RSS

الأربعاء، 20 أغسطس 2008

يوم من عمرى

تحديث
اول مرة اعمل تحديث فى حياتى
بس التحديث ده غالى عندى قوى ومش ينفع اعمل تحديث المفروض انى اعمل بوست كمان ما هو الخبر يستاهل اكتر من كده عايزين تعرفوا سبب التحديث طب استنوا خليكوا قاعدين شوية الخبر بيقول ان فرنسا هانم كلمتنى فى التليفون ايون كده والله كلمتنى انا حنين القلب وقالتلى طمنى كل الناس عليه وسلميلى عليهم كلهم نفر نفر ونفرية نفرية وقوليهم كل سنة وانتم طيبين بس خلاص احسن انا فرحانة وسعيدة قوى قوى .. =========== السلام عليكم ورحمه الله انا اول مرة احضر تجمع تدوينى وبصراحه بحلم بيه من ساعه ما دخلت العالم ده بحلم بالناس اللى ارتبط بيهم ونفسى اتعرف عليهم واشوفهم من كتر ما كنت بفكر فيهم حلمت بناس عمرى ما شوفتها بس تخيلتها فى الحلم زى عاشقه النقاب واللى لسه مش اتشرفت بيها ولماضه واللى الحمد لله قابلتها وفاتيما حبيبه قلبى ونوران بجد الناس دى من كتر تفكيرى فيها حلمت بيها وكنت اتمنى يكونوا كل المدونين موجودين علشان اتعرف عليهم بس خيرها فى غيرها المهم انا مش بعرف احكى يعنى هقول وخلاص واستحملونى بقى اليوم ابتداه الساعه 11 الصبح واول حد شوفته كان خالد همس الاحباب ايه يا جماعه الاخلاق دى وجدعنه وشهامه ولاد البلد وخفه دم بجد حسيت انه اخويا انسان من اول ما تشوفه تحس انه قريب منك وكأنك تعرفه من فترة وبعدين شوفت الاب الروحى للمدونين كلهم بابا ابو خالد صاحب مدونه ذكريات ابوخالد مش عارفه اقول عنه ايه حسيت جنبه بدفىء وحنيه وطيبه مش حستها الا مع والدى الله يرحمه وبجد يا بابا ابوخالد اشهد الله انى احتسبك ابى امام الله شوفت كمان حبيبه قلبى واللى كنت هتخنق جدا لو اعتذرت او مش جت لانى اصلا كنت هموت واتعرف بيها فاتيما صاحبه مدونه روح قلب ماما انسانه صافيه جدا ونقيه وطيبه لابعد الحدود جواها حب وحنان يغرق بلد ومن ساعه ما دخلت وانا عينى عليها وهى حست انى عايزة اقعد جنبها واكلمها وفعلا نجحت انى استفرد بيها ومش هقول فين وقعدنا ننم شويه كتير وكنت مبسوطه اوى انى اخيرا اتعرفت بالست اللى دخلت قلبى من قبل ما اشوفها ربنا يرجع ليكى يوسف يا حبيبتى علشان اشوف ضحكتك مليه عنيكى من غير الم وطبعا شوفت الشقيه مها زين واصحابها هبه ورحاب ودى اللى كانت فعلا مفاجاه ليه عليها خفه دم رهيبه واخلاق ودماغ كبيرة وبتموت فى التصوير واتصورت وهى بتكشف عليه الا بالحق يا مها هى الاستشارة امتى وفين الروشته ؟؟ واصحابها هاديين جدا واوحده منهم تاهت ومش هقول تاهت فين برضه وشوفت سوووو عجوز وعندى 30 سنه فنان وناقد هايل وبقولك لازم تمثل يا سوووو كمان بجد ليك حركه كده بتعملها بوشك بموت على نفسى من الضحك دمه زى العسل واى حد يلاحظ فيه مجدعه ورجوله من اول ما يتكلم وعلى طبيعته خالص ومع انه يا عينى حرق كربوهيدرات كتير بس بجد انبسطت اوى انى اتعرفت على شخصيه جميله كده ولماضه وصحبتها الدكتورة لماضه اخلاق وتدين وطيبه بس فعلا لمضه شويه وصحبتها اخلاق وهاديه واتكلمت معاها شويه صغنين بس اتشرفت بيها واحمد سكر انسان هادى واخلاق وكان اغلب الوقت ساكت وسعدت اوى انى اتعرفت بيه وشيماء سمير انسانه رائعة وطيبه وعسوله وهاديه وصغنونه بس عليها شعر وطريقه القاء تجنن تخطف اى حد بيسمعها موهوبه بجد ومستقبلك هايل باذن الله يا شيمو ودكتور محمود صاحب مدونه بطوط حبوب انسان متدين واخلاق وفخور جدا بالمنوفيه واللى منها وكان نفسه يا عينى ينام بس فقرة النوم كانت ملغيه معلش يا دكتور زمرده لذيذه واخلاق ودمها خفيف وكان نفسى اقعد معاكى ونتكلم اكتر من كده ومصطفى ساجى هادى جدا واخلاق بس مش كلمته معلش خيرها فى غيرها واميرة صاحبه مدونه سهر الليالى هاديه جدا ومش لحقت اقعد معاها تتعوض المرة الجايه والمهندس محمد حسن صاحب مدونه اسكندرانى اوى انسان ناضج واخلاق وفكر واعى وبجد وجهه مشرفه للمصريين بالخارج ومتجوز من 11 سنه صح يا هندسه مين تانى مين تانى ايمان انسانه هاديه جدا ورقيقه بس معلش نسيت مدونتك ورومانسى كان ساكت بس واضح عليه انه بيستكشف الناس الاول بس اخد مدوتناعلشان نتواصل اسفه جدا لو كنت نسيت اى حد سامحونى واعذرونى الزهيمر وحكم السن اتكلمنا فى ايه بقى اتكلموا فى حاجات كتير مثلا لماضه اتكلمت فى ازاى نحافظ على مدونتنا من السرقه خصوصا انها اتسرقت فعلا وسوووو اقترح انها تتسجل بالشهر العقارى وده برضه مش هيمنع سرقتها لان لو اى حد اضاف ولو فقرة بسيطه على الفكرة تبقى ملكه وخالد اتكلم عن صورتنا اللى بتتشوه فى الخارج بسبب السينما وافلام اللى كلها مشاهد اباحيه يا بتتكلم عن السرقه والقتل واحنا برضه لينا دور لان اغلب البوستات بتتكلم عن السلبيات بس اكيد فيه ايجابيات وبعدين اتغدينا بعينك يا رايق وروحنا القلعه وبابا ابو خالد كان عايز يلحق معرض الكتاب بس للاسف كان قفل وكلنا جيلاتى من عند عزة وسووووووووووو كل ام على وابو على وحلى بالعيله كلها بس اقولكم على حاجه انا بجد حسيت انى وسط اهلى الاب والاخوات اللى تحس انهم بجد بيحبوك وخايفين عليك والام فرنسا حبيبتى حتى لو كانت مش موجوده كفايه اننا كلنا حسينا بوجودها وسطنا والرايق اللى كنت بجد اتمنى يحضر بس ظروفه اقولكم على حاجه تانى كلكم وحشتونى جدا من امبارح لحد خالد الا هو الاجتماع الجاى امتى فى اسكندريه بكرة ولا بعد بكرة ؟؟؟؟؟ السلام عليكم ورحمه الله وبركاته

