RSS

الجمعة، 11 سبتمبر، 2009

لقاء سكندرى تدوينى خيرى

بصوا بقى ياجماعه الموضوع اننا انا والبت دودو فى لحظه تجلى كده كنا ناويين نروح ملجأ للايتام

يعنى احنا مش لينا نفس نعمل خير زيكم ولا ايه؟

بس للامانه الموضوع ده من قبل رمضان وفكرنا انه يكون لقاء تدوينى

يعنى من ناحيه ناخد ثواب ومن ناحيه تانيه نشوف بعض

ولان وقت رمضان ضيق

ولان العيد بعد رمضان على طول (اضافه هايله الحقيقه) صح؟

ولان بعد العيد مدارس

وعلشان كللل الحاجات دى

اجلنا اليوم ... امتى بقى ياحنونه؟

ده سؤال وجيه (مين وجيه ده)... اقولكم

الميعاد هيكون يوم السبت الموافق 10/10

حد من الجماهير يقولى ما تخليه فى العيد

ارد عليه واقوله الناس اللى هتيجى من سفر

والاعياد بتبقى بهدله واحنا جايبين الناس نضايفهم مش نبهدلهم

حد تانى من صفوف الجماهير الغفيره هيقولى واشمعنى اليوم ده يا حنونه

اقوله بالعقل كده ياابنى هتكون الناس ارتاحت من دوشه العيد والمدارس

ويجوا لنا بقى على رواقه ويكونوا رتبوا امورهم

طيب يطلع واحد تانى يسئلنى هنتقابل امتى وازاى

هاقوله يوم 10/10 الساعه 10 صباحا

اليوم كله عشرات اهو علشان محدش ينسى

ولانى ديمقراطيه واحب الاسئله تكون كتير واحب اجاوبها هيجى حد يسئلنى

هنعمل ايه بقى فى اليوم بتاعنا ده؟ هارد واقول

هانتجمع ونروح كلنا على ملجأ ايتام نقعد معاهم شويه وناخد حسنات كتيييير

ونروح بعد كده على كافيتريا سيد درويش فى بحرى على البحر مباشرتا

ونقعد نتعرف ونتكلم مع بعض

ويجينى سؤال تااانى بيقول

مين الصُحبه ؟ ياحنونه دى اهم حاجه

طبعااااااا معانا فاتيما روح قلب المدونين كلهم

ومعانا الراعى الرسمى للقاء فى القاهره خالد همس الاحباب ابو همس الجدع قوى

ومعانا دودو عاشقه الرومانسيه صديقتى الغاليه

ومعانا عادل مدونه البلد دى فيها حكومه

وكيارا عالم مولان ان شاء الله هتيجى برضه

والاستاذ هانى مدونه نط فى الكوز باذن الله هيجى

ومعانا باذن الله ناس كتييييير هيكونوا مفاجئه اللقاء

ومش هانعلن عنهم الا لما يدونا الموافقه الاخيره

وطبعا فى انتظار كل الناس الحلوه دى

حنين القلب و دودو عاشقه الرومانسيه

وقبل اللقاء بشويه هانروح الملجأ ونعرفوا لكم كلللل التفاصيل

ونعمل اعلان نهائى تاااااااااانى

وحشتووووونى ونفسى اشوفكم نفر نفررررررر

18 التعليقات:

عاشقه الرومانسيه يقول...

حجزززززززز اول تعليق

عاشقه الرومانسيه يقول...

هيييييييييييييه
حجزت الاول فعلا
هيييييييييه
هييييييييييييييه
والتانى كمان

عاشقه الرومانسيه يقول...

انا عارفه اللى فى البوست
وجايه العب اصلا
وناخد كمااااااااااااان تعليق
قبل خالد مايجى

همس الاحباب يقول...

ايه نظام الاستكراد
طب ما بلاش انتى

همس الاحباب يقول...

