازم تتنقلوا بس بعقد جديد وتأمينات جديده علشان بتوع الضرايب الوحشيين ومتقلقوش نفس المرتب ونفس التأمينات بس العقد بس هو اللى هيكون جديد واهه ناخد كام سنه اعفاء من الضرايب واحنا اولى بفلوسنا ولا ايه
انا : فى عقلى بالى يا ولاد الحراميه احنا شركه كبيرة وبتكسب ملايين وصاحبها احد الوزراء الحاليين ازاى نعمل كده اومال خلينا ايه للناس الغلابه اللى قرفنهم طول النهار فى
التليفزيون هفوترك ولا اظبطك لا ومين اللى بيظبط اول واحد المفروض انه يدفع الضرايب
ولا هى الضرايب دى على الغلابه وبس بقى ده اسمه كلام!!!!!!
طيب سؤال اخير بالله عليكو ده نصب ولا فلوسنا وحقنا زى ما حضره المدير ما بيقول ؟؟
ملحوظه صغننه:
انا رفضت انا وزميلاتى موضوع الاستقاله وجارى المناقشات بيننا
السلام عليكم ورحمه الله وبركاته

29 التعليقات:

عاشــــــ النقاب ـقــــة"نونو" يقول...

السلام عليكم
بصي اصلهم هياخدوا اعفاء من الضرايب عشر سنسين فعاوز يتغلهم بقى دماغ صحيح
بس للاسف الشديد انصحك تقبلي لان فيه مليون غيرك قاعد على الرصيف مستني شغلك بنص مرتبك
فهيمشيكي وان ما وافقتيش براحتك هتترفدي وابقي شوفي ممكن الوضع يختلف لو تكاتفتم كلكم الموظفين كلهم يد واحدة هنا ممكن يتهزوا انما عشرة ولا عشرين
بكرة يجي مليون غيركوا
انما المقياس اللي بتتكلمي بيه وضرايب وبتاع خليها في سرك بقى
ربنا يرشدك ويكرمك يارب وانصحك كدة بسؤال مستشارين حواليكي وصلاة استخارة
تحياتي

Yahia يقول...

بصي يا بنتي لازم تعرفي ان زمن الشعارات والجدعنه والشهامة والرجوله ده انتهى من زمااان وخليكي واقعية واعرفي ان الدنيا دي فيها نوعين بس من الناس ..... ناس بتدوس على ناس وطبعا مش محتاج اوضح مين بيدوس ومين بينداس. المهم شوفي مصلحتك فين وحلك الوحيد الدعاء لله عشان بجد مفيش غيره ممكن يرحم.

سلام

قوس قزح يقول...

و الله ما عارفة اقولك ايه
بس مفيش فى بالى غير جملة واحدة :
"من اتقى الله جعل الله له مخرجا" بس

تحياتى

أبو خالد يقول...

أبنتى / حنين القلب
لا.. لا تستقيلى
و ألزمى هذا الموقف
لأننا لن نحيا إلا عمر و احد
و يانعيش كرام مرفوعى الرأس
يا نموت أفضل..
و دى ليست شعارات أنها نبض حياة
و قالوا لفرعون أيه فرعنك
قال ما لقيتش حد يصدنى
و أعلمى أنه لن يصيبك إلا ما كتبه
الله عليك ..
و لا تنسى أن الأرزاق بيد الله و حده..
و فى النهاية حسبنا الله و نعم الوكيل
فى كل ظالم

حنين القلب يقول...

nonoymm
وعليكم السلام
اولا يا ستى هما مش يقدروا يرفدونى لانى متثبته ولو بايدهم كانوا مشونا فعلا وزى ما بتقولى جابوا ناس بنص مرتبنا
وفيه كمان مكتب العمل يا ستى احنا ممكن نعمل كتير.
بس برضه هنشوف اخرتها معاهم ايه لازم نضمن حقوقنا مش نقدم استقاله ونقعد نعيط جنب الحيط.
وبرضه هصلى استخارة .وربنا يكرمك
سلام

حنين القلب يقول...

yahia
بص يا يحيى انا واقعيه وعارفه ان الناس نوعين انما انا مش هقبل اكون من اللى بينداس عليهم انا انسانه مش حشرة علشان اقبل حد يدوس عليه وزى ما تيجى تيجى وهعرف اخد حقى برضه .
وهدعى بس هدعى على الظالم
حسبيا الله ونعم الوكيل
سلام يا ابا يوسف

حنين القلب يقول...

rainbow
قولى حسبيا الله ونعم الوكيل
مش هى الضرايب اللى بيقولوا مصلحتك اولا واللى بيبنوا بيها المستشفيات والمدارس ولا ايه؟؟؟
سلام

حنين القلب يقول...

ابى العزيز ابو خالد
والله صدقت الارزاق بيدالله

واحنا هنعرف نصد فرعون ازاى ومش هنستقيل ولن نستسلم ابدا.
وحسبيا الله ونعم الوكيل فى الظالم
سلام

حنين القلب يقول...

nonoymm
انا قريت البوست بتاعتك واجاباتك فوق الممتازة بجد كلها صدق بس حاولت اعلق مش بيظهر تعليقى عندك ليه مش عارفه شوفى ليه التعليقات مش بتظهر
اوك
سلام

الـجـدة فـصـيـحـة يقول...