41 التعليقات:

حسن حنفى يقول...

بجد يا بختك

انا رحت اجتماعين قبل كده في المنصوره

واتعرفت علي ناس كتير

وبجد الاجتماعات دي احسن حاجه

وبتقرب المدونين من بعض

فاتيما يقول...

حنوووووووونة
أزيك يا حبيبتى
يا بنتى أنتى كتبتى حاجات شبه اللى كتبته عندى فى البوست
و كأننا قلب واحد و بنوصف شعورنا فى مكانين مختلفين
أنا كمان يا حبيبتى مبسوطة بيكى قوى
و سعيدة إننا إتقابلنا
و ربنا يكتر مناسباتنا السعيدة دى
أشوفك دايماً
سلميلى على البحر و السمك
و كل حتة فى إسكندرية الجميلة
و بوسيلى روحك و قوليلها
فاتيما بعتالك دى
أمووووووا

همس الاحباب يقول...

ايه ده يا جدعان
هو انتى حضرتى الاجتماع معانا
سبحان الله مخدتش بالى بصراحة

همس الاحباب يقول...

وبعدين من امتى انتى بتحضرى اجتماعات
وبتعملى تغطية
انتى اخرك يا بنتى تقعدى تنضفى المدونة من قشر اللب بس
لا بجد بقى انا كنت سعيد جدا انى قابلت انسانة طيبة وجدعة وروحها جميلة قوى
واخت غالية على قلبى وروحى زيك
ربنا يجمعنا دايما على خير

همس الاحباب يقول...

ممكن افتن واقوول انتى وفاتيما كنتم فين
ولا اقولك تدفعى كام وبلاش اسيح
انا لا اقبل الرشوة ولا المجاملات ولا الهدايا ممكن اخد حقى كاش

همس الاحباب يقول...

ام يوسف منورة المدونة
بس احب احذرك من حاجة المدونة دى محتلة من قبل الاعداء
خلى بالك يعنى
وبعدين انتى عارفة ان حنين من اول ما شافت التعليق بتاعك
واقفة قدام المرايا وبتبوس فى روحها وبتقولها دى من فاتيما
لحد ما البنت يا ولداه جالها حالة ازبهلال واغمن عليها

دعاء مواجهات يقول...

ياعم ياعــــــــم

جميلة اوى التجمعات دى فعلا

انا روحت مرة وحسيت انى ادمنتهم خلاااص فعلا

انتى حد جميل اوى

تقبلى تحيااتى

اتمنى دوام التواصل

سلاام

الدفاع يقول...

ماشى يا حنين كده مش تقوليلى مكان التجمع فين ؟؟؟؟؟؟؟
وانا مفكر ان لسه الميعاد مجاش ماشى ياحنين مش هانساها لك خالص
تحياتى وان شاء الله المره الجايه انا هاجى ادور عليكوا فى اسكندريه حته حته
كل عام وانتم جميعا بخير

زُمُرده يقول...

عيني يا عيني كل ده ومبعرفيش تقولي امال لو قلتي هتعملي ايه بقى؟؟؟؟؟؟؟؟

وحشاني على فكره اووووووووي

قال هو امتى الاجتماع التاني لحسن انتم بجد وحشتووووووني اوووووووووي

خدي بالك منك يا عسولتي

زُمُرده يقول...

بجد انت عسووووووووووله

الكلام ده انا
هههههههههههههههههههههه

خدعوك وقالوا
هههههههههههههههه

Soooo يقول...

عارفه ياحنين
انا لما شفتك اول ماشوفتك حسيتك قريبه قوي
واقسملك بالله العلي العظيم انك سبب رئيسي في اني اجي التجمع ده
لانك انسانه جدعه قوي


ربنا يارب يارب يارب يسعدك ويبسطك ويهيئلك الخير ويرضيكي دنيا وآخره يارب



ملحوظه
الكربوهيدرات خلصت .. هقوم اشحن واجي اعلق تاني




سلامووووووووووز

حنين القلب يقول...

حسن حنفى

يا ريت كنت جيت كان يوم حلو اوى
ان شاء الله المرة الجايه تيجى
طبعا بتقربنا من بعض
ونتعرف على بعض

نورتنى

حنين القلب يقول...