هى بقت كده
عامة البادىء اظلم
المدونة دى اخر بوست هينزل فيها ده
وبعد كده ربنا يسهل الامور

عاشقه الرومانسيه يقول...

همس الاحباب
ليه يااخويا هتقفلها
ولا هتجيب لها قرار ازاله؟
لالالالالالالالا
حاسب
دى مدونه حنونه ياابنى

عاشقه الرومانسيه يقول...

همس الاحباب

ياابنى اتكلم على قدك
بلاش تلعب مع الكبار بعدين تتعور
احنا هزارنا وحش

mahasen saber يقول...

حنيين زى ما قلتلك هحاول احضر ان شاء الله

دعواتك بس معايا كدا وربنا ييسر كل امر

دموع القمر يقول...

انا هحقد عليييكوا

:) :)

لا لا ربنا يتمم مشواركوا على خييير

ويجعلوا فى ميزان حسناتكم

دعاء مواجهات يقول...

ولحسن لاحظ انا رقم تعليقى جة العاشر كمان بجملة العشراات

ربنا يوفقنا ديم لفعل الخير ويارب اعرف اجى ياارب

ووحشانى اوى وكل سنة وانتى طيبة

سلاماات

اســ الغربه ـــير يقول...

انا جاى

7annen يقول...

حنوووون وحشانى ياقمر

ازيك يا جميل

ربنا يقدركم على فعل الخير دايما

حنين

كيــــــــــــارا يقول...

شط إسكندرية يا شط الهوى
رحنا إسكندرية رمانا الهوى
يا دنيا هنية و ليالي رضية
أحملها بعينيه شط إسكندرية
البحر و رياحو و الفلك الغريب
يحملها جراحو و يرحل في المغيب
يتمهل شوية و يتودع شوية
و تعانق المية شط إسكندرية
ليالي مشيتك يا شط الغرام
و إن أنا نسيتك ينساني المنام
و الشاهد عليه غنوة أمارية
و النسمة البحرية و شط إسكندرية

والعبي ياام بؤلوووووووووظ هههههههههههههه

سومه...مجنونه فى بلد عاقل يقول...

ومعاكم ربنا انا يا بنتى ضربت تفليسه تمام اما ابقى احوش ابقى انزل معاكم ان شاء الله:))

أسير الجراح يقول...

السلام عليكم


ازيك يا حنين

كل سنة وانتى طيبة


وان شاء الله ربنا يقدم ما فىية الخير


ويجعلة فى ميزان حسناتكم

كل سنة وانتى طيبة

وبجد نفسى اكون موجود معاكم

ان شاء الله لو فى مكان ابقى بلغينى

لانى عرفت باللقاء بالصدفة من مدونة غريبة

دة احنا اسكندرنية حتى

هههههههههههههههههههههههههة


كل سنة وانتى طيبة


اسير الجراح

(احمد سكر ) يقول...

السلام عليكم

باذن الله اجى

وارخم عليكم

بذمتك

موحشتكيش رخااامتى

كل سنه وانتى طيبه

وياريت اشوفكم بردو فى اللقاء الاول

بتاع العيد

احمد

Hannoda يقول...

حنين واحشاني جدا و سعدت جدا بالاخبار الكتير اللي عمالة اعرفها خلال اليومين اللي فاتوا

انا نازلة مصر يوم 19 - 9
وماشية للأسف يوم 3 - 10

بس بحاول قد ما اقدر اني اتصرف في معاد الحجز و اأخره عشان أقدر اشوفكم كلكم.. نفسي قوي

يهني جدددا رأيك في الموضوع ده
http://hannoda.blogspot.com/2009/09/blog-post_13.html

عاشقة القمر يقول...

سلام عليكم كل سنه وانتي طيبه
ربنا يجعلها في ميزان حسناتكم
كان نفسي اكون معاكم
بس انا لم نزلت مصر قعدت شهرين مش كان في برنامج ان شاءالله اشوفكم في ساعات خير