السلام عليكم ورحمة الله وبركاته

طبعًا ده اسمه نصب وسرقة واحتيال
ومعاير مزودجة بنتعامل بيها يعني أصحاب الملايين أو المليارات عايزين يتهربوا من حق الدولة في دفع الضرائب وفي نفس الوقت بيطلبوا من اللي بيكسب ملاليم ولا حتى ألوف انهم يكونوا أمناء في الضرائب .

بصراحة أنا من وجهة نظري أن لا يصح إلا الصحيح يعني مينفعش اننا نجاري الغلط مهما كان
ومؤمنة أن ربنا هو الرزاق
ولو تركتي شيء لوجه الله ورضاه أكيد هايعوضك في جانب أخر


تحياتي

فرنسا هانم يقول...

ازيك يا حنين
طيب مانتى جبتى المفيد
وجبتى من الاخر
الشركه شركه وزير حالى
خلاص
يعنى من العينه الحاكمه
اعوذ بالله
حاولوا تقفوا مع بعض وهما مش هيقدروا عليكم
اما لو اتفرقتم هيصطادكوا واحد واحد

Doba يقول...

مفارقات كل فرد عن الآخر هى من ستتحكم
فان اتفقت على ان تكونو جميعا على مبدأ واحد كان بها ولكن للأسف معظم الناس بتخون الموقف

اتمنى تقدروا تلاقو حل مناسب وبالنسبة لاصحاب العمل لا يسعنا الا ان نقول

حسبنا الله وهو نعم الوكيل

هبة

حنين القلب يقول...

الجده الفصيحه
اولا نورتينى جداااا
ثانيا طبعا نصب واحتيال وبعدين مهو لازم يقدروا على الغلابه اللى بيكسبوا ملاليم اومال هيقدروا على الوزير .
المهم احنا مش هنسيب الشغل مهما حصل وفيه مكتب العمل وفيه حاجات كتير .
واهم شىء فيه ربنا على الظالم والمفترى وربنا معانا ان شاء الله
سلام يا جدتى

حنين القلب يقول...

فرنسا هانم
ازيك يا حبيبتى وحشتينى يا فرنستى عايزين بوست خفيف وحشتنا حكاياتك.
بصى يا فرنستى تكون بتاعه اى حد بس برضه هناخد حقوقنا وزى ما انتى قولتى طول ما احنا ايد واحد مش فيه حد هيقدر يفرقنا بس فيه ناس قدمتها فعلاومضت العقد الجديد ولقيت الاساسى ضعيف جدا راحوا سحبوا الاستقاله فى ساعتها وكده ضمنا ان مش فيه حد تانى يقدمها .والله المستعان .
سلام يا حبيبتى

حنين القلب يقول...

doba
ازيك يا دوبا ايه اخبارك ياام يوسف
الحمد لله احنا فعلا دلوقتى كلنا ايد واحده وان شاءالله خير.
سلام يا هبه

Empress appy يقول...

ايوه خليكوا متمسكين بحقوقوا ويا ريت لو تلاقى محامى كويس ليكوا ولازم تأخدم حقكم منه ميبقاش استهبال ومتخافوش

حنين القلب يقول...

appy
طبعا يا ابى كلنا ايد واحده واطمنى هما خلاص ربنا هداهم وهيعملوا قرار نقل لينا بعد ما عملنا مشكلنا وهددنا بمكتب العمل.
نورتينى يا ابى
سلام

بنت النيل يقول...

حنين القلب
حسبى الله ونعمة الوكيل فى كل ظالم
انا لو مكانك ارفض الوضع دة
وربنا كبير لا ينسى احد
بس انى اوافق على كدة يبقى انا شريكة معاهم فى الا هيحصل
صلى واطلبى من ربنايفرج عنكم الهم والغم
والارزاق بيدى الله سبحانة وتعالى
تحياتى لكى بنت النيل

همس الاحباب يقول...

لا حول ولا قوة الا بالله
ايه اللى بيحصل ده فى البلد والله حرام وسرقة عينى عينك
وابتزاز لصغار الموظفين لمصلحة جشع وطمع لفرد واحد
وزير بيعمل كده ومال الباقى يعمل ايه وبيكسب والحمد لله طب عايز ايه
يدفع حق البلد عليه ولا الغلابة هما اللى ايتحملوا كل حاجة
عامة موقفكم ايجابى وربنا يوفقكم
ولازم نقف وقفة ونفضح تلك اللاعيب القذرة
تحياتى ليكى
خالد

حنين القلب يقول...

بنت النيل
طلعا الارزاق بيد الله وربنا معانا واللى معاه ربنا مش يخاف من حد.
انتى نورتينى بجد يا بنت النيل
سلام اختك عروسه البحر كده مفيش حد احسن من حد انتى النيل وانا البحر يلا هعزمك على سمك ان شاء الله مدام نورتى المدونه.
سلالالالالالالالالالام

حنين القلب يقول...