فاتيما
وحشتينى موووووووووووووووووووت

انا يشرفنى انى اكون فيه منك هو انا اطول يا باشا
والله مبسوطه انى شوفتك واتعرفت بيكى اوى يا حبيبتى
وكنت اتمنى تقعدى معانا اكتر من كده بس علشان انتى كنتى مستعجله بس المرة الجايه تقعدى معانا اكتر ان شاء الله
والبحر والسمك والرمل والبلد كلها بتسلم عليكى
موووووووووووووء
احلى بوسه لاحن واطيب واطهر قلب

حنين القلب يقول...

همس الاحباب
لا والنبى ايه
معلش انا كنت قاعده تحت التربيزة
اخدت الجاتو وعلشان مش بحب حد يشوفنى وانا باكل نزلت تحت التربيزة اكل براحتى
بس تصدق انا بقى اللى مش شوفتك نوهائى
الا انت كنت فين ؟؟

حنين القلب يقول...

همس الاحباب
يا عم انا ولا بحضر اجتماعات ولا بعمل تغطيه
انت نسيت انك اتصلت بيه علشان كنت تايه وقعدت تعيط وتقولى الحقينى والنبى لحسن مش عارف اوصل اى حته وانا جيت زى سوبر مان ونجدتك من الضياع
نسييييييييييت ولا ايه

بجد يا خالد انا اللى سعيده اوى اتعرفت بحد جدع اوى كده وطيب واخلاق
واتمنى يتكرر اليوم ده تانى
نورت اسكندريه يا ابو همس

حنين القلب يقول...

همس الاحباب
هو انت كل ده ومش سيحت
ده انت سيحت فى مدونتك تسيح مش حد عمله قبل كده
وانا كمان هسيح ليك
يا جماعه اول مرة اعرف ان خالد بخيييييييييييييل جدا
طلب ليه سندوتشات الكبده واكلها وساب ليه سندوتش واحد بفتحه لقيته واخد منه الكبده وسايب ليه العيش فاضى
روحت سيبته راح اخدته وقال الحمد لله نست السندوشت وكله برضه
وروحت على الستشفى واخدت محلول
ربنا يسامحك يا بخيل
وش بيطلع لسانه

حنين القلب يقول...

همس الاحباب
ام يوسف منورة المدونة
بس احب احذرك من حاجة المدونة دى محتلة من قبل الاعداء

فعلا يا فاتيما خالد محتل المدونه بتاعتى وبياخد منها الاكل والشرب والفلوس
حرااااااااااااامى حد يجرى وراه

واقفة قدام المرايا وبتبوس فى روحها وبتقولها دى من فاتيما
لحد ما البنت يا ولداه جالها حالة ازبهلال واغمن عليها


فى دى عندك حق يا خالد انا فرحانه اوى بمقابله فاتيما وتعليقها كمان

بس الازبهلال وحاله الاغماء دى حصلت منك ومن الجوع اللى سببته ليه

حنين القلب يقول...

دعاء مواجهات
بجد كنت اتمنى تكونى معانا يا دودو
وسالت عليكى النهارده فى بؤجه الخير كنت عايزة اكلمك ومش لقيتك روحتى
بجد انتى احلى مليون مرة
واجدع كمان واطيب
واتمنى نكون اصحاب
واشوفك فى الاجتماع الجاى فى اسكندريه
اصلى مش بخرج بره اسكندريه
عاااااااااااااااااااااا
نورتينى يا حبيبتى

حنين القلب يقول...

الدفاع
اسامه باشا
انا قولت ليك ان كل المعلومات عن لقاء المدونين عند خالد همس الاحباب
وقولت ليك الميعاد راجع التعليقات يا متر
ويا سيدى تعالى انت بس الاجتماع الجاى ومن غير ما تدور حته حته ولا حاجه
هنستناك التجمع الجاى ان شاء الله
نورتنى يا متر

حنين القلب يقول...

زمرده
وحشتينىىىىىىىىىىىىىىىىىىىىىىىى
ازيك يا حبيبتى
انا والله ما بعرف احكى بس قولت اللى حسيته وانا معاكم
كنت مبسوطه اوى بيكم كلكم
وانتى طبعا علشان طلعتى بنت اسكندرانيه دمها عسل وجدعه وطيبه وشقيه

مش عارفه يا زمرده الاجتماع الجاى امتى
اسئلى ابو همس هو اللى بيكون عنده الاخبار كلها
نورتينى يا سكرة

حنين القلب يقول...

زمرده
انتى كده واكتر من كده مليون مرة
بطلى تواضع

مووووووووووووووووووووووء
بحبك

حنين القلب يقول...

soooo
يا سوووو والله نفس احساسى
والله حسيت انك اخويا بجد
بس طلعت اجدع مما كنت اتصور
ودمك عسسسسسسسسسسسسسسسسسسسسسل
وانت كمان كنت سبب رئيسى علشان اجى اليوم ده
دنا كنت هنتحر 6 مرات لو مش كنت جيت
الحمد لله انك جيت العمر مش لعبه ياخويا

يا رب يكرمك ويحفظك من كل سوء

سووووووو
بقولك ايه احسن حاجه علشان ترتاح من الكربوهيدرات اللى عماله تخلص دى
اشترى مطعم وكده يبقى الشحن تحت امرك
وابقى اعزمنى مااااااااااشى
سلام يا سكر المدونات

عاشــــــ النقاب ـقــــة"نونو" يقول...

السلام عليكم
حبيبتي والله انا كمان نفسي اشوفكم كلكم وخصوصا انتي وفاتيما ونهر الحب ووووووووووووووو
بس للاسف انا ما روحتش اسكندرية السنة دي ربنا ييسر باذن الله ونتقابل اقرب وقت
والله حتى اجتماع المدونين بكرة مش هتقدر اروحه لاني عيانة من يوم الاربعا جدا والحمد لله على كل حال
بس باتحسن اصلي عندي اللوز وبتجيلي صعب شوية
الحمد لله
يارب في الخير دائما متجمعين
تحياتي حبيبتي في الله

همس الاحباب يقول...

انا برده اللى اكلت اكلك
وطلعت بخيل جدا كمان
اوك
يا بنتى ده انتى اكلتى 15 سندوتش
وحليتى ب3 ام على وبنص بطيخة
وكلتى 2 صباع من صوابع ايدى وكنتى ناوية تكملى على دراعى
بس ربنا ستر ولحقوكى على اخر لحظة

زيزو الشقى يقول...

بسم الله الرحمن الرحيم

حنين القلب مدونتك حلوة قوى

وكل عام وانتى بخير

وكل سنة وانتى طيبة

بمناسبة شهر رمضان

شهر الصوم

تحياتى

وكل احتراماتى

اتمنالك التوفيق

واتمنالك النجاح

مدونتى تنور لو زورتيها

شكرا



عز الدين



سلااااااام

حنين القلب يقول...

عاشقه النقاب
الف مليون سلامه عليكى يا حبيبتى
مش تاخدى بالك من نفسك
وليه مش شلتى اللوز من زمان مدام بتتعبك كده
ربنا يشفيكى يا حبيبتى
وان شاء الله السنه الجايه تقدرى تيجى وتنورنى اسكندريه كلها
ابقى طمنينى عليكى
سلام يا حبيبتى

حنين القلب يقول...

همس الاحباب
يا نهااااااااار افتراه
انا كلت كل ده
على اساس انى مفجوعه ولا ايه
وصوابع ايه اللى اكلتها انت اصلا ايدك فيها صوبعين بس انا مش كلت حاجه انت جاى كده
وبعدين انا مش عايزة اتكلم ام على مين اللى اكلتها
والله مش كلت الا جيلاتى وخالد اخد نصها وقالى الساقع وحش علشانك واكلها هو
ولا الحاجه الساقعه قالى انتى بتعملى رجيم ودى تتخنك وراح شربها على بق واحد
ربنا يسامحك يا ابو همس

حنين القلب يقول...