همس الاحباب
اخى العزيز خالد هى دى الطبيعه ان الكبير هو اللى محش بيقدر عليه انما الصغير يتعمل ليه تهرب من الضرايت وتقدير جزافى وحاجات تخرب بيته انما الكبير هيعملوا معاه ايه ؟
قشى حصانه
وقشى وسايط
وقشى ضهر بيسنده
يعنى محدش هياخد منه حق ولا باطل
فخمتوووووووووووو
خالد كنت عايزة اقولك حاجه
انا دخلت مدونتك وقريت البوست وبجد جميل جدا وربنا يخلى ليك همسه بس التعليق بتاعى مش نزل عندك رغم انى عيده اكتر من 3 مرات بس برضه مش نزل
ابقى شوف الموضوع ده
سلام يا ابو همسه

(احمد سكر ) يقول...

السلام عليكم
هتوافقى هتوافقى

صدقينى هيضغطو عليكم

وهيقولكم لو طلبنا موظفين

الطابور ما بنعرفش نجيب اخره من كتر المتقدمين


انصحكم انكم توافقو بمزاجكم

وصدقينى الموظف اكتر واحد بيدفع ضرايب

ودوول شركه بتكسب ملااين

وبتهرب من الضرايب

حسبنا الله ونعمن الوكيل

والله بيتخصم منى ضريبة كسب عمل

كل شهر 280 جنيه

افتراااا

ودول بيكسبو ملاااين

ومش عارفين يقفشوهم

تحياتى

احمد سكر

حنين القلب يقول...

احمد سكر
والله ما هنوافق وعايزين يعينوا ناس ماشى براحتهم انما احنا مش هنقدم استقاله.
والناس اللى قدموها عملوا مشكله ورجعوها تانى والحمد لله بطلوا يتكلموا فى الموضوع تانى من بعدها
فيه حاجات كتير نعملها ولو عايزين يطلعونا يدونا حقوقنا وانا نقدمها ونمشى خالص ونريحهم مننا.
وبعدين بيتخصم منك 280 ضريبه اومال المرتب كاااااااااام اللهم ما حسد انا مش بحسد انا بقر بسسسسسسس
انا لسه جايه من عندك وعجبتنى اوى صورة اولادك ربنا يحفظهم ليك ويخليك ليهم .
سلام يا سكر

حبيب الروح يقول...

بالمناسبة بجد والله احب اشكرك على هديتك ليا بالفكرة الجميلة دى
لانى كنت محتاج جدا اتكلم مع ناس بيفهمو ويقدرو
لانى تعبت جدا من البحث عن اصدقاء اتكلم معاهم لعد طول فترة وحدة عشت فيها فى مكتبى وحيد
صحيح بيجيلى عملاء وبيطلبو شغل وبييجو يستلمو الشغل
بس ما فيش منهم حد قدرت اعتبره صديق ليا بمعنى الكلمة
عموما ردى على مشكلتك فى الشغل اللى اتكلمتى عنها يتلخص فى انى اقولك
لو ربنا قدرك بجد انتى وجوزك وساغرتم اة بلد عربى
حاتتغير حاجات كتير فى حياتكم
ويا رب ربنا يوفقكم فى حاجة زى دى
اخوكى المخلص احمد وجدى

همس الاحباب يقول...

انتى منورانى ب3 تعليقات مش تعليق واحد
وجميعا نزلوا ابقى شوفيهم
تحياتى وتقبلى مرورى
خالد

حنين القلب يقول...

همس الاحباب
الحمد لله يا خالد انهم وصلوا دنا فضلت يومين اعيط ويجيبوا ليه فى مناديل وعصير وانا ابدا مش عايزة ابطل مش بطلت عياط الا دلوقتى لما جابولى لحمه!!!!
ايه فاكرنى بطلت عياط لما نزلوا التعليقات بتاعتى ماشى هو سبب برضه بس اللحمه اهم معلش يا ابو همسه
سلام

حنين القلب يقول...

حبيب الروح
لا شكر على واجب احنا اخوات
لا طبعا مش اسيب بلدى بسهوله
سفر ايه هو احنا عارفين نعيش جوا لما هنعيش بره.
وبعدين عمال اقولك بصحى على اغنيه يا حبيبتى يا مصر يا مصر وتقولى سيبها واسكندريه والبحر لا طبعا مش اسيبها دنا زى السمكه لو خرجت اموووووت.
وان شاء الله ربنا هيصلح حال بلدنا لانها بجد اجمل بلاد المسلمين .
سلام يا احمد

Mafrousa يقول...

يالهوى على الناس و سنينها

ماهو القانون بيتعمل علشان حد يتحايل عليه
ويكسره

حاجه تفرس...الله يكون فى عونكم
اوعوا حد يقنعكوا بالاستقاله و لو حتى دفعولكوا مال قارون ...كده مش حيبقى ليكوا حق فى حاجه

حنين القلب يقول...

واحده مفروسه
خلاص يا مفروسه الموضوع فشل فشل زريع
الحمد لله اللى معاه ربنا مش يتظلم لان ربنا مش بيرضى بالظلم
سلام يا مفروسه يا حبيبتى