زيزو الشقى
اهلا بيك فى مدونتك التانيه
كل سنه وانت طيب واعاده الله عليك بالخير واليمن والبركات
اكيد مدونتك احلى
هروح ازورك حالاً
نورتنى يا عز الدين
سلام

Unknown يقول...

حنين
سعدت جدابالحديث القصير معك
عبر الفون وان شاء الله نقابل مرة ومرات عديدة
كل سنة وانتى طيبة
رمضان كريم

صاحب المضيفة يقول...

جميل قوي الاجتماعات دي بتربط الناس ببعضها اكتر وبتكون جميلة


ربنا يكرمك ويعزك

حنين القلب يقول...

نهر الحب
ايناس ازيك يا سكرة
وانا كمان كنت مبسوطه اوى وانا بكلمك
كل سنه وانتى طيبه يا نوسه
رمضان كريم
نورتينى
ملحوظه انا حاولت ادخل اعلق عندك قبل كده بس التعليقات مش كانت بتفتح
ليه ؟؟
ابقى قوليلى عايزة ادخل عندك واعلق
سلام

حنين القلب يقول...

صاحب المضيفه
اكيد لو كنت حضرتك حضرت كان هيبقى اليوم احسن
ان شاء الله المرة الجايه تنور اسكندريه وتكون معانا
كل سنه وحضرتك طيب
اسعدنى مرورك

Ahmed Fahmy يقول...

بجد اليوم ده كان حلو و نفسي يتككر كتير
كانت اول مرة ليا احضر اجتماع بلوجرز
عجبني اوي المجتمع ده اوي كنت حاسس اني بين عيلتي
انا حطيت البلوجز عندي ف الليست و ان شاء الله هاتابعها علاطول و اتمني التواصل دايما
و خلي بالك احنا بلديات بقي لو في اجتماعات قريبة ابقي قولي لي عليها
تحياتي
رومانسيييييي

Empress appy يقول...

معلش يا حنين انا هبقى اجيلك لوحياتى انا وبطوط بقى والله نفسى اشوشك خالص

غير معرف يقول...

السلام عليكم

صراحة بطوط بيحكى عن اليوم ده ومبسوط فعلا زي ما انت مبسوطة بالضبط

والواحد فعلا زعلان جدا انه محضرش حاجة زي كده بس يلا ملحوقة

وربنا يكرمك يا رب

ويلا سلام

حنين القلب يقول...

احمد فهمى
كنت منورنا ومنور اسكندريه كلها ان شاء الله نتواصل دايما واكيد لو فيه اجتماعات تانى هقول
سلام يا رومانسى

حنين القلب يقول...

appy
انا كمان يا آبى كان نفسى اشوفك اوى والله بس ولا يهمك خيرها فى غيرها وحشتينى يا حوبا

حنين القلب يقول...

جمعاوى
عليكم السلام ورحمه الله وبركاته ان شاء الله المرة الجايه تكون معانا
وتنور اسكندريه كلها وكلنا كنا مبسوطين جدا
الحمد لله ويا رب نتجمع دايما على خير سلام

اسكندراني اوي يقول...

الحق يقال كل الناس اللي حضرت اللقاء كانوا قمه في الفهم والوعي والجمال
دا ان دل على شيئ يدل على ان التدوين والمدونين ناس عندها اللي تؤمن بيه وتقوله وتطبقه

تحياتي ليكي

حنين القلب يقول...

اسكندرانى اوى
طبعا عندك حق يا استاذ محمد بس عارف والكلام عن نفسى التدوين غير فيه كتير وبجد اتشرفت بيكم جدا وكان يوم جميل اوى واتمنى يتكرر
كل سنه وحضرتك طيب
رمضان كريم

غير معرف يقول...

滿..........................................................